Tagaru Palya Ott Release: ಇಂದಿನಿಂದ ಅಮೇಜಾನ್ ಪ್ರೈಮ್‌ನಲ್ಲಿ 'ಟಗರುಪಲ್ಯ' ಸ್ಟೀಮಿಂಗ್

  ಉಮೇಶ್ ಕೆ ಕೃಪಾ ನಿರ್ದೇಶನದ ಟಗರುಪಲ್ಯ ಸಿನಿಮಾ 2023ರ ಅಕ್ಟೋಬರ್ 27ರಂದು ಚಿತ್ರಮಂದಿಗರಗಳಲ್ಲಿ ರಿಲೀಸ್ ಆಗಿತ್ತು. ಸಿನಿಮಾವನ್ನು 3 ಲಕ್ಷಕ್ಕೂ ಹೆಚ್ಚು ಜನ ನೋಡಿದ್ದಾರೆ ಎಂದು ಸ್ವತಃ ನಿರ್ಮಾಪಕರಾದ ಧನಂಜಯ್ ಮಾಹಿತಿ ನೀಡಿದ್ದರು. ಇದೀಗ ನಾಗಭೂಷಣ್ ಎನ್‌.ಎಸ್ ಮತ್ತು ಅಮೃತಾ ಪ್ರೇಮ್ ಮೊದಲ ಬಾರಿಗೆ ನಾಯಕ-ನಾಯಕಿಯಾಗಿ ನಟಿಸಿರುವ  'ಟಗರುಪಲ್ಯ' ಚಿತ್ರ ಇಂದು (ಡಿಸೆಂಬರ್ 8) ಅಮೇಜಾನ್ ಪ್ರೈಮ್‌ನಲ್ಲಿ ಬಿಡುಗಡೆಯಾಗಿದೆ.       

ಟಗರುಪಲ್ಯ ಒಂದು ಹರಕೆಯ ಕಥೆ. ಈ ಚಿತ್ರದ ಕಥೆ ಆರಂಭವಾಗುವುದು ಸೂರ್ಯ ಹುಟ್ಟೋಕು ಮುಂಚೆ ಹಾಗೂ ಮುಗಿಯುವುದು ಸಂಜೆ ಮಳೆ ಜೋರಾಗಿ ಹೊಯ್ಯುವ ಹೊತ್ತಿಗೆ ಕುಟುಂಬವೊಂದು ಊರ ದೇವರಿಗೆ ಹರಕೆ ತೀರಿಸಲು ಹೋದಾಗ ಏನೆಲ್ಲಾ ನಡೆಯುತ್ತೆ ಅನ್ನೋದೆ ಸಿನಿಮಾ ಜೀವಾಳ. ಇದರಲ್ಲಿ ಹೊಟ್ಟೆ ಹುಣ್ಣಾಗಿಸುವಷ್ಟು ನಗು, ಪ್ರೇಮಿಗಳ ವೇದನೆ, ತಂದೆಯ ಚಿಂತನೆ, ತಲೆ ಒದರದ ಟಗರಿನ ರೋಧನೆ ಎಲ್ಲವೂ ಇದೆ. 

'ಟಗರು ಪಲ್ಯ' ಹಳ್ಳಿ ಸೊಗಡಿನ ಚಿತ್ರ. ಪಕ್ಕಾ ಗ್ರಾಮೀಣ ಕಥೆ, ಹಳ್ಳಿ ಭಾಷೆ, ಹಳ್ಳಿ ಸೊಗಡನ್ನು ತೋರಿಸಲಾಗಿದೆ. ಕೆಲ ಹಳ್ಳಿಗರಿಗೆ ಸಿಟಿ ಬದುಕಿನ ಬಗ್ಗೆ ಇರುವ ಮೋಹ, ಪ್ರತಿಷ್ಠೆಗಾಗಿ ಮದುವೆಯನ್ನು ಅದ್ಧೂರಿಯಾಗಿ ಮಾಡುವ ಪರಿಪಾಠದ ಬಗ್ಗೆ ತಿಳಿವಳಿಕೆಯನ್ನು ಚಿತ್ರದಲ್ಲಿ ಮೂಡಿಸಲಾಗಿದೆ. ಜೊತೆಗೆ ಗ್ರಾಮೀಣ ಜನರ ಧಾರ್ಮಿಕ ನಂಬಿಕೆಗಳು ಎಷ್ಟೊಂದು ಮುಗ್ಧತೆಯಿಂದ ಕೂಡಿರುತ್ತವೆ ಎಂಬುದನ್ನು 'ಟಗರುಪಲ್ಯ'ದಲ್ಲಿ ಬಹಳ ಸೊಗಸಾಗಿ ತೋರಿಸಲಾಗಿದೆ. 

ದೇವನೂರು ಮಹಾದೇವ ಅವರ 'ಸಂಬಂಜ ಅನ್ನೋದು ದೊಡ್ದು ಕನಾ' ಎನ್ನುವ ಮಾತನ್ನು 'ಟಗರುಪಲ್ಯ' ಸಿನಿಮಾದಲ್ಲಿ ಹೇಳುವ ಪ್ರಯತ್ನ ಮಾಡಲಾಗಿದೆ. ಸಣ್ಣ ಎಳೆಯನ್ನಿಟ್ಟುಕೊಂಡು 2 ಗಂಟೆ ಸಿನಿಮಾ ಮಾಡುವುದು ಕಷ್ಟ. ಆದರೆ ಆ ಪ್ರಯತ್ನದಲ್ಲಿ ಉಮೇಶ್ ಕೆ ಕೃಪ ಬಹುತೇಕ ಸಕ್ಸಸ್ ಕಂಡಿದ್ದರು. ಸಿನಿಮಾ ನೋಡಿದ ಪ್ರೇಕ್ಷಕರು ನೋಡಿ ಮೆಚ್ಚಿಕೊಂಡಿದ್ದರು. ಥಿಯೇಟರ್‌ನಲ್ಲಿ ಸಿನಿಮಾ ನೋಡಲು ಆಗದೇ ಇದ್ದವರು, ಇದೀಗ ಒಟಿಟಿಯಲ್ಲಿ ವೀಕ್ಷಿಸಬಹುದು.

ಟಗರು ಪಲ್ಯ ಸಿನಿಮಾ ಪ್ಲಸ್ ಪಾಯಿಂಟ್ ಪಾತ್ರವರ್ಗ. ನಾಗಭೂಷಣ, ಅಮೃತಾ ಪ್ರೇಮ್, ರಂಗಾಯಣ ರಘು, ತಾರಾ, ಬಿರಾದರ್ ಸೇರಿದಂತೆ ಎಲ್ಲರೂ ಚಿತ್ರದಲ್ಲಿ ಅಭಿನಯ ಅದ್ಭುತವಾಗಿದೆ.