ಉಗಾದಿ ಟು 99: ಕನ್ನಡದಲ್ಲಿ ಫೇಲ್ಯೂರ್ ಆದ ಸೂಪರ್ ಹಿಟ್ ರಿಮೇಕ್ ಸಿನಿಮಾಗಳಿವು!

2010ರಲ್ಲಿ ತೆರೆಕಂಡ 'ಏನೋ ಒಂಥರಾ' ಸಿನಿಮಾದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಪ್ರಿಯಾಮಣಿ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದರು. ಇದು ತಮಿಳಿನ ಖುಷಿ ಸಿನಿಮಾದ ರಿಮೇಕ್ ಆಗಿದ್ದು, ಕನ್ನಡದಲ್ಲಿ ಮುಸ್ಸಂಜೆ ಮಹೇಶ್ ನಿರ್ದೇಶನ ಮಾಡಿದ್ದರು. ಪ್ರೇಮಕಥೆ ಹೊಂದಿದ್ದ ಈ ಸಿನಿಮಾ ತಮಿಳಿನಲ್ಲಿ ಸೂಪರ್ ಹಿಟ್ ಆಗಿತ್ತು. ಆದರೆ, ಕನ್ನಡದಲ್ಲಿ ಅಷ್ಟೊಂದು ಯಶಸ್ಸು ಗಳಿಸಲಿಲ್ಲ.  

2007ರಲ್ಲಿ ತೆರೆಕಂಡ ಸ್ನೇಹನಾ ಪ್ರೀತಿನಾ ಚಿತ್ರದಲ್ಲಿ ದರ್ಶನ್ ಮತ್ತು ಆದಿತ್ಯ ನಾಯಕರಾಗಿ, ಲಕ್ಷ್ಮಿ ರೈ  ಮತ್ತು ಸಿಂಧು ತೊಲಾನಿ ನಾಯಕಿಯರಾಗಿ ಕಾಣಿಸಿಕೊಂಡಿದ್ದರು  ಶಾಹುರಾಜ್ ಶಿಂಧೆ ಅವರ ನಿರ್ದೇಶನದ ಈ ಸಿನಿಮಾದಲ್ಲಿ ಶ್ರೀಮಂತ ಹುಡುಗ, ಬಡ ಹುಡುಗಿ ಹಾಗೂ ಶ್ರೀಮಂತ ಹುಡುಗಿ, ಬಡ ಹುಡುಗನ ಪ್ರೇಮಕಥೆ, ಕಿತ್ತಾಟ ತೋರಿಸಲಾಗಿತ್ತು. ಇದು ಹಿಂದಿಯ ಸೂಪರ್ ಹಿಟ್ ಇಷ್ಕ್ ಸಿನಿಮಾಧ ರಿಮೇಕ್ ಆಗಿದ್ದು, ಕನ್ನಡದಲ್ಲಿ ವಿಫಲಗೊಂಡಿತ್ತು.  

ಕೋದಂಡರಾಮ ಸಿನಿಮಾವನ್ನು ಕ್ರೇಜಿ ಸ್ಟಾರ್ ರವಿಚಂದನ್ ನಿರ್ದೇಶಿಸಿ, ನಟಿಸಿದ್ದರು. ಈ ಸಿನಿಮಾದಲ್ಲಿ ರವಿಚಂದ್ರನ್ ಜೊತೆಗೆ ಶಿವರಾಜ್‌ಕುಮಾರ್, ಸಾಕ್ಷಿ ಶಿವಾನಂದ್, ಆಶಾಸೈನಿ, ಮೋಹನ್ ಶಂಕರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಇದು ಮಲಯಾಳಂನ ತೆಂಕಶಿಪಟ್ಟಣಂ ರಿಮೇಕ್ ಆಗಿತ್ತು. ಮಲಯಾಳಂನಲ್ಲಿ ಹಿಟ್ ಆಗಿದ್ದ ಈ ಸಿನಿಮಾ, ಕನ್ನಡದಲ್ಲಿ ಯಶಸ್ಸು ಕಾಣಲಿಲ್ಲ. 

2009ರಲ್ಲಿ ತೆರೆಕಂಡ ನಾಗಣ್ಣ ನಿರ್ದೇಶನದ ದುಬೈ ಬಾಬು ಸಿನಿಮಾದಲ್ಲಿ  ರಿಯಲ್ ಸ್ಟಾರ್ ಉಪೇಂದ್ರ ನಾಯಕನಾಗಿ ಹಾಗೂ ನಿಖಿತಾ ತುಕ್ರಾಲ್ ನಾಯಕಿಯಾಗಿ ಅಭಿನಯಿಸಿದ್ದರು. ಇದು ತೆಲುಗಿನ ಸೂಪರ್ ಹಿಟ್ ಸಿನಿಮಾ ದುಬೈ ಸೀನು ರಿಮೇಕ್ ಆಗಿತ್ತು. ದುಬೈಗೆ ಹೋಗಿ ಶ್ರೀಮಂತನಾಗಬೇಕು ಎಂಬ ನಾಯಕನ ಕಥೆ ಹೊಂದಿದ್ದ ಈ ಸಿನಿಮಾ ಕನ್ನಡದಲ್ಲಿ ಸಕ್ಸಸ್ ಆಗಲಿಲ್ಲ.  

99 ಚಿತ್ರವೂ 2018ರಲ್ಲಿ ತೆರೆಕಂಡ ತಮಿಳಿನ ರೊಮ್ಯಾಂಟಿಕ್ 96ದ ರಿಮೇಕ್ ಆಗಿತ್ತು. ಪ್ರೀತಂ ಗುಬ್ಬಿ ನಿರ್ದೇಶನದ ಈ ಸಿನಿಮಾದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಮತ್ತು ಭಾವನಾ ಮುಖ್ಯಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಭಾವನಾತ್ಮಕ ವಿಷಯಗಳನ್ನು ಹೊಂದಿದ್ದ ಈ ಸಿನಿಮಾ ತಮಿಳಿನಲ್ಲಿ ಸೂಪರ್ ಹಿಟ್ ಆಗಿತ್ತು. ಆದರೆ, ಕನ್ನಡದಲ್ಲಿ ಸಿನಿರಸಿಕರ ಮನಗೆಲ್ಲುವಲ್ಲಿ ವಿಫಲವಾಯಿತು.  

ನವರಸ ನಾಯಕ ಜಗ್ಗೇಶ್ ಇಮೇಜಿನ ಹಂಗು ತೊರೆದು ನಟಿಸಿದ್ದ ಚಿತ್ರ ಮನ್ಮಥ. ಈ ಸಿನಿಮಾದಲ್ಲಿ ಗೂನು ಬೆನ್ನು, ಉಬ್ಬಲ್ಲು, ಸೊಟ್ಟಕಾಲು ಹೀಗೆ ಅಷ್ಟಾವಕ್ರನ ರೂಪದಲ್ಲಿ ವಿಭಿನ್ನ ಪಾತ್ರವನ್ನು ನಿರ್ವಹಿಸಿದ್ದರು. ಜಗ್ಗೇಶ್ ಈ ಪಾತ್ರ ನಿರ್ವಹಿಸಲು ಸಾಕಷ್ಟು ರಿಸ್ಕ್ ತೆಗೆದುಕೊಂಡಿದ್ದರು. ಇದು ನವ್ಯಾ ನಾಯರ್ ಹಾಗೂ ದಿಲೀಪ್ ಅಭಿನಯದ ಮಲಯಾಳಂನ ಕುಂಜಿಕೋನನ್ ಸಿನಿಮಾದ ರಿಮೇಕ್ ಆಗಿತ್ತು.  

ಓಂ ಸಾಯಿ ಪ್ರಕಾಶ್ ಅವರ ನಿರ್ದೇಶನದಲ್ಲಿ ಮೂಡಿಬಂದ ಯುಗಾದಿ ಸಿನಿಮಾದಲ್ಲಿ ಕ್ರೇಜಿ ಸ್ಟಾರ್ ರವಿಚಂದ್ರನ್, ಶ್ರೀಕಾಂತ್ ಮತ್ತು ಜೆನ್ನಿಫರ್ ಕೊತ್ವಾಲ್, ಕಮ್ನ ಜೆಥಮಲ್ನಿ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದು ತೆಲುಗಿನ ಸೂಪರ್ ಹಿಟ್ ಸಿನಿಮಾ ಸಂತೋಷಂ ರಿಮೇಕ್ ಆಗಿತ್ತು. ಈ ಚಿತ್ರ ಕೂಡ ಅಷ್ಟೇನು ಹಿಟ್ ಆಗಲಿಲ್ಲ. 

ರಾಜೇಂದ್ರ ಬಾಬು ನಿರ್ದೇಶನದ ನಾನು ನಾನೇ ಸಿನಿಮಾದಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ಹಾಗೂ ಸಾಕ್ಷಿ ಶಿವಾನಂದ್ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದು ಹಿಂದಿಯ ರಾಜಾ ಹಿಂದೂಸ್ತಾನಿ ಸಿನಿಮಾದ ರಿಮೇಕ್ ಆಗಿತ್ತು. ಹಿಂದಿಯಲ್ಲಿ ಯಶಸ್ಸು ಕಂಡಿದ್ದ ಈ ಚಿತ್ರ ಕನ್ನಡದಲ್ಲಿ ಸಿನಿರಸಿಕರಬ ಮನಗೆಲ್ಲುವಲ್ಲಿ ವಿಫಲವಾಯಿತು. 

ದಯಾಳ ಪದ್ಮನಾಭ್ ನಿರ್ದೇಶನದ ಸತ್ಯ ಹರಿಶ್ಚಂದ್ರ ಸಿನಿಮಾದಲ್ಲಿ ಶರಣ್, ಸಂಚಿತಾ ಪಡುಕೋಣೆ ಹಾಗೂ ಚಿಕ್ಕಣ್ಣ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದು 2013ರಲ್ಲಿ ಬಿಡುಗಡೆಯಾಗಿದ್ದ ಸೂಪರ್ ಹಿಟ್ ಪಂಜಾಬಿ ಸಿನಿಮಾ ಸಿಂಗ್ ಔರ್ ಕೌರ್ ಸಿನಿಮಾದ ರಿಮೇಕ್ ಆಗಿತ್ತು. ಕನ್ನಡದಲ್ಲಿ ಈ ಸಿನಿಮಾ ಹೆಚ್ಚು ಸದ್ದು ಮಾಡಲಿಲ್ಲ. 

ಸೂರ್ಯ ಗೌಡ ನಿರ್ದೇಶನದಲ್ಲಿ ಮೂಡಿಬಂದ ಗೋವಾ ಸಿನಿಮಾದಲ್ಲಿ ಕೋಮಲ್ ಕುಮಾರ್, ತರುಣ್ ಚಂದ್ರ, ಶ್ರೀಕಾಂತ್ ನಾಯಕರಾಗಿ ಮತ್ತು ಶರ್ಮಿಲ ಮಾಂಡ್ರೆ, ಸೋನು ಗೌಡ, ರಾಚೆಲ್ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದು 2010ರ ತಮಿಳಿನ ಗೋವಾ ಸಿನಿಮಾದ ರಿಮೇಕ್ ಆಗಿತ್ತು. ಇದು ಕನ್ನಡದಲ್ಲಿ ಹಿಟ್ ಆಗಲಿಲ್ಲ.