ರವಿಶಂಕರ್ ಟು ಗರುಡ ರಾಮ್: ಸ್ಯಾಂಡಲ್‌ವುಡ್‌ನ ಈ ಖಳನಾಯಕರಿಗೆ ಸೂಪರ್ ಸಕ್ಸಸ್ ಕೊಟ್ಟ ಸಿನಿಮಾಗಳಿವು!

2011ರಲ್ಲಿ 'ಕೋಟೆ' ಸಿನಿಮಾದ ಮೂಲಕ ಕನ್ನಡಕ್ಕೆ ಕಾಲಿಟ್ಟ ರವಿಶಂಕರ್ ಎರಡನೇ ಚಿತ್ರವಾದ 'ಕೆಂಪೇಗೌಡ' ಮೂಲಕ ದೊಡ್ಡ ಜನಪ್ರಿಯತೆ ಪಡೆದರು. ಈ ಚಿತ್ರದಲ್ಲಿ 'ಆರ್ಮುಗಂ' ಎಂಬ ವಿಲನ್ ಪಾತ್ರದಲ್ಲಿ ನಟಿಸಿದ್ದು, ರವಿಶಂಕರ್ ಅವರ ಖಡಕ್ ವಾಯ್ಸ್, ಬೆಚ್ಚಿಬೀಳಿಸುವ ನಟನೆಗೆ ಕನ್ನಡ ಸಿನಿಪ್ರೇಕ್ಷಕರು ಫಿದಾ ಆಗಿದ್ದರು. ಈ ಸಿನಿಮಾ ಸೂಪರ್ ಹಿಟ್ ಆಗವುದರ ಜೊತೆಗೆ ರವಿಶಂಕರ್ ನಟನೆಗೆ ಅಪಾರ ಮೆಚ್ಚುಗೆ ವ್ಯಕ್ತವಾದವು. ಆದಾದ ಬಳಿಕ ಇಂದಿನವರೆಗೆ ರವಿಶಂಕರ್ ಹಿಂದೆ ತಿರುಗಿ ನೋಡೆ ಇಲ್ಲ. ಪುನೀತ್ ರಾಜ್​​ಕುಮಾರ್, ಯಶ್, ದರ್ಶನ್, ಶರಣ್ ಹೀಗೆ ಬಹುತೇಕ ಕನ್ನಡ ನಟರ ಚಿತ್ರಗಳಲ್ಲಿ ಆಲ್ ಟೈಮ್ ವಿಲನ್ ಆಗಿ ಅಬ್ಬರಿಸಿದ್ದಾರೆ. ಸದ್ಯ ಸೌತ್ ಇಂಡಿಯಾದ ಎಲ್ಲಾ ಭಾಷೆಗಳಲ್ಲೂ ವಿಲನ್ ಆಗಿ ಅಭಿನಯಿಸುತ್ತಿದ್ದಾರೆ. 

2004ರಲ್ಲಿ ತೆರೆಕಂಡ 'ಕಂಠಿ' ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಕಿಶೋರ್ ಅವರು, ಮುಂದೆ ಆಕಾಶ್, ಸಿದ್ದು, ಡೆಡ್ಲಿಸೋಮದಂತಹ ಸಿನಿಮಾ ಮಾಡಿದ್ದರೂ ಅವರಿಗೆ ಹೆಚ್ಚು ಯಶಸ್ಸು ತಂದುಕೊಟ್ಟಿದ್ದು 2007ರಲ್ಲಿ ತೆರೆಕಂಡ ದುನಿಯಾ. ಈ ಚಿತ್ರದ ಯಶಸ್ಸಿಗೆ ಕಿಶೋರ್ ಅವರು ನಿರ್ವಹಿಸಿದ ಪೊಲೀಸ್ ಕೂಡ ಒಂದು ಅಂದ್ರೆ ತಪ್ಪಾಗಲ್ಲ. ದುನಿಯಾ ಚಿತ್ರದಿಂದ ಗುರುತಿಸಿಕೊಂಡ ಕಿಶೋರ್‌ಗೆ ತಮಿಳಿನ ಪೊಲ್ಲದವನ್ ಸಿನಿಮಾದ ಸೆಲ್ವ ಪಾತ್ರ ಸಿಕ್ಕಿತು. ಈ ಪಾತ್ರ ಸೌತ್ ಇಂಡಿಯಾದಲ್ಲಿ ಫೇಮಸ್ ಆಗುವಂತೆ ಮಾಡಿತ್ತು. ಬಿರುಗಾಳಿ ಚಿತ್ರದ ಇವರ ಇನ್ಸ್‌ಪೆಕ್ಟರ್ ಪಾತ್ರ ಕನ್ನಡಿಗರು ಮರೆಯಲು ಸಾಧ್ಯವಿಲ್ಲ. ಮುಂದೆ ರಜನಿಕಾಂತ್ ಅಭಿನಯದ ಕಬಾಲಿ ಸಿನಿಮಾದಲ್ಲಿ ನಟಿಸಿ, ಪ್ರಪಂಚಾದ್ಯಂತ ಗುರುತಿಸಿಕೊಂಡರು.

2009ರಲ್ಲಿ ಸವಾರಿ ಸಿನಿಮಾದಲ್ಲಿ ಒಂದು ಚಿಕ್ಕಪಾತ್ರ ನಿರ್ವಹಿಸುವ ಮೂಲಕ ನಟನೆಗೆ ಎಂಟ್ರಿಕೊಟ್ಟ ಸೌರವ್ ಲೋಕೇಶ್, ಮುಂದೆ ಲೋಕಿ, ಶಿವ, ಸ್ವಿಟಿ ನನ್ನ ಜೋಡಿ ಸೇರಿದಂತೆ ಹನ್ನೆರಡಕ್ಕೂ ಹೆಚ್ಚು ಚಿತ್ರಗಳಲ್ಲಿ ಚಿಕ್ಕಪುಟ್ಟ ಪಾತ್ರಗಳಲ್ಲಿ ನಟಿಸಿದರು. ಬಳಿಕ ಶಿವರಾಜ್‌ಕುಮಾರ್ ಅಭಿನಯದ 'ಭಜರಂಗಿ' ಸಿನಿಮಾದಲ್ಲಿ ಖಳನಾಯಕನ ಪಾತ್ರ ನಿರ್ವಹಿಸಿದ್ದರು. ಈ ಸಿನಿಮಾ ಸೂಪರ್ ಹಿಟ್ ಆಗುವುದಲ್ಲದೇ ಸೌರವ್ ಲೋಕೇಶ್ ಅವರ 'ರಾಣಾ' ಪಾತ್ರ ಗಮನ ಸೆಳೆದಿತ್ತು. ಚಿತ್ರದ ಬಳಿಕ ಭಜರಂಗಿ ಲೋಕಿ ಅಂತಲೇ ಖ್ಯಾತಿ ಪಡೆದರು. ಇತ್ತೀಚೆಗೆ ಸಲಾರ್ ಸಿನಿಮಾದಲ್ಲಿ ನಟಿಸಿದ್ದ ಇವರು ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಗುರುತಿಸಿಕೊಂಡಿದ್ದರು.

ಸ್ಯಾಂಡಲ್‌ವುಡ್ ನಟ ಡಾಲಿ ಧನಂಜಯ್ ಯಾವ ಪಾತ್ರಕ್ಕೂ ಸೈ ಎನ್ನುವ ನಟ. ಇವರು ೨೦೧೩ರಲ್ಲಿ ಡೈರೆಕ್ಟರ್ ಸ್ಪೆಷಲ್ ಸಿನಿಮಾ ಮೂಲಕ ಚಂದನವನ ಪ್ರವೇಶಿಸಿರು. ಮುಂದೆ ಧನಂಜಯ್ ನಟಿಸಿದ ಜಯನಗರ 4th ಬ್ಲಾಕ್, ರಾಟೆ ಸಿನಿಮಾಗಳು ಹಿಟ್ ಆದವು. ಆನಂತರ ಬಂದ ಜೆಸ್ಸಿ, ಬಾಕ್ಸರ್, ಬದ್ಮಾಶ್, ಎರಡನೇ ಸಲ ಚಿತ್ರಗಳು ಬಾಕ್ಸಾಫೀಸ್‌ನಲ್ಲಿ ಸದ್ದು ಮಾಡಲಿಲ್ಲ. ಈ ವೇಳೆ ಡಾಲಿಗೆ ಸಿನಿಮಾ ಆಫರ್ಸ್ ಕಡಿಮೆಯಾಗಿತ್ತು. ಇಂತಹ ಸಂದರ್ಭದಲ್ಲಿ ಶಿವರಾಜ್‌ಕುಮಾರ್ ಅಭಿನಯದ 'ಟಗರು' ಸಿನಿಮಾದಲ್ಲಿ ಖಳನಾಯಕನಾಗಿ ನಟಿಸುವ ಅವಕಾಶ ಸಿಕ್ಕಿತು. ಇದರಲ್ಲಿ 'ಡಾಲಿ' ಎನ್ನುವ ನೆಗೆಟಿವ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಖಡಕ್ ಪೊಲೀಸ್ ಅಧಿಕಾರಿಯಾಗಿ ಶಿವಣ್ಣ ಮತ್ತು ಕ್ರೌರ್ಯದ ಪ್ರತಿರೂಪ ಡಾಲಿಯಾಗಿ ಧನಂಜಯ ಮಿಂಚಿದ್ದರು. ಈ ಚಿತ್ರದಲ್ಲಿನ ಧನಂಜಯ್ ಅಭಿನಯಕ್ಕೆ ಪ್ರೇಕ್ಷಕರು ಸಂಪೂರ್ಣವಾಗಿ ಫಿದಾ ಆದರು. ಈ ಸಿನಿಮಾದಿಂದ  ಧನಂಜಯ ಆಗಿದ್ದವರು ಡಾಲಿ ಧನಂಜಯ್ ಆದರು. ಡಾಲಿ ಪಾತ್ರದ ಮೂಲಕ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ ಅವರು, ಮಂಕಿ ಸೀನಾ, ಯಜಮಾನ ಚಿತ್ರದ ಮಿಠಾಯಿ ಸೂರಿ, ಸಲಗದಲ್ಲಿ ಸಾಮ್ಟಾಟ್, ಪುಷ್ಟ ಚಿತ್ರದಲ್ಲಿ ಜಾಲಿ ರೆಡ್ಡಿ ಎಂಬ ವಿಭಿನ್ನ ಪಾತ್ರಹಳ ಮೂಲಕ ಗಮನ ಸೆಳೆದ ಇವರು,   ನಂತರ ಸಾಲು-ಸಾಲು ಸಿನಿಮಾಗಳಲ್ಲಿ ನಾಯಕನಾಗಿ ಸೂಪರ್ ಸಕ್ಸಸ್ ಕಂಡರು.

ರಾಕಿಂಗ್ ಸ್ಟಾರ್ ಯಶ್ ಅವರ ಬಾಡಿಗಾರ್ಡ್ ಹಾಗೂ ಕಾರು ಡ್ರೈವರ್ ಆಗಿ ಕೆಲಸ ಮಾಡುತ್ತಿದ್ದ ರಾಮಚಂದ್ರ ರಾಜು ಅಲಿಯಾಸ್ ಗರುಡ ರಾಮ್ ಅವರನ್ನು ನೋಡಿದ ಪ್ರಶಾಂತ್ ನೀಲ್, ಕೆಜಿಎಫ್ ಸಿನಿಮಾ ವಿಲನ್ ಆಗಿ ಆಯ್ಕೆ ಮಾಡಿದರು. ಅದಕ್ಕಾಗಿ ಒಂದು ವರ್ಷಗಳ ಕಾಲ ತರಬೇತಿ ನೀಡಿ, ಜಿಮ್‌ಗೆ ಕಳುಹಿಸಿದ್ದರು. ಗರುಡ ರಾಮ್ ಕೆಜಿಎಫ್‌ ಸಿನಿಮಾದಲ್ಲಿ ಕೆಜಿಎಫ್ ಚಿನ್ನದ ಮಾಫಿಯಾದ ದೊರೆ ಸೂರ್ಯವರ್ಧನ್ ಹಿರಿಯ ಪುತ್ರ 'ಗರುಡ' ಪಾತ್ರದ ಖಡಕ್‌ ಲುಕ್‌ನಿಂದಾಗಿ ಎಲ್ಲರ ಗಮನ ಸೆಳೆದರು. ಹೆಚ್ಚು ಡೈಲಾಗ್‌ ಇಲ್ಲದೇ ಹೋದರೂ, ತಮ್ಮ ವಾಕಿಂಗ್‌ ಸ್ಟೈಲ್‌, ಭಯಂಕರವಾದ ಕಣ್ಣುಗಳ ಮೂಲಕ ಸಿನಿರಸಿಕರ ಮನಗೆದ್ದರು. ಈ ಸಿನಿಮಾ ಬಳಿಕ 'ಗರುಡ ರಾಮ್, ಅಂತಲೇ ಜನಪ್ರಿಯರಾದರು. ಸದ್ಯ ಪರಭಾಷಾ ಸಿನಿಮಾಗಳಲ್ಲಿ ಬೇಡಿಕೆ ಹೆಚ್ಚಿಸಿಕೊಂಡಿರುವ ಗರುಡ ರಾಮ್, ತಮಿಳು ನಟರಾದ ಕಾರ್ತಿ, ಜಯಂ ರವಿ, ಮಲಯಾಳಂ ನಟ ಮೋಹನ್‌ಲಾಲ್, ಪ್ರಭಾಸ್ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ.