ಈ ಬಾರಿ ಮಜಾ ಟಾಕೀಸ್‌ನಲ್ಲಿ ವರಲಕ್ಷ್ಮೀ, ರಾಣಿ, ಇಜಿಲಾ ಸೇರಿದಂತೆ ಪ್ರಮುಖರೇ ಮಿಸ್!

ಅಪರ್ಣಾ ವಸ್ತಾರೆ ಮಜಾ ಟಾಕೀಸ್‌ನಲ್ಲಿ ತಮ್ಮದೇ ವಿಶೇಷ ಮ್ಯಾನರಿಸಂನಿಂದ ಗಮನ ಸೆಳೆದಿದ್ದರು. ಪ್ರತಿ ಎಪಿಸೋಡ್‌ನಲ್ಲೂ ಒಂದೊಂದು ಹೊಸ ರೀತಿಯ ಕಾನ್ಸೆಪ್ಟ್ ಮೂಲಕ ಪ್ರೇಕ್ಷಕರಿಗೆ ಮೋಡಿ ಮಾಡಿದ್ದರು. ಒನ್‌ ಆಂಡ್ ಒನ್ಲಿ ವರಲಕ್ಷ್ಮೀಯಾಗಿ ತಮ್ಮದೇ ಹಾಸ್ಯದ ಮೂಲಕ ಎಲ್ಲರನ್ನು ನಕ್ಕು ನಗಿಸುತ್ತಿದ್ದರು. ವರಲಕ್ಷ್ಮೀಗೆ ಮದುವೆ ಆಗಿರುವುದಿಲ್ಲ. ಹಾಗಾಗಿ ತಮ್ಮನ್ನು ಮದುವೆಯಾಗಲು ಸಲ್ಮಾನ್ ಖಾನ್ ಬರ್ತಾರೆ ಅಂತ ಕಾಮಿಡಿ ಮಾಡುತ್ತಿದ್ದರು. ಈ ವಿಷಯ ಇಟ್ಟುಕೊಂಡು ಸೃಜನ್ ಸ್ಟೇಜ್ ಮೇಲೆ ಒನ್‌ ಆಂಡ್ ಒನ್ಲಿ ವರಲಕ್ಷ್ಮಿಯ ಕಾಲೆಳೆಯುತ್ತಿದ್ದರು. ಸದಾ ನಗುಮುಖದಿಂದ ಎಲ್ಲರನ್ನು ನಗಿಸುತ್ತಿದ್ದ ಅಪರ್ಣಾ ಈ ಬಾರಿಯ ಮಜಾ ಟಾಕೀಸ್‌ನಲ್ಲಿ ಇರೋದಿಲ್ಲ ಎಂಬುದು ಅಭಿಮಾನಿಗಳಿಗೆ ನೋವಿನ ಸಂಗತಿ.

ನಟಿ, ನಿರೂಪಕಿ ಶ್ವೇತಾ ಚಂಗಪ್ಪ ಮಜಾ ಟಾಕೀಸ್ ಕಾರ್ಯಕ್ರಮದಲ್ಲಿ ಸೃಜನ್ ಪತ್ನಿಯಾಗಿ ಕಾಣಿಸಿಕೊಳ್ಳುತ್ತಿದ್ದರು. ಅಪರ್ಣಾ ಹಾಗೂ ಶ್ವೇತಾ ಇದರಲ್ಲಿ ಅಕ್ಕ-ತಂಗಿಯಾಗಿ ಕಾಣಿಸಿಕೊಂಡಿದ್ದರು. ಸದ್ಯ ಕಲರ್ಸ್ ಕನ್ನಡ ಬಿಡುಗಡೆ ಮಾಡಿರುವ ಪ್ರೋಮೋದಲ್ಲಿ ಶ್ವೇತಾ ಕಾಣಿಸಿಕೊಂಡಿಲ್ಲ. ಹೀಗಾಗಿ, ಈ ಬಾರಿ ರಾಣಿ ಪಾತ್ರ ಇರಲಿದೆಯೋ ಅಥವಾ ಇಲ್ಲವೋ ಎಂಬುದು ತಿಳಿದಿಲ್ಲ.

ಈ ಬಾರಿಯ ಮಜಾ ಟಾಕೀಸ್‌ನಲ್ಲಿ ಇಂದ್ರಜಿತ್ ಲಂಕೇಶ್ ಮಿಸ್ ಆಗಿದ್ದು, ಆ ಜಾಗಕ್ಕೆ ಯೋಗರಾಜ್ ಭಟ್ಟರು ಬಂದಿದ್ದಾರೆ. ಹೌದು ಈ ಹಿಂದೆ ಮಜಾ ಟಾಕೀಸ್‌ ವೇದಿಕೆಯಲ್ಲಿ ಇಂದ್ರಜಿತ್ ಕುಳಿತುಕೊಳ್ಳುತ್ತಿದ್ದರು. ಅವರನ್ನು ಎಲ್ಲರೂ ಇಜಿಲಾ ಅಂತ ಕರೀತಿದ್ರು. ಸ್ಪರ್ಧಿಗಳ ಜೋಕ್‌ಗೆ ನಗುತ್ತಾ, ಆಗಾಗ ಕಮೆಂಟ್ ಪಾಸ್ ಮಾಡುತ್ತಿದ್ದರು. ಈ ಬಾರಿ ಆ ಜಾಗವನ್ನು ಭಟ್ಟರು ತುಂಬುವ ಸೂಚನೆ ಸಿಕ್ಕಿದೆ.

ಇವರ ಜೊತೆಗೆ ಮುದ್ದು ಸರೋಜ ಎಂದೇ ಪ್ರಸಿದ್ಧರಾಗಿದ್ದ ಪವನ್, ರೆಮೊ, ಮನೋಹರ್ ಹಾಗೂ ಮಂಡ್ಯ ರಮೇಶ್ ಸೇರಿದಂತೆ ಕೆಲವರು ಮಿಸ್ ಆಗಿದ್ದಾರೆ. ಈ ಕಲಾವಿದರನ್ನು ಮಜಾ ಟಾಕೀಸ್‌ ಕಾರ್ಯಕ್ರಮದಲ್ಲಿ ವೀಕ್ಷಕರು ಮಿಸ್ ಮಾಡಿಕೊಳ್ಳಲಿದ್ದಾರೆ.

ಈ ಬಾರಿಯ ಮಜಾ ಟಾಕೀಸ್ ಕಾರ್ಯಕ್ರಮಕ್ಕೆ ಟಾಕಿಂಗ್ ಸ್ಟಾರ್ ಸೃಜನ್ ಲೋಕೇಶ್ ಅವರೊಂದಿಗೆ ಹೊಸ ಕಲಾವಿದರ ದಂಡೇ ಸೇರಿಕೊಂಡಿದೆ. ಅಗ್ನಿಸಾಕ್ಷಿ ಸೀರಿಯಲ್‌ನಲ್ಲಿ ಚಂದ್ರಿಕಾ ಪಾತ್ರದ ಮೂಲಕ ಕಿರುತೆರೆ ವೀಕ್ಷಕರ ಮನಗೆದ್ದಿದ್ದ ಹಾಗೂ ವಿಲನ್ ಪಾತ್ರದ ಮೂಲಕವೇ ಖ್ಯಾತಿ ಗಳಿಸಿರುವ ಪ್ರಿಯಾಂಕಾ ಇರಲಿದ್ದಾರೆ. ಇವರು ಈ ಹಿಂದೆ ಬಿಗ್‌ಬಾಸ್‌ನಲ್ಲೂ ಸ್ಪರ್ದಿಯಾಗಿ ಭಾಗವಹಿಸಿದ್ದರು. ಉಳಿದಂತೆ ಬಿಗ್‌ಬಾಸ್‌ ಸೀಸನ್ 10 ಸ್ಪರ್ಧಿ ತುಕಾಲಿ ಸಂತೋಷ್, ವಿನೋದ್ ಗೊಬ್ಬರಗಾಲ, ಪ್ರಿಯಾಂಕಾ ಕಾಮತ್, ಶಿವು, ಚಂದ್ರಪ್ರಭಾ ಮುಂತಾದವರು ಹೊಸದಾಗಿ ಸೇರ್ಪಡೆಯಾಗಿದ್ದಾರೆ.