ಸೌತ್ ಚಿತ್ರರಂಗವನ್ನು ಆಳುತ್ತಿರುವ ಪವರ್‌ಫುಲ್ ಸಿನಿ ಕುಟುಂಬಗಳಿವು!

ಅಲ್ಲು-ಕೊನಿಡೇಲ ಕುಟುಂಬ ಭಾರತದ ಶ್ರೀಮಂತ ಸಿನಿಮಾ ಕುಟುಂಬಗಳಲ್ಲೊಂದಾಗಿದೆ. ಮೆಗಾ ಫ್ಯಾಮಿಲಿ ಅಂತ ಕರೆಲ್ಪಡುವ ಅಲ್ಲು-ಕೊನಿಡೇಲಾ ಕುಟುಂಬ ತೆಲುಗು ಚಿತ್ರರಂಗವನ್ನು ಆಳುತ್ತಿದೆ. ಈ ಕುಟುಂಬದಲ್ಲಿ ಹೀರೋಗಳ ಜೊತೆಗೆ ನಟರು, ನಿರ್ಮಾಪಕರು ತಮ್ಮ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಟಾಲಿವುಡ್‌ನ ಜನಪ್ರಿಯ ನಟ, ಹಾಸ್ಯನಟ ಮತ್ತು ನಿರ್ಮಾಪಕ ಅಲ್ಲು ರಾಮಲಿಂಗಯ್ಯ 1950ರಲ್ಲಿ ಮೆಗಾ ಫ್ಯಾಮಿಲಿ ಸ್ಥಾಪಿಸಿದರು. ಈ ಕುಟುಂಬದಿಂದ ಬಂದ ರಾಮ್ ಚರಣ್, ಅಲ್ಲು ಅರ್ಜುನ್, ನಾಗೇಂದ್ರ ಬಾಬು, ವರಣ್ ತೇಜ್, ಸಾಯಿ ಧರಮ್ ತೇಜ್ ಮುಂತಾದವರು ತೆಲುಗಿನಲ್ಲಿ ಸ್ಟಾರ್ ನಟರಾಗಿ ತಮ್ಮದೇ ಹೆಸರು ಮಾಡಿದ್ದಾರೆ.

ಟಾಲಿವುಡ್‌ನ ಪವರ್‌ಫುಲ್ ಫ್ಯಾಮಿಲಿಗಳಲ್ಲಿ ನಂದಮೂರಿ ಕುಟುಂಬ ಕೂಡ ಒಂದು. ನಂದಮೂರಿ ತಾರಕ ರಾಮಾರಾವ್ ತೆಲುಗು ಚಿತ್ರರಂಗದ ದಂತಕಥೆ. ತಮ್ಮದೇ ಸ್ವಂತ ಪಕ್ಷ ಕಟ್ಟಿ ಅವಿಭಜಿತ ಆಂಧ್ರಪ್ರದೇಶದ ಸಿಎಂ ಸಹ ಆದವರು. ಈಗ ಅವರ ಕುಟುಂಬದಲ್ಲಿ ಹಲವು ಜನ ಸಿನಿಮಾ ನಟರು, ರಾಜಕಾರಣಿಗಳು ಇದ್ದಾರೆ. ಈ ಕುಟುಂಬದಿಂದ ಬಂದ ನಂದಮೂರಿ ಹರಿಕೃಷ್ಣ, ನಂದಮೂರಿ ಬಾಲಕೃಷ್ಣ, ಜೂನಿಯರ್ ಎನ್‌ಟಿಆರ್, ನಂದಮೂರಿ ಕಲ್ಯಾಣ್ ರಾಮ್ ಸ್ಟಾರ್‌ಗಳಾಗಿ ಮಿಂಚುತ್ತಿದ್ದಾರೆ.

ಅಕ್ಕಿನೇನಿ ಕುಟುಂಬ ತೆಲುಗು ಇಂಡಸ್ಟ್ರಿಯ ಪ್ರಭಾವಿ ಮನೆತನಗಳಲ್ಲಿ ಒಂದು. ಟಾಲಿವುಡ್ ಲೆಜೆಂಟ್ ಅಕ್ಕಿನೇನಿ ನಾಗೇಶ್ವರ ರಾವ್ ಚಿತ್ರರಂಗದಲ್ಲಿ ಬಹಳ ದೊಡ್ಡ ಹೆಸರು ಮಾಡಿದವರು. ಈ ಕುಟುಂಬದ ಮೂರು ತಲೆಮಾರು ಸಿನಿಮಾರಂಗದಲ್ಲಿ ತೊಡಗಿಕೊಂಡಿದೆ. ನಾಗೇಶ್ವರ ರಾವ್ ಅವರಿಗೆ ನಾಗರ್ಜುನ, ವೆಂಕಟ ರತ್ನಂ, ನಾಗ ಸುಶೀಲಾ, ಸರೋಜಾ ಹಾಗೂ ಸತ್ಯವತಿ ಎಂಬ ಐವರು ಮಕ್ಕಳು. ಈ ಪೈಕಿ ಅಕ್ಕಿನೇನಿ ನಾಗಾರ್ಜುನ ಹಾಗೂ ಅವರ ಪುತ್ರರಾದ ನಾಗಚೈತನ್ಯ, ಅಖಿಲ್ ಸಿನಿಮಾರಂಗದಲ್ಲಿ ಸ್ಟಾರ್‌ಗಳಾಗಿ ಮಿಂಚುತ್ತಿದ್ದಾರೆ.

ವರನಟ ಡಾ.ರಾಜ್‌ಕುಮಾರ್ ಕನ್ನಡಿಗರ ಅಸ್ಮಿತೆಯ ಸಂಕೇತ. ಅಣ್ಣಾವ್ರು ಕನ್ನಡ ಚಿತ್ರರಂಗಕ್ಕೆ ಭದ್ರವಾದ ಬುನಾದಿ ಹಾಕಿ, ಸಾಮಾಜಿಕ ಚಿತ್ರಗಳ ಮೂಲಕ ಚಿತ್ರಪ್ರೇಮಿಗಳಿಗೆ ಒಳ್ಳೆಯ ಸಂದೇಶವನ್ನು ನೀಡಿದ್ದಾರೆ. ಅಣ್ಣಾವ್ರ ಮಕ್ಕಳಾದ ಶಿವರಾಜ್‌ಕುಮಾರ್, ಪುನೀತ್ ರಾಜ್‌ಕುಮಾರ್ ಹಾಗೂ ರಾಘವೇಂದ್ರ ರಾಜ್‌ಕುಮಾರ್ ಕೂಡ ತಂದೆಯಂತೆಯೇ ಸ್ಯಾಂಡಲ್‌ವುಡ್‌ನಲ್ಲಿ ಸ್ಟಾರ್ ನಾಯಕ ನಟರಾಗಿ ಮಿಂಚುತ್ತಿದ್ದಾರೆ. ಜೊತೆಗೆ ಅಣ್ಣಾವ್ರ ಮೊಮ್ಮಕ್ಕಳಾದ ಯುವರಾಜ್‌ಕುಮಾರ್, ವಿನಯ್ ರಾಜ್‌ಕುಮಾರ್, ಧನ್ಯಾ ರಾಮ್‌ಕುಮಾರ್, ಧೀರೇನ್ ರಾಮ್‌ಕುಮಾರ್,  ಷಣ್ಮುಖ ಗೋವಿಂದರಾಜ್ ನಟನೆಯಲ್ಲಿ ಛಾಪು ಮೂಡಿಸುತ್ತಿದ್ದರೆ, ಶಿವರಾಜ್‌ಕುಮಾರ್ ಪುತ್ರಿ ನಿವೇದಿತಾ ನಿರ್ಮಾಪಕಿಯಾಗಿದ್ದಾರೆ.

ಮಾಲಿವುಡ್‌ನ ಸೂಪರ್ ಸ್ಟಾರ್ ಮಮ್ಮುಟಿ. 200ಕ್ಕೂ ಅಧಿಕ ಸಿನಿಮಾಗಳಲ್ಲಿ ಅಭಿನಯಿಸಿರುವ ಇವರ ಕೈಯಲ್ಲಿ ಈಗಲೂ ಎರಡ್ಮೂರು ಸಿನಿಮಾಗಳಿವೆ. ಇವರ ಮಗ ದುಲ್ಕರ್ ಸಲ್ಮಾನ್ ಕೂಡ ಮಾಲಯಾಳಂ ಸಿನಿಮಾರಂಗದ ಖ್ಯಾತ ನಟ. ಮಾಲಿವುಡ್ ಮಾತ್ರವಲ್ಲದೇ, ಪರಭಾಷೆಯಲ್ಲೂ ಸಿಕ್ಕಾಪಟ್ಟೆ ಅಭಿಮಾನಿಗಳನ್ನು ಹೊಂದಿರುವ ಇವರಿಗೆ ಹೆಚ್ಚು ಜನಪ್ರಿಯತೆ ತಂದುಕೊಟ್ಟ ಚಿತ್ರ ಚಾರ್ಲಿ. ಇದಾದ ಬಳಿಕ ಕುರುಪ್, ಕಿಂಗ್ ಆಫ್ ಕೋಥಾ, ಸೀತಾ ರಾಮಂ ಸಿನಿಮಾಗಳ ಮೂಲಕ ಇನ್ನು ಹೆಚ್ಚಿನ ಖ್ಯಾತಿ ಗಳಿಸಿದ್ದಾರೆ.