ಸ್ಯಾಂಡಲ್‌ವುಡ್ ಕಾಮಿಡಿ ಕಿಂಗ್ ಸಾಧು ಕೋಕಿಲ ನಿರ್ದೇಶನದ ಟಾಪ್ 5 ಹಿಟ್ ಸಿನಿಮಾಗಳಿವು!

ಸಾಧು ಕೋಕಿಲ ನಿರ್ದೇಶನದ ಮೊದಲ ಚಿತ್ರ ರಕ್ತ ಕಣ್ಣೀರು. ಇದು ತಮಿಳಿನ 'ರಕ್ತ ಕಣ್ಣೀರ್' ಚಿತ್ರದ ರಿಮೇಕ್. ಈ ಸಿನಿಮಾದಲ್ಲಿ ಉಪೇಂದ್ರ ಹೀರೊ ಆಗಿ ನಟಿಸೋದು ಮಾತ್ರವಲ್ಲದೇ ಚಿತ್ರಕಥೆ, ಸಂಭಾಷಣೆ ಬರೆದಿದ್ದರು. ಮೋಹನನಾಗಿ ಉಪ್ಪಿ ನಟನೆಯನ್ನು ಯಾರು ಮರೆಯಲು ಸಾಧ್ಯವಿಲ್ಲ. ಡೈಲಾಗ್‌ಗಳಂತೂ ಒಂದಕ್ಕಿಂತ ಒಂದು ಸೂಪರ್. ಕಾಂತ ಆಗಿ ರಮ್ಯಾಕೃಷ್ಣ ಚಿತ್ರದಲ್ಲಿ ನಟಿಸಿದ್ದರು. 2003ರಲ್ಲಿ ಸಿನಿಮಾ ಸೆನ್ಸೇಷನ್ ಕ್ರಿಯೇಟ್ ಮಾಡಿತ್ತು.

 'ಸುಂಟರಗಾಳಿ' ಸಿನಿಮಾದಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಮತ್ತು ರಕ್ಷಿತಾ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ದರು. 2006ರಲ್ಲಿ ತೆರೆಕಂಡ ಈ ಚಿತ್ರವನ್ನು ಸಾಧು ಕೋಕಿಲ ನಿರ್ದೇಶನ ಮಾಡಿದ್ದರು. ಸಿನಿಮಾದಲ್ಲಿ ಜಿ.ಪಿ.ರಾಜರತ್ನಂರವರ `ನೀ ನನ್ನಟ್ಟಿ' ಹಾಡನ್ನು ಬಳಸಿಕೊಳ್ಳಲಾಗಿತ್ತು. ಚಿತ್ರದಲ್ಲಿ ಸಾಧು ಕೋಕಿಲ, ಬುಲೆಟ್‌ ಪ್ರಕಾಶ್‌, ರಂಗಾಯಣ ರಘು ಮುಂತಾದವರ ಕಾಮಿಡಿ, ಮಾಸ್ ಡೈಲಾಗ್, ದರ್ಶನ್-ರಕ್ಷಿತಾ ಜೋಡಿ, ತಾಯಿ-ಮಗನ ಸೆಂಟಿಮೆಂಟ್ ಪ್ರೇಕ್ಷಕರಿಗೆ ಸಖತ್ ಇಷ್ಟವಾಗಿತ್ತು.

ತಮಿಳಿನ ಪೀತಮಗನ್ ಚಿತ್ರದ ರಿಮೇಕ್ ಆದ 'ಅನಾಥರು' ಸಿನಿಮಾದಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್, ರಿಯಲ್ ಸ್ಟಾರ್ ಉಪೇಂದ್ರ, ರಾಧಿಕಾ ಕುಮಾರಸ್ವಾಮಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಉಪ್ಪಿ ಸವಾಲಿನ ಪಾತ್ರವೊಂದನ್ನು ನಿರ್ವಹಿಸಿದ್ದರು. ಹುಚ್ಚ ರುದ್ರ' ಪಾತ್ರದಲ್ಲಿ ಉಪೇಂದ್ರ ಅವರ ಅಭಿನಯಕ್ಕೆ ಸಿನಿರಸಿಕರು ಫಿದಾ ಆಗಿದ್ದರು. ಒಟ್ಟಾರೆ ಸಾಧು ಕೋಕಿಲ ನಿರ್ದೇಶನದ ಅನಾಥರು ಚಿತ್ರದಲ್ಲಿ ವಿಶಿಷ್ಟ ಪಾತ್ರದಲ್ಲಿ ಉಪೇಂದ್ರರ ನಟನೆ ಮತ್ತು ದರ್ಶನ್-ರಾಧಿಕಾ ಕಾಂಬಿನೇಶನ್ ಗಮನ ಸೆಳೆದಿತ್ತು.

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಮತ್ತು ಥ್ರಿಲ್ಲರ್ ಮಂಜು ಮುಖ್ಯಪಾತ್ರದಲ್ಲಿ ನಟಿಸಿದ್ದ 'ಪೊಲೀಸ್ ಸ್ಟೋರಿ 3' ಚಿತ್ರವನ್ನು ಸಾಧು ಕೋಕಿಲ ಸೇರಿದಂತೆ ಆರು ಜನ ನಿರ್ದೇಶಕರು ಕೇವಲ 12 ಘಂಟೆಗಳಲ್ಲಿ ನಿರ್ದೇಶನ ಮಾಡಿದ್ದರು. ಎರಡುವರೆ ಗಂಟೆಗಳ ಚಿತ್ರವನ್ನು 12 ಘಂಟೆಗಳಲ್ಲಿ ನಿರ್ದೇಶಿಸಿದ್ದರಿಂದ ಈ ಚಿತ್ರ ಲಿಮ್ಕಾ ಮತ್ತು ಗಿನ್ನಿಸ್ ರೆಕಾರ್ಡ್ ನಲ್ಲಿ ಸ್ಥಾನ ಪಡೆದಿತ್ತು.

2008ರಲ್ಲಿ ಬಿಡುಗಡೆಯಾದ ಡೈನಾಮಿಕ್ ಪ್ರಿನ್ಸ್ ಪ್ರಜ್ವಲ್ ದೇವರಾಜ್, ಸುನೈನಾ ಹಾಗೂ ಗಾಯಿತ್ರಿ ನಟನೆಯ 'ಗಂಗೆ ಬಾರೆ ತುಂಗೆ ಬಾರೆ' ಚಿತ್ರ ಪ್ರೇಕ್ಷಕರ  ಗಮನ ಸೆಳೆದಿತ್ತು. ಇದೊಂದು ತ್ರಿಕೋನ ಪ್ರೇಮಕಥೆ ಹೊಂದಿರುವ ಸಿನಿಮಾವಾಗಿದ್ದು, ಸಾಧು ಕೋಕಿಲ ಆಕ್ಷನ್ ಕಟ್ ಹೇಳಿದ್ದರು. ವಿ. ನಾಗೇಂದ್ರ ಪ್ರಸಾದ್, ಜಯಂತ್ ಕಾಯ್ಕಿಣಿ, ಕೆ ಕಲ್ಯಾಣ್ ಸಾಹಿತ್ಯದಲ್ಲಿ ಮೂಡಿಬಂದ ಹಾಡುಗಳಿಗೆ ಸಾಧು ಕೋಕಿಲಾ ಸಂಗೀತ ನೀಡಿದ್ದರು.