ನಂದ ಲವ್ಸ್ ನಂದಿತಾ ಟು ಹುಡುಗರು: ಲೂಸ್ ಮಾದ ಯೋಗೇಶ್ ನಟನೆಯ ಟಾಪ್ 5 ಸಿನಿಮಾಗಳಿವು!

ಲೂಸ್ ಮಾದ ಯೋಗೇಶ್ ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ ನಂದ ಲವ್ಸ್ ನಂದಿತಾ. ಇದೊಂದು ಪ್ರೇಮಕಥೆ ಹೊಂದಿದ್ದ ಚಿತ್ರವಾಗಿದ್ದು, ನಟಿ ಶ್ವೇತಾ ನಾಯಕಿಯಾಗಿ ನಟಿಸಿದ್ದರು. ಈ ಸಿನಿಮಾ ಅಷ್ಟೊಂದು ಯಶಸ್ವಿಯಾಗಿರಲಿಲ್ಲ. ಆದರೆ, ಚಿತ್ರದ 'ಜಿಂಕೆ ಮರಿನಾ' ಹಾಡು ಸಖತ್ ಹಿಟ್ ಆಗಿತ್ತು. ಈ ಸಿನಿಮಾವನ್ನು ಗೆಜ್ಜೆನಾದ ವಿಜಯಕುಮಾರ್ ನಿರ್ದೇಶಿಸಿದ್ದರು.  

ನಂದ ಲವ್ಸ್ ನಂದಿತಾ ಬಳಿಕ ಯೋಗೇಶ್, ರಾವಣ, ಪುಂಡ, ಯೋಗಿ ಮುಂತಾದ ಸಿನಿಮಾಗಳಲ್ಲಿ ನಟಿಸಿದರು. ಆದರೆ, ಆ ಸಿನಿಮಾಗಳು ಯಶಸ್ವಿಯಾಗಲಿಲ್ಲ. 2010ರಲ್ಲಿ ಎ.ಪಿ.ಅರ್ಜುನ್ ನಿರ್ದೇಶನದ ಅಂಬಾರಿ ಸಿನಿಮಾದಲ್ಲಿ ನಟಿಸಿದರು. ಈ ಸಿನಿಮಾ ಭರ್ಜರಿ ಯಶಸ್ಸು ಸಾಧಿಸುವುದರ ಜೊತೆಗೆ ಯೋಗಿಗೆ ಅತ್ತ್ಯುತ್ತಮ ನಾಯಕನಟ ರಾಜ್ಯಪ್ರಶಸ್ತಿ ತಂದು ಕೊಟ್ಟಿತು. ಈ ಚಿತ್ರದ ಹಾಡುಗಳು ಕೂಡ ಸೂಪರ್ ಹಿಟ್ ಆದವು.  

ನಂತರ 2012ರಲ್ಲಿ ವಿಜಯ್ ಪ್ರಸಾದ್ ನಿರ್ದೇಶನದ ಸಿದ್ಲಿಂಗು ಸಿನಿಮಾದಲ್ಲಿ ಅಭಿನಯಿಸಿದರು. ಈ ಚಿತ್ರದಲ್ಲಿ ಯೋಗಿಗೆ ಜೋಡಿಯಾಗಿ ಸ್ಯಾಂಡಲ್‌ವುಡ್ ಕ್ವೀನ್ ರಮ್ಯಾ ಅಭಿನಯಿಸಿದ್ದರು. ಸಿದ್ಲಿಂಗ್ ವಿಮರ್ಶಕರು ಹಾಗೂ ಪ್ರೇಕ್ಷಕರಿಂದ ಬಹಳ ಮೆಚ್ಚುಗೆ ಗಳಿಸಿತ್ತು. ಚಿತ್ರದ ಪಾತ್ರಗಳು ಕೂಡ ಅಷ್ಟೇ ಸದ್ದು ಮಾಡಿದ್ದವು.  

ಹುಡುಗರು ಚಿತ್ರದಲ್ಲಿ ಪುನೀತ್ ರಾಜ್‌ಕುಮಾರ್, ಯೋಗೇಶ್ , ಶ್ರೀನಗರ ಕಿಟ್ಟಿ ನಾಯಕರಾಗಿ ಮತ್ತು ರಾಧಿಕಾ ಪಂಡಿತ್, ಅಭಿನಯ, ವನಿತಾ ವಸು ನಾಯಕಿಯರಾಗಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಒಂದೇ ಮನಸ್ಥಿತಿಯುಳ್ಳ ಮೂವರು ಹುಡುಗರ ಕಥೆ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಅಷ್ಟೇ ಅಲ್ಲದೇ ಚಿತ್ರಮಂದಿರಗಳಲ್ಲಿ 15 ವಾರಗಳ ಕಾಲ ಓಡಿತ್ತು.

ಅಂಬರ ಸಿನಿಮಾದಲ್ಲಿ ಲೂಸ್ ಮಾದ ಯೋಗೇಶ್ ನಾಯಕನಾಗಿ ಮತ್ತು ಭಾಮ ನಾಯಕಿಯಾಗಿ ಅಬಿನಯಿಸಿದ್ದಾರೆ. ಭೂಮಿಗಿಂತ ದೊಡ್ಡದು ಆಕಾಶ, ಅದಕ್ಕಿಂತಲೂ ದೊಡ್ಡದು ಪ್ರೀತಿ ಎಂಬುದೇ ಚಿತ್ರದ ಸಂದೇಶ. ಇದೊಂದು ಕಾಲೇಜು ಲವ್ ಸ್ಟೋರಿ. ಬಿಎಸ್ಸಿ ವಿದ್ಯಾರ್ಥಿ ಅಜಯ್ (ಯೋಗಿ), ಕಾಮರ್ಸ್ ವಿದ್ಯಾರ್ಥಿನಿ ಅರುಂಧತಿ ಇಬರಿಬ್ಬರು ಪರಸ್ಪರ ಪ್ರೀತಿಸುತ್ತಿರುತ್ತಾರೆ. ಆದರೆ, ಇಬ್ಬರು ಕೂಡ ಬಾಯ್ಬಿಟ್ಟು ಹೇಳಿಕೊಳ್ಳಲ್ಲ. ಬಳಿಕ ಇವರಿಬ್ಬರ ಬಾಳಲ್ಲಿ ವಿಲನ್ ಎಂಟ್ರಿಯಾಗುತ್ತದೆ. ಬಳಿಕ ಒಂದಿಷ್ಟು ಹೊಡೆದಾಟ, ಬಡಿದಾಟವಿರುತ್ತದೆ. ಕೊನೆಯಲ್ಲಿ ಇಬರಿಬ್ಬರು ಏನಾಗುತ್ತಾರೆಂಬುದೇ ಚಿತ್ರದ ಕಥೆ.