ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸಿದ ಶಿವಣ್ಣನ 'ಘೋಸ್ಟ್' ಸಿನಿಮಾ: ಚಿತ್ರದ ಕಲೆಕ್ಷನ್ ಡಿಟೇಲ್ಸ್ ಇಲ್ಲಿದೆ.

'ಘೋಸ್ಟ್‌' ಸಿನಿಮಾದಲ್ಲಿ ಒಂದು ಜೈಲ್ ಹೈಜಾಕ್ ಮಾಡುವ ಕಥೆಯನ್ನು ಹೆಣೆಯಲಾಗಿದೆ. ಆ ಹೈಜಾಕ್ ಮಾಡೋದು ಶಿವಣ್ಣ. ಶಿವರಾಜ್‌ಕುಮಾರ್ ಹಾಗೂ ಜಯರಾಮ್ ನಡುವಿನ ಜಿದ್ದಾಜಿದ್ದಿ ಈ ಚಿತ್ರದ ಹೈಲೈಟ್. ಸಿನಿಮಾದಲ್ಲಿ ಹ್ಯಾಟ್ರಿಕ್ ಹೀರೋ ಏಳೆಂಟು ಖೈದಿಗಳನ್ನು ಬಳಸಿ ಜೈಲಿನ ಸಿಬ್ಬಂದಿಯನ್ನೇ ಯಾಮಾರಿಸುತ್ತಾರೆ. ಶಿವಣ್ಣ ಕೊನೆವರೆಗೂ ತಾನ್ಯಾರು ಮತ್ತು ತನ್ನ ಹಿಂದೆ ಇರೋದ್ಯಾರು ಅನ್ನೋದನ್ನು ಬಿಟ್ಟುಕೊಡಲ್ಲ. ಈ ನಡುವೆ ಜೈಲಿನ ಮುಖ್ಯ ಅಧಿಕಾರಿಯಾಗಿ ಮಲಯಾಳಂ ನಟ ಜಯರಾಮ್ ಎಂಟ್ರಿ ಕೊಡ್ತಾರೆ. ಹೈಜಾಕ್ ಆದ ಜೈಲನ್ನು ಮತ್ತೆ ತಮ್ಮ ಅಧೀನಕ್ಕೆ ಪಡೆಯುವ ಹೊಣೆಹೊತ್ತು ಬರುವ ಜಯರಾಮ್ ಹಾಗೂ ಶಿವಣ್ಣ ನಡುವೆ ಸಾಕಷ್ಟು ಜಿದ್ದಾಜಿದ್ದಿ ನಡೆಯಲಿದ್ದು, ಸಖತ್ ಇಂಟರೆಸ್ಟಿಂಗ್ ಆಗಿದೆ. 

ಜೈಲರ್ ಬಳಿಕ ಶಿವರಾಜ್‌ಕುಮಾರ್ ಮತ್ತೊಂದು ಜೈಲಿನ ಕಥೆಯಲ್ಲಿ ನಟಿಸಿರೋದು ಕಾಕತಾಳೀಯವೇನೋ? ಆದರೆ, ಈ ಸತ್ಯವನ್ನು ನಂಬಲೇಬೇಕು. ಶಿವಣ್ಣನ ಗ್ಯಾಂಗ್‌ಸ್ಟರ್ ಲುಕ್ ಪ್ರೇಕ್ಷಕರಿಗಂತೂ ಸಖತ್ ಕಿಕ್ ಕೊಡುತ್ತೆ. ಇಡೀ ಸಿನಿಮಾದಲ್ಲಿ ಶಿವಣ್ಣನ ಆಂಗ್ರಿ ಯಂಗ್ ಮ್ಯಾನ್ ಲುಕ್ ಇಷ್ಟವಾಗುತ್ತೆ. ಇದರೊಂದಿಗೆ ಪಟ-ಪಟನೇ ಸಾಗುವ ಸ್ಕ್ರೀನ್ ಪ್ಲೇ ಪ್ರೇಕ್ಷಕರನ್ನು ಎಂಗೇಜಿಂಗ್ ಆಗಿ ಇಡುತ್ತದೆ. ಚಿತ್ರದಲ್ಲಿ ಶಿವರಾಜ್‌ಕುಮಾರ್ ಲುಕ್, ಮ್ಯಾನರಿಸಂ ಹಾಗೂ ಡೈಲಾಗ್ ಡಿಲೇವರಿ ಫ್ಯಾನ್ಸ್‌ಗಂತೂ ಸಖತ್ ಕಿಕ್ ಕೊಡುತ್ತೆ. ಜೊತೆಗೆ ಅರ್ಜುನ್ ಜನ್ಯ ಸಂಗೀತ ಘೋಸ್ಟ್‌ನಲ್ಲಿ ಹೀರೋ ಎನ್ನಬಹುದು. ಚಿತ್ರದ ಪ್ರಮುಖ ಘಟ್ಟಗಳಲ್ಲಿ ಪ್ರೇಕ್ಷಕರಿಗೆ ಒಂದೊಳ್ಳೆ ಅನುಭವ ಕೊಡುವುದಕ್ಕೆ ಜನ್ಯ ಸಾಕಷ್ಟು ಶ್ರಮಿಸಿದ್ದಾರೆ. 

ಅಕ್ಟೋಬರ್ 19ರಂದು ಬಿಡುಗಡೆಯಾಗಿದ್ದ ಶಿವರಾಜ್‌ಕುಮಾರ್ ಅಭಿನಯದ 'ಘೋಸ್ಟ್' ಸಿನಿಮಾ ಸಾಧಾರಣ ಓಪನಿಂಗ್ ಪಡೆದುಕೊಂಡಿತ್ತು. ತಮಿಳಿನ 'ಲಿಯೋ'ಗೆ ಹೋಲಿಸಿದರೆ 'ಘೋಸ್ಟ್' ಆರ್ಭಟ ಕಡಿಮೆಯಿತ್ತು. ಆದರೆ, ದಸರಾ ಸಂಭ್ರಮದಲ್ಲಿ ಶಿವಣ್ಣನ ಆರ್ಭಟ ಜೋರಾಗಿದ್ದು, ಸಿನಿಮಾ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಲಾಂಗ್ ಫೆಸ್ಟಿನಲ್ ವೀಕೆಂಡ್ ಚಿತ್ರದ ಕಲೆಕ್ಷನ್‌ಗೆ ಪ್ಲಸ್ ಆಗಿದ್ದು, ಪ್ರೇಕ್ಷಕರು ಹಬ್ಬ ಮುಗಿಸಿ 'ಘೋಸ್ಟ್' ಸಿನಿಮಾ ಕಣ್ತುಂಬಿಕೊಳ್ಳಲು ಮುಗಿಬಿದ್ದಿದ್ದಾರೆ. 

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಅಭಿನಯದ ಬಹುನಿರೀಕ್ಷಿತ 'ಘೋಸ್ಟ್' ಸಿನಿಮಾ ಮೊದಲ ದಿನ ೨ ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಇನ್ನೂ ಎರಡನೇ ದಿನ (ಅಕ್ಟೋಬರ್ ೨೦)ರಂದು ೧.೫ ಕೋಟಿ ರೂ. ಗಳಿಸಲಿದೆ ಎಂದು ಬಾಕ್ಸಾಫೀಸ್‌ ಪಂಡಿತರು ಲೆಕ್ಕ ಅಭಿಪ್ರಾಯಪಟ್ಟಿದ್ದರು. ಜೊತೆಗೆ ಸಾಲು-ಸಾಲು ರಜೆಗಳಿರುವುದರಿಂದ ಮುಂದಿನ ದಿನಗಳಲ್ಲಿ ಇನ್ನೂ ಹೆಚ್ಚಿನ ಕಲೆಕ್ಷನ್ ಮಾಡುವುದಾಗಿ ತಿಳಿಸಿದ್ದರು. 

ಬಾಕ್ಸಾಫೀಸ್ ಪಂಡಿತರ ಪ್ರಕಾರ, 'ಘೋಸ್ಟ್' ಸಿನಿಮಾ ಮೊದಲ ದಿನ 1.40 ಕೋಟಿ ರೂಪಾಯಿ,  2ನೇ ದಿನ 2 ಕೋಟಿ ರೂ,  3ನೇ ದಿನ 4.40 ಕೋಟಿ ರೂ. ಸೇರಿ ಅಂದಾಜು 8 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ಆದರೆ ಭಾನುವಾರ, ಸೋಮವಾರ, ಮಂಗಳವಾರ ಸಿನಿಮಾ ಕಲೆಕ್ಷನ್ ಹೆಚ್ಚಾಗಿದೆ. 6ನೇ ದಿನ ಸಾಕಷ್ಟು ಥಿಯೇಟರ್‌ಗಳ ಮುಂದೆ ಹೌಸ್‌ಫುಲ್ ಬೋರ್ಡ್ ಬಿದ್ದಿದ್ದು, ಶೀಘ್ರದಲ್ಲೇ ಚಿತ್ರತಂಡ ಒಟ್ಟು ಕಲೆಕ್ಷನ್ ಬಗ್ಗೆ ಅಧಿಕೃತ ಮಾಹಿತಿ ನೀಡುವ ಸಾಧ್ಯತೆಯಿದೆ.