ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾದ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಇತರ ಮಾಹಿತಿ ಇಲ್ಲಿದೆ.

ಬಡ ಮಧ್ಯಮ ವರ್ಗದ ಇಬ್ಬರು ಪ್ರೇಮಿಗಳು ಸುಂದರ ಬದುಕು ಕಟ್ಟಿಕೊಳ್ಳುವ ಕನಸು ಕಾಣುತ್ತಾರೆ. ಸುಮುದ್ರದ ತೀರದಲ್ಲಿ ಸುಂದರವಾದ ಮನೆ ಕಟ್ಟಿಕೊಳ್ಳಬೇಕು ಅನ್ನೋ ಆಸೆ. ಆ ಕನಸಿಗೆ ಅದರದ್ದೇ ಆದ ಬೆಲೆ ಇರುತ್ತೆ. ಅದನ್ನು ಸಂಪಾದಿಸಲು ಹೋದ ಹೀರೋ ಸಂಕಷ್ಟಕ್ಕೆ ಸಿಲುಕುತ್ತಾನೆ. ನಂತರ ಜೈಲು, ಪ್ರೀತಿ, ರೋಧನೆ, ವೇದನೆ, ಭಾವುಕತೆ ಪ್ರೇಮಿಗಳಿಬ್ಬರ ಬಾಳಲ್ಲಿ ಹೆಣೆದುಕೊಳ್ಳುತ್ತಾ ಸಾಗುತ್ತೆ. ಮುಂದೇನಾಗುತ್ತೆ? ಪ್ರೇಮಿಗಳ ಪಾಡೇನು? ಈ ಕಥೆಯ ವಿಲನ್ ಯಾರು? ಎಂಬುದೇ ಸಿನಿಮಾದ ಒನ್‌ಲೈನ್ ಕಥೆ. 

ಈ ಚಿತ್ರದಲ್ಲಿ ಹೀರೊ, ಹೀರೊಯಿನ್‌ಗೆ ಬಿಲ್ಡಪ್ ಇಲ್ಲ. ಐಶಾರಾಮಿ ಕಾರಲ್ಲಿ ರಕ್ಷಿತ್ ಶೆಟ್ಟಿ, ರುಕ್ಮಿಣಿ ಪ್ರಯಾಣ. ಕಾರು ಐಶಾರಾಮಿ ಆದರೂ, ಬದುಕು ಹಾಗಿಲ್ಲ ಅನ್ನೋದು ಆರಂಭದಲ್ಲೇ ನಿರ್ದೇಶಕರು ಕಟ್ಟಿ ಕೊಡುತ್ತಾರೆ. ಈ ಪ್ರೇಮಕಥೆಯಲ್ಲಿ ನಲಿವು, ನೋವು, ಕನಸು ಎಲ್ಲವೂ ಇದೆ. ಹೀಗಾಗಿ ಚಿತ್ರಕಥೆ ಪ್ರೇಮಿಗಳಿಗೆ ಹೇಳಿ ಮಾಡಿಸಿದ ಹಾಗಿದೆ. ಪ್ರೇಮಿಗಳನ್ನೇ ಇಟ್ಟುಕೊಂಡು ಮಾಡಿದ ಸಿನಿಮಾ ಅನ್ನೋದು ಖಡಾಖಂಡಿತವಾಗಿ ಹೇಳಬಹುದು. 

'ಸಪ್ತ ಸಾಗರದಾಚೆ ಎಲ್ಲೋ' ರಕ್ಷಿತ್ ಶೆಟ್ಟಿ ಹಾಗೂ ರುಕ್ಮಿಣಿ ವಸಂತ್ ಇಬ್ಬರಿಗೂ ಹೇಳಿ ಮಾಡಿಸಿದ ಸಿನಿಮಾನೋ.. ಇಲ್ಲವೇ ಈ ಸಿನಿಮಾಗೆ ಅವರೇ ಸೂಕ್ತವೋ ಅನ್ನುವಷ್ಟು ಹೋಲಿಕೆಯಾಗಿದೆ. ಭಾವನಾತ್ಮಕ ಸನ್ನಿವೇಶಗಳಲ್ಲಿ ರಕ್ಷಿತ್ ಶೆಟ್ಟಿ ಹಾಗೂ ರುಕ್ಮಿಣಿ ವಸಂತ್ ಆದರ್ಶ ಪ್ರೇಮಿಗಳನ್ನು ನೆನಪಿಸುತ್ತಾರೆ. ಹೆಚ್ಚು ಕಡಿಮೆ 10 ವರ್ಷಗಳ ಅಂತರದ ಕಥೆಯಲ್ಲಿ ರಿಯಲ್ ಲೈಫ್ ಪ್ರೇಮಿಗಳಿಗೆ ರೀಲ್ ಲೈಫ್ ಪ್ರೇಮಿಗಳು ಖಂಡಿತಾ ಇಷ್ಟ ಆಗುತ್ತಾರೆ. 

'ಸಪ್ತ ಸಾಗರದಾಚೆ ಎಲ್ಲೋ' ನಿರ್ದೇಶಕ ಹೇಮಂತ್ ಎಂ ರಾವ್ ಅವರ ಮತ್ತೊಂದು ಕಾಡುವಂತಹ ಸಿನಿಮಾ ಎನ್ನಬಹುದು. ಭಾವನಾತ್ಮಕ ಪ್ರೇಮಕಥೆಯಾಗಿದ್ದರಿಂದ ಕಾಮಿಡಿಗೆ ಅವಕಾಶವಿಲ್ಲ. ಹೃದಯ ಭಾರ ಮಾಡಿಕೊಂಡವರು, ಹಗೂರ ಇಟ್ಟುಕೊಂಡವರು ಇಬ್ಬರಿಗೂ ತಟ್ಟುವ ಸಿನಿಮಾ. ಬಹಳ ದಿನಗಳ ಬಳಿಕ ಒಂದೊಳ್ಳೆ ಪ್ರೇಮಕಥೆ ಬಂದಿದ್ದು, ಸಿನಿರಸಿಕರಿಗೆ ಖಂಡಿತವಾಗಿಯೂ ಇಷ್ಟವಾಗಬಹುದು.

ಈ ಸಿನಿಮಾದ ಪ್ಲಸ್ ಪಾಯಿಂಟ್ ಅಂದರೆ ಕಥೆ. ಬಹಳ ದಿನಗಳ ಬಳಿಕ ಒಂದೊಳ್ಳೆ ಪ್ರೇಮಕಥೆ ತೆರೆಮೇಲೆ ಬಂದಿದೆ. ರಕ್ಷಿತ್ ಶೆಟ್ಟಿ, ರಕ್ಮಿಣಿ ವಸಂತ್ ಹೊಸ ಕಾಂಬಿನೇಷನ್ ಸಿಕ್ಕಿದೆ. ಮೈನಸ್ ಅಂದರೆ, ಪ್ರೇಮಕಥೆಯಲ್ಲಿ ಕಾಮಿಡಿ ಸನ್ನಿವೇಶ ಇಲ್ಲದೆ ಇರೋದು. ಬರೀ ಪ್ರೇಮಿಗಳೇ ಟಾರ್ಗೆಟ್ ಆಡಿಯನ್ಸ್ ಅಂತ ಅನಿಸುತ್ತೆ. ಇವೆಲ್ಲವನ್ನೂ ಬಿಟ್ಟು ನೋಡಿದರೆ, ಪ್ರೇಮಿಗಳು ಹೊಗಳಿ ಕೊಂಡಾಡುವ ಸಿನಿಮಾವಿದು.