ಹೋಟೆಲ್ ಮತ್ತು ರೆಸಾರ್ಟ್ ಹೊಂದಿರುವ ಸ್ಯಾಂಡಲ್‌ವುಡ್ ನಟರಿವರು: ಇವರ ಹೋಟೆಲ್ ಎಲ್ಲಿದೆ ಗೊತ್ತಾ?

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ತಂದೆ ಸಂಜೀವ್ ಹೋಟೆಲ್ ಬ್ಯುಸಿನೆಸ್ ಮಾಡುತ್ತಿದ್ದಾರೆ.  ಅವರು ಹೋಟೆಲ್ ಸರೋವರ ಎಂಬ ಹೆಸರಿನಲ್ಲಿ ೫ಸ್ಟಾರ್, ೭ಸ್ಟಾರ್ ಹೋಟೆಲ್ಬ ಹೊಂದಿದ್ದಾರೆ. ಇದಲ್ಲದೇ ಸುದೀಪ್ ತಮ್ಮ ಸ್ನೇಹಿತನ ಜೊತೆ ಸೇರಿ 'ಕಿಚ್ಚನ ಹಳ್ಳಿಮನೆ' ಎಂಬ ಹೋಟೆಲ್ ಆರಂಭಿಸಿದ್ದಾರೆ. ಇದನ್ನು ಅವರ ಸ್ನೇಹಿತ ನಡೆಸಿಕೊಂಡು ಹೋಗ್ತಿದ್ದಾರೆ. ವಿಕ್ರಾಂತ್ ರೋಣ ಸಿನಿಮಾ ಪ್ರಚಾರ ಸಂದರ್ಭದಲ್ಲಿ ಉದ್ಯಮಗಳ ಬಗ್ಗೆ ಮಾತನಾಡಿದ್ದ ಸುದೀಪ್, ಪತ್ನಿ ಪ್ರಿಯಾ ಜೊತೆ ಸೇರಿ ಕಾಫಿ ಆಂಡ್ ಬನ್ಸ್ ಎಮೋಷನ್ ಎನ್ನುವ ಉದ್ಯಮ ಆರಂಭಿಸಿರುವುದಾಗಿ ಹೇಳಿದ್ದರು. ಇದರ ಜೊತೆಗೆ ರೆಸ್ಟೋರೆಂಟ್, ಕೆಫೆ ಹಾಗೂ ಎನ್‌ಎಫ್‌ಟಿ ಉದ್ಯಮಗಳನ್ನು ಆರಂಭಿಸುವುದಕ್ಕೆ ನಿರ್ಧರಿಸಿದ್ದರು. ನನಗೆ ಅಡುಗೆ ಮಾಡುವುದೆಂದರೆ ಬಹಳ ಇಷ್ಟ. ಅದು ನನ್ನ ಫ್ಯಾಷನ್. ನನ್ನ ಫ್ಯಾಮಿಲಿ ಬಿಸಿನೆಸ್ ಕೂಡ ಅದೇ ಆಗಿತ್ತು. ನನ್ನ ತಂದೆ ಕೂಡ ಹೋಟೆಲ್ ಉದ್ಯಮದಲ್ಲಿದ್ದರು. ಅದನ್ನು ಮುಂದುವರೆಸಿಕೊಂಡು ಹೋಗಬೇಕೆಂಬ ಆಸೆಯಿದೆ ಎಂದಿದ್ದರು.

ನಟ ಹಾಗೂ ಬಿಗ್ ಬಾಸ್ ಸೀಸನ್ 7ರ ವಿಜೇತ ಶೈನ್ ಶೆಟ್ಟಿ ಸ್ವಂತ ರೆಸ್ಟೋರೆಂಟ್ ಹೊಂದಿದ್ದಾರೆ. ಇವರು 2019ರಲ್ಲಿ ಬನಶಂಕರಿ 2ನೇ ಹಂತದಲ್ಲಿ ಸಣ್ಣದೊಂದು ಗಾಡಿಯಲ್ಲಿ 'ಗಲ್ಲಿ ಕಿಚನ್' ತೆರೆದಿದ್ದರು. ಇಲ್ಲಿನ ಆಹಾರಕ್ಕೆ ಜನರು ಫಿದಾ ಆಗಿದ್ದು, ಸಿಕ್ಕಾಪಟ್ಟೆ ಫೇಮಸ್ ಆಯಿತು. ಸದ್ಯ  ಶೈನ್ ಶೆಟ್ಟಿ ಮೂರು 'ಗಲ್ಲಿ ಕಿಚನ್' ಹೆಸರಿನ ರೆಸ್ಟೋರೆಂಟ್‌ಗಳನ್ನು ಮುನ್ನಡೆಸಿಕೊಂಡು ಹೋಗುತ್ತಿದ್ದಾರೆ.

ನಟ ಲೋಕೇಶ್ ಅವರು ತಾವೊಂದು ಹೋಟೆಲ್ ತೆರೆಯಬೇಕು ಅಂತ ಆಸೆ ಹೊಂದಿದ್ದರು. ಅವರ ಕನಸನ್ನು ಅವರ ಮಗ ಸೃಜನ್ ನೆರವೇರಿಸಿದ್ದಾರೆ. ಸೃಜನ್ ಬೆಂಗಳೂರಿನ ಬನಶಂಕರಿಯಲ್ಲಿ 'ಕೋಕು ಕಿಚನ್' ಎಂಬ ತೆರೆದಿದ್ದಾರೆ. ಲೋಕೇಶ್ ಅವರನ್ನು ಮನೆಯಲ್ಲಿ ಎಲ್ಲರೂ ಪ್ರೀತಿಯಿಂದ ಕೋಕು ಅಂತ ಕರೆಯುತ್ತಿದ್ದರಂತೆ. ಅದೇ ಹೆಸರನ್ನೇ ಸೃಜನ್ ತಮ್ಮ ರೆಸ್ಟೋರೆಂಟ್‌ಗೆ ಇಟ್ಟಿದ್ದಾರೆ. ಇದಲ್ಲದೇ, ಬೆಳ್ಳಂದೂರಿನಲ್ಲಿ ಸೃಜನ್ ಒಡೆತನದ ಸೋಚಿ ಎಂಬ ರೆಸ್ಟೋರೆಂಟ್ ಇದೆ.

ಕಿರುತೆರೆ ಕಲಾವಿದರಾದ ಚಂದನ್ ಕುಮಾರ್-ಕವಿತಾ ಗೌಡ ಕೂಡ ಹೋಟೆಲ್ ಬ್ಯುಸಿನೆಸ್‌ನಲ್ಲಿ ತೊಡಗಿಕೊಂಡಿದ್ದಾರೆ. ಚಂದನ್ ಮೊದಲು ಬೆಂಗಳೂರಿನ ಸಹಕಾರ ನಗರದಲ್ಲಿ ಬಿರಿಯಾನಿ ಹೋಟೆಲ್ ತೆರೆದಿದ್ದರು. ಮದುವೆಯಾದ ಬಳಿಕ ಕವಿತಾ ಹಾಗೂ ಚಂದನ್ ಸೇರಿ ಮೈಸೂರು ಹಾಗೂ ಬೆಂಗಳೂರು ರಸ್ತೆಯಲ್ಲಿ 'ಮಂಡಿಪೇಟೆ ಪಲಾವ್' ಎಂಬ ರೆಸ್ಟೋರೆಂಟ್ ಅನ್ನು ಆರಂಭಿಸಿದ್ದಾರೆ. ಜೊತೆಗೆ ಇತ್ತೀಚೆಗೆ ಚಿಕ್ಕಮಗಳೂರಿನಲ್ಲಿ ಕೂಡ ರೆಸಾರ್ಟ್ ಆರಂಭಿಸಿದ್ದಾರೆ.

ಕನ್ನಡ ಕಿರುತೆರೆಯ ಖ್ಯಾತ ನಿರೂಪಕ ಮತ್ತು ಚಿತ್ರನಟ ಅಕುಲ್ ಬಾಲಾಜಿ, ದೊಡ್ಡಬಳ್ಳಾಪುರ ಬಳಿಯ ಲಘುಮೇನಹಳ್ಳಿಯಲ್ಲಿ ಐಶಾರಾಮಿ ಶೈನ್ ಬೈ ಜೆಡ್ ಎಂಬ ರೆಸಾರ್ಟ್‌ವೊಂದನ್ನು ಹೊಂದಿದ್ದಾರೆ. ಹಳ್ಳಿ ಶೈಲಿಯಲ್ಲಿರುವ ಈ ರೆಸಾರ್ಟ್ ವೀಕೆಂಡ್‌ನಲ್ಲಿ ಕಾಲ ಕಳೆಯಲು ಸೂಕ್ತವಾಗಿದೆ.  

ಕನ್ನಡ ಕಿರುತೆರೆ ಲೋಕದ ಯಶಸ್ವಿ ನಟ ಕಿರಣ್ ರಾಜ್  ನಟನೆ ಜೊತೆಗೆ ಡಯಟ್ ಆನ್ ಟೇಬಲ್ ಎಂಬ ರೆಸ್ಟೋರೆಂಟ್ ಹಾಗೂ ತಮ್ಮದೇಯಾದ ಬಟ್ಟೆ ಬ್ರಾಂಡ್ ಅನ್ನು ನಡೆಸಿಕೊಂಡು ಹೋಗುತ್ತಿದ್ದಾರೆ. ಇದರ ಜೊತೆಗೆ ಸದ್ಯ ಸಿನಿಮಾ ಕಡೆಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ.

ಕನ್ನಡ ಚಿತ್ರರಂಗದ ರಿಯಲ್ ಸ್ಟಾರ್ ಉಪೇಂದ್ರ ಅವರು ತಾವರೆಕೆರೆಯ ಚುಂಚನಕುಪ್ಪೆ ಬಳಿ 'ರುಪ್ಪಿಸ್' ಹೆಸರಿನ ರೆಸಾರ್ಟ್ ಮತ್ತು ರೆಸ್ಟೋರೆಂಟ್ ಹೊಂದಿದ್ದಾರೆ. ಈ ರೆಸಾರ್ಟ್‌ನಲ್ಲಿ ಸಮಾರಂಭ ಮಾಡಲು, ಹಾಲಿಡೇಯಲ್ಲಿ ಕಾಲ ಕಳೆಯಲು ಹಾಗೂ ಶೂಟಿಂಗ್ ಮಾಡಲು ಅವಕಾಶವಿದೆ. ಇದರಲ್ಲಿ ಸಿನಿಮಾ ಹಾಗೂ ಸೀರಿಯಲ್ ಚಿತ್ರೀಕರಣ ನಡೆಯುತ್ತದೆ. ಸದ್ಯ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ 'ನಿನಗಾಗಿ' ಧಾರಾವಾಹಿ ಚಿತ್ರೀಕರಣ ನಡೆಯುತ್ತಿದೆ.

ಕನ್ನಡ ಜನಪ್ರಿಯ ನಿರೂಪಕ ನಿರಂಜನ್ ದೇಶಪಾಂಡೆ ಅವರು ಕೂಡ ಹೋಟೆಲ್ ಉದ್ಯಮ ನಡೆಸುತ್ತಿದ್ದಾರೆ. ಇವರು ಚಿಕ್ಕಮಗಳೂರಿನಲ್ಲಿ ಬೆಟ್ಟ ಗುಡ್ಡ ರಿಟ್ರೀಟ್ ಎಂಬ ರೆಸಾರ್ಟ್ ಹೊಂದಿದ್ದಾರೆ. ಬೆಟ್ಟ-ಗುಡ್ಡಗಳ ಮದ್ಯವಿರುವ ಈ ರೆಸಾರ್ಟ್ ಕೂಡ ವೀಕೆಂಡ್‌ನಲ್ಲಿ ಕಾಲ ಕಳೆಯಲು ಸೂಕ್ತವಾಗಿದೆ.