ಸಂಜಿತ್ ಹೆಗಡೆ to ಜಸ್ಕರಣ್ ಸಿಂಗ್: ಸರಿಗಮಪ ರಿಯಾಲಿಟಿ ಶೋನಿಂದ ಫೇಮಸ್ ಆದವರಿವರು!

ಭಾರತದ ಜಸ್ಟಿನ್ ಬೈಬರ್ ಎಂದೇ ಕರೆಸಿಕೊಳ್ಳೂವ ಸಂಜಿತ್ ಹೆಗಡೆ, ಪಾಪ್ ಸಂಗೀತಲೋಕದಲ್ಲಿ ಹೊಸ ಸಂಚಲನವನ್ನು ಉಂಟು ಮಾಡಿರುವ ಕನ್ನಡದ ಪ್ರತಿಭೆ. ಸರಿಗಮಪ ಸೀಸನ್ 13ರಲ್ಲಿ ಭಾಗವಹಿಸಿದ್ದ ಇವರು, 'ಗುನು ಗುನುಗುವ' ಹಾಡಿನಿಂದ ಪ್ರಸಿದ್ದರಾದರು. ಸದ್ಯ  ಕನ್ನಡ ಮಾತ್ರವಲ್ಲದೇ ಕನ್ನಡ, ತಮಿಳು, ತೆಲುಗು, ಮಲಯಾಳಂ ಹಾಗೂ ಹಿಂದಿ ಚಿತ್ರರಂಗಗಳಲ್ಲಿ ತಮ್ಮ ಸುಮಧುರ ಕಂಠದಿಂದ ಸದ್ದು ಮಾಡುತ್ತಿದ್ದಾರೆ. ಕನ್ನಡದ ಹಲವು ಸಿನಿಮಾಗಳ ಹಾಡಿಗೆ ಧ್ವನಿಯಾಗಿರುವ ಸಂಜಿತ್, ಇತ್ತೀಚೆಗೆ ಸೋನು ನಿಗಮ್ ಅವರ ಜೊತೆ 'ಮಾಯಾವಿ' ಸಾಂಗ್ ಹಾಡುವ ಮೂಲಕ ಮಾಯಲೋಕವನ್ನೇ ಸೃಷ್ಟಿಸಿದ್ದರು.

ಸರಿಗಮಪ ಸೀಸನ್ 20ರಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಿದ್ದ ಜಸ್ಕರಣ್ ಸಿಂಗ್, ನೀ ಸಿಗೋವರೆಗೂ...ಸರಿಯಾಗಿ ನೆನಪಿದೆ ಹಾಡುಗಳ ಮೂಲಕ ಮೋಡಿ ಮಾಡಿದ್ದರು. ಇವರ ಗಾಯನಕ್ಕೆ ತೀರ್ಪುಗಾರರಾದ ಅರ್ಜುನ್ ಜನ್ಯ, ಹಂಸಲೇಖ, ವಿಜಯ್ ಪ್ರಕಾಶ್ ಅವರಿಂದ ಭಾರೀ ಮೆಚ್ಚುಗೆ ವ್ಯಕ್ತವಾಗಿತ್ತು. ಬಳಿಕ ಅರ್ಜುನ್ ಜನ್ಯ 'ಕೃಷ್ಣಂ ಪ್ರಣಯ ಸಖಿ' ಸಿನಿಮಾದಲ್ಲಿ  ಹಾಡುವ ಅವಕಾಶ ಕಲ್ಪಿಸಿಕೊಟ್ಟರು. ಇವರು ಹಾಡಿರುವ 'ದ್ವಾಪರ ದಾಟುತಾ' ಸಾಂಗ್ ಸಿಕ್ಕಾಪಟ್ಟೆ ಟ್ರೆಂಡ್ ಸೃಷ್ಟಿಸಿತ್ತು. ಇನ್‌ಸ್ಟಾಗ್ರಾಮ್, ಟ್ವಿಟರ್, ಯೂಟ್ಯೂಬ್‌ನಲ್ಲಿ ಮಿಲಿಯನ್‌ಗಟ್ಟಲೇ ವೀವ್ಸ್ ಪಡೆದುಕೊಂಡಿತ್ತು. ಈ ಹಾಡಿನ ಮೂಲಕ ಜಸ್ಕರಣ್ ಸಿಂಗ್ ಜನಪ್ರಿಯತೆ ಹೆಚ್ಚಾಯಿತು.

ತಮ್ಮ ಧ್ವನಿಯಿಂದಲೇ ಗುರುತಿಸಿಕೊಂಡಿದ್ದ ಹಾವೇರಿ ಜಿಲ್ಲೆಯ ಚಿಲ್ಲೂರು ಬಡ್ನಿ ಗ್ರಾಮದ ಕುರಿಗಾಯಿ ಹನುಮಂತ, ಜೀ ಕನ್ನಡ ವಾಹಿನಿಯ ಸರಿಗಮಪ ಸೀಸನ್ 15ರಲ್ಲಿ ಭಾಗವಹಿಸಿ ಹೆಚ್ಚಿನ ಜನಪ್ರಿಯತೆ ಪಡೆದುಕೊಂಡರು. ಈ ಶೋನಲ್ಲಿ ತಮ್ಮ ಗಾಯನ ಮತ್ತು ಮುಗ್ಧತೆಯಿಂದಲೇ ಫೇಮಸ್ ಆದರು. ಜೊತೆಗೆ ಗ್ರಾಮೀಣ ಪ್ರದೇಶದ ಜಾನಪದ ಹಾಡುಗಳನ್ನು ಹಾಡುತ್ತಾ ಎಲ್ಲರ ಪ್ರೀತಿ ಗಳಿಸಿದ್ದರು. ಆನಂತರ 'ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್' ರಿಯಾಲಿಟಿ ಶೋನಲ್ಲಿ ಭಾಗವಹಿಸಿ, ಅಲ್ಲಿಯೂ ಉತ್ತಮ ನೃತ್ಯ ಪ್ರದರ್ಶನ ನೀಡಿದ್ದರು. ಸದ್ಯ ಅವರು ಬಿಗ್‌ಬಾಸ್ ಕನ್ನಡ ಸೀಸನ್ 11ಕ್ಕೆ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಭಾಗವಹಿಸಿದ್ದಾರೆ.

ಸರಿಗಮಪ ರಿಯಾಲಿಟಿ ಶೋ ಮೂಲಕ ಫೇಮಸ್ ಆದವರಲ್ಲಿ ಐಶ್ವರ್ಯಾ ರಂಗರಾಜನ್ ಕೂಡ ಒಬ್ಬರು. ಸರಿಗಮಪ ಸೀಸನ್ 11ರಲ್ಲಿ ಭಾಗವಹಿಸಿದ್ದ ಐಶ್ವರ್ಯಾ, ರನ್ನರ್ ಅಪ್ ಕೂಡ ಆಗಿದ್ದರು. ತಮಿಳು ಸರಿಗಮಪದಲ್ಲಿಯೂ ಕೂಡ ಭಾಗವಹಿಸಿದ್ದರು. ಆನಂತರ ಹಲವು ಕನ್ನಡ ಸಿನಿಮಾಗಳ ಹಾಡಿಗೆ ಧ್ವನಿಯಾಗಿರುವ ಇವರು, ಸದ್ಯ ಬಹುಬೇಡಿಕೆಯ ಗಾಯಕಿಯಾಗಿ ಗುರುತಿಸಿಕೊಂಡಿದ್ದಾರೆ.

ಸರಿಗಮಪ ಸೀಸನ್ 19ರ ಫೈನಲಿಸ್ಟ್ ಆಗಿದ್ದ ದಿಯಾ ಹೆಗಡೆ, ತಮ್ಮ ವಿಭಿನ್ನ ಹಾಡುಗಾರಿಕೆ ಹಾಗೂ ಡ್ಯಾನ್ಸ್‌ನಿಂದಲೇ ಗಮನ ಸೆಳೆದಿದ್ದರು. ರಕ್ಷಿತಾ ಪ್ರೇಮ್, ವಿಜಯ್ ಪ್ರಕಾಶ್, ಅರ್ಜುನ್ ಜನ್ಯ, ಹಂಸಲೇಖ ಕೂಡ ದಿಯಾ ಹಾಡಿಗೆ ಫಿದಾ ಆಗಿದ್ದರು. ಕನ್ನಡದ ಸರಿಗಮಪದಿಂದ ಗುರುತಿಸಿಕೊಂಡ ದಿಯಾ, ಸೋನಿ ಟಿವಿಯಲ್ಲಿ ಪ್ರಸಾರವಾದ ಇಂಡಿಯನ್ ಐಡಲ್ ಸಿಂಗಿಂಗ್ ಶೋನ ಫಿನಾಲೆಯಲ್ಲಿ ತಮ್ಮ ಗಾಯನ ಮೂಲಕ ಗಮನ ಸೆಳೆದಿದ್ದರು. ಆನಂತರ  'ಸೂಪರ್ ಸ್ಟಾರ್ ಸಿಂಗರ್ 3'ನಲ್ಲಿ ಭಾಗವಹಿಸಿದ್ದರು.

ಇವರಷ್ಟೇ ಅಲ್ಲದೇ, ಆಶಾ ಭಟ್, ಫೃಥ್ವಿ ಭಟ್, ಶ್ರೀನಿಧಿ ಶಾಸ್ತ್ರೀ, ಚೆನ್ನಪ್ಪ, ಸುನೀಲ್ ಗುಜಗೊಂಡ, ಸುಹನಾ, ರಜತ್ ಹೆಗ್ಡೆ, ಕಂಬದ ರಂಗಯ್ಯ, ದರ್ಶನ್, ಸುಪ್ರೀತ್, ನಿಹಾಲ್, ಆಶ್ವಿನ್ ಶರ್ಮಾ ಸೇರಿದಂತೆ ಅನೇಕ ಪ್ರತಿಭೆಗಳು ಸರಿಗಮಪದಿಂದ ಬೆಳಕಿಗೆ ಬಂದಿದ್ದಾರೆ.