ಹೆಚ್ಚು ರಿಮೇಕ್ ಸಿನಿಮಾಗಳನ್ನು ಮಾಡಿರುವ ಕನ್ನಡದ ನಿರ್ದೇಶಕರ ಪಟ್ಟಿ ಇಲ್ಲಿದೆ.

ನಿರ್ದೇಶಕ ಕೆ ಮಾದೇಶ ಅವರು ಅತಿಹೆಚ್ಚು ರಿಮೇಕ್ ಸಿನಿಮಾಗಳನ್ನು ಮಾಡಿದ್ದಾರೆ. ಇವರ ನಿರ್ದೇಶನದ ಮೊದಲ ಸಿನಿಮಾ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕನಾಗಿ ನಟಿಸಿರುವ ಗಜ. ಇದು ತೆಲುಗಿನ ಭದ್ರ ಚಿತ್ರದ ರಿಮೇಕ್. ರಿಮೇಕ್ ಆದರೂ ಕೂಡ ಗಜ ಚಿತ್ರ ಒರಿಜಿನಲ್ ಸಿನಿಮಾವನ್ನೇ ಹಿಂದಿಕ್ಕಿ ಬ್ಲಾಕ್‌ಬಸ್ಟರ್ ಆಗಿತ್ತು. ನಂತರ ಬಂದ ಮಾದೇಶ್ ಆಕ್ಷನ್ ಕಟ್ ಹೇಳಿರುವ ರಾಮ್, ಬೃಂದಾವನ, ಪವರ್, ಹುಡುಗರು, ರಾಜ್‌ವಿಷ್ಣು ಈ ಎಲ್ಲಾ ಚಿತ್ರಗಳು ರಿಮೇಕ್‌ಗಳೇ. ರಿಮೇಕ್ ಸಿನಿಮಾಗಳನ್ನು ತಮ್ಮ ಸ್ಟೈಲ್‌ನಲ್ಲೇ ಮಾಡಿರುವ ಇವರು, ಯಶಸ್ವಿ ಕೂಡ ಆಗಿದ್ದಾರೆ. 

ಫ್ರೆಂಡ್ಸ್ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಪ್ರವೇಶಿಸಿದ ನಿರ್ದೇಶಕ ಎಂ.ಡಿ.ಶ್ರೀಧರ್ ಕೂಡ ಹಲವು ರಿಮೇಕ್ ಚಿತ್ರಗಳನ್ನ ಮಾಡಿ ಗೆದ್ದಿದ್ದಾರೆ. ಇವರು ಆಕ್ಷನ್ ಕಟ್ ಹೇಳಿರುವ ಒಡೆಯ ಪೋರ್ಕಿ, ಜಾಲಿಡೇಸ್, ಬುಲ್ ಬುಲ್, ಚೆಲ್ಲಾಟ ಸಿನಿಮಾಗಳು ಬೇರೆ ಭಾಷೆಯ ರಿಮೇಕ್ ಚಿತ್ರಗಳಾಗಿವೆ. 

ಕನ್ನಡ ಚಿತ್ರರಂಗದಲ್ಲಿ ಪ್ರಮುಖ ನಿರ್ದೇಶಕರಾಗಿ ಗುರುತಿಸಿಕೊಂಡಿರುವ ಗುರುದೇಶಪಾಂಡೆ ಕೂಡ ದಕ್ಷಿಣ ಭಾರತದ ಹಲವು ಇತರ ಭಾಷೆಯ ಸಿನಿಮಾಗಳನ್ನು ಕನ್ನಡಕ್ಕೆ ರಿಮೇಕ್ ಮಾಡಿದ್ದಾರೆ. ಯಶ್ ನಟನೆಯ ರಾಜಾಹುಲಿ, ರುದ್ರತಾಂಡವ, ಜಾನ್ ಜಾನಿ ಜನಾರ್ಧನ್, ಸಂಹಾರ, ಪಡ್ಡೆಹುಲಿ ಈ ಎಲ್ಲಾ ಸಿನಿಮಾಗಳು ಬೇರೆ ಭಾಷೆಯ ರಿಮೇಕ್‌ಗಳಾಗಿವೆ. 

ಶರಣ್ ನಟನೆಯ 'ವಿಕ್ಟರಿ' ನಿರ್ದೇಶಕ ನಂದ ಕಿಶೋರ್ ಆಕ್ಷನ್ ಕಟ್ ಹೇಳಿರುವ ಮೊದಲ ಸಿನಿಮಾ. 2013ರಲ್ಲಿ ತೆರೆಗೆ ಬಂದ ಈ ಸಿನಿಮಾ ನಂತರ ತೆಲುಗಿಗೆ ರಿಮೇಕ್ ಆಯಿತು. ನಂತರ ನಂದ ಕಿಶೋರ್ ರಿಮೇಕ್ ಸಿನಿಮಾಗಳನ್ನು ಮಾಡಲು ಆರಂಭಿಸಿದರು. ಇವರು ಆಕ್ಷನ್ ಕಟ್ ಹೇಳಿರುವ ಅಧ್ಯಕ್ಷ, ರನ್ನ, ಮುಕುಂದ ಮುರಾರಿ, ಬೃಹಸ್ಪತಿ ರಿಮೇಕ್ ಸಿನಿಮಾಗಳು.  

ಸಾಧುಕೋಕಿಲ ಅತ್ಯುತ್ತಮ ನಟ ಮಾತ್ರವಲ್ಲದೇ ನಿರ್ದೇಶಕ ಕೂಡ ಹೌದು. ಇವರ ನಿರ್ದೇಶನದ ಮೊದಲ ಸಿನಿಮಾ ರಕ್ತಕಣ್ಣೀರು. ತಮಿಳಿನ ರಿಮೇಕ್ ಆಗಿದ್ದ ಈ ಚಿತ್ರದಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ನಾಯಕನಾಗಿ ಅಭಿನಯಿಸಿದ್ದರು. ನಂತರ ಅನಾಥರು, ಸೂಪರ್ ರಂಗ, ಶೌರ್ಯ, ಭಲೇ ಜೋಡಿ ಹೀಗೆ ಅನೇಕ ರಿಮೇಕ್ ಸಿನಿಮಾಗಳನ್ನು ಮಾಡಿದ್ದಾರೆ. ಜೊತೆಗೆ ತೀರ್ಥ ಎಂಬ ಸಿನಿಮಾಗೆ ಅವರೇ ಕಥೆ ಬರೆದಿದ್ದಾರೆ. 

ಎಸ್ ನಾರಾಯಣ್ ಕನ್ನಡ ಚಿತ್ರರಂಗದ ಪ್ರತಿಭಾವಂತ ನಿರ್ದೇಶಕ. ಇವರು ಅನೇಕ ಮರೆಯಲಾಗದ ಸಿನಿಮಾಗಳನ್ನು ನೀಡಿದ್ದಾರೆ. ರವಿಮಾಮ, ಸೂರ್ಯವಂಶ, ಸಿಂಹಾದ್ರಿಯ ಸಿಂಹ, ಗ;ಆಟೆ ಅಳಿಯಂದಿರು, ಮೌರ್ಯ ಹೀಗೆ ೧೨ಕ್ಕೂ ಹೆಚ್ಚು ರಿಮೇಕ್ ಸಿನಿಮಾಗಳನ್ನು ಮಾಡಿದ್ದಾರೆ. ಇದರ ಜೊತೆಗೆ ಅನೇಕ ಉತ್ತಮ ಸ್ವಂತಿಕೆ ಸಿನಿಮಾಗಳನ್ನು ನೀಡಿದ್ದಾರೆ. ಇದನ್ನು ನಾವು ಮರೆಯುವಂತಿಲ್ಲ. 

ಕನ್ನಡ ಚಿತ್ರರಂಗದ ಪ್ರಮುಖ ನಿರ್ದೇಶಕರಲ್ಲಿ ಒಬ್ಬರಾಗಿರುವ ಓಂ ಪ್ರಕಾಶ್ ರಾವ್ ಕೂಡ ಹಲವು ರಿಮೇಕ್ ಸಿನಿಮಾಗಳನ್ನು ಮಾಡಿ ಗೆದ್ದಿದ್ದಾರೆ. ಇವರ ನಿರ್ದೇಶನದ ಹುಚ್ಚ, ನಿನ್ನೆ ಪ್ರೀತಿಸುವೆ, ಕಲಾಸಿಪಾಳ್ಯ, ಸಾಹುಕಾರ, ಅಣ್ಣ್ರಾವ್ರು, ಮಂಡ್ಯ, ಪ್ರಿನ್ಸ್, ಚಂದ್ರಲೇಖಾ ಸೇರಿದಂತೆ ಹಲವು ಸಿನಿಮಾಗಳು ಬೇರೆ ಭಾಷೆಯ ರಿಮೇಕ್‌ಗಳಾಗಿವೆ.  

ಸ್ಯಾಂಡಲ್‌ವುಡ್‌ನ ಕ್ರೇಜಿಸ್ಟಾರ್ ರವಿಚಂದ್ರನ್ ಅವರು ಬಹುಮುಖ ಪ್ರತಿಭೆ. ನಟನೆ, ನಿರ್ಮಾಣ, ನಿರ್ದೇಶನ, ಸಾಹಿತ್ಯ, ಸಂಗೀತ, ಸಂಕಲನ ಮುಂತಾದ ಚಿತ್ರರಂಗದ ವಿವಿಧ ಪ್ರಕಾರಗಳಲ್ಲಿ ಕೆಲಸ ಮಾಡಿದ್ದಾರೆ. ರವಿಚಂದ್ರನ್ ಅನೇಕ ಸಿನಿಮಾಗಳಿಗೆ ಆಕ್ಷನ್ ಕಟ್ ಹೇಳಿದ್ದಾರೆ. ಈ ಪೈಕಿ ರಣಧೀರ, ಅಂಜದಗಂಡು, ಯುದ್ಧಕಾಂಡ, ಯುಗಪುರುಷ ಸೇರಿದಂತೆ ಹಲವು ಸಿನಿಮಾಗಳು ರಿಮೇಕ್ ಆಗಿವೆ. 

'ಕಿಚ್ಚ' ಎಂದೇ ಖ್ಯಾತಿ ಪಡೆದಿರುವ ಸುದೀಪ್  ಸುದೀಪ್ ಕೇವಲ ನಟ ಮಾತ್ರ ಅಲ್ಲ, ಪ್ರತಿಭಾವಂತ ನಿರ್ದೇಶಕ ಕೂಡ. ಅಭಿನಯ ಚಕ್ರವರ್ತಿ ಮೊದಲ ಬಾರಿಗೆ ನಿರ್ದೇಶನ ಮಾಡಿದ ಚಿತ್ರ ಮೈ ಆಟೋಗ್ರಾಫ್. ನಿರ್ದೇಶನ ಮಾತ್ರವಲ್ಲದೇ ಕಿಚ್ಚ ಕ್ರಿಯೇಷನ್ಸ್ ಅಡಿಯಲ್ಲಿ ನಿರ್ಮಾಣ ಕೂಡ ಮಾಡಿದ್ದರು. ಈ ಚಿತ್ರ ಉತ್ತಮ ಪ್ರತಿಕ್ರಿಯೆ ಪಡೆದು 175 ದಿನಗಳ ಕಾಲ ಪ್ರದರ್ಶನ ಕಂಡಿತ್ತು. ನಂತರ #73 ಶಾಂತಿನಿವಾಸ, ವೀರ ಮದಕರಿ, ವೀರ ಮದಕರಿ ,ಮಾಣಿಕ್ಯ ಸಿನಿಮಾಗಳಿಗೆ ಆಕ್ಷನ್ ಕಟ್ ಹೇಳಿದರು. ಇವೆಲ್ಲವೂ ರಿಮೇಕ್ ಚಿತ್ರಗಳೇ.