ಆರಂಭದಲ್ಲಿ ಸ್ಟಾರ್ ನಟರ ಸಿನಿಮಾಗಳಲ್ಲಿ ಮಿಂಚಿ ನಂತರ ಮರೆಯಾದ ನಟಿಯರಿವರು!

2007ರಲ್ಲಿ ಮೆರವಣಿಗೆ ಸಿನಿಮಾ ಮೂಲಕ ಚೆಂದನವನ ಪ್ರವೇಶಿಸಿದ ಐಂದ್ರಿತಾ ರೇ, ಮೊದಲ ಸಿನಿಮಾದಲ್ಲೇ ಯಶಸ್ಸು ಗಳಿಸಿದರು. ನಂತರ ವೀರ ಪರಂಪರೆ, ಮನಸಾರೆ, ಪಾರಿಜಾತ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದರು. ಇದಾದ ಬಳಿಕ ಐಂದ್ರಿತಾ ರೇ ಅಭಿನಯದ ಕೆಲ ಸಿನಿಮಾಗಳು ಮುಗ್ಗರಿಸಿದವು. ಸದ್ಯ  ಐಂದ್ರಿತಾ ರೇ ಅಭಿನಯದ ಯಾವ ಸಿನಿಮಾಗಳು ತೆರೆಗೆ ಬಂದಿಲ್ಲ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಸಾರಥಿ ಮೂಲಕ ಬೆಳ್ಳಿತೆರೆಗೆ ಕಾಲಿಟ್ಟ ದೀಪಾ ಸನ್ನಿಧಿ, ಸೂಪರ್ ಸಕ್ಸಸ್ ಕಂಡರು. ನಂತರ ಅದೇ ವರ್ಷ ಪುನೀತ್ ರಾಜ್‌ಕುಮಾರ್ ಜೊತೆಗೆ ಪರಮಾತ್ಮ ಚಿತ್ರದಲ್ಲಿ ನಟಿಸಿದರು. ಇದಾದ ಬಳಿಕ ಯಶ್, ಗಣೇಶ್ ರೀತಿಯ ಸ್ಟಾರ್ ನಟರ ಜೊತೆ ನಟಿಸಿದ ದೀಪಾ ಸನ್ನಿಧಿ ತಮಿಳಿನ ಎರಡು ಚಿತ್ರಗಳಲ್ಲಿಯೂ ಸಹ ನಟಿಸಿದರು. ನಂತರ ಚೌಕ ಹಾಗೂ ಚಕ್ರವರ್ತಿ ಚಿತ್ರಗಳಲ್ಲಿ ಬಣ್ಣ ಹಚ್ಚಿದ ನಟಿ ಈ ನಟಿ, ಸದ್ಯ ಯಾವುದೇ ಚಿತ್ರದಲ್ಲೂ ಬಣ್ಣಹಚ್ಚಿಲ್ಲ. ಸಾರಥಿ ಹಾಗೂ ಪರಮಾತ್ಮ ಸಮಯದಲ್ಲಿ ಈ ನಟಿ ಕುರಿತು ಹುಟ್ಟಿಕೊಂಡಿದ್ದ ನಿರೀಕ್ಷೆಗಳು ನಿಜವಾಗಲಿಲ್ಲ.

ದೀಪಾ ಸನ್ನಿಧಿ ರೀತಿಯೇ ಕನ್ನಡದ ಸ್ಟಾರ್ ನಟಿಯರ ಪಟ್ಟಿ ಸೇರಲಿದ್ದಾರೆ ಎಂಬ ನಿರೀಕ್ಷೆಯನ್ನು ಹುಟ್ಟುಹಾಕಿ ವಿಫಲರಾದವರಲ್ಲಿ ಶರ್ಮಿಳಾ ಮಾಂಡ್ರೆ ಕೂಡ ಒಬ್ಬರು. ಆರಂಭದಲ್ಲಿ ಒಳ್ಳೆಯ ಹೈಪ್ ಪಡೆದುಕೊಂಡಿದ್ದ ಶರ್ಮಿಳಾ ಮಾಂಡ್ರೆ, ನಂತರದಲ್ಲಿ ಅಂತಹ ಹಿಟ್ ಚಿತ್ರಗಳಲ್ಲಿ ನಟಿಸಲಿಲ್ಲ. ತೆಲುಗು ಹಾಗೂ ತಮಿಳು ಚಿತ್ರರಂಕ್ಕೂ ಕಾಲಿಟ್ಟ ನಟಿ ಶರ್ಮಿಳಾ, ಒಂದಕ್ಕಿಂತ ಹೆಚ್ಚು ಚಿತ್ರಗಳಲ್ಲಿ ಆಫರ್ ಪಡೆಯಲಿಲ್ಲ. 2022ರಲ್ಲಿ ಗಾಳಿಪಟ ೨ ಸಿನಿಮಾ ಮೂಲಕ ಕಂಬ್ಯಾಕ್ ಮಾಡಿದ್ದರು.

ನಟಿ ಡೈಸಿ ಬೋಪಣ್ಣ ರಾಮ ಶಾಮ ಭಾಮ ಹಾಗೂ ಗಾಳಿಪಟ ಚಿತ್ರಗಳಲ್ಲಿ ನಟಿಸುವ ಮೂಲಕ ಸಾಕಷ್ಟು ಅಭಿಮಾನಿಗಳನ್ನು ಸಂಪಾದಿಸಿದ್ದರು. ನಂತರದ ದಿನಗಳಲ್ಲಿ ದೊಡ್ಡ ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದರು ತೀರಾ ಕಡಿಮೆ. ಹೀಗೆ ತೆರೆಮರೆಗೆ ಸರಿದ ಕೊಡಗಿನ ಚೆಲುವೆ ಕೈಯಲ್ಲಿ ಸದ್ಯ ಯಾವುದೇ ಚಿತ್ರಗಳಿಲ್ಲ.

ಮುಂಗಾರು ಮಳೆ ರೀತಿಯ ಇಂಡಸ್ಟ್ರಿ ಹಿಟ್ ಚಿತ್ರದ ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದ ನಟಿ ಪೂಜಾ ಗಾಂಧಿ ನಂತರ ಮಿಲನ, ಕೃಷ್ಣ ಹಾಗೂ ತಾಜ್‌ ಮಹಲ್ ರೀತಿಯ ಹಿಟ್ ಚಿತ್ರಗಳಲ್ಲಿ ನಟಿಸಿ ಸ್ಟಾರ್ ಪಟ್ಟ ಗಿಟ್ಟಿಸಿಕೊಂಡಿದ್ದರು. ಆದರೆ, ಈ ಸ್ಟಾರ್‌ಡಂ ಹೆಚ್ಚುದಿನ ಉಳಿಯಲಿಲ್ಲ. ಪೂಜಾ ಗಾಂಧಿ ನಟಿಸಿದ ಸಾಲು ಸಾಲು ಚಿತ್ರಗಳು ಮಕಾಡೆ ಮಲಗಿದವು. ಬಳಿಕ ನಿಜ ಜೀವನದ ಕತೆ ಆಧಾರಿತ ದಂಡುಪಾಳ್ಯ ಸಿನಿಮಾದಲ್ಲಿ ನಟಿಸಿದರು. ಈ ಸಿನಿಮಾ ಹಿಟ್ ಆಯಿತು. ದಂಡುಪಾಳ್ಯ ಬಳಿಕ ಕನ್ನಡ ಚಿತ್ರರಂಗದಿಂದ ದೂರ ಉಳಿದಿರುವ ನಟಿ ಪೂಜಾ ಗಾಂಧಿ ಸದ್ಯ ಯಾವ ಚಿತ್ರಗಳಲ್ಲು ನಟಿಸುತ್ತಿಲ್ಲ.