ಸ್ಯಾಂಡಲ್‌ವುಡ್‌ನಲ್ಲಿ ಅತೀ ಕಡಿಮೆ ಕಾಲಾವಧಿ ಬದುಕಿದ ಸ್ಟಾರ್ ನಟಿಯರ ಪಟ್ಟಿ ಇಲ್ಲಿದೆ.

ತಮ್ಮ ಸ್ನಿಗ್ಧ ಸೌಂದರ್ಯ ಮತ್ತು ಪ್ರಬುದ್ಧ ನಟನೆಯಿಂದ ದಕ್ಷಿಣ ಚಿತ್ರರಂಗದಲ್ಲಿ ಅಪಾರ ಅಭಿಮಾನಿಗಳನ್ನು ಹೊಂದಿದ್ದವರು ನಟಿ ಸೌಂದರ್ಯ. ಹೆಸರಿಗೆ ತಕ್ಕಂತೆ ಸುಂದರಿಯಾಗಿದ್ದ ಸೌಂದರ್ಯ, ತಮ್ಮ 27ನೇ ವಯಸ್ಸಿನಲ್ಲಿಯೇ ನಿಧನರಾದರು. ತಮ್ಮ 12 ವರ್ಷದ ಸಿನಿಪಯಣದಲ್ಲಿ ಸುಮಾರು 120ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದ ಸೌಂದರ್ಯ, 2004ರ ಏಪ್ರಿಲ್‌  17ರಂದು ವಿಮಾನ ಅಪಘಾತದಲ್ಲಿ ಮರಣ ಹೊಂದಿದರು.  ಈ ಸಂದರ್ಭ ಅವರ ದೇಹ ಗುರುತೂ ಸಿಗದಷ್ಟೂ ಸುಟ್ಟು ಹೋಗಿತ್ತು. 

ಸಾಹಸಸಿಂಹ ಡಾ. ವಿಷ್ಣುವರ್ಧನ್ ಅಭಿನಯದ ಸಿರಿವಂತ, ವರ್ಷ, ಮರ್ಮ, ಉಗ್ರಗಾಮಿ, ವೀರ ಪರಂಪರೆ ಹಾಗೂ ಆರು ವರ್ಷಗಳ ಕಾಲ ಕಿರುತೆರೆಯಲ್ಲಿ ಸುಮಾರು 35ಕ್ಕೂ ಧಾರಾವಾಹಿಗಳಲ್ಲಿ ಬಣ್ಣ ಹಚ್ಚಿದ್ದ ನಟಿ ಹೇಮಾಶ್ರೀ ತಮ್ಮ ಪತಿಯ ಜೊತೆಗೆ ಪ್ರವಾಸಕ್ಕೆಂದು ತೆರಳಿ ನಿಗೂಢವಾಗಿ ಸಾವನ್ನಪ್ಪಿ, ಬೆಂಗಳೂರಿಗೆ ಮೃತದೇಹವಾಗಿ ವಾಪಾಸ್ಸಾಗಿದ್ದರು. ಇವರು ತಮ್ಮ 30 ವರ್ಷಕ್ಕೆ ಕೊನೆಯುಸಿರೆಳೆದಿದ್ದಾರೆ. 

ಚಿಕ್ಕಮಗಳೂರಿನ ಚಿಕ್ಕಮಲ್ಲಿಗೆ ನಿವೇದಿತಾ ಜೈನ್ ಅತಿಕಡಿಮೆ ಅವಧಿಯಲ್ಲಿ ಬದುಕಿದ ಸ್ಟಾರ್ ನಟಿಯಾಗಿದ್ದಾರೆ. ಭಾರತೀಯ ಸೌಂದರ್ಯ ಸ್ಪರ್ಧಿಯಾಗಿದ್ದ ನಿವೇದಿತಾ, ಕೇವಲ 19 ವರ್ಷಕ್ಕೆ ತಮ್ಮ ಜೀವಿತವನ್ನು ಕೊನೆಗೊಳಿಸಿದರು. ಇವರು 1998ರ ಮೇ 17ರಂದು ತಮ್ಮ ಮನೆಯ ಎರಡನೇ ಮಹಡಿಯಿಂದ ಕಾಲು ಜಾರಿ ಬಿದ್ದು ಆಸ್ಪತ್ರೆಗೆ ದಾಖಲಾದರು. ಸುಮಾರು 25 ದಿನಗಳವರೆಗೆ ಕೋಮಾದಲ್ಲಿದ್ದು, ನಂತರ ಕೊನೆಯುಸಿರೆಳೆದರು. ನಿವೇದಿತಾ ಕೇವಲ ಎರಡು ವರ್ಷದ ಬಣ್ಣದ ಬದುಕಿನಲ್ಲಿ 12 ಸಿನಿಮಾಗಳಲ್ಲಿ ಅಭಿನಯಿಸಿದ್ದರು. ಶಿವರಂಜಿನಿ, ಸೂತ್ರಧಾರ, ಪ್ರೇಮರಾಗ ಹಾಡು ಗೆಳತಿ, ಬಾಳಿನ ದಾರಿ, ಬಾಳಿದ ಮನೆ, ಅಮೃತವರ್ಷಿಣಿ, ನೀ ಮುಡಿದಾ ಮಲ್ಲಿಗೆ ಸೇರಿ ಹಲವು ಸಿನಿಮಾಗಳಲ್ಲಿ ನಟಿಸಿದ್ದರು. 

ಕನ್ನಡದ ಮುದ್ದು ಮುಖದ ನಟಿ ಮಂಜುಳಾ ರೋಮ್ಯಾಂಟಿಕ್ ಮತ್ತು ಬಜಾರಿ ಪಾತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದರು. ತುಮಕೂರು ಮೂಲದ ಮಂಜುಳಾ 1970-80 ದಶಕದಲ್ಲಿ ಅತ್ಯಂತ ಸಕ್ರಿಯವಾಗಿದ್ದ ನಟಿಯಾಗಿದ್ದರು. ಸುಮಾರು 100ಕ್ಕೂ ಅಧಿಕ ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದ ಈ ನಟಿ, 1986 ಸೆಪ್ಟಂಬರ್ 12ರಂದು ತಮ್ಮ ಮನೆಯಲ್ಲಿ ಸಂಭವಿಸಿದ ಗ್ಯಾಸ್ ಸಿಲಿಂಡರ್ ಸ್ಪೋಟದಲ್ಲಿ ನಿಧನರಾದರು. ಆಗ ಅವರಿಗೆ 32 ವರ್ಷ ವಯಸ್ಸಾಗಿತ್ತು. 

ದಕ್ಷಿಣ ಭಾರತದ ಸಿನಿಮಾಗಳಲ್ಲಿ ಐಟಂ ಡ್ಯಾನ್ಸರ್ ಆಗಿದ್ದ ಸಿಲ್ಕ್ ಸ್ಮಿತಾ, ಬಹುಬೇಡಿಕೆಯ ನಟಿಯಾಗಿದ್ದರು. ಯಾವುದೇ ಸಿನಿಮಾದಲ್ಲಿ ಸಿಲ್ಕ್ ಸ್ಮಿತಾ ಡ್ಯಾನ್ಸ್ ಇದ್ದರೆ ಅದನ್ನು ನೋಡಲೆಂದೇ ಜನರು ಥಿಯೇಟರ್‌ಗೆ ಹೋಗುತ್ತಿದ್ದರು. ಕನ್ನಡದಲ್ಲಿ ಸುಮಾರು ಆರು- ಏಳು ಚಿತ್ರಗಳಲ್ಲಿ ನಟಿಸಿದ್ದ ಈ ನಟಿ,  ಖಿನ್ನತೆಯಿಂದ 1996 ಸೆಪ್ಟೆಂಬರ್ 23ರಂದು ಚೆನ್ನೈನ ತಮ್ಮ ಮನೆಯಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡರು.

ಪ್ಯಾಟೇ ಹುಡ್ಗೀರು ಸೀಸನ್ 4ರ ವಿಜೇತಯಾಗಿದ್ದ ಮೆಬಿನಾ ಮೈಕಲ್ ಕನ್ನಡ ಕಿರುತೆರೆಯಲ್ಲಿ ಸಕ್ರಿಯರಾಗಿದ್ದರು. ನಂತರ ತಮಿಳು ಸಿನಿಮಾಗೆ ನಾಯಕಿಯಾಗಿ ಆಯ್ಕೆಯಾಗಿದ್ದು, ಮಾಡೆಲಿಂಗ್‌ನಲ್ಲೂ ಜನಪ್ರಿಯತೆ ಗಳಿಸಿದ್ದರು. ಆದರೆ, 2020ರಲ್ಲಿ ನಡೆದ ಕಾರು ಅಪಘಾತದಲ್ಲಿ 23ರಲ್ಲಿ ನಿಧನರಾದರು. 

ಕನ್ನಡ ಚಿತ್ರರಂಗ ಕಂಡ ಅಪರೂಪದ ತಾರೆ ಕಲ್ಪನಾ 'ಮಿನುಗು ತಾರೆ' ಅಂತಲೇ ಖ್ಯಾತಿ ಗಳಿಸಿದ್ದರು. ಕಪ್ಪು-ಬಿಳುಪಿನ ಅವಧಿಯಲ್ಲಿ ಅದ್ಭುತ ಮ್ಯಾನರಿಸಂನಿಂದ ಮನರಂಜಿಸುತ್ತಿದ್ದರು. ಖಿನ್ನತೆಯಿಂದ ನರಳುತ್ತಿದ್ದ ಕಲ್ಪನಾ, 1979 ಮೇ 12ರಂದು ಬೆಳಗಾವಿಯ ಸಂಕೇಶ್ವರ ಹತ್ತಿರದ ಐಬಿಯಲ್ಲಿ 56 ನಿದ್ದೆ ಮಾತ್ರೆ ನುಂಗಿ ಆತ್ಮಹತ್ಯೆ ಮಾಡಿಕೊಂಡರು. ಆಗ ಅವರಿಗೆ 36 ವರ್ಷ ವಯಸ್ಸಾಗಿತ್ತು.