ಸ್ಟಾರ್ ನಟರ ಗೆಳೆಯ ರಿಷಬ್ ಶೆಟ್ಟಿ: ಉಡುಪಿಗೆ ಆಗಮಿಸುತ್ತಿರುವ ಪ್ಯಾನ್ ಇಂಡಿಯಾ ಸ್ಟಾರ್ಸ್!

ತೆಲುಗು ನಟ ಜೂನಿಯರ್ ಎನ್‌ಟಿಆರ್ ಕೆಲ ದಿನಗಳ ಹಿಂದೆ ತಾಯಿ ಶಾಲಿನಿ ಹಾಗೂ ಪತ್ನಿ ಜೊತೆಗೆ ಉಡುಪಿಗೆ ಆಗಮಿಸಿದ್ದರು. ಜೂನಿಯರ್ ಎನ್‌ಟಿಆರ್ ತಾಯಿ ಕುಂದಾಪುರದವರಾಗಿದ್ದು, ಉಡುಪಿ ಶ್ರೀಕೃಷ್ಣನ ದರ್ಶನವನ್ನು ಮಗನೊಂದಿಗೆ ಪಡೆಯಬೇಕು, ತನ್ನ ತವರಿಗೆ ಮಗನನ್ನು ಕರೆದೊಯ್ಯಬೇಕೆಂಬುದು ಅವರ ಆಸೆಯಾಗಿತ್ತು. ತಮ್ಮ ತಾಯಿಯ ಕನಸನ್ನು ಜೂನಿಯರ್ ಎನ್‌ಟಿಆರ್ ನನಸು ಮಾಡಿದ್ದರು. ಈ ಸಂದರ್ಭ ಅವರಿಗೆ ಸಾಥ್ ನೀಡಿದ್ದು ರಿಷಬ್ ಶೆಟ್ಟಿ ದಂಪತಿ ಹಾಗೂ ಪ್ರಶಾಂತ್ ನೀಲ್ ದಂಪತಿ. ಈ ವೇಳೆ ರಿಷಬ್ ಶೆಟ್ಟಿ ಹುಟ್ಟೂರಾದ ಕೆರಾಡಿ ಗ್ರಾಮದ ಮೂಡುಗಲ್ಲಿನ ಕೇಶವನಾಥೇಶ್ವರ ಗುಹಾಂತರ ದೇವಾಲಯ ಹಾಗೂ ಕೊಲ್ಲೂರಿಗೂ ಭೇಟಿ ನೀಡಿದ್ದರು. 

ಮಲಯಾಳಂ ಚಿತ್ರರಂಗದ ಸೂಪರ್ ಸ್ಟಾರ್ ಮೋಹನ್‌ ಲಾಲ್ ಕಳೆದ ಏಪ್ರಿಲ್ ತಿಂಗಳಲ್ಲಿ ಕೊಲ್ಲೂರಿನ ಮೂಕಾಂಬಿಕಾ ದೇವಾಲಯಕ್ಕೆ ಭೇಟಿ ನೀಡಿದ್ದರು. ಈ ಸಂದರ್ಭ ರಿಷಭ್ ಶೆಟ್ಟಿ ದಂಪತಿ ಕೂಡ ಮೋಹನ್ ಲಾಲ್ ಅವರನ್ನು ಭೇಟಿಯಾಗಿದ್ದರು. ಇವರಿಬ್ಬರ ಭೇಟಿ  ಕಾಂತಾರದ ಪ್ರಿಕ್ವೆಲ್‌ನಲ್ಲಿ ಮೋಹನ್ ಲಾಲ್ ಕಾಣಿಸಿಕೊಳ್ಳಬಹುದಾ ಎನ್ನುವ ಪ್ರಶ್ನೆ ಮೂಡಿಸಿತ್ತು. 

ಇತ್ತೀಚೆಗೆ ಕೊಲ್ಲೂರು ದೇವಾಲಯಕ್ಕೆ ಭೇಟಿ ನೀಡಿದ್ದ ಮಲಯಾಳಂ ಖ್ಯಾತ ನಟ ಜಯಸೂರ್ಯ, ರಿಷಬ್ ಶೆಟ್ಟಿಯನ್ನು ಭೇಟಿ ಮಾಡಿದ್ದರು. ರಿಷಬ್ ಭೇಟಿಯಾಗಿದ್ದ ಫೋಟೋವನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದ ಜಯಸೂರ್ಯ, 'ಕಥನಾರ್ ಮೀಟ್ಸ್ ಕಾಂತಾರ' ಅಂತ ಕ್ಯಾಪ್ಷನ್ ನೀಡಿದ್ದರು. ಇಬ್ಬರು ಶರ್ಟ್ ಮತ್ತು ಪಂಚೆ ಧರಿಸಿ ನಗುತ್ತಾ ನಡೆದು ಬರುತ್ತಿರುವ ಫೋಟೋ ಎಲ್ಲರ ಗಮನ ಸೆಳೆದಿತ್ತು. 

ತೆಲುಗು ನಟ ರಾಣಾ ದಗ್ಗುಬಾಟಿ ಕೂಡ ಕುಂದಾಪುರಕ್ಕೆ ಭೇಟಿ ನೀಡಿದ್ದರು. ಆಗ ರಿಷಬ್ ಶೆಟ್ಟಿ ಅವರನ್ನು ಕೆರಾಡಿ ಗ್ರಾಮದ ಮೂಡುಗಲ್ಲಿನ ಕೇಶವನಾಥೇಶ್ವರ ಗುಹಾಂತರ ದೇವಾಲಯಕ್ಕೆ ಕರೆದುಕೊಂಡು ಹೋಗಿದ್ದರು.