ಶಂಕರ್‌ನಾಗ್ ಟು ಗಣೇಶ್: ಬೆಳ್ಳಿತೆರೆ ಮೇಲೆ ಆಟೋ ಚಾಲಕರಾಗಿ ಮಿಂಚಿದ ಸ್ಟಾರ್ ನಟರಿವರು!

ಆಟೋ ಡ್ರೈವರ್ ಪಾತ್ರ ಅಂದಾಕ್ಷಣ ನೆನಪಾಗೋದೆ ಕನ್ನಡದ ದಂತಕಥೆ ಶಂಕರ್ ನಾಗ್. ಅವರು ನಮ್ಮ ನಡುವೆ ಇಲ್ಲವಾಗಿ ಮೂರು ದಶಕದ ಮೇಲಾಯಿತು. ಇಂದಿಗೂ ಅವರಿಗೆ ಅಪಾರ ಪ್ರಮಾಣದ ಅಭಿಮಾನಿಗಳಿದ್ದಾರೆ. ಅದರಲ್ಲೂ ಆಟೋ ಚಾಲಕರಿಗೂ ಶಂಕರ್‌ನಾಗ್‌ಗೂ ಅವಿನಭಾವ ಸಂಬಂಧವಿದೆ. 1980ರಲ್ಲಿ ಬಿಡುಗಡೆಯಾದ 'ಆಟೋ ರಾಜ' ಚಿತ್ರದ ಮೂಲಕ ಶಂಕರ್ ನಾಗ್ ಆಟೋ ಚಾಲಕರ ಆರಾಧ್ಯ ದೈವವಾಗಿ ಬದಲಾಗಿದ್ದು ಇತಿಹಾಸ. ರಾಜ್ಯದ ಆಟೋಗಳ ಮೇಲೆಲ್ಲ ರಾರಾಜಿಸುತ್ತಿರುವ ಶಂಕರ್ ಇಂದಿಗೂ ಕೂಡ ಜನಮಾನಸದಲ್ಲಿ ಜೀವಂತವಾಗಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ವೃತ್ತಿ ಬದುಕಿನಲ್ಲಿ ಮೈಲಿಗಲ್ಲಾದ ಸಿನಿಮಾ 'ಸಾರಥಿ'. ದಾಸ ಸಂಕಷ್ಟದಲ್ಲಿದ್ದಾಗ ಕೈ ಹಿಡಿದು ಮೇಲೆತ್ತಿದ ಸಿನಿಮಾ ಇದು. ಕೃಷ್ಣ ಎನ್ನುವ ಪಾತ್ರದಲ್ಲಿ ಎಲ್ಲಾ ಆಟೋ ಚಾಲಕರ ಪ್ರತಿನಿಧಿಯಾಗಿ ದರ್ಶನ್ ನಟಿಸಿದ್ದರು. ಚಿತ್ರವನ್ನು ಸಮಸ್ತ ಆಟೋ ಚಾಲಕರಿಗೆ ಅರ್ಪಿಸಿದ್ದರು. ಈ ಸಿನಿಮಾದ 'ಅತಿರಥ ಮಹಾರಥ ಸಾರಥಿ, ಸೂರ್ಯ ಚಂದ್ರ ಎತ್ತುತ್ತಾರೆ ಆರತಿ, ಆಟೋ ಡ್ರೈವರ್‌ ಕೂಡ ಒಬ್ಬ ಸಾಹಿತಿ' ಸಾಂಗ್ ಆಟೋ ಚಾಲಕರ ಪಾಲಿನ ಆಂಥಮ್ ಆಗಿಬಿಟ್ಟಿದೆ. ನಟ ದರ್ಶನ್‌ಗೆ ಸಾಕಷ್ಟು ಜನ ಅಭಿಮಾನಿಗಳಿದ್ದು, ಅದರಲ್ಲಿ ಆಟೋ ಚಾಲಕರ ಸಂಖ್ಯೆ ಜಾಸ್ತಿಯಿದೆದೆ. ಚಾಲೆಂಜಿಂಗ್ ಸ್ಟಾರ್‌ಗೂ ಅಷ್ಟೇ, ಆಟೋ ಚಾಲಕರ ಅಂದ್ರೆ ಪಂಚಪ್ರಾಣ.

ಸಾಹಸಸಿಂಹ ಡಾ.ವಿಷ್ಣುವರ್ಧನ್ 'ಕೋಟಿಗೊಬ್ಬ' ಸಿನಿಮಾದಲ್ಲಿ ಆಟೋ ಚಾಲಕನಾಗಿ ಕಾಣಿಸಿಕೊಂಡಿದ್ದರು. ಒಬ್ಬ ಸಮಾನ್ಯ ಯುವಕ ತನ್ನ ಸ್ನೇಹಿತನ ಸಾವಿನಿಂದ ಬದಲಾಗಿ ಮುಂಬೈ ಭೂಗತ ಲೋಕದ ದೊರೆಯಾಗುವ ಕಥೆಯನ್ನು ಚಿತ್ರ ಹೊಂದಿತ್ತು. ವಿಷ್ಣುವರ್ಧನ್ ಮುಂಬೈ ಗ್ಯಾಂಗ್ ಸ್ಟರ್ ಜಯಸಿಂಹ ಮತ್ತು ಮುಗ್ಧ ಆಟೋ ಡ್ರೈವರ್ ನಂಜುಂಡನ ಪಾತ್ರದಲ್ಲಿ ಮಿಂಚಿದ್ದರು. ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು.

ಯೋಗರಾಜ್ ಭಟ್ ನಿರ್ದೇಶನದಲ್ಲಿ ನಟ ಕಿಚ್ಚ ಸುದೀಪ್ ಹಾಗೂ ರಮ್ಯಾ ನಟಿಸಿದ ಸಿನಿಮಾ 'ರಂಗ SSLC'. ಚಿತ್ರದಲ್ಲಿ ಸುದೀಪ್ ಆಟೊ ಡ್ರೈವರ್ 'ರಂಗ' ಆಗಿ ಪ್ರೇಕ್ಷಕರನ್ನು ರಂಜಿಸಿದ್ದರು. SSLC ಎಕ್ಸಾಂ ಪಾಸ್ ಮಾಡೋಕ್ಕಾಗದೇ ಪದೇ ಪದೆ ರಂಗ ಸೋಲುವುದು, ಮುಂದೆ ಬಾಂಬ್ ನಾಗನ ಜೊತೆಗೆ ಜಿದ್ದಿಗೆ ಬಿದ್ದು ಆತನ ಜೀವನ ಏನಾಗುತ್ತದೆ ಎನ್ನುವ ಕಥೆ ಚಿತ್ರದಲ್ಲಿತ್ತು. ಸಿನಿಮಾ ಟೈಟಲ್, ಕಾನ್ಸೆಪ್ಟ್ ನಿಜಕ್ಕೂ ಚೆನ್ನಾಗಿತ್ತು. 

ಡಿ ರಾಜೇಂದ್ರ ಬಾಬು ನಿರ್ದೇಶನದ 'ಆಟೋ ಶಂಕರ್' ಸಿನಿಮಾದಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ಆಟೋ ಚಾಲಕನಾಗಿ ನಟಿಸಿದ್ದರು. ಚಿತ್ರದಲ್ಲಿ ಶಿಲ್ಪಾ ಶೆಟ್ಟಿ ಹಾಗೂ ರಾಧಿಕಾ ಕುಮಾರಸ್ವಾಮಿ ನಾಯಕಿಯರಾಗಿ ಕಾಣಿಸಿಕೊಂಡಿದ್ದರು. ಸಿನಿಮಾದಲ್ಲಿ ಒಬ್ಬ ಆಟೋ ಚಾಲಕ ಬಡ್ಡಿ ವ್ಯವಹಾರ ಮಾಡುವ ಮಹಿಳೆಯಿಂದ (ಶಿಲ್ಪಾ ಶೆಟ್ಟಿ) ಬಡವರನ್ನು ಹೇಗೆ ರಕ್ಷಿಸುತ್ತಾನೆ ಎಂಬುದಾಗಿತ್ತು. ಈ ಚಿತ್ರದ ರೆಡಿ ರೆಡಿ..ಎಂದೂ ರೆಡಿ ಜನಗಳ ಸೇವೆಗೆ ನಮ್ಮ ಗಾಡಿ ಹಾಡು ಸೂಪರ್ ಹಿಟ್ ಆಗಿತ್ತು. 

2013ರಲ್ಲಿ ತೆರೆಕಂಡ ಉದಯ್ ಪ್ರಕಾಶ್ ನಿರ್ದೇಶನದ 'ಆಟೋ ರಾಜ' ಸಿನಿಮಾದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗಿ ನಟಿಸಿದ್ದರು. ಚಿತ್ರದಲ್ಲಿ ಭಾಮಾ ಹಾಗೂ ದೀಪಿಕಾ ಕಾಮಯ್ಯ ನಾಯಕಿರಾಗಿ ಕಾಣಿಸಿಕೊಂಡಿದ್ದರು. ಚಿತ್ರದಲ್ಲಿ ಶಂಕರ್ ಧ್ವನಿಯನ್ನು ಅನುಕರಣೆ ಮಾಡುತ್ತ ಗಣೇಶ್ ತಾವೇ ಶಂಕರ್ ಆಗಲು ಸಾಕಷ್ಟು ಪ್ರಯತ್ನಪಟ್ಟಿದ್ದರು. 

ಡಾಲಿ ಧನಂಜಯ್ 'ಬಡವ ರಾಸ್ಕಲ್' ಸಿನಿಮಾದಲ್ಲಿ ಆಟೋ ಚಾಲಕನಾಗಿ (ಶಂಕರ್) ಆಗಿ ಕಾಣಿಸಿಕೊಂಡಿದ್ದರು. ಶಂಕರ್ ಸಿನಿಮಾದಲ್ಲಿ ಎಂಬಿಎ ವ್ಯಾಸಂಗ ಮಾಡಿದ್ರು ಕೂಡ ಕೆಲಸಕ್ಕೆ ಸೇರಿರೋದಿಲ್ಲ. ಅಪ್ಪನ ಆಟೋವನ್ನು ಓಡಿಸುತ್ತ, ಇಂತದ್ದೆ ಮತ್ತಷ್ಟು ಆಟೋಗಳನ್ನು ಲೋನ್‌ ಮಾಡಿ ತೆಗೆದುಕೊಳ್ಳಬೇಕು ಹಾಗೂ ಅದರಿಂದ ತಾನು ಲೈರ್ಫ ಸೆಟಲ್ ಮಾಡಿಕೊಳ್ಳಬೇಕು ಅಂದುಕೊಂಡಿರುತ್ತಾನೆ. ಇಂತಹ ಸಂದರ್ಭದಲ್ಲಿ ಶಂಕರ್ ರೌಡಿ ಪಡೆಗೆ ಒಂದು ಸಣ್ಣ ಕಿರಿಕ್‌ನಿಂದಾಗಿ ಕನೆಕ್ಟ್ ಆಗುತ್ತಾರೆ. ಅಲ್ಲಿಂದ ಶಂಕರ್ ರಿಯಲ್ ಜರ್ನಿ ಶುರುವಾಗುತ್ತೆ . 

ದುನಿಯಾ ವಿಜಯ್ 'ಕನಕ' ಸಿನಿಮಾದಲ್ಲಿ ಆಟೋ ಡ್ರೈವರ್ ಅಗಿ ಕಾಣಿಸಿಕೊಂಡಿದ್ದರು.  'ಕನಕ' ಸಿನಿಮಾ ಒಬ್ಬ ಅಪ್ಪಟ್ಟ ಡಾ.ರಾಜ್ ಕುಮಾರ್ ಅವರ ಅಭಿಮಾನಿಯ ಕಥೆಯಾಗಿದೆ. ಈ ಸಿನಿಮಾದಲ್ಲಿ ಹರಿಪ್ರಿಯಾ ಮತ್ತು ಕೆಂಡಸಂಪಿಗೆ ಬೆಡಗಿ ಮಾನ್ವಿತಾ ನಾಯಕಿಯರಾಗಿ ಕಾಣಿಸಿಕೊಂಡಿದ್ದರು. ಆರ್.ಚಂದ್ರು ಈ ಸಿನಿಮಾವನ್ನು ನಿರ್ದೇಶನ ಮಾಡಿದ್ದರು.