ರಕ್ಷಾ ಬಂಧನ 2024: ಅಣ್ಣ-ತಂಗಿ ಬಾಂಧವ್ಯ ಸಾರುವ ಕನ್ನಡದ ಬೆಸ್ಟ್ ಸಿನಿಮಾಗಳಿವು!

ಸ್ಯಾಂಡಲ್‌ವುಡ್‌ನಲ್ಲಿ ಅಣ್ಣ-ತಂಗಿ ಅಂದಾಕ್ಷಣ ನೆನಪಾಗೋದು ಶಿವರಾಜ್‌ಕುಮಾರ್ ಹಾಗೂ ರಾಧಿಕಾ ಕುಮಾರಸ್ವಾಮಿ. ಅಷ್ಟರ ಮಟ್ಟಿಗೆ ಅವರ ಸಿನಿಮಾಗಳು ಸಿನಿರಸಿಕರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿವೆ. 2002ರಲ್ಲಿ ತೆರೆಕಂಡ ಶಿವರಾಜ್‌ ಕುಮಾರ್ ಮತ್ತು ರಾಧಿಕಾ ಅಭಿನಯದ 'ತವರಿಗೆ ಬಾ ತಂಗಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಅಣ್ಣ-ತಂಗಿ ಬಾಂಧವ್ಯದ ಈ ಚಿತ್ರ ಬಾಕ್ಸಾಫೀಸ್‌ನಲ್ಲಿ ಅಭೂತಪೂರ್ವ ಯಶಸ್ಸು ಗಳಿಸಿತ್ತು. ಅದರಲ್ಲೂ 'ತಂಗಿ ನಿನ್ನ ನಗುವಲ್ಲೊಂದು' ಹಾಡಂತೂ ಸಿಕ್ಕಾಪಟ್ಟೆ ಹಿಟ್ ಆಗಿತ್ತು. ಫ್ಯಾಮಿಲಿ ಅಡಿಯೆನ್ಸ್ ಮನಗೆದ್ದಿದ್ದ ಈ ಸಿನಿಮಾವನ್ನು ರಕ್ಷಾ ಬಂಧನದಂದು ನೆನಪಿಸಿಕೊಳ್ಳಲೇಬೇಕು. 

ಪಿ ವಾಸು ನಿರ್ದೇಶನದ ಹೃದಯವಂತ ಸಿನಿಮಾ ಕೂಡ ಅಣ್ಣ-ತಂಗಿ ಬಾಂಧವ್ಯ ಕುರಿತು ತಿಳಿಸಿತ್ತು. ಈ ಚಿತ್ರದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್, ನಗ್ಮಾ ಹಾಗೂ ಅನು ಪ್ರಭಾಕರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಹೃದಯವಂತ ಸಿನಿಮಾದ ತಂಗಿಯೇ..ತಂಗಿಯೇ ಹಾಡು ಕೂಡ ಸಖತ್ ಹಿಟ್ ಆಗಿತ್ತು. ಗಂಭೀರ ಕಥೆ ಹೊಂದಿದ್ದ ಈ ಸಿನಿಮಾ  ಅಣ್ಣ-ತಂಗಿ ಬಾಂಧವ್ಯದ ಮೂಲಕ ಪ್ರೇಕ್ಷಕರ ಹೃದಯ ಗೆದ್ದಿತ್ತು. 

ಎಸ್ ನಾರಾಯಣ್ ನಿರ್ದೇಶನದ ವರ್ಷ ಸಿನಿಮಾದಲ್ಲಿ ಡಾ.ವಿಷ್ಣುವರ್ಧನ್, ರಮೇಶ್ ಅರವಿಂದ್, ಮಾನ್ಯ, ಅನು ಪ್ರಭಾಕರ್ ಸೇರಿದಂತೆ ದೊಡ್ಡ ತಾರಾಬಳಗವಿತ್ತು. ಚಿತ್ರದಲ್ಲಿ ವಿಷ್ಣುದಾದ ಸತ್ಯ ಎಂಬ ಪಾತ್ರವನ್ನು ನಿರ್ವಹಿಸಿದ್ದರು. ಹೆತ್ತವರ ನಿಧನದ ನಂತರ ಸತ್ಯ ತನ್ನ ಏಳು ತಂಗಿಯರನ್ನು ತಂದೆಯ ಸ್ಥಾನದಲ್ಲಿ ನಿಂತು ಸಾಕುತ್ತಾನೆ. ಆದರೆ, ಅವರ ಮದುವೆ ಬಳಿಕ ತಂದೆಯ ಕಾರಣಕ್ಕಾಗಿ ಒಡಹುಟ್ಟಿದವರೇ ಆತನ ವಿರುದ್ಧ ಹೇಗೆ ತಿರುಗಿಬೀಳುತ್ತಾರೆ ಎಂಬುದು ಈ ಸಿನಿಮಾದ ಕಥಾಹಂದರ. ಈ ಸಿನಿಮಾಗೆ ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. 

ತವರಿಗೆ ಬಾ ತಂಗಿ ಬಳಿಕ ಶಿವರಾಜ್‌ಕುಮಾರ್ ಹಾಗೂ ರಾಧಿಕಾ ಕಾಂಬಿನೇಷನ್‌ನಲ್ಲಿ ಮೂಡಿಬಂದ ಮತ್ತೊಂದು ಸಿನಿಮಾ ಅಣ್ಣ-ತಂಗಿ. 2005ರಲ್ಲಿ ಬಿಡುಗಡೆಯಾದ ಈ ಸಿನಿಮಾವನ್ನು ಕೂಡ ಓಂ ಸಾಯಿಪ್ರಕಾಶ್ ನಿರ್ದೇಶಿಸಿದ್ದರು. ಅಣ್ಣ-ತಂಗಿಯ ಸಂಬಂಧದ ಕುರಿತಾದ ಈ ಸಿನಿಮಾ ಬ್ಲಾಕ್‌ಬಸ್ಟರ್ ಆಗಿತ್ತು. ಈ ಸಿನಿಮಾದ ಪ್ರತಿಯೊಂದು ಹಾಡುಗಳು ಕೂಟ್ ಆಗಿದ್ದವು. ಈಗಲೂ ಕೂಡ ರಕ್ಷಾ ಬಂಧನ ಅಂದಾಕ್ಷಣ ನೆನಪಾಗೋದೇ ಈ ಸಿನಿಮಾ.

ಪಿ.ಎನ್.ಸತ್ಯ ನಿರ್ದೇಶನದ ತಂಗಿಗಾಗಿ ಸಿನಿಮಾದಲ್ಲಿ ದರ್ಶನ್, ಶ್ವೇತಾ ಚಂಗಪ್ಪ ಹಾಗೂ ಪೂನಂ ಬಾಜ್ವಾ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದರು. ಅಣ್ಣ-ತಂಗಿಯ ಪ್ರೀತಿಯ ಕಥೆ ಹೊಂದಿದ್ದ ಈ ಸಿನಿಮಾ ತಮಿಳಿನ ರಿಮೇಕ್ ಆಗಿತ್ತು. ಶ್ವೇತಾ ಚಂಗಪ್ಪ ಚಿತ್ರದಲ್ಲಿ ದರ್ಶನ್ ತಂಗಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. 2006ರಲ್ಲಿ ತೆರೆಕಂಡ ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಅಷ್ಟಾಗಿ ಸದ್ದು ಮಾಡಲಿಲ್ಲ. 

ದೇವರು ಕೊಟ್ಟ ತಂಗಿ ಸಿನಿಮಾದಲ್ಲಿ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ನಾಯಕನಾಗಿ ಮತ್ತು ಮೋನಿಕಾ ನಾಯಕಿಯಾಗಿ ನಟಿಸಿದ್ದರು. ಶಿವಣ್ಣ ಅವರ ತಂಗಿಯ ಪಾತ್ರದಲ್ಲಿ ಮೀರಾ ಜಾಸ್ಮಿನ್ ನಟಿಸಿದ್ದರು. ಇದೊಂದು ಅಣ್ಣ-ತಂಗಿ ಸೆಂಟಿಮೆಂಟ್ ಚಿತ್ರ. ಈ ಸಿನಿಮಾದಲ್ಲಿ ಅಣ್ಣ-ತಂಗಿ ಬಡವರಾದರೂ ಕೂಡ ಹೃದಯ ಶ್ರೀಮಂತಿಕೆ ಹೊಂದಿರುತ್ತಾರೆ. ಮಾಲೀಕನ ಮನೆಗೆ ತನ್ನ ತಂಗಿ ಸೊಸೆಯಾಗಿ ಬಂದ ಮೇಲೆ ಅಲ್ಲಿ ನಡೆಯುವ ಘಟನಾವಳಿಗಳೇ ಈ ಚಿತ್ರದ ಕಥಾವಸ್ತು. ಸಾಯಿಪ್ರಕಾಶ್ ನಿರ್ದೇಶನದ ಈ ಸಿನಿಮಾ ಕೂಡ ಯಶಸ್ಸು ಕಂಡಿತ್ತು. 

2006ರಲ್ಲಿ ತೆರೆಕಂಡ ಒಡಹುಟ್ಟಿದವಳು ಸಿನಿಮಾದಲ್ಲಿ ಕ್ರೇಜಿಸ್ಟಾರ್ ರವಿಚಂದ್ರನ್, ರಾಧಿಕಾ ಕುಮಾರಸ್ವಾಮಿ, ರಕ್ಷಿತಾ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದರು. ತಂಗಿಯ ಪಾತ್ರದಲ್ಲಿ ನಟಿ ಮಲ್ಲಿಕಾ ಕಾಣಿಸಿಕೊಂಡಿದ್ದರು. ಮಡಿಕೆ ತಯಾರಿಸಿ ಜೀವನ ಸಾಗಿಸುವ ಅಣ್ಣ ತನ್ನ ತಂಗಿಯ ಮದುವೆಗಾಗಿ ಎಷ್ಟೆಲ್ಲಾ ಕಷ್ಟಪಡುತ್ತಾನೆ ಎಂಬುದನ್ನು ಈ ಸಿನಿಮಾ ತೋರಿಸಿತ್ತು. ಈ ಚಿತ್ರವನ್ನು ಸಾಯಿಪ್ರಕಾಶ್ ನಿರ್ದೇಶನ ಮಾಡಿದ್ದರು.