ತ್ರಿಬಲ್ ರೋಲ್‌ನಲ್ಲಿ ಅಭಿನಯಿಸಿರುವ ಸ್ಯಾಂಡಲ್‌ವುಡ್‌ ನಟರಿವರು!

ವರನಟ ಡಾ.ರಾಜ್‌ಕುಮಾರ್ ಕನ್ನಡಿಗರ ಅಸ್ಮಿತೆಯ ಸಂಕೇತ. ಅಣ್ಣಾವ್ರು 'ಶಂಕರ್‌ ಗುರು' ಸಿನಿಮಾದಲ್ಲಿ ತ್ರಿಬಲ್ ರೋಲ್‌ನಲ್ಲಿ ಕಾಣಸಿಕೊಂಡಿದ್ದರು. ಅಂದಿನ ಟೆಕ್ನಾಲಜಿಯಲ್ಲಿ ಮೂರು ಪಾತ್ರಗಳನ್ನು ಏಕಕಾಲಕ್ಕೆ ತೆರೆಯ ಮೇಲೆ ತರೋದು ಸುಲಭವಾಗಿರಲಿಲ್ಲ. ಕನ್ನಡದಲ್ಲಿ ಬಿಡುಗಡೆಯಾಗಿ ಜಯಭೇರಿ ಬಾರಿಸಿದ ಬಳಿಕ ಹಿಂದಿ, ಮಲಯಾಳಂ, ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ಡಬ್ ಆಗಿತ್ತು. ಕೇವಲ 48 ಲಕ್ಷ ಬಜೆಟ್‌ನಲ್ಲಿ ತಯಾರಾಗಿದ್ದ ಈ ಚಿತ್ರ 3.78 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿತ್ತು.

ಡಾ.ರಾಜ್‌ಕುಮಾರ್ ನಂತರ ದ್ವಿಪಾತ್ರ ಹಾಗೂ ತ್ರಿಪಾತ್ರದಲ್ಲಿ ಕಾಣಿಸಿಕೊಂಡ ನಟ ಶಂಕರ್ ನಾಗ್. 1982ರಲ್ಲಿ ಬಿಡುಗಡೆಯಾದ 'ಗೆದ್ದಮಗ' ಸಿನಿಮಾಲ್ಲಿ ತ್ರಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆನಂತರ ಮಾನವ ದಾನವ ಹಾಗೂ ಮಹೇಶ್ವರ ಚಿತ್ರಗಳಲ್ಲಿ ದ್ವಿಪಾತ್ರದಲ್ಲಿ ನಟಿಸುವ ಮೂಲಕ ಸಿನಿರಸಿಕರ ಮನಗೆದ್ದಿದ್ದರು. 

ನಾಗರಹಾವು ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದ ಸಂಪತ್ ಕುಮಾರ್ ಮುಂದೆ ವಿಷ್ಣುವರ್ಧನ್ ಹೆಸರಿನಿಂದ ಕನ್ನಡ ಸಿನಿಪ್ರಿಯರ ಹೃದಯ ಸಾಮ್ರಾಜ್ಯದಲ್ಲಿ ಸಾಹಸಸಿಂಹನಾಗಿ ಶಾಶ್ವತವಾಗಿ ನೆಲೆಸಿದ್ದಾರೆ. ಭಾರತೀಯ ಸಿನಿರಂಗದಲ್ಲೇ ಅತಿಹೆಚ್ಚು ಬಾರಿ ದ್ವಿಪಾತ್ರದಲ್ಲಿ ನಟಿಸಿರುವ ಏಕೈಕ ನಟ ಅಂದರೆ ಸಾಹಸಸಿಂಹ ಡಾ.ವಿಷ್ಣುವರ್ಧನ್. ವಿಷ್ಣುದಾದಾ ಸತ್ಯಂ ಶಿವಂ ಸುಂದರಂ ಹಾಗೂ ಸಿಂಹಾದ್ರಿಯ ಸಿಂಹ ಈ ಎರಡು ಚಿತ್ರಗಳಲ್ಲಿ ತ್ರಿಪಾತ್ರದಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದರು.

2012ರಲ್ಲಿ ತೆರೆಕಂಡ ಪಿ.ಸಿ ಶ್ರೀರಾಮ್ ನಿರ್ದೇಶನದ 'ಗಾಡ್ ಫಾದರ್' ಸಿನಿಮಾದಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ತ್ರಿಬಲ್‌ ರೊಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಇದು ತಮಿಳಿನ 'ವರಲಾರು' ಸಿನಿಮಾದ ರಿಮೇಕ್ ಆಗಿತ್ತು. ಚಿತ್ರದಲ್ಲಿ ಸೌಂದರ್ಯ ಜಯಮಾಲಾ, ಸದಾ, ಭೂಮಿಕಾ ಚಾವ್ಲಾ ಹಾಗೂ ಕ್ಯಾಥೆರಿನ್ ತ್ರೆಸಾ ಪ್ರಮುಖ ಪಾತ್ರದಲ್ಲಿ ಕಾಣಸಿಕೊಂಡಿದ್ದರು. ಹಾಲಿವುಡ್‌ ಸಿನಿಮಾದಲ್ಲೂ ಉಪ್ಪಿ ತ್ರಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಕರುನಾಡ ಚಕ್ರವರ್ತಿ, ಸ್ಯಾಂಡಲ್‌ವುಡ್ ಕಿಂಗ್, ಸೆಂಚುರಿ ಸ್ಟಾರ್, ಹ್ಯಾಟ್ರಿಕ್ ಹೀರೊ ಹೀಗೆ ಹಲವು ಬಿರುದುಗಳಿಂದ ಕರೆಸಿಕೊಳ್ಳುವ ಶಿವ ರಾಜ್‌ಕುಮಾರ್,  ಸುಮಾರು ಮೂರು ದಶಕಗಳಿಂದ 125ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿ, ಕನ್ನಡ ಪ್ರೇಕ್ಷಕರ ಮನಗೆದ್ದಿದ್ದಾರೆ. ಅಂದ್ಹಾಗೆ ಶಿವಣ್ಣ 1996ರಲ್ಲಿ ತೆರೆಕಂಡ 'ಅಣ್ಣಾವ್ರು ಮಕ್ಕಳು' ಸಿನಿಮಾದಲ್ಲಿ ಶಿವ, ರಾಮ ಹಾಗೂ ಕುಮಾರ್ ಎಂಬ ಮೂರು ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು.