ಶೃತಿ ಪ್ರಕಾಶ್ ಟು ವರ್ತೂರು ಸಂತೋಷ್: ಕನ್ನಡ ಬಿಗ್‌ಬಾಸ್ ಪರಿಚಯಿಸಿದ ಅದ್ಭುತ ಪ್ರತಿಭೆಗಳಿವು!

ನಟ ಪ್ರಥಮ್ ಬಿಗ್‌ಬಾಸ್ ಕನ್ನಡ ಸೀಸನ್‌ 4ರಲ್ಲಿ ಭಾಗವಹಿಸಿ ವಿಜೇತರಾಗಿದ್ದರು. ಬಿಗ್‌ಬಾಸ್‌ ಮನೆಗೆ ಬರುವುದಕ್ಕಿಂತ ಮೊದಲು ಪ್ರಥಮ್ ಯಾರೆಂಬುದು ಯಾರಿಗೂ ತಿಳಿದಿರಲಿಲ್ಲ. ಬಿಗ್‌ಬಾಸ್ ಬಳಿಕ ಅವರು ಒಳ್ಳೆ ಹುಡುಗ ಪ್ರಥಮ್ ಎಂದೇ ಖ್ಯಾತಿ ಗಳಿಸಿದರು. ನಂತರ ಕನ್ನಡ ಕಿರುತೆರೆಯಲ್ಲಿ ಕಾಣಿಸಿಕೊಂಡರು. ಬಳಿಕ ಚಂದನವನಕ್ಕೆ ಎಂಟ್ರಿಕೊಟ್ಟ ಪ್ರಥಮ್, ನಟ ಮತ್ತು ನಿರ್ದೇಶಕನಾಗಿ ಗುರುತಿಸಿಕೊಂಡಿದ್ದಾರೆ.

ಬೆಳಗಾವಿ ಮೂಲದ ಶೃತಿ ಪ್ರಕಾಶ್ ಕನ್ನಡಿಗರಿಗೆ ಪರಿಚಯವವಿದ್ದೇ 'ಬಿಗ್‌ಬಾಸ್ ಕನ್ನಡ ಸೀಸನ್ 5'ರ ಮೂಲಕ. ಇದಕ್ಕೂ ಮೊದಲು ಅವರು ಹಿಂದಿಯ `ಕ್ಲೋಸ್-ಅಪ್' ವೆಬ್‌ಸಿಂಗರ್ ಸ್ಪರ್ಧೆಯಲ್ಲಿ ಭಾಗವಹಿಸಿ ಸೆಮಿಫೈನಲ್‌ವರೆಗೂ ಹೋಗಿದ್ದರು. ವಿ ಚಾನೆಲ್‌ನ ದಿಲ್ ದೋಸ್ತಿ ಡ್ಯಾನ್ಸ್, ಇಷ್ಕ್ ಅನಪ್ಲಗಡ್' ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದರು. 2017ರಲ್ಲಿ ಸ್ಟಾರ್‌ಪ್ಲಸ್‌ನ `ಸಾಥ್ ನಿಭಾನಾ ಸಾಥಿಯಾ' ಟೆಲಿ ಸೀರಿಯಲ್‌ನಲ್ಲಿ ಅಭಿನಯಿಸಿದ್ದರು. ಇದು ಅವರಿಗೆ ಸಾಕಷ್ಟು ಜನಪ್ರಿಯತೆ ತಂದುಕೊಟ್ಟಿತ್ತು. ಶೃತಿ ಪ್ರಕಾಶ್ ಓರ್ವ ಅದ್ಭುತ ಗಾಯಕಿ ಹಾಗೂ ನಟಿ. ಲಂಡನ್‌ನಲ್ಲಿ ಲಂಬೋದರ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್ ಪ್ರವೇಶಿಸಿದ ಇವರು, ನಂತರ ರಂಗಮಂದಿರ, ಫಿದಾ, ಶ್ರೀ ಭರತ ಬಾಹುಬಲಿ, ಕಸ್ತೂರಿ ಮಹಲ್, ಕಡಲ ತೀರದ ಭಾರ್ಗವ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ. 

ಕನ್ನಡ ಚಿತ್ರರಂಗದ ಪ್ರತಿಭಾವಂತ ನಟ ಧನರಾಜ್ ಕರ್ನಾಟಕದ ಜನತೆಗೆ ಪರಿಚಯವಾಗಿದ್ದು ಬಿಗ್‌ಬಾಸ್ ಕನ್ನಡ ಸೀಸನ್ 6ರ ಮೂಲಕವೇ. ವಾಯ್ಸ್ ಓವರ್ ಆರ್ಟಿಸ್ಟ್ ಮತ್ತು ಡಬ್ಬಿಂಗ್ ಆರ್ಟಿಸ್ಟ್ ಆಗಿರುವ ಧನರಾಜ್, ಬಿಗ್‌ಬಾಸ್ ಬಳಿಕ ಜನಪ್ರಿಯತೆ ಪಡೆದರು.  ಹಲವಾರು ಬಗೆಯಲ್ಲಿ ಮಿಮಿಕ್ರಿ ಮಾಡುವ ಇವರು ಕೆಲವು ಕಾರ್ಟೂನ್‌ಗಳಿಗೂ ಧ್ವನಿ ನೀಡಿದ್ದಾರೆ. ಯಶ್ ಕೆಜಿಎಫ್ ಚಿತ್ರದ ಒಂದು ಪಾತ್ರಕ್ಕೂ ಕೂಡ ಇವರು ವಾಯ್ಸ್ ನೀಡಿದ್ದಾರೆ.

ದಿವ್ಯಾ ಸುರೇಶ್ ಕನ್ನಡ ಕಿರುತೆರೆಯಲ್ಲಿ ಗುರುತಿಸಿಕೊಂಡಿದ್ದೇ ಬಿಗ್‌ಬಾಸ್‌ ರಿಯಾಲಿಟಿ ಶೋ ಮೂಲಕ. ದೊಡ್ಮನೆಯಲ್ಲಿ ಟಾಸ್ಕ್‌ಗಳಲ್ಲಿ ಉತ್ತಮ ಪ್ರದರ್ಶನ ನೀಡಿತ್ತಿದ್ದ ದಿವ್ಯಾ, ಕನ್ನಡಿಗರ ಮನಗೆದ್ದರು. ಇವರು ನನ್ನ ಹೆಂಡ್ತಿ ಎಂಬಿಬಿಎಸ್, ತ್ರಿಪುರ ಸುಂದರಿ ಮತ್ತು ಜೋಡಿ ಹಕ್ಕಿ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಜೊತೆಗೆ ಹಿಲ್ಟನ್ ಹೌಸ್, ಹಿರಣ್ಯ, ರೌಡಿ ಬೇಬಿ ಸಿನಿಮಾಗಳಲ್ಲೂ ನಟಿಸಿದ್ದಾರೆ. 

ಬಿಗ್‌ಬಾಸ್‌ ಸೀಸನ್ 10ರಲ್ಲಿ ಭಾಗವಹಿಸುವುದಕ್ಕೂ ಮುನ್ನ ವರ್ತೂರು ಸಂತೋಷ್ ಯಾರೆಂಬುದು ಹಲವರಿಗೆ ತಿಳಿದಿರಲಿಲ್ಲ. ಆದರೆ, ಬಿಗ್‌ಬಾಸ್‌ ಮನೆಗೆ ಬಂದ ಬಳಿಕ ಕರ್ನಾಟಕದಲ್ಲಿ ಅವರ ಜನಪ್ರಿಯತೆ ಹೆಚ್ಚಿತು. ಜೊತೆಗೆ ಹಳ್ಳಿಕಾರ್ ಒಡೆಯನ ಅಭಿಮಾನಿ ಬಳಗವೂ ಹೆಚ್ಚಿತು. ದೇಸಿ ತಳಿಯ ಹಸುವಾಗಿರುವ 'ಹಳ್ಳಿಕಾರ್' ತಳಿಯನ್ನು ಅಭಿವೃದ್ದಿಪಡಿಸುವ ಸಲುವಾಗಿ ವರ್ತೂರು ಸಂತೋಷ್ ಮಾಡುತ್ತಿರುವ ಸಾಧನೆ ಹೆಚ್ಚು ಜನರಿಗೆ ತಿಳಿಯಿತು. ಇವರನ್ನು ಹಳ್ಳಿಕಾರ್ ಒಡೆಯ ಅಂತಲೇ ಕರೆಯಲಾಗುತ್ತೆ. 

ಸೋಶಿಯಲ್ ಮೀಡಿಯಾದಲ್ಲಿ 'ಬ್ರೋ ಗೌಡ' ಅಂತಲೇ ಗುರುತಿಸಿಕೊಂಡಿದ್ದ ಶಮಂತ್ ಗೌಡ ಅವರಿಗೆ ಕರ್ನಾಟಕದಾದ್ಯಂತ ಜನಪ್ರಿಯತೆ ಸಿಕ್ಕಿದ್ದು 'ಬಿಗ್‌ಬಾಸ್‌' ರಿಯಾಲಿಟಿ ಶೋ ಮೂಲಕ. ಬಿಗ್‌ಬಾಸ್‌ ಸೀಸನ್ 8ರಲ್ಲಿ ಭಾಗವಹಿಸಿದ್ದ ಶಮಂತ್ ತಮ್ಮ ಗಾಯನದ ಮೂಲಕ ಹೆಸರು ಮಾಡಿದರು. ಸದ್ಯ ಲಕ್ಷ್ಮೀ ಬಾರಮ್ಮ ಸೀರಿಯಲ್‌ನಲ್ಲಿ ವೈಷ್ಣವ್ ಪಾತ್ರದ ಮೂಲಕ ಸಿಕ್ಕಾಪಟ್ಟೆ ಜನಪ್ರಿಯತೆ ಗಳಿಸಿದ್ದಾರೆ. 

ಬಿಗ್‌ಬಾಸ್‌ಗೂ ಮುನ್ನ ಟಿಕ್‌ಟಾಕ್ ವಿಡಿಯೋಸ್ ಮಾಡುತ್ತಿದ್ದ ನಿವೇದಿತಾ ಗೌಡ, ಬಿಗ್‌ಬಾಸ್‌ ಸೀಸನ್ 5ರ ಮೂಲಕ ಕರ್ನಾಟಕದ ಮನೆಮಾತಾದರು. ನಂತರ ಚಂದನವನದಲ್ಲಿ ಗೊಂಬೆ ಎಂದೇ ಖ್ಯಾತಿ ಗಳಿಸಿದ ನಿವೇದಿತಾ, ಸದ್ಯ ಕನ್ನಡ ಕಿರುತೆರೆಯ ಹಲವು ರಿಯಾಲಿಟಿ ಶೋಗಳಲ್ಲಿ ಸಕ್ರಿಯರಾಗಿದ್ದಾರೆ.

ಮಾಡರ್ನ್ ರೈತ ಶಶಿಕುಮಾರ್ ಅವರು ಕೂಡ ಕನ್ನಡಿಗರಿಗೆ ಪರಿಚಯವಾಗಿದ್ದೇ ಬಿಗ್‌ಬಾಸ್ ರಿಯಾಲಿಟಿ ಶೋ ಮೂಲಕ. ಸೀಸನ್ 6ರಲ್ಲಿ ಭಾಗವಹಿಸಿದ್ದ ಶಶಿಕುಮಾರ್ ವಿಜೇತರಾಗಿದ್ದರು. ಜಾನಪದ ನೃತ್ಯ ಮತ್ತು ನಾಟಕಗಳಲ್ಲಿ ಅಭಿನಯಿಸುವ ಶಶಿ ಒಬ್ಬ ಒಳ್ಳೆಯ ಜಾನಪದ ಕಲಾವಿದ. ಡೂಳ್ಳು ಕುಣಿತ, ಪೂಜೆ ಕುಣಿತ, ವೀರಗಾಸೆ, ಕಂಸಾಳೆ ಮುಂತಾದ ಜಾನಪದ ಕೆಲೆಗಳಲ್ಲಿ ಸಿದ್ಧಹಸ್ತರು. `ಭೂಮಿಕ' ಎಂಬ ತಂಡ ಕಟ್ಟಿಕೊಂಡು ರಾಜ್ಯ ಮತ್ತು ರಾಷ್ಟ್ರಾದಾದ್ಯಂತ ಹಲವು ಕಾರ್ಯಕ್ರಮಗಳನ್ನು ನೀಡಿದ್ದಾರೆ. ಇವುಗಳಲ್ಲಿ ಮೂರು ನೃತ್ಯ ಮತ್ತು ಎರಡು ನಾಟಕ ಕಾರ್ಯಕ್ರಮಗಳಿಗೆ ಚಿನ್ನದ ಪದಕ ಪಡೆದಿದ್ದಾರೆ. ಇತ್ತೀಚೆಗೆ ಮೆಹಬೂಬ ಎಂಬ ಸಿನಿಮಾದಲ್ಲೂ ಕೂಡ ಅಭಿನಯಿಸಿದ್ದರು.