Happy Birthday: ಆಶಿಕಾ ರಂಗನಾಥ್ ಅಭಿನಯದ ಟಾಪ್ ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಯೋಗರಾಜ್‌ ಭಟ್ ಹಾಗೂ ಗೋಲ್ಡನ್ ಸ್ಟಾರ್ ಗಣೇಶ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದ ಮುಗುಳುನಗೆ ಸಿನಿಮಾದಲ್ಲಿ ಆಶಿಕಾ ರಂಗನಾಥ್ ವೈಶಾಲಿ ಎಂಬ ಪಾತ್ರ ನಿರ್ವಹಿಸಿದ್ದರು. ಈ ಸಿನಿಮಾದಲ್ಲಿ ಮೂವರು ನಾಯಕಿಯರಿದ್ದು, ದೊಡ್ಡ ಕನಸು ಕಾಣುವ ಕಾಲೇಜು ಹುಡುಗಿಯ ಪಾತ್ರದಲ್ಲಿ ಆಶಿಕಾ ರಂಗನಾಥ್ ಕಾಣಿಸಿಕೊಂಡಿದ್ದರು. ನಗು-ಅಳುವಿನ ಸುತ್ತ ಹೆಣೆದಿದ್ದ ಮಧುರ ಭಾವನೆಗಳ ಸರಮಾಲೆಯೇ ಮುಗುಳುನಗೆ ಸಿನಿಮಾ. 2017ರಲ್ಲಿ ತೆರೆಕಂಡ ಈ ಸಿನಿಮಾ ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿತ್ತು. ಸಿನಿಮಾದ ಹಾಡಂತೂ ಸೂಪರ್ ಹಿಟ್ ಆಗಿದ್ದವು.   

ಅನಿಲ್ ಕುಮಾರ್ ಕಥೆ ಬರೆದು ನಿರ್ದೇಶಿಸಿದ್ದ ರ್ಯಾಂಬೋ ಚಿತ್ರದಲ್ಲಿ ಆಶಿಕಾ ರಂಗನಾಥ್ ನಟ ಶರಣ್‌ಗೆ ಜೋಡಿಯಾಗಿ ಕಾಣಿಸಿಕೊಂಡಿದ್ದರು. ಈ ಚಿತ್ರದ 'ಚುಟು ಚುಟು' ಹಾಡು ಯೂಟ್ಯೂಬ್ ನಲ್ಲಿ ಹಲವು ದಾಖಲೆ ಮಾಡಿತ್ತು. ಚಿಕ್ಕ ವಯಸ್ಸಿನಿಂದ ಕೃಷ್ಣ (ಶರಣ್) ಗಣೇಶನ ಭಕ್ತ. ಗಣೇಶನ ಭಕ್ತನಾದರೂ ಈತ ಈ ಯುಗದ ಕೃಷ್ಣ. ಜೀವನದಲ್ಲಿ 'ವೆರೈಟಿ' ಬೇಕು ಅಂತ ಎಲ್ಲ ವಿಷಯದಲ್ಲಿಯೂ ಹುಡುಕುತ್ತಿರುತ್ತಾನೆ. ಅದೇ ರೀತಿ 'ವೆರೈಟಿ' ಗಾಗಿ ಲವ್ ಮಾಡುವ ಹುಡುಗಿಯರನ್ನು ಬದಲಿಸುತ್ತಿರುತ್ತಾನೆ. ಇತ್ತ ಮಯೂರಿ (ಆಶಿಕಾ) ಕೂಡ ಫ್ರೆಂಡ್ ಶಿಪ್ ಹೆಸರಿನಲ್ಲಿ ಹುಡುಗರ ಎಟಿಎಂ ಅನ್ನು ಅವರಿಗಿಂತ ಹೆಚ್ಚು ಬಳಸುವ ಚಾಲಾಕಿ ಆಗಿರುತ್ತಾಳೆ. ಇಂತಹ ಜೋಡಿ ಒಟ್ಟಿಗೆ ಸೇರಿದರೆ ಎನ್ನೆಲ್ಲಾ ಆಗುತ್ತದೆ ಎನ್ನುವುದು ಚಿತ್ರದ ಕಥೆ. 

ಮಹೇಶ್‌ ಕುಮಾರ್ ನಿರ್ದೇಶನದ 'ಮದಗಜ' ಸಾಹಸಪ್ರಧಾನ ಸಿನಿಮಾವಾಗಿದ್ದು, ನಟ ಶ್ರೀಮುರಳಿಗೆ ಆಶಿಕಾ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಎರಡು ಊರಿನ ನಡುವೆ ದ್ವೇಷ, ಒಂದೂರಿನಲ್ಲಿ ಬರೀ ವಿಲ್ಲನ್ನುಗಳು, ಕೊಚ್ಚುವುದೊಂದೇ ಅವರ ಕೆಲಸ. ಇನ್ನೊಂದು ಊರಿನಲ್ಲಿ 'ಹೀರೋ'ಗಳು ಅವರದ್ದೂ ಕೊಚ್ಚುವುದೇ ಕೆಲಸ. ಅಪ್ಪ ಊರ ಜನರನ್ನು ದುಷ್ಟರಿಂದ ಕಾಯುವ ದೊರೆ, ಮಗ ಯುವರಾಜ. ವಯಸ್ಸಾದ ಅಪ್ಪನ ಜಾಗ ತುಂಬುವ ಮಗನ ಹೆಗಲಿಗೆ ಊರ ಜನರನ್ನು ಕಾಪಾಡುವ ಜವಾಬ್ದಾರಿ. ಮಗ ಹೇಗೆ ಈ ಜವಾಬ್ದಾರಿಯನ್ನು ನಿರ್ವಹಿಸುತ್ತಾನೆ ಎಂಬುದು ಚಿತ್ರದ ಕಥೆಯಾಗಿತ್ತು. 

ಸಿಂಪಲ್ ಸುನಿ ನಿರ್ದೇಶನದ ಅವತಾರ ಪುರುಷ ಚಿತ್ರದಲ್ಲಿ ಮತ್ತೊಮ್ಮೆ ಶರಣ್ ಹಾಗೂ ಆಶಿಕಾ ಜೋಡಿಯಾಗಿ ಕಾಣಿಸಿಕೊಂಡಿದ್ದರು. ಬ್ಲ್ಯಾಕ್ ಮ್ಯಾಜಿಕ್ ಕುರಿತ ಈ ಚಿತ್ರದಲ್ಲಿ ಶರಣ್‌ ಜ್ಯೂನಿಯರ್  ಆರ್ಟಿಸ್ಟ್ ಆಗಿ ಒದ್ದಾಡುವ ಅನಿಲನಾಗಿ ಕಾಣಿಸಿಕೊಂಡಿದ್ದರು.  ಈ ಚಿತ್ರದಲ್ಲಿ ಆಶಿಕಾ 'ಸಿರಿ' ಎಂಬ ಪಾತ್ರದಲ್ಲಿ ಸಿಂಪಲ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು.  ಚಿತ್ರದ ಹೆಸರಿಗೆ ತಕ್ಕಂತೆ ಚಿತ್ರದಲ್ಲಿ ಶರಣ್ ಅವರ ವಿವಿಧ ಅವತಾರಗಳನ್ನು ಈ ಸಿನಿಮಾದಲ್ಲಿ ನೋಡಬಹುದು.

ತಾಯಿಗೆ ತಕ್ಕ ಮಗ ಸಿನಿಮಾದಲ್ಲಿ ಆಶಿಕಾ ರಂಗನಾಥ್ ನಟ ಅಜಯ್‌ ರಾವ್‌ಗೆ ನಾಯಕಿಯಾಗಿ ನಟಿಸಿದ್ದರು. ಚಿತ್ರದಲ್ಲಿ ಸುಮಲತಾ ಅಂಬರೀಶ್ ಅಜಯ್ ತಾಯಿಯ ಪಾತ್ರದಲ್ಲಿ ನಟಿಸಿದ್ದರು. ಈ ಸಿನಿಮಾದಲ್ಲಿ ಮೋಹನ್ ದಾಸ್‌ಗೆ (ಅಜಯ್) ತಾಯಿಯೇ ಸರ್ವಸ್ವ.  ಜನರಿಗೆ ನ್ಯಾಯ ಕೊಡಿಸುವುದು ತಾಯಿಯ ಕೆಲಸ. ತಾಯಿಗೆ ರಕ್ಷಣೆ ನೀಡುವುದು ಮಗನ ಕರ್ತವ್ಯ. ಹೀಗೆ, ತಾಯಿ ಮಗನ ಜೀವನದಲ್ಲಿ ಎಂಟ್ರಿ ಕೊಡುವ ಹುಡುಗಿಯೇ ಸರಸ್ವತಿ (ಆಶಿಕಾ). ಈ ಸಿನಿಮಾದಲ್ಲಿ ಆಶಿಕಾ ಸಖತ್ ಹಾಟ್ ಆಗಿ ಅಭಿನಯಿಸಿದ್ದರು.  

ಪವನ್ ಒಡೆಯರ್ ನಿರ್ದೇಶನದ ರೇಮೊ ಚಿತ್ರದಲ್ಲಿ ಇಷಾನ್ ಮತ್ತು ಆಶಿಕಾ ರಂಗನಾಥ್ ನಾಯಕ-ನಾಯಕಯಾಗಿ ನಟಿಸಿದ್ದರು. ಈ ಸಿನಿಮಾದಲ್ಲಿ ವಿರುದ್ಧ ದಿಕ್ಕಿನ ಇಬ್ಬರು ಸಂಗೀತ ಪ್ರೇಮಿಗಳ ಲವ್‌ಸ್ಟೋರಿಯನ್ನು ಅನೇಕ ಟ್ವಿಸ್ಟ್‌ಗಳೊಂದಿಗೆ ಹೆಣೆಯಲಾಗಿತ್ತು. ಪ್ರೇಮಕಥೆ ಜೊತೆಗೆ ಅಪ್ಪ-ಅಮ್ಮನ ಭಾವನೆಗಳಿಗೆ ಈ ಸಿನಿಮಾದಲ್ಲಿ ಜಾಗ ನೀಡಲಾಗಿತ್ತು.