ಹಾಡುಗಳೇ ಇಲ್ಲದಿದ್ರೂ ಕನ್ನಡದ ಈ ಸಿನಿಮಾಗಳು ಸೂಪರ್ ಹಿಟ್!

ಭಾರತೀಯ ಚಿತ್ರರಂಗದಲ್ಲೇ ಹೊಸ ಪ್ರಯೋಗ ಎಂದೆನಿಸಿಕೊಂಡ ಕನ್ನಡ ಸಿನಿಮಾ 'ಪುಷ್ಪಕ ವಿಮಾನ'. ಕಮಲ್ ಹಾಸನ್ ನಟನೆಯ ಈ ಮೂಕಿ ಕಾಮಿಡಿ ಸಿನಿಮಾ 1987ರಲ್ಲಿ ತೆರೆಕಂಡು ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದಲ್ಲಿ ಯಾವುದೇ ಹಾಡುಗಳಿರಲಿಲ್ಲ ಹಾಗೂ ಸಂಭಾಷಣೆ ಇರಲಿಲ್ಲ. ಬರೀ ಮೂಕಭಿನಯದಿಂದ ಅಂದಿನ ದಿನಗಳಲ್ಲಿ ಮೆಚ್ಚುಗೆಗೆ ಪಾತ್ರವಾಗಿತ್ತು.  'ಪುಷ್ಪಕ ವಿಮಾನ' ಸಿನಿಮಾವನ್ನು ವಾಸ್ ರಾವ್ ನಿರ್ದೇಶನ ಮಾಡಿದ್ದರು. ವೈದ್ಯನಾಥನ್ ಅವರ ಹಿನ್ನೆಲೆ ಸಂಗೀತ ಬಿಟ್ಟರೆ ಯಾವುದೇ ಹಾಡುಗಳು ಈ ಚಿತ್ರದಲ್ಲಿ ಇರಲಿಲ್ಲ. ಬೆಂಗಳೂರಿನಲ್ಲಿ ೩೫ ವಾರಗಳ ಕಾಲ ಈ ಸಿನಿಮಾ ಪ್ರದರ್ಶನವಾಗಿತ್ತು.

ಹಾಡುಗಳಿಲ್ಲದೇ ಯಶಸ್ವಿಯಾದ ಮತ್ತೊಂದು ಕನ್ನಡ ಸಿನಿಮಾವೆಂದರೆ ಸಾಹಸಸಿಂಹ ಡಾ.ವಿಷ್ಣುವರ್ಧನ್ ಅಭಿನಯದ 'ನಿಷ್ಕರ್ಷ'. ಈ ಚಿತ್ರಕ್ಕೆ ಸಸ್ಪೆನ್ಸ್ ಕಮ್ ಥ್ರಿಲ್ಲರ್ ಸಿನಿಮಾಗಳ ಮಾಸ್ಟರ್ ಎಂದು ಬ್ರ್ಯಾಂಡ್ ಆಗಿದ್ದ ಸುನಿಲ್ ಕುಮಾರ್ ದೇಸಾಯಿ ಆಕ್ಷನ್ ಕಟ್ ಹೇಳಿದ್ದರು. ಬ್ಯಾಂಕ್ ದರೋಡೆಯನ್ನು ಬಹಳ ಅದ್ಭುತವಾಗಿ ತೆರೆಮೇಲೆ ಕಟ್ಟಿಕೊಟ್ಟಿದ್ದ ಅವರು, ಇಡೀ ಚಿತ್ರವನ್ನು ಒಂದೇ ಕಟ್ಟಡದಲ್ಲಿ ಚಿತ್ರೀಕರಣ ಮಾಡಿ ಅಂದಿನ ಕಾಲಕ್ಕೆ ಬಹುದೊಡ್ಡ ಸಾಹಸ ಮಾಡಿದ್ದರು. ವಿಷ್ಣು ದಾದಾ ಈ ಸಿನಿಮಾದಲ್ಲಿ ಕಮಾಂಡೋ ಅಜಯ್ ಆಗಿ ಮಿಂಚಿದ್ರು. 1993ರಲ್ಲಿ ತೆರೆಕಂಡ ಈ ಸಿನಿಮಾದಲ್ಲಿ ಕೂಡ ಒಂದೇ ಒಂದು ಹಾಡು ಇರಲಿಲ್ಲ. ಹಾಡುಗಳಿಲ್ಲದಿದ್ದರೂ ಕೂಡ ನಿಷ್ಕರ್ಷ ಸಿನಿಮಾ ಸೂಪರ್ ಹಿಟ್ ಆಗಿತ್ತು.

2013ರಲ್ಲಿ ಬಿಡುಗಡೆಯಾದ 6-5=2 ಸಿನಿಮಾ ಕೋಟಿಗಟ್ಟಲೆ ಹಣ ಸುರಿದು ಸಿನಿಮಾ ನಿರ್ಮಿಸುತ್ತಿರುವ ಕನ್ನಡದ ನಿರ್ಮಾಪಕರಿಗೆ ಶಾಕ್ ಉಂಟುಮಾಡಿತ್ತು. ಎಳ್ಳು ಪ್ರಚಾರ ಪಡೆದುಕೊಳ್ಳದ ಈ ಸಿನಿಮಾ, ಚಿತ್ರಮಂದಿರಗಳಲ್ಲಿ ಒಂದು ವಾರ ಇರೋದೇ ಕಷ್ಟ ಅಂದುಕೊಂಡಿದ್ದರು. ಆದರೆ, ಕೆ.ಎಸ್.ಅಶೋಕ್ ನಿರ್ದೇಶನದ ವಿಭಿನ್ನ ಶೀರ್ಷಿಕೆಯೊಂದಿಗೆ ಬಂದ ಈ ಸಿನಿಮಾ ಪ್ರೇಕ್ಷಕರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿತ್ತು.  ಬಹುತೇಕ ಹೊಸಬರೇ ಇದ್ದ ಈ ಸಿನಿಮಾವನ್ನು 30 ಲಕ್ಷ ವೆಚ್ಚದಲ್ಲಿ ನಿರ್ಮಸಲಾಗಿತ್ತು. ಈ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ 5 ಕೋಟಿಗೂ ಅಧಿಕ ಗಳಿಕೆ ಕಂಡಿತ್ತು.  ಐದು ಮಂದಿ ಗೆಳೆಯರು ದಟ್ಟವಾದ ಅರಣ್ಯಕ್ಕೆ ಟ್ರಕ್ಕಿಂಗ್ ಅಂತ ಹೋದಾಗ ದೆವ್ವದ ಕಾಟಕ್ಕೆ ಹೇಗೆ ಒಬ್ಬಬ್ಬರೇ ಪ್ರಾಣ ಕಳೆದುಕೊಳ್ಳುತ್ತಾರೆ ಎಂಬುದು ಚಿತ್ರದ ಕಥೆ. ಹಿನ್ನೆಲೆ ಸಂಗೀತ ಬಿಟ್ಟರೆ ಯಾವುದೇ ಹಾಡುಗಳಿರದ ಈ ಸಿನಿಮಾ,  ನೈಜ ಘಟನೆಯನ್ನು ಆಧರಿಸಿತ್ತು.  

ಶಂಕರ್ ನಾಗ್ ಅವರ ಅತ್ಯುತ್ತಮ ಸಿನಿಮಾಗಳ ಪೈಕಿ ಆಕ್ಸಿಡೆಂಟ್ ಕೂಡ ಒಂದು. 1980ರಲ್ಲಿ ಮುಂಬೈನಲ್ಲಿ ನಡೆದ ಹಿಟ್ ಅಂಡ್ ರನ್ ಪ್ರಕರಣದಿಂದ ಪ್ರೇರಣೆ ಪಡೆದು ಈ ಚಿತ್ರ ತಯಾರಿಸಲಾಗಿತ್ತು. ಪ್ರಬಲ ರಾಜಕಾರಣಿಯ ಮಗ ಆಕ್ಸಿಡೆಂಟ್ ಮಾಡುವುದು, ಮಗನನ್ನ ಕಾಪಾಡಲು ರಾಜಕಾರಣಿ ತನ್ನ ಅಧಿಕಾರವನ್ನು ದುರ್ಬಳಕೆ ಮಾಡಿಕೊಳ್ಳುವುದು ಈ ಚಿತ್ರದ ಕಥಾವಸ್ತು. ಈ ಚಿತ್ರಕ್ಕೆ ರಾಷ್ಟ್ರ ಪ್ರಶಸ್ತಿ ಹಾಗೂ ರಾಜ್ಯ ಪ್ರಶಸ್ತಿ ಲಭಿಸಿದೆ. ಆದರೆ, ಈ ಸಿನಿಮಾದಲ್ಲಿ ಯಾವುದೇ ಹಾಡು ಇರಲಿಲ್ಲ.

2021ರಲ್ಲಿ ಕನ್ನಡ ಚಿತ್ರರಂಗದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡಿದ ಸಿನಿಮಾ ದಿಯಾ. ರೋಮ್ಯಾಂಟಿಕ್, ಟ್ರಾಜಿಡಿ ಕಥಾಹಂದರ ಹೊಂದಿದ್ದ ಈ ಸಿನಿಮಾದಲ್ಲಿ ಖುಷಿ ರವಿ, ಪೃಥ್ವಿ ಅಂಬರ್, ದೀಕ್ಷಿತ್ ಶೆಟ್ಟಿ  ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು. ಲವ್ ಸ್ಟೋರಿ ಜೊತೆಗೆ ಎಮೋಷನ್ ಇದ್ದ ಕಾರಣ ಈ ಸಿನಿಮಾ ಪ್ರೇಕ್ಷಕರನ್ನು ಹೆಚ್ಚು ಸೆಳೆದಿತ್ತು. ಎರಡು ಲವ್ ಸ್ಟೋರಿಗಳನ್ನು ಒಳಗೊಂಡ ಈ ಸಿನಿಮಾ ಸಿನಿರಸಿಕರಿಗೆ ಬಹಳ ಇಷ್ಟವಾಗಿತ್ತು. ರೊಮ್ಯಾಂಟಿಕ್ ಲವ್ ಸ್ಟೋರಿ ಅಂದ ಮೇಲೆ ಅಲ್ಲಿ ಹಾಡುಗಳಿಗೆ ಹೆಚ್ಚಿನ ಆದ್ಯತೆ ಇರುತ್ತದೆ. ಆದರೆ, ಕೆ.ಎಸ್.ಅಶೋಕ್ ನಿರ್ದೇಶನದ ಈ ಸಿನಿಮಾದಲ್ಲಿಯೂ ಕೂಡ ಯಾವುದೇ ಹಾಡುಗಳು ಇರಲಿಲ್ಲ. ಇಲ್ಲಿ ಗಟ್ಟಿತನದ ಕತೆ ಇದ್ದಿದ್ದರಿಂದ ಹಾಡುಗಳ ಅವಶ್ಯಕತೆ ಇರಲಿಲ್ಲ ಎಂಬುದು ನಿರ್ದೇಶಕ ಅಭಿಪ್ರಾಯ.