'ಎ' ಸಿನಿಮಾ ರೀ-ರಿಲೀಸ್: ರಿಯಲ್ ಸ್ಟಾರ್ ಉಪೇಂದ್ರ ಅವರ ಕಲ್ಟ್ ಕ್ಲಾಸಿಕ್ ಸಿನಿಮಾದ ವಿಶೇಷತೆಗಳಿವು!

ನಿರ್ದೇಶಕರಾಗಿದ್ದ ಉಪೇಂದ್ರ 'ಹೀರೊ' ಆಗಬೇಕು ಎಂದುಕೊಂಡಾಗ ಚಿತ್ರದಲ್ಲೂ ಒಬ್ಬ ಸಿನಿಮಾ ನಿರ್ದೇಶಕನ ಕಥೆ ಹೇಳಿದ್ದರು. ಸಿನಿಮಾದೊಳಗೊಂದು ಸಿನಿಮಾ ಕಥೆ ಹೇಳಿದ್ದರು. ಜೀವನದಲ್ಲಿ ಏಳುಬೀಳು ಕಂಡ ಸೂರ್ಯ ಪ್ರೀತಿ ಎನ್ನುವುದು ಸುಳ್ಳು ಎಂದರೆ, ಸುಖದ ಸುಪ್ಪತ್ತಿಗೆಯಲ್ಲಿ ಬೆಳೆದ ಹುಡುಗಿ ಪ್ರೀತಿಯ ಬಗ್ಗೆ ಸೂರ್ಯನಿಗೆ ಪಾಠ ಮಾಡಲು ಬರ್ತಾಳೆ. ಇವರಿಬ್ಬರ ಸಂಘರ್ಷದ ಕಥೆಯೇ 'ಎ'.

ಉಪೇಂದ್ರ ಅವರ 'ಎ' ಸಿನಿಮಾ ಕನ್ನಡ ಚಿತ್ರರಂಗದ ದಿಕ್ಕನ್ನೇ ಬದಲಿಸಿದ ಸಿನಿಮಾ ಎಂದರೂ ತಪ್ಪಾಗಲ್ಲ. ಉಪ್ಪಿ ಈ ಸಿನಿಮಾವನ್ನು ಶಿವಣ್ಣ ಅಥವಾ ಬೇರೆ ಯಾರಿಗಾದರೂ ಮಾಡಬೇಕು ಅಂತ ಕಥೆ ಬರೆದಿಟ್ಟುಕೊಂಡಿದ್ದರು. ಆದರೆ, ನಿರ್ಮಾಪಕರು ನೀವೇ ಹೀರೊ ಆಗಿ ಎಂದಾಗ ಉಪೇಂದ್ರ ಹೀರೊ ಇಮೇಜ್ ಬಿಟ್ಟು ಸ್ಕ್ರೀನ್‌ಪ್ಲೇ ಮೂಲಕ ಗೆಲ್ಲುವ ಪ್ರಯತ್ನ ಮಾಡಿದ್ದರು. ಚಿತ್ರದ ಆರಂಭದಲ್ಲೇ ನಾಯಕ ಸೂರ್ಯ, 'ಐ ಆಮ್ ಗಾಡ್, ಗಾಡ್ ಈಸ್ ಗ್ರೇಟ್' ಎನ್ನುತ್ತಾ ಗನ್ ಹಿಡಿದು ಎಲ್ಲರನ್ನು ಹೆದರಿಸುವುದು, ದೇವಸ್ಥಾನದಲ್ಲಿ ದೇವರಿಗೆ ಎದುರು ಗನ್ ಹಿಡಿದು ವಾದಕ್ಕೆ ಇಳಿಯುವುದು, ಗಣೇಶನನ್ನು ಬಾವಿಗೆ ಎತ್ತಿ ಹಾಕುವುದು, ಸಿನಿಮಾ ಆರಂಭದಲ್ಲೇ end ಕಾರ್ಡ್ ಹಾಕಿದ್ದು, ಹೀಗೆ ಎಲ್ಲವೂ ಪ್ರೇಕ್ಷಕರಿಗೆ ಸಖತ್ ಡಿಫರೆಂಟ್ ಎನ್ನಿಸಿತ್ತು. 'ಎ' ಸಿನಿಮಾ ಪೋಸ್ಟರ್‌ಗಳನ್ನು ಕೂಡ ವಿಭಿನ್ನವಾಗಿ ಡಿಸೈನ್ ಮಾಡಲಾಗಿತ್ತು.

ಉಪೇಂದ್ರ ಅವರು ರಿವರ್ಸ್ ಸ್ಕ್ರೀನ್‌ಪ್ಲೇ ಕಾನ್ಸೆಪ್ಟ್‌ನಲ್ಲಿ 'ಎ' ಚಿತ್ರದ ಕತೆ ಹೇಳಿದ್ದರು. ಹಲವು ಫ್ಲಾಶ್‌ಬ್ಯಾಕ್‌ಗಳಲ್ಲಿ ಸಿನಿಮಾ ಕಥೆ ನಿರೂಪಿಸಿದ್ದರು. ಕನ್ನಡದ ಮಟ್ಟಿಗೆ ರೊಮ್ಯಾಂಟಿಕ್ ಸೈಕಲಾಜಿಕಲ್ ಥ್ರಿಲ್ಲರ್ ಎನ್ನುವ ವಿಭಿನ್ನ ಜಾನರ್ ಸಿನಿಮಾ ಅದಾಗಿತ್ತು. ಇನ್ನು ಬಣ್ಣದಲೋಕದ ಕಾಸ್ಟಿಂಗ್ ಕೌಚ್ ಕರಾಳ ಮುಖದ ಬಗ್ಗೆಯೂ ಚಿತ್ರದಲ್ಲಿ ಚರ್ಚಿಸಲಾಗಿತ್ತು. ಬಹಳ ರಿಯಲಿಸ್ಟಿಕ್ ಆಗಿ ಚಿತ್ರವನ್ನು ಉಪ್ಪಿ ಹೇಳುವ ಪ್ರಯತ್ನ ಮಾಡಿದ್ದರು. ರಿವರ್ಸ್ ಸ್ಕ್ರೀನ್‌ಪ್ಲೇ ಕಾರಣಕ್ಕೆ ಕಥೆ ಅರ್ಥವಾಗದೇ ಕೆಲವರು ಪದೇ ಪದೇ ಸಿನಿಮಾ ನೋಡಿದ್ದರು.

ರಿಯಲ್ ಸ್ಟಾರ್ ಉಪೇಂದ್ರ ಅವರು ತಮ್ಮ ಚೊಚ್ಚಲ ಚಿತ್ರಕ್ಕೆ 'ಎ' ಎನ್ನುವ ಟೈಟಲ್ ಫಿಕ್ಸ್ ಮಾಡಿದ್ದರು. ಜೊತೆಗೆ 'ಕಡ್ಡಾಯವಾಗಿ ಬುದ್ಧಿವಂತರಿಗೆ ಮಾತ್ರ' ಅಂತ ಟ್ಯಾಗ್‌ಲೈನ್ ಕೂಡ ಕೊಟ್ಟಿದ್ದರು. ಪ್ರೇಕ್ಷಕರು ಬೈಯ್ಕೊಂಡ್ರು ಪರವಾಗಿಲ್ಲ, ನಮ್ಮ ಸಿನಿಮಾ ನೋಡಬೇಕು ಅನ್ನೋದು ಉಪೇಂದ್ರ ಲೆಕ್ಕಾಚಾರವಾಗಿತ್ತು. ಸಿನಿರಸಿಕರು ಮುಗಿಬಿದ್ದು ಈ ಸಿನಿಮಾ ನೋಡಿದ್ದರು.

ಬಿ. ಜಗನ್ನಾಥ ಮತ್ತು ಬಿ. ಜಿ ಮಂಜುನಾಥ್ 'ಎ' ಚಿತ್ರಕ್ಕೆ ಬಂಡವಾಳ ಹೂಡಿದ್ದರು. ಚಾಂದಿನಿ ನಾಯಕಿಯಾಗಿ ರಿಯಲ್ ಸ್ಟಾರ್‌ಗೆ ಸಾಥ್ ನೀಡಿದ್ದರು. 1.25 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ 'ಎ' ಚಿತ್ರ ಬಾಕ್ಸಾಫೀಸ್‌ನಲ್ಲಿ ಬರೋಬ್ಬರಿ 20 ಕೋಟಿ ಕಲೆಕ್ಷನ್ ಮಾಡಿ ದಾಖಲೆ ಬರೆದಿತ್ತು. ಕರ್ನಾಟಕದಲ್ಲಿ 25 ವಾರಗಳ ಕಾಲ 'ಎ' ಸಿನಿಮಾ ಯಶಸ್ವಿ ಪ್ರದರ್ಶನ ಕಂಡಿತ್ತು. ನಿರ್ದೇಶಕರಾಗಿ ಮಾತ್ರವಲ್ಲದೇ, ಹೀರೊ ಆಗಿಯೂ ಉಪೇಂದ್ರ ಸೂಪರ್ ಸಕ್ಸಸ್ ಕಂಡಿದ್ದರು.

ಈ ಚಿತ್ರದಲ್ಲಿ ಸಾಕಷ್ಟು ಹೊಸ ಪ್ರತಿಭೆಗಳಿಗೆ ಉಪೇಂದ್ರ ಅವಕಾಶ ಕೊಟ್ಟಿದ್ದರು. ಗುರುಕಿರಣ್ ಅವರು ಇದೇ ಸಿನಿಮಾ ಮೂಲಕ ಸಂಗೀತ ನಿರ್ದೇಶಕರಾಗಿ ಕನ್ನಡ ಚಿತ್ರರಂಗಕ್ಕೆ ಬಂದರು. ಅಂದಾಜು ಎರಡ್ಮೂರು ಲಕ್ಷ ವೆಚ್ಚದಲ್ಲಿ ಸಿನಿಮಾದ ಸಾಂಗ್ಸ್ ಸಿದ್ಧವಾಗಿತ್ತು. ಆದರೆ, ಆಡಿಯೋ ಕ್ಯಾಸೆಟ್‌ ಬರೋಬ್ಬರಿ 2 ಕೋಟಿ ಹಣ ತಂದು ಕೊಟ್ಟಿತ್ತು. ಮಾರಿ ಕಣ್ಣು ಹೋರಿಮ್ಯಾಲೆ, ಸುಮ್ ಸುಮ್ನೆ, ಹೇಳ್ಕೊಳ್ಳೊಕ್ ಒಂದೂರು ಹೀಗೆ ಎಲ್ಲಾ ಸಾಂಗ್ಸ್ ಸಿನಿರಸಿಕರ ಬಾಯಲ್ಲಿ ನಲಿದಾಡಿತ್ತು.

ಉಪೇಂದ್ರ ಅವರ 'ಎ' ಸಿನಿಮಾ ತೆಲುಗು ಭಾಷೆಗೂ ಆಗಿ 100 ದಿನ ಪ್ರದರ್ಶನ ಕಂಡು ಸಿನಿಮಾ ಎಲ್ಲರ ಹುಬ್ಬೇರಿಸಿತ್ತು.  ತರ್ಲೆ ನನ್ಮಗ ಸಿನಿಮಾ ಮೂಲಕ ನಿರ್ದೇಶಕರಾಗಿ ಚಿತ್ರರಂಗಕ್ಕೆ ಪರಿಚಿತರಾಗಿದ್ದ ಉಪೇಂದ್ರ ಮುಂದೆ ಶ್, ಓಂ ರೀತಿಯ ಹಿಟ್ ಸಿನಿಮಾಗಳನ್ನು ಕೊಟ್ಟು ಸಕ್ಸಸ್ ಕಂಡಿದ್ದರು. 2007ರಲ್ಲಿ ಈ ಸಿನಿಮಾ ತಮಿಳಿಗೂ ರೀಮೆಕ್ ಆಗಿತ್ತು.