ನೀವು ಮಿಸ್ ಮಾಡದೇ ನೋಡಲೇಬೇಕಾದ ಸ್ಯಾಂಡಲ್‌ವುಡ್‌ನ ಟಾಪ್ 5 ಮಿಸ್ಟರಿ ಸಿನಿಮಾಗಳಿವು!

2013ರಲ್ಲಿ ಬಂದ ಪವನ್ ಕುಮಾರ್ ನಿರ್ದೇಶನದ ಸೂಪರ್ ಹಿಟ್ 'ಲೂಸಿಯಾ' ಚಿತ್ರದಲ್ಲಿ ಸತೀಶ್ ನೀನಾಸಂ ನಾಯಕನಾಗಿ ಮತ್ತು ಶ್ರುತಿ ಹರಿಹರನ್ ನಾಯಕಿಯಾಗಿ ನಟಿಸಿದ್ದರು. ಈ ಚಿತ್ರದಲ್ಲಿ ನಾಯಕ ಕನಸು ಕಾಣಲು ಮಾತ್ರೆ ತೆಗೆದುಕೊಳ್ಳುವ ಕಥೆಯಿದ್ದು,  ಕನಸನ್ನೇ ನಿಜ ಎಂದುಕೊಂಡು ಅನುಭವಿಸುವ ಮಾನಸಿಕ ಯಾತನೆಯನ್ನು ತೋರಿಸಲಾಗಿತ್ತು. ತನ್ನ ವಿಭಿನ್ನ ಹಾಡುಗಳು ಹಾಗೂ ಮೇಕಿಂಗ್ ಮೂಲಕ ಈ ಸಿನಿಮಾ ಪ್ರೇಕ್ಷಕರ ನಿದ್ದೆಗೆಡಿಸಿತ್ತು. ಕನ್ನಡ ಚಿತ್ರೋದ್ಯಮದಲ್ಲೂ ಸಾಕಷ್ಟು ನಿರೀಕ್ಷೆ ಹಾಗೂ ಭರವಸೆ ಹುಟ್ಟುಹಾಕಿತ್ತು.

2014ರಲ್ಲಿ ತೆರೆಕಂಡ  'ಉಳಿದವರು ಕಂಡಂತೆ' ಚಿತ್ರ ಒಂದು ವಿನೂತನ ಪ್ರಯತ್ನವಾಗಿತ್ತು. ಹಲವು ಕೋನಗಳಲ್ಲಿ ಒಂದು ವ್ಯಕ್ತಿಯ ಕಥೆಯನ್ನು ಹೇಳುವ ಪರಿ ಪ್ರಶಂಸೆ ಪಡೆದಿತ್ತು. ಈ ಸಿನಿಮಾದಲ್ಲಿ ರಕ್ಷಿತ್ ಶೆಟ್ಟಿ ನಾಯಕನಾಗಿ ನಟಿಸುವುದಲ್ಲದೇ, ನಿರ್ದೇಶನ ಮಾಡಿದ್ದರು. ಆದರೆ, ಉತ್ತಮ ಕಥೆ ಹೊಂದಿದ್ದರೂ ಕೂಡ ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಯಶಸ್ವಿಯಾಗಲಿಲ್ಲ.  ಆದರೆ, ನಂತರದ ದಿನಗಳಲ್ಲಿ ಇದೊಂದು ಕನ್ನಡದ ಕಲ್ಟ್ ಚಿತ್ರವಾಗಿ ಬದಲಾಯಿತು. ತಮಿಳು ಭಾಷೆಯಲ್ಲೂ ರಿಮೇಕ್ ಆಯಿತು. ಚಿತ್ರದ ನಿರ್ದೇಶನಕ್ಕಾಗಿ ರಕ್ಷಿತ್ ಫಿಲ್ಮಫೇರ್ ಮತ್ತು ಕರ್ನಾಟಕ ರಾಜ್ಯ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿ ಪಡೆದಿದ್ದರು.

2015ರಲ್ಲಿ ಬಿಡುಗಡೆಯಾದ  'ರಂಗಿತರಂಗ' ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಸಂಚಲನ ಸೃಷ್ಟಿಸಿತ್ತು. ಇದೊಂದು ವಿಭಿನ್ನ ಕಥಾಹಂದರ ಸಿನಿಮಾವಾಗಿದ್ದು, ನಿರುಪ್ ಭಂಡಾರಿ, ರಾಧಿಕ ಚೇತನ್, ಅವಂತಿಕಾ ಶೆಟ್ಟಿ, ಸಾಯಿ ಕುಮಾರ್, ಅರವಿಂದ್ ರಾವ್, ಶಿಲ್ಪಾ ಸಿಂಗ್, ಚೇತನ್ ರಾಜ್, ಅನುಪ್ ಭಂಡಾರಿ, ಶಂಕರ್ ಮತ್ತು ಪ್ರಮೋದ್ ಶೆಟ್ಟಿ ಒಂದು ರೀತಿಯ ಹೊಸ ಪಾತ್ರಗಳಲ್ಲಿ ನಟಿಸಿದ್ದರು. ಅದರಲ್ಲೂ ಸಾಯಿ ಕುಮಾರ್ ನಟನೆಗೆ ವೀಕ್ಷಕರು ಫಿದಾ ಆಗಿದ್ದರು. 1.5 ಕೋಟಿ ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಯಾರೂ ಊಹಿಸಲಾಗದ ಯಶಸ್ಸು ಕಂಡಿತ್ತು. ಈ ಚಿತ್ರ ಒಟ್ಟಾರೆಯಾಗಿ 43 ಕೋಟಿ ಕಲೆಕ್ಷನ್ ಮಾಡಿತ್ತು.  

1993ರಲ್ಲಿ ತೆರೆಕಂಡ ಕನ್ನಡದ ಅದ್ಭುತ ಸಿನಿಮಾ ಶ್.. ರಿಯಲ್ ಸ್ಟಾರ್ ಉಪೇಂದ್ರ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಈ ಚಿತ್ರದಲ್ಲಿ ಕುಮಾರ್ ಗೋವಿಂದ್ ನಾಯಕನಾಗಿ ನಟಿಸಿದ್ದರು. ಉಳಿದಂತೆ ಕಾಶಿನಾಥ್, ಉಪೇಂದ್ರ, ಸಾಧುಕೋಕಿಲ, ಬ್ಯಾಂಕ್ ಜನಾರ್ಧನ್, ಮೈಕಲ್‌ ಮಧು, ಬಿರಾದರ್ ಸೇರಿದಂತೆ ಹಲವರು ಅಭಿನಯಿಸಿದ್ದರು. ಚಿತ್ರತಂಡವೊಂದು ಹಳ್ಳಿಗೆ ಶೂಟಿಂಗ್ ಹೋದಾಗ ಆಗುವ ಭಯಾನಕ ಘಟನೆಗಳ ಕಥೆಯನ್ನು ಹೊಂದಿದ್ದ ಈ ಚಿತ್ರ ಬ್ಬ್ಲಾಕ್ ಬಸ್ಟರ್ ಅಗಿತ್ತು. 

ಲೂಸಿಯಾ ಪವನ್ ಕುಮಾರ್ ನಿರ್ದೇಶನದಲ್ಲಿ ಮೂಡಿಬಂದ 'ಯು ಟರ್ನ್ ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಚಿತ್ರದಲ್ಲಿ ಶ್ರದ್ಧಾ ಶ್ರೀನಾಥ್, ರೋಜರ್ ನಾರಾಯಣ್, ದಿಲೀಪ್ ರಾಜ್, ರಾಧಿಕಾ ನಾರಾಯಣ್, ಪ್ರಮೋದ್ ಶೆಟ್ಟಿ ಮುಂತಾದವರು ನಟಿಸಿದ್ದರು. ಬೆಂಗಳೂರಿನ ಡಬಲ್‌ ರೋಡ್‌ ಪ್ಲೈಓವರ್ ಮೇಲಿನ ನೈಜ ಸಮಸ್ಯೆಯೊಂದನ್ನು ಇಟ್ಟುಕೊಂಡು ಅದಕ್ಕೆ ರೋಚಕವಾದ ಚಿತ್ರಕಥೆ ಬರೆದು ಪವನ್ ಕುಮಾರ್ ಆಕ್ಷನ್ ಕಟ್ ಹೇಳಿದ್ದರು. ಈ ಚಿತ್ರ ಬಾಕ್ಸಾಫೀಸ್‌ನಲ್ಲಿ ಉತ್ತಮ ಪ್ರತಿಕ್ರಿಯೆ ಸಿಗುವುದರ ಜೊತೆಗೆ ನೋಡುಗರ ಮೆಚ್ಚುಗೆಯನ್ನು ಪಡೆದುಕೊಂಡಿತ್ತು.