ದ್ವಾರಕೀಶ್ ಟು ಚಿಕ್ಕಣ್ಣ: ಕಾಮಿಡಿ ಪಾತ್ರದಿಂದ 'ಹೀರೋ' ಪಟ್ಟ ಅಲಂಕರಿಸಿದ ಕನ್ನಡದ ನಟರಿವರು!

ಒಂದ್ಕಾಲದಲ್ಲಿ ವಿಲನ್ ಅಥವಾ ಕಾಮಿಡಿ ನಟನಾಗಿ ಕಾಣಿಸಿಕೊಂಡರೆ ಮತ್ತೆ ಆ ಇಮೇಜ್‌ನಿಂದ ಹೊರಬರಲಾಗದ ಪರಿಸ್ಥಿತಿಯಿತ್ತ. ಆದ್ರೀಗ ಕಾಲ ಬದಲಾಗಿದ್ದು, ಸ್ಯಾಂಡಲ್‌ವುಡ್‌ನ ಅನೇಕ ಕಾಮಿಡಿ ನಟರು ಹೀರೋಗಳಾಗಿದ್ದಾರೆ. ಕಾಮಿಡಿ ಪಾತ್ರದಿಂದ ಹೀರೋ ಪಟ್ಟ ಅಲಂಕರಿಸಿದ ನಟರಲ್ಲಿ ಮೊದಲಿಗೆ ನೆನಪಾಗೋದು ಕರ್ನಾಟಕದ ಕುಳ್ಳ ಅಂತಲೇ ಖ್ಯಾತಿ ಪಡೆದಿರುವ ದ್ವಾರಕೀಶ್. ಮೇಯರ್ ಮತ್ತಣ್ಣ ಸಿನಿಮಾ ಮೂಲಕ ಹಾಸ್ಯನಟರಾಗಿ ಚಂದನವನ ಪ್ರವೇಶಿಸಿದ ಅವರು, ನಂತರ ಹಲವು ಸಿನಿಮಾಗಳಲ್ಲಿ ಹಾಸ್ಯ ಪಾತ್ರಗಳಲ್ಲಿ ಕಾಣಸಿಕೊಂಡಿದ್ದರು. ನಂತರ 1972ರಲ್ಲಿ ಕುಳ್ಳ ಏಜೆಂಟ್ 000 ಚಿತ್ರದ ಮೂಲಕ ಅವರು ನಾಯಕರಾದರು. ಈ ಚಿತ್ರ ಪ್ರೇಕ್ಷಕರಿಂದ  ಮೆಚ್ಚುಗೆ ಪಡೆದುಕೊಳ್ಳುತ್ತಿದ್ದಂತೆ ಕಿಲಾಡಿ ಪುಟ್ಟು, ಪೆದ್ದ ಗೆದ್ದ, ಪ್ರಚಂಡ ಕುಳ್ಳ, ಸಿಂಗಾಪುರದಲ್ಲಿ ರಾಜಾ ಕುಳ್ಳ ಹೀಗೆ ಹಲವು ಸಿನಿಮಾಗಳ ಮೂಲಕ ಹೀರೋ ಆಗಿ ಸೂಪರ್ ಸಕ್ಸಸ್ ಕಂಡರು. 

ತಮ್ಮದೇಯಾದ ಮ್ಯಾನರಿಸಂ ಮೂಲಕ ಪ್ರೇಕ್ಷಕರನ್ನು ನಕ್ಕುನಲಿಸುವ ಜಗ್ಗೇಶ್, ಭಾರತೀಯ ಚಿತ್ರರಂಗದಲ್ಲಿ ನವರಸ ನಾಯಕ ಅಂತಲೇ ಖ್ಯಾತಿ ಪಡೆದಿದ್ದಾರೆ.  ಪಂಚಿಂಗ್ ಡೈಲಾಗನ್ನೆ ಬಂಡವಾಳ ಮಾಡಿಕೊಂಡ ಇವರು, ಆರಂಭದಲ್ಲಿ ಚಿಕ್ಕ-ಚಿಕ್ಕ ಪಾತ್ರ ಮಾಡುತ್ತಿದ್ದರು. ಜಗ್ಗೇಶ್ ಅಭಿನಯದ ಮೊದಲ ಸಿನಿಮಾ ಇಬ್ಬನಿ ಕರಗಿತು. ಈ ಚಿತ್ರದಲ್ಲಿ ಜಗ್ಗೇಶ್ ಸೈಡ್ ಕಾಮಿಡಿಯನ್ ಆಗಿ ನಟಿಸಿದ್ದರು. ನಂತರ ರಣಧೀರ, ರಾಣಿ ಮಹಾರಾಣಿ, ಪೋಲಿ ಹುಡುಗ ಹೀಗೆ ಹಲವು ಸಿನಿಮಾಗಳಲ್ಲಿ ಹಾಸ್ಯ ಹಾಗೂ ಖಳನಟನಾಗಿ ನಟಿಸಿದರು. ಇವರು ನಾಯಕನಾಗಿ ಅಭಿನಯಿಸಿದ ಮೊದಲ ಸಿನಿಮಾ 'ತರ್ಲೆ ನನ್ ಮಗ'. ಆನಂತರ ಭಂಡ ನನ್ನ ಗಂಡ, ಸರ್ವರ್ ಸೋಮಣ್ಣ, ಮೇಕಪ್ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ ಜಗ್ಗೇಶ್ ಇಂದು ಕನ್ನಡ ಚಿತ್ರರಂಗಲ್ಲಿ ಸ್ಟಾರ್ ನಟರಾಗಿರುವುದು ಇತಿಹಾಸ. 

ಜಗ್ಗೇಶ್ ಅವರಂತೆಯೇ ಒಂದು ಗುರಿ ಇಟ್ಟುಕೊಂಡ ಬಂದ ಕಾಮಿಡಿ ನಟರಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಕೂಡ ಒಬ್ಬರು. ಆರಂಭದಲ್ಲಿ ಉದಯ ವಾಹಿನಿಯ 'ಕಾಮಿಡಿ ಟೈಮ್' ಎಂಬ ಕಾರ್ಯಕ್ರಮದ ನಿರೂಪಕರಾಗಿದ್ದ ಗಣೇಶ್, ಒಂದ್ಕಾಲದಲ್ಲಿ ಅವರು ಕಾಮಿಡಿ ಟೈಮ್ ಗಣೇಶ್ ಅಂತಲೇ ಜನಪ್ರಿಯತೆ ಗಳಿಸಿದ್ದರು. ಇವರು ಸಿನಿಮಾರಂಗಕ್ಕೆ ಎಂಟ್ರಿಕೊಟ್ಟಿದ್ದು ಠಫೋರಿ ಸಿನಿಮಾ ಮೂಲಕ. ಇದರಲ್ಲಿ ಖಳನಾಯಕನ ಪಾತ್ರ ಮಾಡಿದ್ದರು. ಆ ನಂತರ ಅಬ್ಬಬ್ಬಾ ಎಂಥ ಹುಡುಗ, ಬಾ ಬಾರೋ ರಸಿಕ, ಅಹಂ ಪ್ರೇಮಾಸ್ಮಿ ಹೀಗೆ ಹಲವು ಸಿನಿಮಾಗಳಲ್ಲಿ ಹಾಸ್ಯನಟರಾಗಿ ಕಾಣಿಸಿಕೊಂಡಿದ್ದರು. ಇವರು ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ ಚೆಲ್ಲಾಟ, ಆದರೆ ಅವರಿಗೆ ಸ್ಟಾರ್ ಇಮೇಜ್ ತಂದುಕೊಟ್ಟಿದ್ದು ಮುಂಗಾರು ಮಳೆ. 

ಅಣ್ಣ ಜಗ್ಗೇಶ್, ವಿಷ್ಣುವರ್ಧನ್, ಶಿವರಾಜ್‌ಕುಮಾರ್, ಪುನೀತ್ ರಾಜ್‌ಕುಮಾರ್, ರವಿಚಂದ್ರನ್ ಹೀಗೆ ಹಲವು ಸ್ಟಾರ್ ನಟರ ಸಿನಿಮಾಗಳಲ್ಲಿ ತಮ್ಮ ಕಾಮಿಡಿ ಕಿಕ್ ನೀಡ್ತಿದ್ದ ಕೋಮಲ್, ಮಿಸ್ಟರ್ ಗರಗಸ ಸಿನಿಮಾ ಮೂಲಕ ಹೋರೋ ಆದರು. ಆದರೆ, ಈ ಸಿನಿಮಾ ಅವರ ಕೈಹಿಡಿಯಲಿಲ್ಲ. ನಂತರ 'ಚಮ್ಕಾಯ್ಸಿ ಚಿಂದಿ ಉಡಾಯಿಸಿ' ಸಿನಿಮಾದಲ್ಲಿ ನಾಯಕನಾಗಿ ನಟಿಸಿದರೂ ಇದು ಕೂಡ ಯಶಸ್ಸು ಕಾಣಲಿಲ್ಲ. ನಂತರ ಬಂದ ಗೋವಿಂದಾಯ ನಮಃ ಕೋಮಲ್ ಅವರ ಕಾಮಿಡಿ ಇಮೇಜ್ ಬದಲಾಯಿಸಿ, ಹೀರೋ ಲುಕ್ ಕೊಟ್ಟಿತು. 

ನಟ ಶರಣ್ ಕೂಡ ಆರಂಭದಲ್ಲಿ ಸ್ಟಾರ್ ನಟರ ಜೊತೆ ಕಾಮಿಡಿ ಪಾತ್ರ ಮಾಡುತ್ತಿದ್ದರು. 1996ರಲ್ಲಿ ಪ್ರೇಮ ಪ್ರೇಮ ಪ್ರೇಮ ಎಂಬ ಸಿನಿಮಾ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ಇವರು, ನೂರು ಸಿನಿಮಾಗಳಲ್ಲಿ ಪ್ರೇಕ್ಷಕರನ್ನು ನಕ್ಕು ನಲಿಸಿದರು. ಆನಂತರ ತಮ್ಮ ನೂರನೇ ಸಿನಿಮಾ 'ರ್ಯಾಂಬೋ' ಮೂಲಕ ಚಿತ್ರರಂಗಕ್ಕೆ ಹೀರೋ ಆಗಿ ಎಂಟ್ರಿ ಕೊಟ್ಟರು. ಅಂದುಕೊಂಡಂತೆ ಈ ಸಿನಿಮಾ ಯಶಸ್ವಿಯಾಗುವ ಮೂಲಕ ನಾಯಕನ ಪಟ್ಟ ಅಲಂಕರಿಸಿದರು. ಇದಾದ ಬಳಿಕ ವಿಕ್ಟರಿ, ಅಧ್ಯಕ್ಷ, ರಾಜ ರಾಜೆಂದ್ರ, ಜಯಲಲಿತಾ, ವಿಕ್ಟರಿ ೨, ಗುರುಶಿಷ್ಯರು ಹೀಗೆ ಒಂದಾದ ಮೇಲೆ ಒಂದರಂತೆ ಹಿಟ್ ಸಿನಿಮಾಗಳನ್ನು ನೀಡುವ ಮೂಲಕ ಚಂದನವನದ ಪೈಸಾ ವಸೂಲ್ ಹೀರೋ ಎನಿಸಿಕೊಂಡಿದ್ದಾರೆ. 

ತಮ್ಮ ವಿಶಿಷ್ಟ ಮ್ಯಾನರಿಸಂನಿಂದ ಪ್ರೇಕ್ಷಕರಿಗೆ ಕಚಗುಳಿಯಿಡುವ ನಟ ಚಿಕ್ಕಣ್ಣ. ಇವರು ತೆರೆಮೇಲೆ ಕಾಣಿಸಿಕೊಂಡರೆ ಸಾಕು ಪ್ರೇಕ್ಷಕರಿಗೆ ಮನರಂಜನೆಯ ರಸದೌತಣ ಸಿಗೋದು ಗ್ಯಾರಂಟಿ. ರಾಕಿಂಗ್ ಸ್ಟಾರ್ ಯಶ್ ಅವರ `ಕಿರಾತಕ' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಹಾಸ್ಯನಟನಾಗಿ ಕಾಲಿಟ್ಟಇವರು, ರಾಜಾ ಹುಲಿ, ಅಧ್ಯಕ್ಷ ಚಿತ್ರಗಳ ಮೂಲಕ ಬಿಗ್‌ಬ್ರೇಕ್ ಪಡೆದರು.. ಕನ್ನಡದ ಬಹುತೇಕ ಎಲ್ಲಾ ನಟರೊಂದಿಗೆ ತೆರೆ ಹಂಚಿಕೊಂಡಿರುವ ಚಿಕ್ಕಣ್ಣ, ಅಧ್ಯಕ್ಷ ಸಿನಿಮಾದಲ್ಲಿ ನಾಯಕನಿಗಿರುವಷ್ಟೇ ಪ್ರಾಮುಖ್ಯತೆಯಿರುವ ಪಾತ್ರದಲ್ಲಿ ಮಿಂಚಿದ್ದರು. ಇದಾದ ಬಳಿಕ ಹಲವು ಸಿನಿಮಾಗಳಲ್ಲಿ ನಟಿಸುವ ಜೊತೆಗೆ 'ಉಪಾಧ್ಯಕ್ಷ' ಸಿನಿಮಾದಲ್ಲಿ ಹೀರೋ ಆಗಿ ಮಿಂಚಿದರು.