ಮದುವೆ ಬಳಿಕ ನಟನೆಗೆ ಗುಡ್‌ಬೈ ಹೇಳಿದ ಸ್ಯಾಂಡಲ್‌ವುಡ್ ನಟಿಯರಿವರು: ಈಗೇನು ಮಾಡ್ತಿದ್ದಾರೆ ಗೊತ್ತಾ?

2011ರಲ್ಲಿ ತಮಿಳು ಚಿತ್ರದ ಮೂಲಕ ಸಿನಿಪಯಣ ಆರಂಭಿಸಿದ ನಟಿ ದೀಪಿಕಾ ಕಾಮಯ್ಯ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 'ಚಿಂಗಾರಿ' ಸಿನಿಮಾದಿಂದ ಬಿಗ್ ಬ್ರೇಕ್ ಪಡೆದರು. ನಂತರ ಗಣೇಶ್‌ರ ಅಟೋರಾಜ ಚಿತ್ರದಲ್ಲಿ ನಟಿಸಿದ ಇವರು, ಹಿಂದಿಯಲ್ಲಿ ಶಾಹೀದ್ ಕಪೂರ್ ನಟನೆಯ`ಪಟಾ ಪೋಸ್ಟರ್ ನಿಕಲಾ ಹಿರೋ' ಚಿತ್ರದಲ್ಲಿ ಕೂಡ ಬಣ್ಣಹಚ್ಚಿದ್ದರು. ಬಿಗ್‌ಬಾಸ್ ಸೀಸನ್ 2ರಲ್ಲಿ ಕಾಣಿಸಿಕೊಂಡಿದ್ದರು. 2017ರಲ್ಲಿ ಆಸ್ಟ್ರೇಲಿಯಾದ ಬ್ಯಾಂಕಿಂಗ್ ಸಂಸ್ಥೆಯಲ್ಲಿ ಕೆಲಸ ಮಾಡ್ತಿದ್ದ ಸುಮಂತ್ ಗೋಪಿ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಮದುವೆ ಬಳಿಕ ನಟನೆಗೆ ಗುಡ್‌ಬೈ ಹೇಳಿದ ದೀಪಿಕಾ, ಆಸ್ಟ್ರೇಲಿಯಾದಲ್ಲಿ ನೆಲಸಿದ್ದಾರೆ. 

ಕನ್ನಡ ,ತೆಲುಗು,ಮಲಯಾಳಂ ಮತ್ತು ತಮಿಳು ಸಿನಿಮಾರಂಗಗಳಲ್ಲಿ 40ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಮಾನ್ಯ, ತಾವು ನಟಿಸಿದ ನಾಲ್ಕು ಭಾಷೆಗಳಲ್ಲಿಯೂ ಫಿಲ್ಮ್ ಫೇರ್ ಅವಾರ್ಡ್ ಪಡೆದಿದ್ದರು. ಕನ್ನಡದಲ್ಲಿ ದರ್ಶನ್ ನಟನೆಯ ಶಾಸ್ತ್ರಿ ಹಾಗೂ ವಿಷ್ಣುವರ್ಧನ್ ಅವರ ವರ್ಷ ಸೇರಿದಂತೆ ಕೆಲ ಚಿತ್ರಗಳಲ್ಲಿ ನಟಿಸಿದ್ದಾರೆ.  2013ರಲ್ಲಿ ವಿಕಾಸ್ ಬಾಜ್‌ಪೈ ಅವರನ್ನು ಕೈಹಿಡಿದ ಮಾನ್ಯ, ಸಿನಿಮಾದಿಂದ ದೂರವಾಗಿ ಪತಿಯೊಂದಿಗೆ ಅಮೆರಿಕಾದಲ್ಲಿ ನೆಲೆಸಿದರು. ಸದ್ಯ ಅಮೆರಿಕದಲ್ಲಿ ಬ್ಯಾಂಕ್ ಉದ್ಯೋಗಿ ಆಗಿರುವ ಮಾನ್ಯಾಗೆ  ಒಮಿಷ್ಕಾ ಎಂಬ ಮಗಳಿದ್ದು, ಅವರಿಗೂ ಕನ್ನಡ ಕಲಿಸಿಕೊಡುತ್ತಿದ್ದಾರೆ.

ಗಾಳಿಪಟ ಬೆಡಗಿ ಡೈಸಿ ಬೋಪಣ್ಣ ತಮ್ಮ ಸಹಜ ಸೌಂದರ್ಯ ಹಾಗೂ ಸೌಮ್ಯ ನಟನೆಯಿಂದ ಸಿನಿರಸಿಕರ ಮನೆಗೆದ್ದಿದ್ದರು. ಮೂಲತಃ ಕೊಡಗಿನವರಾದ ಈ ಚೆಲುವೆ ಕನ್ನಡ, ತಮಿಳು, ತೆಲಗು, ಹಿಂದಿ ಮತ್ತು ಮಲಯಾಳಂ ಚಿತ್ರಗಳಲ್ಲಿ ಮಿಂಚಿದ್ದರು. 2011ರಲ್ಲಿ ಮುಂಬೈ ಮೂಲದ ಅಮಿತ್ ಜಾಜು ಅವರೊಂದಿಗೆ ಮದುವೆಯಾದ ಈ ಚೆಲುವೆ ಸಿನಿಮಾರಂಗದಿಂದ ದೂರ ಉಳಿದರು. ಪೈಟಿಂಗ್ ಮತ್ತು ಮಾಡೆಲಿಂಗ್ ಸಾಕಷ್ಟು ಆಸಕ್ತಿ ಹೊಂದಿದ್ದ ಇವರು, ಅದನ್ನೇ ವೃತ್ತಿಯಾಗಿ ತೆಗೆದುಕೊಂಡಿದ್ದಾರೆ.

ಬಾಲನಟಿಯಾಗಿ ಸಿನಿಮಾರಂಗ ಪ್ರವೇಶಿಸಿದ ಸಿಂಧು ಮೆನನ್, 'ಪ್ರೇಮ ಪ್ರೇಮ ಪ್ರೇಮ' ಚಿತ್ರದಿಂದ ನಾಯಕಿಯಾದರು. ಆನಂತರ ಕಿಚ್ಚ ಸುದೀಪ್ ಅಭಿನಯದ `ನಂದಿ' ಮತ್ತು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ `ಧರ್ಮ' ಚಿತ್ರದ ಮೂಲಕ ಜನಪ್ರಿಯರಾದರು. ಏತನ್ಮಧ್ಯೆ ಪರಭಾಷಾ ಚಿತ್ರಗಳಲ್ಲಿಯೂ ನಟಿಸಿ ಸೈ ಎನಸಿಕೊಂಡರು. ಸ್ವಲ್ಪಕಾಲ ಕಿರುತೆರೆಯ ಕಾರ್ಯಕ್ರಮಗಳಲ್ಲಿ ನಿರೂಪಕಿಯಾಗಿ ಕಾಣಿಸಿಕೊಂಡ ಸಿಂಧು ಕೆಲ ಧಾರಾವಾಹಿಗಳಲ್ಲಿಯೂ ಅಭಿನಯಿಸಿದ್ದಾರೆ. 2010ರಲ್ಲಿ ಯುಕೆ ಮೂಲದ ಪ್ರಭು ಅವರನ್ನು ಕೈಹಿಡಿದ ಸಿಂಧು, ನಟನೆಗೆ ಗುಡ್‌ಬೈ ಹೇಳಿದರು. 

ನಿಖಿತಾ ತುಕ್ರಾಲ್ ಬೆರಳೆಣಿಯಷ್ಟು ಕನ್ನಡ ಸಿನಿಮಾಗಳಲ್ಲಿ ನಟಿಸಿದರೂ ಸಿಕ್ಕಾಪಟ್ಟೆ ಕ್ರೇಜ್ ಸೃಷ್ಟಿಸಿಕೊಂಡಿದ್ದರು. ಸುದೀಪ್ ನಟನೆಯ ಮಹಾರಾಜ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್ ಪ್ರವೇಶಿಸಿದ್ದ ನಿಖಿತಾ, ಆನಂತರ ಯೋಧ, ಫ್ರಿನ್ಸ್, ವಂಶಿ, ದುಬೈ ಬಾಬು, ಮುಕುಂದ ಮುರಾರಿ, ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದರು. 2016ರಲ್ಲಿ ಗಗನ್ ದೀಪ್ ಸಿಂಗ್ ಅವರನ್ನು ಮದುವೆಯಾದ ನಿಖಿತಾ, ಸಿನಿಮಾಗೆ ಗುಡ್‌ಬೈ ಹೇಳಿದರು. ಸದ್ಯ ಅವರು ಪತಿ ಹಾಗೂ ಮಗಳೊಂದಿಗೆ ಮುಂಬೈನಲ್ಲಿ ನೆಲೆಸಿದ್ದಾರೆ.

2009ರಲ್ಲಿ ಬಿಡುಗಡೆಯಾದ ಪರಿಚಯ ಚಿತ್ರದ ಮೂಲಕ ಚಂದನವನ ಪ್ರವೇಶಿದ ಸಿಂಧು ಲೋಕನಾಥ್, 2012ರಲ್ಲಿ ಲೈಫ್ ಇಷ್ಟೇನೆ ಸಿನಿಮಾ ಮೂಲಕ ನಾಯಕಿಯಾದರು. ಆನಂತರ ರಾಕ್ಷಿಸಿ, ಯಾರೇ ಕೂಗಾಡಲಿ, ಡ್ರಾಮಾ, ಲವ್ ಇನ್ ಮಂಡ್ಯ ಸೇರಿದಂತೆ ಕೆಲ ಸಿನಿಮಾಗಳಲ್ಲಿ ಬಣ್ಣಹಚ್ಚಿದ್ದ ಈ ನಟಿ, ಪೂಮಾ ಕಂಪನಿಯಲ್ಲಿ ಹೆಚ್‌ಆರ್ ಆಗಿದ್ದ ಶ್ರೇಯಸ್ ಎಂಬುವವರನ್ನು ಮದುವೆಯಾದರು. ಬಳಿಕ ನಟನೆಯಿಂದ ದೂರ ಉಳಿದರು. 

ಸಾಕ್ಷಿ ಶಿವಾನಂದ್ ಕನ್ನಡ ಸೇರಿದಂತೆ ತೆಲುಗು,ಹಿಂದಿ, ತಮಿಳು ಮತ್ತು ಮಲಯಾಳಂ ಸಿನಿಮಾಗಳಲ್ಲಿ ಅಭಿನಯಿಸಿ ಜನಪ್ರಿಯತೆ ಗಳಿಸಿದ್ದರು. ಗಲಾಟೆ ಅಳಿಯಂದಿರು ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬಂದ ಇವರು, ನಾನು ನಾನೇ, ಸೈನಿಕ, ಕೋದಂಡರಾಮ ಮುಂತಾದ ಚಿತ್ರಗಳಲ್ಲಿ ನಟಿಸಿದರು. ಆನಂತರ ಮೋಹನ್ ಬಾಬು ಅವರ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಈ ಚೆಲುವೆ ಸಿನಿಮಾದಿಂದ ದೂರ ಉಳಿದರು. 

ಚಂದನವನದಲ್ಲಿ ಗೋಲ್ಡನ್ ಕ್ವೀನ್ ಅಂತಲೇ ಖ್ಯಾತಿ ಪಡೆದಿರುವ ನಟಿ ಅಮೂಲ್ಯ, ಚಿಕ್ಕವಯಸ್ಸಿನಲ್ಲೇ ಹಲವು ಸಿನಿಮಾಗಳಲ್ಲಿ ನಟಿಸಿ ಪ್ರೇಕ್ಷಕರ ಮನಗೆದ್ದಿದ್ದರು. ಚೆಲುವಿನ ಚಿತ್ತಾರ ಸಿನಿಮಾ ಮೂಲಕ ನಾಯಕಿಯಾಗಿ ಬೆಳ್ಳಿತೆರೆ ಎಂಟ್ರಿಕೊಟ್ಟ ಅಮೂಲ್ಯ, ಆನಂತರ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿ ಸೈ ಎನಿಸಿಕೊಂಡರು. 2017ರಲ್ಲಿ ಜಗದೀಶ್ ಚಂದ್ರ ಕೈಹಿಡಿದ ಅಮೂಲ್ಯ, ಸಿನಿಮಾದಿಂದ ದೂರವೇ ಉಳಿದಿದ್ದಾರೆ.