ಡಾ.ರಾಜ್‌ಕುಮಾರ್ ಟು ವಿನಯ್ ಗೌಡ: ತೆರೆಮೇಲೆ ಶಿವ ಪಾತ್ರದಲ್ಲಿ ಮಿಂಚಿದ ಕನ್ನಡದ ನಟರಿವರು!

ತಮ್ಮ ಮೊದಲ ಸಿನಿಮಾ ಬೇಡರ ಕಣ್ಣಪ್ಪದಲ್ಲಿ ಶಿವನ ಪರಮ ಭಕ್ತನಾಗಿ ಅಭಿನಯಿಸಿದ್ದ ವರನಟ ಡಾ.ರಾಜ್‌ಕುಮಾರ್, 1967ರಲ್ಲಿ ತೆರೆಕಂಡ ಪಾರ್ವತಿ  ಕಲ್ಯಾಣ ಸಿನಿಮಾದಲ್ಲಿ ತಾವೇ ಶಿವನಾಗಿ ಕಾಣಿಸಿಕೊಂಡಿದ್ದರು. ನಟಿ ಚಂದ್ರಕಲಾ ಪಾರ್ವತಿಯಾಗಿ ಕಾಣಿಸಿಕೊಂಡಿದ್ದರು. ಬಿ.ಎಸ್ ರಂಗ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. 1988ರಲ್ಲಿ ಬಿಡುಗಡೆಯಾದ ಶಿವ ರಾಜ್‌ಕುಮಾರ್ ನಾಯಕನಾಗಿ ನಟಿಸಿದ್ದ 'ಶಿವ ಮೆಚ್ಚಿದ ಕಣ್ಣಪ್ಪ' ಚಿತ್ರದಲ್ಲೂ ಡಾ.ರಾಜ್‌ಕುಮಾರ್ ಶಿವನಾಗಿ ಹಾಗೂ ನಟಿ ಗೀತಾ ಪಾರ್ವತಿಯಾಗಿ ಕಾಣಿಸಿಕೊಂಡಿದ್ದರು.

1984ರಲ್ಲಿ ಬಿಡುಗಡೆಯಾದ ಪ್ರಚಂಡ ಕುಳ್ಳ ಸಿನಿಮಾದಲ್ಲಿ ಸಾಹಸಸಿಂಹ ಡಾ.ವಿಷ್ಣುವರ್ಧನ್ ಶಿವನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಪಿ.ಎಸ್ ಪ್ರಕಾಶ್ ನಿರ್ದೇಶನದ ಈ ಸಿನಿಮಾದಲ್ಲಿ ದ್ವಾರಕೀಶ್, ಗೀತಾ, ಉಮೇಶ್ ಸೇರಿದಂತೆ ಹಲವರು ನಟಿಸಿದ್ದರು.

ರಾಘವೇಂದ್ರ ರಾವ್ ನಿರ್ದೇಶನದಲ್ಲಿ ಮೂಡಿಬಂದ 'ಶ್ರೀ ಮಂಜುನಾಥ' ಸಿನಿಮಾದಲ್ಲಿ  ಅರ್ಜುನ್ ಸರ್ಜಾ, ಸೌಂದರ್ಯ, ಅಂಬರೀಶ್, ಸುಮಲತಾ ಹಲವರು ಅಭಿನಯಿಸಿದ್ದರು. ಕನ್ನಡ ಮತ್ತು ತೆಲುಗಿನಲ್ಲಿ ಏಕಕಾಲಕ್ಕೆ ನಿರ್ಮಾಣವಾಗಿದ್ದ ಈ ಚಿತ್ರದಲ್ಲಿ ಚಿರಂಜೀವಿ ಶಿವನಾಗಿ ಹಾಗೂ ಮೀನಾ ಪಾರ್ವತಿಯಾಗಿ ಕಾಣಿಸಿಕೊಂಡಿದ್ದರು. ನಾಸ್ತಿಕನೊಬ್ಬ ಶಿವಭಕ್ತೆಯ ಕೈ ಹಿಡಿದಾಗ ಅವನಲ್ಲಾಗುವ ಬದಲಾವಣೆಗಳು ಮತ್ತು ಮುಂದೆ ಅವನೇ ಶಿವನ ಪರಮ ಭಕ್ತನಾಗುವುದು ಈ ಸಿನಿಮಾ ಕಥೆ.

ಶ್ರೀಧರ್ ನಟನಾಗಿ ಮಾತ್ರವಲ್ಲದೇ, ಭರತನಾಟ್ಯ ಕಲಾವಿದ ಕೂಡ ಹೌದು. ಇವರು ಶಬರಿಮಲೆ ಸ್ವಾಮಿ ಆಯ್ಯಪ್ಪ, ಕೊಲ್ಲೂರು ಮೂಕಾಂಬಿಕಾ, ಬಾಲಶಿವ, ಮಹಾಸಾಧ್ವಿ ಮಲ್ಲಮ್ಮ ಸಿನಿಮಾಗಳಲ್ಲಿ ಶಿವನ ಪಾತ್ರಗಳಲ್ಲಿ ಬಹಳ ಅದ್ಭುತವಾಗಿ ನಟಿಸಿದ್ದರು.

ಹಿರಿಯ ನಟ ಶ್ರೀನಿವಾಸ್ ಮೂರ್ತಿ ಅವರು ಡಾ.ರಾಜ್‌ಕುಮಾರ್ ಜೊತೆ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿ ಸೈ ಎನಿಸಿಕೊಂಡಿದ್ದರು. ಇವರು ಗುರು ಶಿಷ್ಯರು, ನಂಜುಂಡೇಶ್ವರ ಮಹಿಮೆ, ಶಿವಲೀಲೆ ಸಿನಿಮಾಗಳಲ್ಲಿ ಶಿವನ ಪಾತ್ರದಲ್ಲಿ ಮನೋಜ್ಞವಾಗಿ ಅಭಿನಯಿಸುವ ಮೂಲಕ ಕನ್ನಡ ಸಿನಿಪ್ರೇಕ್ಷಕರ ಮನಗೆದ್ದಿದ್ದರು.

ನಿಜ ಜೀವದಲ್ಲಿ ಶಿವನ ಭಕ್ತನಾಗಿರುವ ಬಿಗ್‌ಬಾಸ್‌ ಖ್ಯಾತಿಯ ವಿನಯ್ ಗೌಡ 'ಹರಹರ ಮಹಾದೇವ' ಧಾರವಾಹಿಯಲ್ಲಿ 'ಶಿವನ' ಪಾತ್ರ ಮಾಡುವ ಮೂಲಕ ಕರ್ನಾಟಕದಾದ್ಯಂತ ಜನಪ್ರಿಯರಾದರು. ಜೊತೆಗೆ ಕನ್ನಡ ಕಿರುತೆರೆಯಲ್ಲಿ 'ಶಿವ' ಅಂತಲೇ ಖ್ಯಾತಿ ಪಡೆದರು. ಯಡಿಯೂರು ಸಿದ್ದಲಿಂಗೇಶ್ವರ ಧಾರಾವಾಹಿಯಲ್ಲೂ ಕೂಡ ವಿನಯ್ 'ಶಿವನ' ಪಾತ್ರ ಮಾಡಿದ್ದರು. ಉಘೇ ಉಘೇ ಮಾದೇಶ್ವರ ಸೀರಿಯಲ್‌ಲ್ಲೂ ಕಾಣಿಸಿಕೊಂಡಿದ್ದರು.

ವಿನಯ್ ಗೌಡ ಹಾಗೆಯೇ ಕನ್ನಡ ಕಿರುತೆರೆಯಲ್ಲಿ ಶಿವನ ಪಾತ್ರದ ಮೂಲಕ ಜನಪ್ರಿಯತೆ ಗಳಿಸಿದವರು ನಟ ಅರ್ಜುನ್ ರಮೇಶ್. ಇವರು ಮಹಾಕಾಳಿ, ಶನಿ ಹಾಗೂ ದೇವಿ ಮಹಾತ್ಮೆ ಧಾರಾವಾಹಿಗಳಲ್ಲಿ ಶಿವನ ಪಾತ್ರದಲ್ಲಿ ಅಭಿನಯಿಸುವ ಮೂಲಕ ವೀಕ್ಷಕರ ಮೆಚ್ಚುಗೆ ಗಳಿಸಿದ್ದಾರೆ.