ಒಂದೊಂದೇ ಕನ್ನಡ ಸಿನಿಮಾದಲ್ಲಿ ಮಿಂಚಿ ಮರೆಯಾದ ಪರಭಾಷಾ ನಟಿಯರಿವರು!

ಸೌತ್ ಚಿತ್ರರಂಗದ ಕೃಷ್ಣ ಸುಂದರಿ ತ್ರಿಶಾ, 2014ರಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಜೊತೆ 'ಪವರ್' ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದರು. ಇದಾದ ಬಳಿಕ ಬೇರೆ ಭಾಷೆಯ ಹಲವು ಸಿನಿಮಾಗಳಲ್ಲಿ ನಟಿಸಿರುವ ತ್ರಿಶಾ, ಸ್ಯಾಂಡಲ್‌ವುಡ್‌ನ ಯಾವ ಸಿನಿಮಾಗಳಲ್ಲಿಯೂ ಕಾಣಿಸಿಕೊಂಡೇ ಇಲ್ಲ. ಮತ್ತೆ ನಟಿಸುವ ಸೂಚನೆಯೂ ಸಿಕ್ಕಿಲ್ಲ.

ರಿಯಲ್ ಸ್ಟಾರ್ ಉಪೇಂದ್ರ ಅಭಿನಯದ 'ಸೂಪರ್​' ಸಿನಿಮಾ ಮೂಲಕ ತಮಿಳು ನಟಿ ನಯನತಾರಾ ಕನ್ನಡಕ್ಕೆ ಕಾಲಿಟ್ಟರು. ಅಲ್ಲಿಯವರೆಗೆ ಯಶಸ್ಸು ಕಾಣಲು ಹವಣಿಸುತ್ತಿದ್ದ ನಯನತಾರಾಗೆ ಈ ಸಿನಿಮಾದಿಂದ ಅದೃಷ್ಟ ಬದಲಾಯಿತು. ಈ ಸಿನಿಮಾ ಯಶಸ್ಸು ತಂದುಕೊಡುತ್ತಿದ್ದಂತೆ ನಯನಾತಾರಾ ಅವರಿಗೆ ಒಳ್ಳೊಳ್ಳೆಯ ಕಥೆಗಳು ಬರಲು ಆರಂಭವಾದವು. ಸೂಪರ್ ಬಳಿಕ ನಯನಾತಾರಾ, ಕನ್ನಡದಲ್ಲಿ ನಟಿಸುವ ಮನಸ್ಸು ಮಾಡೇ ಇಲ್ಲ.  

ದಕ್ಷಿಣ ಚಿತ್ರರಂಗದ ಟಾಪ್ ನಟಿಯರಲ್ಲಿ ಒಬ್ಬರಾದ ಅಮಲಾ ಪೌಲ್, 2017ರಲ್ಲಿ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಟನೆಯ 'ಹೆಬ್ಬುಲಿ' ಸಿನಿಮಾ ಮೂಲಕ ಕನ್ನಡಕ್ಕೆ ಬಂದರು. ಈ ಚಿತ್ರದ ಬಳಿಕ ಅಮಲಾಗೆ ಕನ್ನಡ ಸಿನಿಮಾಗಳಲ್ಲಿ ಹೆಚ್ಚು ಆಫರ್ ಸಿಗುತ್ತಾ? ಎಂಬ ನಿರೀಕ್ಷೆ ಇತ್ತು. ಆದರೆ, ಈ ನಟಿ ಕೂಡ ಮತ್ತೆ ಸ್ಯಾಂಡಲ್‌ವುಡ್‌ಗೆ ಮರಳಲಿಲ್ಲ. 

2015ರಲ್ಲಿ ತೆರೆಕಂಡ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಐರಾವತ ಸಿನಿಮಾಗೆ ನಾಯಕಿಯಾಗುವ ಮೂಲಕ ಅದೃಷ್ಟ ಬದಲಾಯಿಸಿಕೊಂಡ ಊರ್ವಶಿ ರೌಟೇಲಾ, ಸದ್ಯ ಬಾಲಿವುಡ್‌ನಲ್ಲಿ ಟಾಪ್ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ. ಈವರು ಕೂಡ ಮತ್ತೆ ಸ್ಯಾಂಡಲ್‌ವುಡ್‌ನತ್ತ ಮತ್ತೆ ಮುಖ ಮಾಡಿಲ್ಲ. 

ಹಿಂದಿ ಸಿನಿಮಾ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ಅದಾ ಶರ್ಮಾ, ನಂತರ ತೆಲುಗು, ತಮಿಳು ಚಿತ್ರರಂಗದಲ್ಲಿ ಹೆಚ್ಚು ಗುರುತಿಸಿಕೊಂಡರು. ಅದಾ ಶರ್ಮಾ 2015ರಲ್ಲಿ 'ರಣವಿಕ್ರಮ' ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡಿದರು. ಈ ಚಿತ್ರದಲ್ಲಿ ಪುನೀತ್ ರಾಜ್‌ಕುಮಾರ್‌ಗೆ ನಾಯಕಿಯಾಗಿ ಕಾಣಿಸಿಕೊಂಡಿದ್ದ ಅದಾ ಶರ್ಮಾ, ಮತ್ತೆ ಕನ್ನಡದತ್ತ ಮುಖ ಮಾಡಿಲ್ಲ.