ಸೌತ್ ಸಿನಿಮಾರಂಗದ ಶ್ರೀಮಂತ ನಟಿಯರಿವರು: ಇವರ ಆಸ್ತಿ ಮೌಲ್ಯ ಎಷ್ಟು ಗೊತ್ತಾ?

ಸೌತ್ ಇಂಡಿಯಾದ ಲೇಡಿ ಸೂಪರ್ ಸ್ಟಾರ್ ಎಂಬ ಖ್ಯಾತಿ ಗಳಿಸಿರುವ ನಯನತಾರ ಕನ್ನಡ ಸೇರಿದಂತೆ ತಮಿಳು, ತೆಲುಗು, ಮಲಯಾಳಂ ಭಾಷೆಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ಮದುವೆಯಾದ ನಂತರ ನಂಬರ್ ಒನ್ ಹೀರೋಯಿನ್ ಆಗಿ ಮಿಂಚುತ್ತಿರುವ ಲೇಡಿ ಸೂಪರ್ ಸ್ಟಾರ್ ಪ್ರತಿ ಸಿನಿಮಾಗೆ 10 ಕೋಟಿ ರೂಪಾಯಿವರೆಗೆ ಸಂಭಾವನೆ ಪಡೀತಾರೆ. ಇವರ ಆಸ್ತಿಮೌಲ್ಯ ಬರೋಬ್ಬರಿ 200 ಕೋಟಿ.

ಮಿಲ್ಕಿ ಬ್ಯೂಟಿ ಅಂತಲೇ ಖ್ಯಾತಿ ಗಳಿಸಿರುವ ತಮನ್ನಾ ಭಾಟಿಯಾ ಕೂಡ ದಕ್ಷಿಣ ಚಿತ್ರರಂಗದ ಸ್ಟಾರ್ ನಟಿ. ಬಾಲಿವುಡ್‌ನಲ್ಲೂ ಗುರುತಿಸಿಕೊಂಡಿರುವ ಈ ನಟಿ, ಸಿನಿಮಾವೊಂದಕ್ಕೆ ಕೋಟಿ-ಕೋಟಿ ಸಂಭಾವನೆ ಪಡೆಯುತ್ತಾರೆ. ತಮನ್ನಾ ಅವರ ನಿವ್ವಳ ಆಸ್ತಿ ಮೌಲ್ಯ 120 ಕೋಟಿ ರೂಪಾಯಿ.

ಟಾಲಿವುಡ್, ಕಾಲಿವುಡ್‌ನಲ್ಲಿ ಟಾಪ್ ನಟಿಯಾಗಿ ಮಿಂಚುತ್ತಿರುವ ಅನುಷ್ಕಾ ಶೆಟ್ಟಿ, ಇತ್ತೀಚೆಗೆ ಸಿನಿಮಾಗಳ ಆಯ್ಕೆ ವಿಚಾರದಲ್ಲಿ ಸಿಕ್ಕಾಪಟ್ಟೆ ಚ್ಯೂಸಿಯಾಗಿದ್ದಾರೆ. 2023ರಲ್ಲಿ ಮಿಸ್ಟರ್ ಪೊಲಿಶೆಟ್ಟಿ ಸಿನಿಮಾದಲ್ಲಿ ಅಭಿನಯಿಸಿದ್ದ ಈ ನಟಿ, ಸದ್ಯ ಕಾದಿ, ಕಥನಾರ್ ದಿ ವೈಲ್ಡ್ ಸೋರ್ಸೆರರ್ ಮುಂತಾದ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.  ಸಿನಿಮಾವಂದಕ್ಕೆ 5 ರಿಂದ 7 ಕೋಟಿ ವರೆಗೆ ಸಂಭಾವನೆ ಪಡೆಯುವ ಈ ನಟಿಯ ಆಸ್ತಿ ಮೌಲ್ಯ 133 ಕೋಟಿ ರೂಪಾಯಿ.

ಓರ್ವ ಹೀರೋಗೆ ಇರುವಷ್ಟೇ ಚಾರ್ಮ್ ನಟಿ ಸಮಂತಾ ಅವರಿಗೂ ಇದೆ. ನಾಗಚೈತನ್ಯ ಜೊತೆಗಿನ ವಿಚ್ಛೇದನ, ತಂದೆಯ ನಿಧನ, ಮಯೋಸೈಟಿಸ್ ಕಾಯಿಲೆಯಂತಹ ಸಮಸ್ಯೆಗಳಿಂದ ಚೇತರಿಸಿಕೊಳ್ಳುತ್ತಿರುವ ಸಮಂತಾ, ಸದ್ಯ ಸಿನಿಮಾಗಳಿಂದ ದೂರವಿದ್ದಾರೆ. ವೆಬ್‌ ಸೀರೀಸ್‌ಗಳ ಬಗ್ಗೆ ಗಮನ ಹರಿಸಿರುವ ಅವರು, 8 ಕೋಟಿ ರೂಪಾಯಿ ಸಂಭಾವನೆ ಪಡೆಯುತ್ತಾರಂತೆ. ಇವರ ಆಸ್ತಿಮೌಲ್ಯ ಬರೋಬ್ಬರಿ  101 ಕೋಟಿ ರೂಪಾಯಿ.

ಕೊಡಗಿನ ಕುವರಿ ರಶ್ಮಿಕಾ ಮಂದಣ್ಣ ಸದ್ಯ ಟಾಲಿವುಡ್, ಬಾಲಿವುಡ್,ಕಾಲಿವುಡ್ ಸೇರಿದಂತೆ ಸಾಲು-ಸಾಲು ಸಿನಿಮಾ ಮಾಡುತ್ತಾ ಬ್ಯುಸಿಯಾಗಿದ್ದಾರೆ. ರಶ್ಮಿಕಾ ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ ಛಾವಾ ಸಿನಿಮಾಗಾಗಿ 4 ಕೋಟಿ ರೂ. ಸಂಭಾವನೆ ಪಡೆದಿದ್ದರು.  ಇವರ ಆಸ್ತಿಮೌಲ್ಯ  66 ಕೋಟಿ ರೂಪಾಯಿ ಅಂತ ವರದಿಯಾಗಿದೆ.

ಕರಾವಳಿ ಚೆಲುವೆಗೆ ಪೂಜಾ ಹೆಗ್ಡೆ ಅವರು ದಳಪತಿ ವಿಜಯ್ ನಟನೆಯ ಕೊನೆಯ ಸಿನಿಮಾ ಜನ ನಾಯಗನ್ ಹಾಗೂ ಸೂರಿಯ ನಟನೆಯ ರೆಟ್ರೋ ಜೊತೆಗೆ ಹಿಂದಿ ಸಿನಿಮಾವೊಂದರಲ್ಲಿ ಅಭಿನಯಿಸುತ್ತಿದ್ದಾರೆ.  ಸಿನಿಮಾವೊಂದಕ್ಕೆ 2.5 ರಿಂದ 7 ಕೋಟಿ ರೂಪಾಯಿ ಸಂಭಾವನೆ ಪಡೆಯುವ ಈ ನಟಿಯ ಆಸ್ತಿ ಮೌಲ್ಯ  50  ಕೋಟಿ ರೂಪಾಯಿ.

ತಮ್ಮ ಸಹಜ ಅಭಿನಯ ಹಾಗೂ ಸಹಜ ಸೌಂದರ್ಯದಿಂದ ದಕ್ಷಿಣ ಭಾರತ ಮಾತ್ರವಲ್ಲ, ಉತ್ತರದಲ್ಲೂ ಅನೇಕ ಅಭಿಮಾನಿಗಳ ಹೃದಯ ಕದ್ದಿರುವ ಸಾಯಿ ಪಲ್ಲವಿ, ಸಿನಿಮಾವೊಂದಕ್ಕೆ 5 ಕೋಟಿ ರೂಪಾಯಿ ಸಂಭಾವನೆ ಪಡೆದಿದ್ದಾರೆ ಎನ್ನಲಾಗಿದೆ. ಈ ನಟಿಯ ಆಸ್ತಿ ಮೌಲ್ಯ  47 ಕೋಟಿ ರೂಪಾಯಿ.