ಸ್ಯಾಂಡಲ್ ವುಡ್ ಚಿತ್ರಾನ್ನ!

By Staff

| Published: Tuesday, November 12, 2002, 5:30 [IST]

ಮದನ ಬಂದಷ್ಟೇ ವೇಗವಾಗಿ ಮನೆಗೆ ಮರಳಿದ! ಜೈಜಗದೀಶ್ ಮತ್ತು ವಿಜಯಲಕ್ಷ್ಮಿ ಸಿಂಗ್ ದಂಪತಿಗಳ ಜೇಬು ಖಾಲಿ ಮಾಡಿದ. ಈ ಜೋಡಿಯ ಮುಂದಿನ ನಿರೀಕ್ಷೆ ಈ ಬಂಧನ.

ವಿಷ್ಣುವರ್ಧನ್, ಜಯಪ್ರದಾ ಜೋಡಿಯ ಈ ಬಂಧನದ ಚಿತ್ರಕತೆ ಮತ್ತು ನಿರ್ದೇಶನದ ಹೊಣೆಯನ್ನು ವಿಜಯಲಕ್ಷ್ಮಿ ಸಿಂಗ್ ತಮ್ಮ ಹೆಗಲ ಮೇಲೆ ಹಾಕಿಕೊಂಡಿದ್ದಾರೆ. ಮದನ ಚಿತ್ರವನ್ನು ನಿರ್ದೇಶಿಸಿ ಪತಿದೇವರು(ಜೈ ಜಗದೀಶ್ ) ಸೋತರು. ನಾನಾದರೂ ಗೆಲ್ಲೋಣ ಅನ್ನೋ ಬಯಕೆ ಅವರದು. ಮನೋಮೂರ್ತಿ ಸಂಗೀತ ಚಿತ್ರಕ್ಕಿದೆ.

***

ಸದ್ಯದ ವೇಗ ನೋಡಿದರೆ ಮಾತಾಡ್ ಮಾತಾಡು ಮಲ್ಲಿಗೆ, ಇತ್ತೀಚಿನ ಮುಂಗಾರು ಮಳೆ ದಾಖಲೆಗಳನ್ನು ಮುರಿಯುವಂತೆ ಕಾಣುತ್ತಿದೆ. ಚಿತ್ರದ ಹಾಡು, ಕತೆ, ಪಾತ್ರಗಳು ಎಲ್ಲವೂ ಪ್ರೇಕ್ಷಕರಿಗೆ ಇಷ್ಟವಾಗಿವೆ. ಈಗಾಗಲೇ ನಿರ್ದೇಶಕ ನಾಗತಿ ಹಳ್ಳಿ ಮುಖ ಹುಣ್ಣಿಮೆ ಚಂದ್ರನಂತೆ ಹೊಳೆಯುತ್ತಿದೆ!

***

ಸಿಕ್ಸರ್ ನಂತರ ನಿರ್ದೇಶಕ ಶಶಾಂಕ್ ಅವರ ಮೊಗ್ಗಿನ ಜಡೆ ಚಿತ್ರೀಕರಣ ಭರದಿಂದ ಸಾಗಿದೆ. ಮುಂಗಾರು ಮಳೆ ನಿರ್ಮಾಪಕ ಇ.ಕೃಷ್ಣಪ್ಪ ಹಣ ಸುರಿದಿದ್ದಾರೆ. ಚಿತ್ರದ ತುಂಬ ಹೊಸ ಮುಖಗಳೇ..

***

ಇದು ಕತೆಯಲ್ಲ ಕೆತ್ತನೆ ಎಂಬ ಉಪಶೀರ್ಷಿಕೆಯಡಿ ನೀನೊಲಿದ ಕ್ಷಣಚಿತ್ರ ತಯಾರಾಗುತ್ತಿದೆ.

***

ತೊಟ್ಟಿಲು ಚಿತ್ರೀಕರಣ ಸದ್ಯದಲ್ಲೇ ಆರಂಭವಾಗಲಿದೆಯಂತೆ. ಕತೆ, ಚಿತ್ರಕತೆ, ನಿರ್ದೇಶನ ಕೆ.ಪ್ರಸನ್ನ ಕುಮಾರ್ ಅವರದು. ಜೋಗಿ ಖ್ಯಾತಿಯ ಮಳವಳ್ಳಿ ಸಾಯಿಕೃಷ್ಣ ಚಿತ್ರಕ್ಕೆ ಸಂಭಾಷಣೆ ನೀಡಲಿದ್ದಾರೆ. ತೊಟ್ಟಿಲಲ್ಲಿ ಮಲಗಿದ ಮಗು ಪಕ್ಕ ಮಚ್ಚು ಇಟ್ಟಿರುವ ಚಿತ್ರ ಜಾಹೀರಾತಿನಲ್ಲಿ ಕಾಣಿಸಿದೆ.

***

ಜನ್ಮ ಅನ್ನೋ ಚಿತ್ರದ ಹಾಡುಗಳ ಧ್ವನಿ ಮುದ್ರಣ ಆರಂಭಗೊಂಡಿದೆ. ಆದಿಯೂ ಅಂತ್ಯವೂ ಇಲ್ಲದವನು ಈಶ್ವರ.. ಪ್ರೀತಿ ಮಾಡದವನು ಇಲ್ಲಿ ನಶ್ವರ ಎಂದು ಜಾಹೀರಾತು ಹೇಳುತ್ತಿದೆ.

***

ನಾನು ನೀನು ಜೋಡಿ ಕ್ಯಾಸೆಟ್ ಬಿಡುಗಡೆ ಸದ್ಯದಲ್ಲೇ ಆಗಲಿದೆ. ವಿಜಯ ರಾಘವೇಂದ್ರ ಪ್ರಮುಖ ಪಾತ್ರದಲ್ಲಿದ್ದಾರೆ. ಹಂಸಲೇಖ ಹಾಡು, ನಂಜುಂಡೇ ಗೌಡರ ದುಡ್ಡು ಜೋಡಿಯಾಗಿದೆ. ಫಲಿತಾಂಶ ನೋಡೋಣ.

***

ಉಪೇಂದ್ರ ಮತ್ತು ದರ್ಶನ್ ಅಭಿನಯದ ಅನಾಥರು ಸೆಪ್ಟೆಂಬರ್ 18 ರಂದು ತೆರೆಕಾಣಲಿದೆ.

***

ಸತ್ಯ ಇನ್ ಲವ್ಸಂಕ್ರಾಂತಿಗೆ ಬರಲಿದೆ. ದಸರಾ ಹಬ್ಬಕ್ಕೆ ಧ್ವನಿ ಸುರಳಿ ಬರುತ್ತದೆ ಎನ್ನುತ್ತಾರೆ ನಿರ್ದೇಶಕ ರಾಘವ್ ಲೋಕಿ.

***

ಗಂಗೆ ಬಾರೇ ತುಂಗೆ ಬಾರೆಚಿತ್ರೀಕರಣ ಭರದಿಂದ ಸಾಗಿದೆ. ಕೋಕಿಲಾ ಸಾಧು ನಿರ್ದೇಶನ ಮಾಡಿದ್ದು, ದೇವರಾಜ್ ಪುತ್ರ ಪ್ರಜ್ವಲ್ ಚಿತ್ರದ ನಾಯಕ.

***

ಇದು ಬದುಕಿನ ಕತೆ ಮಚ್ಚು ಬಂದೂಕಿನ ಜೊತೆ. ಬಲ್ಲಿಯೋ ಬಲಿಯೋ ಗೊತ್ತಿಲ್ಲ. ಈ ಭೂಗತ ಲೋಕದ ಖದರೇ ಹೀಗೆ.. ಇಲ್ಲಿ ಬಲರಾಮ ಬಲ್ಲಿಯಾಗ್ತಾನೆ... ಎನ್ನುತ್ತಿದೆ ಬಲ್ಲಿಚಿತ್ರದ ಜಾಹೀರಾತು

. ***

ಜೊತೆಜೊತೆಯಲಿಚಿತ್ರದ ಜನಪ್ರಿಯ ಹಾಡು ; ಓ ಗುಣವಂತ. ಈ ಹಾಡೇ ಪ್ರೇಮ್ ಅವರ ಹೊಸ ಚಿತ್ರದ ಶೀರ್ಷಿಕೆ. ಸದ್ದು ಗದ್ದಲವಿಲ್ಲದೇ ಚಿತ್ರೀಕರಣ ಮುಗಿಸಿರುವುದಾಗಿ ಚಿತ್ರತಂಡ ಹೇಳಿದೆ.

ಕತೆ, ಚಿತ್ರಕತೆ, ನಿರ್ದೇಶನದ ಹೊಣೆ ಹೊತ್ತಿರುವವರು ರಘುವರ್ಧನ್. ಹಂಸಲೇಖ ಸಂಗೀತ ನೀಡಿದ್ದಾರೆ. ಪ್ರೇಮ್, ರೇಖಾ, ಅವಿನಾಶ್, ರಂಗಾಯಣ ರಘು, ಚಿತ್ರಾ ಶೆಣೈ ಪ್ರಮುಖ ಪಾತ್ರದಲ್ಲಿದ್ದಾರೆ.