ಟೋಬಿ ಸಿನಿಮಾದ ಜೆನ್ನಿ ಪಾತ್ರಧಾರಿ ಚೈತ್ರಾ ಆಚಾರ್ ಕುರಿತ ನಿಮಗೆ ತಿಳಿಯದ ಇಂಟರೆಸ್ಟಿಂಗ್ ವಿಷಯಗಳಿವು!

ನಟಿ ಚೈತ್ರಾ ಆಚಾರ್ ಮೂಲತಃ ಬೆಂಗಳೂರಿನವರು. ಇವರ ತಂದೆ ಪ್ರಿನ್ಸಿಪಾಲ್. ಎಂ.ಎಸ್.ರಾಮಯ್ಯ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ಪದವಿ ಪಡೆದುಕೊಂಡಿರುವ ಚೈತ್ರಾಗೆ ಚಿಕ್ಕಂದಿನಿಂದಲೂ ನಟನೆ, ಕಿರುಚಿತ್ರ, ನಾಟಕಗಳ ಮೇಲೆ ಹೆಚ್ಚು ಆಸಕ್ತಿಯಿತ್ತು. ಕಾಲೇಜು ದಿನಗಳಲ್ಲಿ ಇವರ ಅಭಿನಯ ಗಮನಿಸಿದ ಗೆಳತಿಯೊಬ್ಬರು  'ಬೆಂಗಳೂರು ಕ್ವೀನ್ಸ್' ಎಂಬ ವೆಬ್ ಸಿರೀಸ್‌ಗೆ ಚೈತ್ರಾ ಅವರ ಫೋಟೋ ಕಳುಹಿಸಿದರು. ಆ ಮೂಲಕ ಚೈತ್ರಾ ಆಚಾರ್ ಬಣ್ಣದ ಲೋಕಕ್ಕೆ ಕಾಲಿಟ್ಟರು. 

ಗುರುಪ್ರಸಾದ್ ನಿರ್ದೇಶನದ 'ಅದೇ ಮಾ' ಚೈತ್ರಾ ನಟಿಸಿದ ಮೊದಲ ಸಿನಿಮಾ. ಆದರೆ, ಈ ಚಿತ್ರ ಕಾರಣಾಂತರಗಳಿಂಗ ಬಿಡುಗಡೆಯಾಗಲಿಲ್ಲ. ನಂತರ ರಾಜ್‌ ಬಿ ಶೆಟ್ಟಿ ಅಭಿನಯದ ಕ್ರೈಮ್ ಥ್ರಿಲ್ಲರ್ 'ಮಹಿರಾ' ಚಿತ್ರದಲ್ಲಿ ನಟಿಸುವ ಮೂಲಕ ಬೆಳ್ಳಿತೆರೆಗೆ ಎಂಟ್ರಿಕೊಟ್ಟರು. ನಂತರ ಗಿಲ್ಕಿ, ಆ ದೃಶ್ಯ, ತಲೆದಂಡ ಸಿನಿಮಾಗಳಲ್ಲಿ ನಟಿಸಿದರು. ಈ ನಟಿಗೆ ಈಗ ಈಗ 28 ವರ್ಷ.

ಚೈತ್ರಾ ನಟಿ ಮಾತ್ರವಲ್ಲದೇ ಗಾಯಕಿಯೂ ಕೂಡ ಹೌದು. ಇವರು ಸಾರ್ವಜನಿಕರಿಗೆ ಸುವರ್ಣಾವಕಾಶ ಚಿತ್ರದ ನೀಲಾಕಾಶ ಕೇಳು, ಮಾಯಾ ಬಜಾರ್‌ 2016ನ ನೀನ್ಯಾರೋ ಹಾಗೂ  ರಿಷಬ್ ಶೆಟ್ಟಿ ಹಾಗೂ ರಕ್ಷಿತ್ ಶೆಟ್ಟಿ ಅಭಿನಯದ ಗರುಡ ಗಮನ ವೃಷಭ ವಾಹನ ಸಿನಿಮಾದ 'ಸೋಜುಗಾದ ಸೂಜಿ ಮಲ್ಲಿಗೆ' ಹಾಡನ್ನು ಹಾಡಿದ್ದಾರೆ. ಅಷ್ಟೇ ಅಲ್ಲದೇ ಸೋಜುಗಾದ ಹಾಡಿಗಾಗಿ  ಸೈಮಾ ಪ್ರಶಸ್ತಿ ಕೂಡ ಪಡೆದುಕೊಂಡಿದ್ದಾರೆ.  

ರಕ್ಷಿತ್ ಶೆಟ್ಟಿ ಅಭಿನಯದ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾದಲ್ಲಿ ಚೈತ್ರಾ ಆಚಾರ್ ನಾಯಕಿಯಾಗಿ ನಟಿಸಿದ್ದು, ಈ ಸಿನಿಮಾ ಸೆಪ್ಟಂಬರ್ ೧ರಂದು ಬಿಡುಗಡೆಯಾಗಲಿದೆ. ಚಿತ್ರದಲ್ಲಿ ಸುರಭಿ ಎಂಬ ಪಾತ್ರಕ್ಕೆ ಚೈತ್ರಾ ಬಣ್ಣ ಹಚ್ಚಿದ್ದಾರೆ. ಇದಲ್ಲದೇ ದೀಕ್ಷಿತ್ ಶೆಟ್ಟಿ ನಟನೆಯ ಬ್ಲಿಂಕ್ ಹಾಗೂ ಸ್ಟ್ರಾಬೆರಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. 

ರಾಜ್ ಬಿ ಶೆಟ್ಟಿ ಅಭಿನಯದ ಟೋಬಿ ಸಿನಿಮಾದಲ್ಲಿ ಚೈತ್ರಾ ಆಚಾರ್ ತಮ್ಮ ಅದ್ಭುತ ನಟನೆ ಮೂಲಕ ಸಿನಿಮಾದಾಚೆಗೂ ಕಾಡುತ್ತಾರೆ. ಚಿತ್ರದಲ್ಲಿ ಅವರು ಬಡ ಹೆಣ್ಣುಮಕ್ಕಳ ಪ್ರತಿನಿಧಿಯಾಗಿ ಕಾಣಿಸುತ್ತಾರೆ. ಟೋಬಿಯಲ್ಲಿ ರಾಜ್ ಬಿ ಶೆಟ್ಟಿ ಹಾಗೂ ಚೈತ್ರಾ ತಂದೆ-ಮಗಳ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.