ಪ್ರೈವೇಟ್ ಜೆಟ್, ಐಷಾರಾಮಿ ಕಾರುಗಳು, ದುಬಾರಿ ಸಂಭಾವನೆ: ಮೆಗಾಸ್ಟಾರ್ ಪುತ್ರ ರಾಮ್ ಚರಣ್ ಆಸ್ತಿ ಮೌಲ್ಯ ಎಷ್ಟು ಗೊತ್ತಾ?

2007ರಲ್ಲಿ ತೆರೆಕಂಡ `ಚಿರುತ' ಸಿನಿಮಾ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ರಾಮ್ ಚರಣ್, ಮಗಧೀರ ಸಿನಿಮಾ ಮೂಲಕ ಬಿಗ್ ಬ್ರೇಕ್ ಪಡೆದರು. ನಂತರ ತೆಲುಗು ಸಿನಿಮಾರಂಗಕ್ಕೆ ಸಾಕಷ್ಟು ಸೂಪರ್ ಹಿಟ್ ಸಿನಿಮಾಗಳನ್ನು ನೀಡಿರುವ ಇವರು, ಸದ್ಯ 'ಆರ್‌ಸಿ 16' ಎಂಬ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. 40 ವರ್ಷದ ರಾಮ್ ಚರಣ್ ಸಿನಿಮಾವೊಂದಕ್ಕೆ ಬರೋಬ್ಬರಿ 100 ಕೋಟಿ ರೂ. ಸಂಭಾವನೆ ಪಡೆಯುತ್ತಾರೆ. ಇದಲ್ಲದೇ, ಪೆಪ್ಸಿ, ಫ್ರೂಟಿ ಸೇರಿದಂತೆ ಹಲವು ಬ್ರಾಂಡ್‌ಗಳಿಗೆ ರಾಯಭಾರಿಯಾಗಿ ಕಾರ್ಯನಿರ್ವಹಿಸುವ ಇವರು, ಪ್ರತಿ ಜಾಹೀರಾತಿಗೆ 2 ರಿಂದ 3 ಕೋಟಿ ರೂಪಾಯಿ ಸಂಭಾವನೆ ಪಡೆಯುತ್ತಾರೆ. 

ರಾಮ್ ಚರಣ್ ಒಟ್ಟಾರೆಯಾಗಿ 1,370 ಕೋಟಿ ರೂಪಾಯಿ ಆಸ್ತಿ ಒಡೆಯ. ಇವರ ಆದಾಯ ಮೂಲ ನಟನೆ ಮಾತ್ರವಲ್ಲ, ಬದಲಾಗಿ ರಿಯಲ್ ಎಸ್ಟೇಟ್ ಮತ್ತು ಸಿನಿಮಾ ನಿರ್ಮಾಣ ಮಾಡುವುದು ಮುಖ್ಯವಾಗಿದೆ. ಕುದುರೆ ಸವಾರಿ ಮೇಲಿನ ಪ್ರೀತಿಯಿಂದ 2011ರಲ್ಲಿ ಹೈದರಾಬಾದ್‌ನಲ್ಲಿ ಪೋಲೋ ರೈಡಿಂಗ್ ಕ್ಲಬ್ ಆರಂಭಿಸಿದ್ದಾರೆ. ಜೊತೆಗೆ 2013ರಲ್ಲಿ ಟರ್ಬೊ ಮೇಘಾ ಏರವೇಸ್ ಪ್ರೈವೇಟ್ ಎಂಬ ಹೆಸರಿನ ವಿಮಾನಯಾನ ಸಂಸ್ಥೆಯನ್ನು ಆರಂಭಿಸಿದ್ದಾರೆ.

ಹೈದರಾಬಾದ್‌ನ ಜುಬಿಲಿ ಹೀಲ್ಸ್‌ನಲ್ಲಿ 38 ಕೋಟಿ ರೂಪಾಯಿ ಮೌಲ್ಯದ ಐಷಾರಾಮಿ ಮನೆ ಹೊಂದಿರುವ ರಾಮ್ ಚರಣ್, ಪ್ರೈವೇಟ್ ಜೆಟ್ ಕೂಡ ಹೊಂದಿದ್ದಾರೆ. ಇನ್ನು ಕಾರು ಕಲೆಕ್ಷನ್ ವಿಚಾರಕ್ಕೆ ಬಂದರೆ ಆಸ್ಟನ್ ಮಾರ್ಟಿನ್ ವಾಂಟೇಜ್ ವಿ8, ಫೆರಾರಿ ಪೋರ್ಟೊಫಿನೊ, ಮರ್ಸಿಡಿಸ್ ಮೇಬ್ಯಾಕ್ ಜಿಎಲ್ಎಸ್ 600, ರೋಲ್ಸ್ ರಾಯ್ಸ್ ಫ್ಯಾಂಟಮ್, ರೇಂಜ್ ರೋವರ್ ಸೇರಿದಂತೆ ಹಲವು ಐಷಾರಾಮಿ ಕಾರು ಹೊಂದಿದ್ದಾರೆ.

ರಾಮ್ ಚರಣ್ ಪತ್ನಿ ಉಪಾಸನಾ ಆಗರ್ಭ ಶ್ರೀಮಂತರಾಗಿದ್ದಾರೆ. ರಾಮ್ ಚರಣ್ ಆಸ್ತಿಗಿಂತ ಪತ್ನಿಯ ಆಸ್ತಿಯೇ ಹೆಚ್ಚಿದೆಯಂತೆ. ಉಪಾಸನಾ ತಂದೆ ಅನಿಲ್ ಕಾಮಿನೇನಿ ಕೆಇಐ ಗ್ರೂಪ್‌ನ ಸಂಸ್ಥಾಪಕರು. ಅವರ ತಾಯಿ ಶೋಭನಾ ಅಫೋಲೋ ಆಸ್ಪತ್ರೆಯಲ್ಲಿ ಉನ್ನತ ಹುದ್ದೆಯಲ್ಲಿದ್ದಾರೆ. ಶೋಭನಾ ತಂದೆ ಪ್ರತಾಪ್ ಸಿ ರೆಡ್ಡಿ ಅವರೇ ಅಫೋಲೋ ಆಸ್ಪತ್ರೆಯ ಸಂಸ್ಥಾಪಕರು. ಉಪಾಸನಾ ಕೂಡ ಅಪೋಲೋ ಆಸ್ಪತ್ರೆಯಲ್ಲಿ ಉನ್ನತ ಹುದ್ದೆಯಲ್ಲಿದ್ದಾರೆ. ಈ ಜೋಡಿ 2012ರಲ್ಲಿ ವಿವಾಹವಾಗಿತ್ತು.