ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರ ಪ್ರಯೋಗಾತ್ಮಕ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಕಿಚ್ಚ ಸುದೀಪ್ ವೃತ್ತಿ ಜೀವನದ ಆರಂಭದಲ್ಲಿಯೇ 'ಮಾಸ್ ಹೀರೋ' ಇಮೇಜಿಗೆ ವಿರುದ್ಧವಾದ ಸಿನಿಮಾಗಳಲ್ಲಿ ನಟಿಸಿದವರು. ಸಿನಿಮಾದ ನಾಯಕ ಕೊನೆಯಲ್ಲಿ ವಿಲನ್ನುಗಳನ್ನು ಕೊಂದು ಗೆಲ್ಲಬೇಕು, ನಾಯಕಿಯನ್ನು ಬಿಗಿದು ತಬ್ಬಿಕೊಳ್ಳಬೇಕು ಎಂಬುದು ಇಂದಿಗೂ ಇದೆ. ಆದರೆ, ಕಿಚ್ಚನಿಗೆ ಹೆಸರು ತಂದುಕೊಟ್ಟ ಹುಚ್ಚ ಸಿನಿಮಾದಲ್ಲಿ ನಾಯಕ ಹುಚ್ಚನಾಗಿ ಹೋಗುತ್ತಾನೆ ಎಂಬುದು ಮಾಸ್ ಪ್ರೇಕ್ಷಕರಿಗೆ ಜೀರ್ಣವಾಗುವ ವಿಷಯವಲ್ಲ. ಆದರೆ, ಆ ಚಿತ್ರದಲ್ಲಿ ಹುಚ್ಚನಾಗಿ ಸುದೀಪ್ ನಟನೆ ಇಂದಿಗೂ ಪ್ರೇಕ್ಷಕರ ಕಣ್ಣಿಗೆ ಕಟ್ಟಿದೆ.  

ಅದರ ನಂತರವೇ ಬಂದ 'ವಾಲಿ' ಸಿನಿಮಾದಲ್ಲಿ ಅಭಿನಯದ ಚಕ್ರವರ್ತಿ ಇನ್ನೂ ಒಂದು ಹೆಜ್ಜೆ ಮುಂದೆ ಹೋದರು. ಆ ಸಿನಿಮಾದಲ್ಲಿ ಸುದೀಪ್ ಅಪ್ಪಟ ವಿಲನ್. ಒಡಹುಟ್ಟಿದವನ ಪತ್ನಿಯನ್ನೇ ಮೋಹಿಸುವ, ಕಾಮಿಸಲು ಹಾತೊರೆಯುವ ವ್ಯಕ್ತಿಯ ಪಾತ್ರದಲ್ಲಿ ಸುದೀಪ್ ನಟಿಸಿದ್ದರು. ಈಗಿನ ಯಾವೊಬ್ಬ ನಾಯಕ ನಟನೂ ಒಪ್ಪದ ಮಾದರಿಯ ಪಾತ್ರ ಅದಾಗಿತ್ತು. ಆದರೆ, ಕಿಚ್ಚ ಆ ಸಿನಿಮಾ ಒಪ್ಪಿಕೊಂಡರು. ವಿಲನ್ ಪಾತ್ರದಲ್ಲಿನ ಅವರ ನಟನೆ, ಅವರೆಷ್ಟು ಅದ್ಭುತವಾದ ನಟ ಎಂಬುದನ್ನು ಸಾರಿ ಹೇಳಿತು. ಸುದೀಪ್‌ರ ಈವರೆಗಿನ ಅತ್ಯುತ್ತಮ ಫರ್ಮಾಮೆನ್ಸ್‌ಗಳಲ್ಲಿ 'ವಾಲಿ' ನಂಬರ್ ಒನ್‌ ಎನ್ನಬಹುದೇನೋ. 

ಈ ಎರಡೂ ಸಿನಿಮಾಗಳ ಬಳಿಕ ಕೆಲ ಮಾಸ್-ಲವ್ ಸ್ಟೋರಿಗಳಲ್ಲಿ ನಟಿಸಿದ ಸುದೀಪ್ ತಮ್ಮೊಳಗಿನ ನಟನ ಹಸಿವು ತಣಿಸಲು ಆಯ್ದುಕೊಂಡ ಸಿನಿಮಾ 'ಸ್ವಾತಿ ಮುತ್ತು'. ರೌಡಿಸಂ ಕತೆಗಳೇ ರಾರಾಜಿಸುತ್ತಿದ್ದ ಆ ಕಾಲದಲ್ಲಿ ಸುದೀಪ್ ಅರೆಬುದ್ಧಿಮಾಂದ್ಯನ ಪಾತ್ರದಲ್ಲಿ ಅಭಿನಯಿಸಿದರು. ಆ ಮೂಲಕ ಎಲ್ಲರು ನಡೆಯುವ ಹಾದಿ ತನ್ನದಲ್ಲ ಎಂಬುದನ್ನು ಸ್ಪಷ್ಟಪಡಿಸಿದರು. ಈ ಸಿನಿಮಾ ಆರ್ಥಿಕವಾಗಿ ದೊಡ್ಡದಾಗಿ ಕೈ ಹಿಡಿಯದಿದ್ದರೂ ಸುದೀಪ್ ಎಂಥಹ ವರ್ಸಟೈಲ್ ನಟ ಎಂಬುದನ್ನು ಸಾಬೀತುಪಡಿಸಿತು. ಈ ಸಿನಿಮಾ ಮೂಲಕ ಸುದೀಪ್ ಕನ್ನಡದ ಕಮಲ್ ಹಾಸನ್ ಎನಿಸಿಕೊಂಡರು. 

ಕೆಲಕಾಲ ಮತ್ತೆ ಸಿದ್ಧ ಮಾದರಿ ಸಿನಿಮಾಗಳಲ್ಲಿ ನಟಿಸಿದ ಸುದೀಪ್ ಮತ್ತೊಮ್ಮೆ ತಮ್ಮೊಳಗಿನ ನಟನನ್ನು ಹೊರಹಾಕಲು ಬಯಸಿದ್ದು 'ಮೈ ಆಟೊಗ್ರಾಫ್' ಚಿತ್ರದ ಮೂಲಕ. ಮಾಸ್ ಸಿನಿಮಾಗಳ ಎಲಿಮೆಂಟ್ ಎನಿಸಿಕೊಳ್ಳುವ ಫೈಟ್‌, ರಗಡ್ ಡೈಲಾಗ್, ನಾಯಕಿಯೊಟ್ಟಿಗಿನ ಇಂಟೆನ್ಸ್ ರೊಮ್ಯಾನ್ಸ್ ಯಾವುದೂ ಇಲ್ಲದ 'ಮೈ ಆಟೊಗ್ರಾಫ್' ಸಿನಿಮಾದಲ್ಲಿ ಸುದೀಪ್ ನಟಿಸಿದರು. ಸಿನಿಮಾ ಸೂಪರ್ ಹಿಟ್ ಆಯಿತು. ಒಳ್ಳೆಯ ಸಿನಿಮಾದಲ್ಲಿ ನಟಿಸಬೇಕೆನ್ನುವ ಅದಮ್ಯ ಬಯಕೆಯಿಂದ ಆ ಸಿನಿಮಾವನ್ನು ಅವರೇ ನಿರ್ಮಾಣ ಮಾಡಿ, ಮೊದಲ ಬಾರಿಗೆ ನಿರ್ದೇಶನ ಸಹ ಮಾಡಿದರು. 

ಬಳಿಕ ಕಿಚ್ಚ ಸುದೀಪ್‌ರ ಧೈರ್ಯಶಾಲಿ ಪ್ರಯೋಗ 'ಶಾಂತಿ ನಿವಾಸ 73'. ಭಿನ್ನ ಮಾದರಿಯ ಕತಾವಸ್ತು ಆಯ್ದುಕೊಂಡು ಅದನ್ನು ಭಿನ್ನವಾಗಿ ಕಟ್ಟಿಕೊಟ್ಟರು. ಉತ್ತಮವಾದ, ಭಿನ್ನವಾದ ಸಿದ್ಧ ಸೂತ್ರವನ್ನು ಮುರಿವ ಸಿನಿಮಾ ನೀಡಬೇಕೆಂಬ ಹಪಹಪಿಯಿಂದಲೇ ಸುದೀಪ್ ಈ ಸಿನಿಮಾ ಮಾಡಿದ್ದರು ಎಂಬುದ ಸ್ಪಷ್ಟ. ಸಿನಿಮಾದ ಬಗ್ಗೆ ಉತ್ತಮ ಪ್ರತಿಕ್ರಿಯೆಗಳೇನೋ ವ್ಯಕ್ತವಾದವಾದರೂ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಗೆಲ್ಲಲಿಲ್ಲ. ಸಿನಿಮಾಕ್ಕೆ ಬಂಡವಾಳವನ್ನೂ ಹೂಡಿದ್ದ ಸುದೀಪ್‌ ಇದರಿಂದ ನಷ್ಟ ಅನುಭವಿಸುವಂತಾಯಿತು. 

ಇದರಿಂದ ಹಿಂಜರಿಯದ ಸುದೀಪ್ ನಂತರ ಎರಡೇ ವರ್ಷದಲ್ಲಿ ಮತ್ತೊಂದು ಸಾಹಸಕ್ಕೆ ಕೈಹಾಕಿದರು ಅದುವೇ 'ಜಸ್ಟ್ ಮಾತ್ ಮಾತಲ್ಲಿ'. ಆ ವರೆಗೆ ರೀಮೇಕ್ ಸಿನಿಮಾಗಳನ್ನು ಮಾತ್ರವೇ ನಿರ್ದೇಶಿಸಿದ್ದ, ಪ್ರಯೋಗಕ್ಕೆ ಆರಿಸಿಕೊಂಡಿದ್ದ ನಟ ಸುದೀಪ್ ಮೊದಲ ಬಾರಿಗೆ ಸ್ವತಂತ್ರ್ಯ ಸಿನಿಮಾ ಮಾಡಿದರು. ಸರಳ ಪ್ರೇಮಕತೆಯನ್ನು ಸುಂದರವಾಗಿ ಕಟ್ಟಿಕೊಡುವ ಯತ್ನವನ್ನು ಸುದೀಪ್ 'ಜಸ್ಟ್ ಮಾತ್ ಮಾತಲ್ಲಿ' ಸಿನಿಮಾ ಮೂಲಕ ಮಾಡಿದರು. ಸಿನಿಮಾದಲ್ಲಿ ಕೆಲವು ಉತ್ತಮ ಡೈರೆಕ್ಟಿಂಗ್ ತಂತ್ರಗಳನ್ನು ಸಹ ಬಳಸಿದ್ದರು. ಆದರೆ ಆ ಸಿನಿಮಾ ಸಹ ನಿರೀಕ್ಷಿಸಿದಷ್ಟು ಯಶಸ್ಸು ಗಳಿಸಿಕೊಡಲಿಲ್ಲ.