ಜೋಗಿ ಟು ಲವ್‌ ಮಾಕ್ಟೇಲ್: ಪರಭಾಷೆಗೆ ರೀಮೆಕ್ ಆಗಿ ಫ್ಲಾಪ್ ಆದ ಕನ್ನಡದ ಸೂಪರ್ ಹಿಟ್ ಸಿನಿಮಾಗಳಿವು!

2005ರಲ್ಲಿ ತೆರೆಕಂಡ ಪ್ರೇಮ್ ಹಾಗೂ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಕಾಂಬಿನೇಷನ್‌ನ 'ಜೋಗಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಚಿತ್ರದಲ್ಲಿ ರೌಡಿಸಂ ಜೊತೆಗೆ ತಾಯಿ- ಮಗನ ಸೆಂಟಿಮೆಂಟ್ ಕಟ್ಟಿಕೊಡಲಾಗಿತ್ತು. ಇನ್ನು ಈ ಸಿನಿಮಾದ ಎಲ್ಲಾ ಹಾಡುಗಳು ಹಿಟ್ ಆಗಿತ್ತು. ಜೋಗಿ ಸಿನಿಮಾ ರಾಜ್ಯಾದ್ಯಂತ ದಾಖಲೆಯ ಪ್ರದರ್ಶನ ಕಂಡಿತ್ತು. ಈ ಚಿತ್ರವನ್ನು ತೆಲುಗಿನಲ್ಲಿ ಪ್ರಭಾಸ್ 'ಯೋಗಿ' ಹೆಸರಿನಲ್ಲಿ ರೀಮೆಕ್ ಮಾಡಿದ್ದರು. ತಮಿಳು ರೀಮೆಕ್‌ನಲ್ಲಿ ಧನುಷ್ ನಟಿಸಿದ್ದರು. ಆದರೆ, ಎರಡೂ ಸಿನಿಮಾಗಳು ಸದ್ದು ಮಾಡಲೇಯಿಲ್ಲ.

ಕನ್ನಡ ಚಿತ್ರರಂಗದಲ್ಲಿ ಸಾರ್ವಕಾಲಿಕ ದಾಖಲೆ ಬರೆದ ಸಿನಿಮಾ ಅಂದರೆ 'ಮುಂಗಾರು ಮಳೆ'. ಯೋಗರಾಜ್‌ ಭಟ್ ನಿರ್ದೇಶನ ಹಾಗೂ ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗಿ ನಟಿಸಿದ ಈ ರೊಮ್ಯಾಂಟಿಕ್ ಸಿನಿಮಾ ಬಾಕ್ಸಾಫಿಸ್ ಶೇಕ್ ಮಾಡಿತ್ತು. 2006ರಲ್ಲಿ ತೆರೆಕಂಡ ಈ ಸಿನಿಮಾ 2008ರಲ್ಲಿ ತೆಲುಗಿಗೆ 'ವಾನ' ಹೆಸರನಲ್ಲಿ ರೀಮೆಕ್ ಆಗಿತ್ತು. ಎಂ. ಎಸ್ ರಾಜು ನಿರ್ದೇಶನದ ಈ ಚಿತ್ರದಲ್ಲಿ ವಿನಯ್ ರೈ ಹೀರೊ ಆಗಿ ನಟಿಸಿದ್ದರು. ಆದರೆ, ಸಿನಿಮಾ ಬಂದು ಹೋಗಿದ್ದು ಯಾರಿಗೂ ಗೊತ್ತಾಗಲಿಲ್ಲ. ಮರಾಠಿ, ಒಡಿಯಾ, ಬೆಂಗಾಲಿ ಭಾಷೆಗಳಿಗೂ ಈ ಸಿನಿಮಾ ರೀಮೆಕ್ ಆಗಿತ್ತು.

ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ನಿರ್ದೇಶಿಸಿ ನಟಿಸಿದ್ದ 'ಉಳಿದವರು ಕಂಡಂತೆ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಗೆಲ್ಲಲಿಲ್ಲ. ಆದರೆ, ಕಲ್ಟ್‌ ಕ್ಲಾಸಿಕ್ ಸಿನಿಮಾ ಎನಿಸಿಕೊಂಡಿತ್ತು. ಒಂದು ವರ್ಗದ ಪ್ರೇಕ್ಷಕರಿಗೆ ಈ ಚಿತ್ರ ಬಹಳ ಇಷ್ಟವಾಗಿತ್ತು. ಆ ಸಿನಿಮಾ ಸೀಕ್ವೆಲ್‌ಗೂ ಈಗ ಪ್ರಯತ್ನ ನಡೀತಿದೆ. ತಮಿಳಿನಲ್ಲಿ ನಿವಿನ್ ಪೌಲಿ 'ರಿಚ್ಚಿ' ಆಗಿ ರೀಮೆಕ್ ಮಾಡಿದ್ದರು. ಆದರೆ, ಸಿನಿಮಾ ಪ್ರೇಕ್ಷಕರ ಮನಗೆಲ್ಲುವಲ್ಲಿ ವಿಫಲವಾಯಿತು.

2016ರಲ್ಲಿ ತೆರೆಕಂಡ ರಕ್ಷಿತ್ ಶೆಟ್ಟಿ ಹಾಗೂ ರಿಷಬ್ ಶೆಟ್ಟಿ ಕಾಂಬಿನೇಷನ್‌ನ 'ಕಿರಿಕ್ ಪಾರ್ಟಿ' ಕನ್ನಡದಲ್ಲಿ ಸೆನ್ಸೇಷನಲ್‌ ಹಿಟ್ ಸಿನಿಮಾ ಎನಿಸಿಕೊಂಡಿತ್ತು. ಚಿತ್ರದಲ್ಲಿ ರಕ್ಷಿತ್ ಜೊತೆ ರಶ್ಮಿಕಾ ಹಾಗೂ ಸಂಯುಕ್ತಾ ನಾಯಕಿಯರಾಗಿ ನಟಿಸಿದ್ದರು. ಕಾಲೇಜು ಲವ್ ಸ್ಟೋರಿ ಹೊಂದಿದ್ದ ಈ ಸಿನಿಮಾ ಬಾಕ್ಸಾಫಿಸ್‌ನಲ್ಲಿ ಧೂಳೆಬ್ಬಿಸಿತ್ತು. 50 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್ ಮಾಡಿ ಎಲ್ಲರ ಹುಬ್ಬೇರಿಸಿತ್ತು. ಇದೇ ಟೈಟಲ್‌ನಲ್ಲಿ ತೆಲುಗಿಗೆ ಸಿನಿಮಾ ರೀಮೆಕ್ ಆಗಿತ್ತು. ಆದರೆ, ಸಿನಿಮಾ ಅಲ್ಲಿ ದೊಡ್ಡದಾಗಿ ಗೆಲ್ಲಲಿಲ್ಲ.

ಶಿವರಾಜ್‌ಕುಮಾರ್ ಹಾಗೂ ಶ್ರೀಮುರಳಿ ನಟನೆಯ ಆಕ್ಷನ್ ಎಂಟರ್‌ಟೈನರ್ 'ಮಫ್ತಿ' ಸೂಪರ್ ಹಿಟ್ ಆಗಿತ್ತು. ಈ ವರ್ಷದ ಆಗಸ್ಟ್ 15ರಂದು ಇದರ ಪ್ರಿಕ್ವೇಲ್ ಭೈರತಿ ರಣಗಲ್ ತೆರೆಗೆ ಬರಲು ಸಕ್ಜಾಗಿದೆ. ಮಫ್ತಿ ಸಿನಿಮಾ 'ಪತ್ತು ತಲ' ಹೆಸರಿನಲ್ಲಿ ತಮಿಳಿಗೆ ರೀಮೆಕ್ ಆಗಿ ಬಂದಿತ್ತು. ಶಿವಣ್ಣ ಮಾಡಿದ್ದ ಮಾಫಿಯಾ ಡಾನ್ ಪಾತ್ರದಲ್ಲಿ ಸಿಂಬು ಮಿಂಚಿದ್ದರು. ಆದರೆ, ಕನ್ನಡದಲ್ಲಿ ನಡೆದ ಮ್ಯಾಜಿಕ್ ಕಾಲಿವುಡ್‌ನಲ್ಲಿ ನಡೆಯಲಿಲ್ಲ.

ರಕ್ಷಿತ್ ಶೆಟ್ಟಿ-ಅನಂತ್ ನಾಗ್ ನಟನೆಯ ಗೋಧಿ ಬಣ್ಣ ಸಾಧಾರಣ ಮೈಕಟ್ಟು ಚಿತ್ರ ತಮಿಳಿಗೆ ರೀಮೆಕ್ ಆಗಿತ್ತು. ಡಾರ್ಲಿಂಗ್ ಕೃಷ್ಣ ಅವರ ಲವ್‌ ಮಾಕ್ಟೇಲ್ ಸಿನಿಮಾ ತೆಲುಗಿನಲ್ಲಿ ಬಂದು ಒಂದು ವಾರ ಕೂಡ ಓಡಲಿಲ್ಲ. ಯಶ್ ಅವರ ಮಿಸ್ಟರ್ ಅಂಡ್ ಮಿಸೆಸ್ ರಾಮಾಚಾರಿ ಕಥೆ ಮರಾಠಿ ಭಾಷೆಗೆ ಹೋಗಿತ್ತು. ಇದೇ ರೀತಿ ದಿಯಾ ಹಾಗೂ ಸಿಂಪಲ್ಲಾಗ್ ಒಂದ್ ಲವ್‌ ಸ್ಟೋರಿ ಸಿನಿಮಾಗಳು ರೀಮೆಕ್ ಆಗಿ ಸದ್ದು ಮಾಡಲಿಲ್ಲ.