Sandalwood Stars In Cop Roles:ಸ್ಯಾಂಡಲ್‌ವುಡ್‌ನ ಪವರ್‌ಫುಲ್ ಪೊಲೀಸ್ ಯಾರು?

ಪೊಲೀಸ್ ಪಾತ್ರಕ್ಕೆ ಹೇಳಿ ಮಾಡಿಸಿದ ಸ್ಟಾರ್ ನಟ ಅಂದರೆ ಅದು ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್. ಅದರಲ್ಲೂ ಡೈಲಾಗ್ ಡೆಲಿವರಿಯಲ್ಲಿ ಕಿಚ್ಚನಂತಹ ಪವರ್ ಬೇರೆ ಯಾರಿಗಿಲ್ಲ. ಸುದೀಪ್ ಮೊದಲ ಬಾರಿ ಖಾಕಿ ತೊಟ್ಟಿದ್ದು ಶಿವಮಣಿ ನಿರ್ದೇಶನದಲ್ಲಿ ಮೂಡಿಬಂದ `ತಿರುಪತಿ' ಚಿತ್ರದಲ್ಲಿ. ನಂತರ ಹುಲಿ, ವೀರ ಮದಕರಿ, ಕೆಂಪೇಗೌಡ, ವರದನಾಯಕ ಹಾಗೂ ಕಬ್ಜ ಸಿನಿಮಾಗಳಲ್ಲಿ ಪೊಲೀಸ್ ಅಧಿಕಾರಿಯಾಗಿ ಮಿಂಚಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಇರುವ ಪರ್ಸನಾಲಿಟಿ ಹಾಗೂ ಹೈಟ್‌ಗೆ ಅವರು ಖಾಕಿ ಡ್ರೆಸ್ ಹಾಕಿದರೆ ನೋಡೋದೆ ಚೆಂದ. ದರ್ಶನ್ ಮೊದಲ ಬಾರಿ ಖಾಕಿ ಡ್ರೆಸ್ ತೊಟ್ಟಿದ್ದು, 2005ರಲ್ಲಿ ತೆರೆಕಂಡ ಅಯ್ಯ ಸಿನಿಮಾದಲ್ಲಿ. ಇದಾದ ಬಳಿಕ ಸ್ನೇಹಿತರು ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. 2015ರಲ್ಲಿ ಬಿಡುಗಡೆಯಾದ ಐರಾವತ ಚಿತ್ರದಲ್ಲೂ ಪೊಲೀಸ್ ಅದಿಕಾರಿಯಾಗಿ ಕಾಣಿಸಿಕೊಂಡಿದ್ದರು. 

ಡೈಲಾಗ್ ಕಿಂಗ್ ಸಾಯಿಕುಮಾರ್ ಹೆಸರು ಕೇಳಿದರೆ ಸಾಕು, ಕನ್ನಡ ಪ್ರೇಕ್ಷಕರ ಮೈ ರೋಮಾಂಚನವಾಗುತ್ತದೆ. ಕಾರಣ ಪೊಲೀಸ್ ಹಾಗೂ ವಿಲನ್ ಪಾತ್ರಗಳಲ್ಲಿ ಕೇಳಿಬರುತ್ತಿದ್ದ ಅವರ ಗಂಡು ಧ್ವನಿ ಹಾಗೂ ಡೈಲಾಗ್ ಡೆಲಿವರಿ ಶೈಲಿ. ಒಂದು ಕಾಲದಲ್ಲಿ ಸಾಯಿಕುಮಾರ್‌ ಅವರನ್ನು ಹುಡುಕಿಕೊಂಡು ಸಾಲು-ಸಾಲು ಪೊಲೀಸ್ ಪಾತ್ರಗಳೇ ಬಂದವು. ಸಾಯಿಕುಮಾರ್ ಅಂದರೆ ಕನ್ನಡಿಗರಿಗೆ ಪೊಲೀಸ್. 1996ರಲ್ಲಿ ತೆರೆಕಂಡ ಕನ್ನಡದ `ಪೊಲೀಸ್ ಸ್ಟೋರಿ' ಚಿತ್ರದಿಂದ ನಾಯಕನಾಗಿ ಬೆಳ್ಳಿತೆರೆಗೆ ಕಾಲಿಟ್ಟ ಇವರು, ಮೊದಲ ಸಿನಿಮಾದಲ್ಲೇ ಯಶಸ್ಸು ಗಳಿಸಿದರು. ನಂತರ ಅಗ್ನಿ ಐಪಿಎಸ್, ಲಾಕಪ್‌ಡೆತ್, ಪೊಲೀಸ್ ಸ್ಟೋರಿ ೨ ಸೇರಿದಂತೆ ಹಲವು ಸಿನಿಮಾಗಳ ಮೂಲಕ ಖ್ಯಾತಿ ಗಳಿಸಿದರು.

ಸ್ಯಾಂಡಲ್‌ವುಡ್ ಬ್ಲ್ಯಾಕ್ ಕೋಬ್ರಾ ದುನಿಯಾ ವಿಜಯ್ 'ಶಂಕರ್ ಐಪಿಎಸ್' ಸಿನಿಮಾದ ಪೊಲೀಸ್ ಪಾತ್ರದ ಮೂಲಕ ಸಿಕ್ಸ್‌ಪ್ಯಾಕ್ ಶೋ ಕೊಟ್ಟಿದ್ದರು. ಜೊತೆಗೆ ಆಕ್ಷನ್ ಹಬ್ಬವನ್ನೇ ಮಾಡಿದ್ದರು. ಆದರೆ, ದುನಿಯಾ ವಿಜಯ ಅವರಿಗೆ ಪೊಲೀಸ್ ಖದರ್ ಅಷ್ಟಾಗಿ ಸೂಟಾಗಿರಲಿಲ್ಲ. 

ಕನ್ನಡಿಗರ ಕಣ್ಮಣಿ ಡಾ.ರಾಜ್‌ಕುಮಾರ್ ಅವರ ಕೊನೆಯ ಸಿನಿಮಾ 'ಶಬ್ಧವೇದಿ'ಯಲ್ಲಿ ಪೊಲೀಸ್ ಆಫೀಸರ್ ಆಗಿ ಮಿಂಚಿದ್ದು. ಕರ್ತವ್ಯ ನಿಷ್ಠೆಗೆ ಮಾಧರಿಯಾಗಿದ್ದು, ಅಭಿಮಾನಿಗಳಿಗೆ ಇವತ್ತಿಗೂ ಥ್ರಿಲ್ಲಿಂಗ್ ಅನುಭವ. ಇದಕ್ಕೂ ಮುನ್ನ ಅವರು ಆಕಸ್ಮಿಕ, ಸಿಐಡಿ ೯೯೯, ಗಂಧದ ಗುಡಿ ಸಿನಿಮಾಗಳಲ್ಲಿ ಪೊಲೀಸ್ ಅದಿಕಾರಿಯಾಗಿ ಮಿಂಚಿದ್ದರು. 

ಶಂಕರ್‌ ನಾಗ್ ಕನ್ನಡ ಚಿತ್ರರಂಗದ ಅಪರೂಪದ ಪ್ರತಿಭೆ. ಅವರು ಕೇವಲ ನಟನಾಗಿ ಮಾತ್ರವಲ್ಲದೇ, ನಿರ್ದೇಶಕನಾಗಿ ಕೂಡ ತಮ್ಮದೇಯಾದ ಛಾಪು ಮೂಡಿಸಿದ್ದಾರೆ. ಕನ್ನಡ ಚಿತ್ರರಂಗಕ್ಕೆ ಹೊಸದಿಕ್ಕು ನೀಡಿದ ಶಂಕರ್ ನಾಗ್, ಸಾಂಗ್ಲಿಯಾನ ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದರು.  ಸಿನಿಮಾ ಬಾಕ್ಸಾಫೀಸ್‌ನಲ್ಲೂ ಭಾರೀ ಯಶಸ್ಸು ಗಳಿಸಿತ್ತು.

ನಟ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಕೋಟ್ಯಂತರ ಜನರ ಆರಾಧ್ಯ ದೈವ. ಅವರು ಪ್ರಕಾಶ್ ನಿರ್ದೇಶನದ ವಂಶಿ ಚಿತ್ರದಲ್ಲಿ ಪೊಲೀಸ್ ಅಧಿಕಾರಿಯಾಗಬೇಕೆಂಬ ಕನಸು ಹೊಂದಿದ್ದ ಯುವಕನಾಗಿ ನಟಿಸಿದ್ದರು. ಆದರೆ, 2015ರಲ್ಲಿ ತೆರೆಕಂಡ ರಣ ವಿಕ್ರಮ ಸಿನಿಮಾದಲ್ಲಿ ಖಡಕ್ ಪೊಲೀಸ್ ಅದಿಕಾರಿಯಾಗಿ ಮಿಂಚಿದ್ದರು. 

ಸಾಹಸ ಸಿಂಹ ಡಾ. ವಿಷ್ಣುವರ್ಧನ್ ಕೂಡ ಪೊಲೀಸ್ ಪಾತ್ರಗಳಲ್ಲಿ ಮೋಡಿ ಮಾಡಿದ ಕನ್ನಡಿಗರ ಕಣ್ಮಣಿ. ಪೊಲೀಸ್ ಪಾತ್ರಕ್ಕೆ ತಕ್ಕ ಘರ್ಜನೆ ಮಾಡ್ತಿದ್ದ ವಿಷ್ಣು ದಾದಾ, ಎಂತಹ ಪಾತ್ರಕ್ಕೂ ಹೊಂದಿಕೊಳ್ಳುತ್ತಿದ್ದರು. ಇವರು ಪೊಲೀಸ್ ಮತ್ತು ದಾದಾ, ನಿಷ್ಕರ್ಷ, ಕದಂಬ, ಜಯಸಿಂಹ ಮುಂತಾದ ಸಿನಿಮಾಗಳಲ್ಲಿ ಪೊಲೀಸ್ ಅದಿಕಾರಿಯಾಗಿ ಮಿಂಚಿದ್ದರು. 

ರಿಯಲ್ ಸ್ಟಾರ್ ಉಪೇಂದ್ರ ಕೂಡ ಪೊಲೀಸ್ ಪಾತ್ರಗಳನ್ನ ಎಂಜಾಯ್ ಮಾಡಿದ ನಟ. ಈ ಹಿಂದೆ ಆರಕ್ಷಕ ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿಯಾಗಿ ಮಿಂಚಿದ್ದ ಉಪ್ಪಿ, ಕಳೆದ ವರ್ಷ ತೆರೆಕಂಡ ಕಬ್ಜದಲ್ಲೂ ಖಾಕಿ ತೊಟ್ಟಿದ್ದರು. ಉಪ್ಪಿಯ ಟಿಪಿಕಲ್ ಸ್ಟೈಲ್‌ಗೆ ಪೊಲೀಸ್ ಪಾತ್ರಕ್ಕಿಂತ ಬೇರೆ ಪಾತ್ರಗಳೇ ಸೂಪರ್ ಅಂತಾರೆ ಸಿನಿ ಪಂಡಿತರು.

ಕರುನಾಡ ಚಕ್ರವರ್ತಿ, ಸ್ಯಾಂಡಲ್‌ವುಡ್ ಕಿಂಗ್, ಸೆಂಚುರಿ ಸ್ಟಾರ್, ಹ್ಯಾಟ್ರಿಕ್ ಹೀರೊ ಹೀಗೆ ಹಲವು ಬಿರುದುಗಳಿಂದ ಕರೆಸಿಕೊಳ್ಳುವ ಶಿವರಾಜ್‌ಕುಮಾರ್, ಮೂರು ದಶಕಗಳಿಂದ ಸುಮಾರು 125ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ತಮ್ಮದೇಯಾದ ವಿಭಿನ್ನ ನಟನೆ, ಡ್ಯಾನ್ಸ್ ಮೂಲಕ ಇಂದಿಗೂ ಯುವಕರಂತೆ ಹೆಜ್ಜೆ ಹಾಕುವ ಶಿವಣ್ಣನ ಎನರ್ಜಿಗೆ ಸರಿಸಾಟಿ ಯಾರು ಇಲ್ಲ. ಇವರು  ಟಗರು, ರುಸ್ತುಂ ಸಿನಿಮಾಗಳಲ್ಲಿ ಖಡಕ್ ಪೋಲಿಸ್ ಅಧಿಕಾರಿಯಾಗಿ ನಟಿಸಿದ್ದರು.