ಕನ್ನಡದ ಈ 8 ಸಿನಿಮಾಗಳು ರೀ-ರಿಲೀಸ್ ಬಾಕ್ಸಾಪೀಸ್‌ನಲ್ಲಿ ಜಾದೂ ಮಾಡೋದು ಗ್ಯಾರಂಟಿ!

ರಾಕಿಂಗ್ ಸ್ಟಾರ್ ಯಶ್ ವೃತ್ತಿ ಬದುಕಿಗೆ ಉತ್ತಮ ಮೈಲೇಜ್ ಕೊಟ್ಟ ಸಿನಿಮಾ ಗೂಗ್ಲಿ. ಪವನ್ ಒಡೆಯರ್ ನಿರ್ದೇಶನದ ಈ ಸಿನಿಮಾ 2013ರ ಜುಲೈ ೧೯ರಂದು ತೆರೆಗೆ ಬಂದಿತ್ತು. ಯಶ್ ನಾಯಕಿಯಾಗಿ ಕೃತಿ ಕರಬಂದ ಬಣ್ಣ ಹಚ್ಚಿದ್ದರು. ಪ್ರೀತಿಯ ಜೊತೆಗೆ ಸಾಕಷ್ಟು ಭಾವನಾತ್ಮಕ ಅಂಶ ಹಾಗೂ ಹಾಸ್ಯವನ್ನು ಈ ಸಿನಿಮಾದಲ್ಲಿ ಬೆರೆಸಲಾಗಿತ್ತು. ಕೇವಲ ಮೂರು ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿದ್ದ ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ 18 ಕೋಟಿ ರೂ. ಬಾಚಿಕೊಂಡಿತ್ತು. ಈ ಸಿನಿಮಾ ಮರು ಬಿಡುಗಡೆಯಾದರೆ, ಅದಕ್ಕಿಂತ ಹೆಚ್ಚು ಕಲೆಕ್ಷನ್ ಮಾಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.

2014ರಲ್ಲಿ ತೆರೆಕಂಡ  'ಉಳಿದವರು ಕಂಡಂತೆ' ಕನ್ನಡ ಸಿನಿಮಾರಂಗದಲ್ಲಿ ಒಂದು ವಿನೂತನ ಪ್ರಯತ್ನವಾಗಿತ್ತು. ಚಿತ್ರದಲ್ಲಿ ಹಲವು ಕೋನಗಳಲ್ಲಿ ಒಂದು ವ್ಯಕ್ತಿಯ ಕಥೆಯನ್ನು ಹೇಳುವ ಪರಿ ಪ್ರಶಂಸೆ ಪಡೆದಿತ್ತು. ಈ ಸಿನಿಮಾದಲ್ಲಿ ರಕ್ಷಿತ್ ಶೆಟ್ಟಿ ನಾಯಕನಾಗಿ ನಟಿಸುವುದಲ್ಲದೇ, ನಿರ್ದೇಶನ ಮಾಡಿದ್ದರು. ಈ ಸಿನಿಮಾದ ರಿಚರ್ಡ್ ಆಂಟನಿ ಪಾತ್ರವನ್ನು ಮರೆಯಲು ಸಾದ್ಯವಿಲ್ಲ. ಆದರೆ, 'ಉಳಿದವರು ಕಂಡಂತೆ ಬಾಕ್ಸಾಫಿಸ್‌ನಲ್ಲಿ ಯಶಸ್ವಿಯಾಗಲಿಲ್ಲ. ನಂತರದ ದಿನಗಳಲ್ಲಿ ಇದೊಂದು ಕನ್ನಡದ ಕಲ್ಟ್ ಚಿತ್ರವಾಗಿ ಬದಲಾಯಿತು. ಈ ಸಿನಿಮಾ ಮತ್ತೆ ಥಿಯೇಟರ್‌ನಲ್ಲಿ ಬಂದರೆ ಸಿನಿಪ್ರೇಕ್ಷಕರು ಖಂಡಿತವಾಗಿಯೂ ಕೈಹಿಡಿಯುತ್ತಾರೆ.

ಗೋಲ್ಡನ್ ಸ್ಟಾರ್ ಗಣೇಶ್, ದೂದ್ ಪೇಡ ದಿಗಂತ್ ಮಂಚಾಲೆ ಹಾಗೂ ರಾಜೇಶ್ ಕೃಷ್ಣನ್ ಮೂವರ ಸಂಗಮದಲ್ಲಿ ಬಂದಿದ್ದ 'ಗಾಳಿಪಟ' ಚಿತ್ರವು ಆ ಕಾಲದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. 2008ರಲ್ಲಿ ಬಿಡುಗಡೆಯಾದ ಗಾಳಿಪಟ ಸಿನಿಮಾದಲ್ಲಿ ಡೈಸಿ ಬೋಪಣ್ಣ, ನೀತು ಹಾಗೂ ಭಾವನಾ ರಾವ್ ನಾಯಕಿರಾಗಿ ನಟಿಸಿದ್ದರು. ಚಿತ್ರದಲ್ಲಿ ಮೂವರು ಸ್ನೇಹಿತರ ಸುಂದರ ಕಥೆ, ಕಾಮಿಡಿ, ಲವ್‌ಸ್ಟೋರಿ ಮತ್ತು ಸೊಗಸಾದ ಹಾಡುಗಳು ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿತ್ತು. ಇಂದಿಗೂ ಈ ಸಿನಿಮಾ ಹಲವರ ಫೆವರಿಟ್. ಗಣಿ, ದಿಗಿ, ಕಿಟ್ಟಿ ಮತ್ತೆ ಥಿಯೇಟರ್‌ಗೆ ಬಂದರೆ ಮತ್ತೆ ಹಿಟ್ ಆಗೋದಂತೂ ಗ್ಯಾರಂಟಿ.

2014ರಲ್ಲಿ ಬಂದ ಪ್ರಶಾಂತ್ ನೀಲ್ ನಿರ್ದೇಶನದ 'ಉಗ್ರಂ' ಸಿನಿಮಾ ರೋರಿಂಗ್ ಸ್ಟಾರ್ ಶ್ರೀಮುರಳಿಗೆ ಬಿಗ್ ಬ್ರೇಕ್ ನೀಡಿತ್ತು. ಇದು ಪ್ರಶಾಂತ್ ನೀಲ್ ನಿರ್ದೇಶನದ ಮೊದಲ ಸಿನಿಮಾ. ಲವ್, ಸೆಂಟಿಮೆಂಟ್, ಸಾಹಸ ಎಲ್ಲಾ ದೃಶ್ಯಗಳನ್ನು ಬೆರೆಸಿ ಸುಂದರವಾಗಿ ತೆರೆಮೇಲೆ ಬಂದಿದ್ದ ಈ ಸಿನಿಮಾ ಅದ್ಭುತ ಯಶಸ್ಸು ಕಂಡಿತ್ತು. ಇನ್ನೊಂದು ವಿಶೇಷವೆಂದರೆ, ಉಗ್ರಂ ಸಿನಿಮಾ ನಂತರ ಶ್ರೀಮುರಳಿ ಸುಮಾರು 67 ಚಿತ್ರದ ಆಫರ್‌ಗಳನ್ನು ನಿರಾಕರಿಸಿದ್ದರು.

ಯೋಗರಾಜ್ ಭಟ್ ಅವರ ನಿರ್ದೇಶನದ ಮತ್ತು ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಾಯಕನಾಗಿ ನಟಿಸಿದ್ದ 'ಪರಮಾತ್ಮ' ಸಿನಿಮಾ ಇಂದಿಗೂ ಅನೇಕರ ಫೇವರಿಟ್ ಸಿನಿಮಾ ಅಂದರೆ ತಪ್ಪಾಗಲ್ಲ. ಪರಮಾತ್ಮ ಇದು ಕೇವಲ ಒಂದು ಚಿತ್ರವಲ್ಲ ಎಮೋಷನ್ ಎಂದು ಹೇಳುವವರೇ ಹೆಚ್ಚಿದ್ದಾರೆ. ಈ ಸಿನಿಮಾದ ಒಂದೊಂದು ಹಾಡುಗಳು ಕೂಡ ಅದ್ಭುತವಾಗಿದ್ದು, ಜನರ ಮನಸಲ್ಲಿ ಅಚ್ಚಳಿಯದೇ ಉಳಿದಿವೆ. ಚಿತ್ರದ ಡೈಲಾಗ್‌ಗಳು, ಸಂಭಾಷಣೆ, ಅನಿರೀಕ್ಷಿತ ಕ್ಲೈಮ್ಯಾಕ್ಸ್ ಎಲ್ಲವೂ ಸಖತ್ ಆಗಿದ್ದವು. ಆದರೆ, ಈ ಸಿನಿಮಾ ಥಿಯೇಟರ್‌ಗಳಲ್ಲಿ ಓಡಲಿಲ್ಲ. ಚಿತ್ರ ಬಿಡುಗಡೆಯಾದಾಗ ಅದಕ್ಕೆ ಸಿಗಬೇಕಿದ್ದ ಪ್ರಶಂಸೆ ಮತ್ತು ಯಶಸ್ಸು ಸಿಕ್ಕಿರಲಿಲ್ಲ. ಹೀಗಾಗಿ, ಈ ಸಿನಿಮಾ ರೀ-ರಿಲೀಸ್ ಆದರೆ ಬಾಕ್ಸಾಪೀಸ್‌ನಲ್ಲಿ ಜಾದೂ ಮಾಡುವುದಂತೂ ಗ್ಯಾರಂಟಿ.

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಿರ್ದೇಶಿಸಿ, ನಟಿಸಿರುವ ಜಸ್ಟ್ ಮಾತ್ ಮಾತಲ್ಲಿ ಸಿನಿಮಾ ಕೂಡ ಪರಮಾತ್ಮ ಚಿತ್ರದಂತೆ ಸೊಗಸಾದ ಹಾಡುಗಳನ್ನು ಹೊಂದಿತ್ತು. ಇದೊಂದು ಪ್ರೇಮಕಥೆಯುಳ್ಳ ಸಿನಿಮಾವಾಗಿದ್ದು, ಮೋಹಕತಾರೆ ರಮ್ಯಾ ನಾಯಕಿಯಾಗಿ ಅಭಿನಯಿಸಿದ್ದರು. ಆದರೆ, ಈ ಚಿತ್ರ ಥಿಯೇಟರ್‌ಗಳಲ್ಲಿ ಓಡಲಿಲ್ಲ. ಈಗ ಈ ಸಿನಿಮಾ ಮರುಬಿಡುಗಡೆ ಆಗಬೇಕು ಎಂಬುದು ಹಲವರ ಆಸೆ.

2005ರಲ್ಲಿ ತೆರೆಕಂಡ ಪ್ರೇಮ್ ಹಾಗೂ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಕಾಂಬಿನೇಷನ್‌ನ 'ಜೋಗಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಚಿತ್ರದಲ್ಲಿ ರೌಡಿಸಂ ಜೊತೆಗೆ ತಾಯಿ- ಮಗನ ಸೆಂಟಿಮೆಂಟ್ ಕಟ್ಟಿಕೊಡಲಾಗಿತ್ತು. ಇನ್ನು ಈ ಸಿನಿಮಾದ ಎಲ್ಲಾ ಹಾಡುಗಳು ಹಿಟ್ ಆಗಿತ್ತು. ಜೋಗಿ ಸಿನಿಮಾ ರಾಜ್ಯಾದ್ಯಂತ ದಾಖಲೆಯ ಪ್ರದರ್ಶನ ಕಂಡಿತ್ತು.

2016ರಲ್ಲಿ ತೆರೆಕಂಡ ಬ್ಲಾಕ್‌ಬಸ್ಟರ್ ಸಿನಿಮಾ ಕಿರಿಕ್ ಪಾರ್ಟಿ. ಈ ಸಿನಿಮಾಗೆ ರಿಷಬ್ ಶೆಟ್ಟಿ ಆಕ್ಷನ್ ಕಟ್ ಹೇಳಿದ್ದು, ರಕ್ಷಿತ್ ಶೆಟ್ಟಿ ನಾಯಕನಾಗಿ ನಟಿಸಿದ್ದರು. ಕೊನೆ ಬೆಂಚಿನಲ್ಲಿ ಕೂತ್ಕೊಂಡು, ಕ್ಲಾಸ್‌ಗಳಿಗೆ ಬಂಕ್ ಹಾಕ್ಕೊಂಡು, ಲೆಕ್ಚರರ್ಸ್ ಹತ್ರ ಬೈಸ್ಕೊಂಡು, ಹುಡುಗೀರ್ ಹಿಂದೆ ಓಡಾಡಕ್ಕೊಂಡು, ಫ್ರೆಂಡ್ಸ್ ಜತೆ ಕಿತ್ತಾಡ್ಕೊಂಡು, ಲವ್, ಫೈಟ್, ಕಾಲೇಜ್ ಎಲೆಕ್ಷನ್ ವಿದ್ಯಾರ್ಥಿ ಜೀವನವನ್ನ ಎಂಜಾಯ್ ಮಾಡಿದ ಪ್ರತಿಯೊಬ್ಬರನ್ನ ಕಾಡುವ ಸಿನಿಮಾ 'ಕಿರಿಕ್ ಪಾರ್ಟಿ'.