ಕನ್ನಡ ಚಿತ್ರರಂಗದ ಎವರ್‌ಗ್ರೀನ್ ಸಿನಿತಾರಾ ಜೋಡಿಗಳು

ಡಾ. ರಾಜಕುಮಾರ್ ಮತ್ತು ಭಾರತಿ ವಿಷ್ಣುವರ್ಧನ್ ಸುಮಾರು 35 ಚಿತ್ರಗಳಲ್ಲಿ ನಟಿಸಿದ್ದಾರೆ. ಕನ್ನಡ ಸಿನಿ ರಸಿಕರ ಅಚ್ಚು ಮೆಚ್ಚಿನ ಜೋಡಿಯಾಗಿದ್ದ ರಾಜ್-ಬಾರತಿ ಹಲವು ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ್ದಾರೆ. ಭಲೆ ಜೋಡಿ, ಶ್ರೀ ಕೃಷ್ಣ ದೇವರಾಯ, ಕುಲ ಗೌರವ, ಬಂಗಾರದ ಮನುಷ್ಯ ಮುಂತಾದ ಚಿತ್ರಗಳು ಇಂದಿಗೂ ಅಜರಾಮರವಾಗಿವೆ. ಹಾಗೇ ರಾಜ್ -ಲೀಲಾವತಿ ಮತ್ತು ರಾಜ್-ಜಯಂತಿ ಕೂಡ ಹೆಸರುವಾಸಿಯಾಗಿತ್ತು.

ಡಾ.ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನದ 1984 ರಲ್ಲಿ ತೆರೆಕಂಡ ಬಂಧನ ಚಿತ್ರದ ಮೂಲಕ ವಿಷ್ಣುವರ್ಧನ್ ಮತ್ತು ಸುಹಾಸಿನಿ ಜೋಡಿ ಒಂದಾಗಿತು. ಮೊದಲ ಚಿತ್ರದಲ್ಲಿ ಗಮನ ಸೆಳೆದ ಈ ಜೋಡಿ ನಂತರ ಸುಪ್ರಭಾತ, ಮುತ್ತಿನ ಹಾರ, ಹಿಮಪಾತ, ಹೆಂಡ್ತಿಗೇಳ್ತೀನಿ, ಮಾತಾಡ್ ಮಾತಾಡು ಮಲ್ಲಿಗೆ, ಸ್ಕೂಲ್ ಮಾಸ್ಟರ್ ಚಿತ್ರಗಳಲ್ಲಿ ನಟಿಸಿತು.

ಅನಂತ ನಾಗ್ ಮತ್ತು ಲಕ್ಷೀ ಕನ್ನಡದ ಮುದ್ದಾದ ಜೋಡಿಗಳಲ್ಲೊಂದು. ಮಧ್ಯಮ ವರ್ಗದ ಹಾಗೂ ಜನ ಸಮಾನ್ಯರ ಜೀವನಕ್ಕೆ ಹತ್ತಿರವಾದ ಪಾತ್ರಗಳು ಮತ್ತು ಕಾದಂಬರಿ ಆಧಾರಿತ ಚಿತ್ರಗಳ ಈ ಜೋಡಿ ಗಮನ ಸೆಳೆಯಿತು. ನಾ ನಿನ್ನ ಬಿಡಲಾರೆ ಚಿತ್ರದಿಂದ ಒಂದಾದ ಈ ಜೋಡಿ ಮುಂದೆ ಚಂದನದ ಗೊಂಬೆ, ಮುದುಡಿದ ತಾವರೆ ಅರಳಿತು, ಬೆಂಕಿಯ ಬಲೆ, ಇಬ್ಬನಿ ಕರಗಿತು ಮುಂತಾದ ಚಿತ್ರಗಳಲ್ಲಿ ನಟಿಸಿತು.

ಕನ್ನಡ ಚಿತ್ರರಂಗದ ಪ್ರಣಯರಾಜ ಶ್ರೀನಾಥ್ ಮತ್ತು ಮಂಜುಳಾ ಜೋಡಿ ಕೂಡ ಚಂದನವನದ ಸಿನಿರಸಿಕರನ್ನು ಮನವನ್ನು ಸೆಳೆದಿತ್ತು. ಸುಮಾರು 42 ಚಿತ್ರಗಳಲ್ಲಿ ಜೊತೆಯಾಗಿದ್ದ ನಟಿಸಿದ್ದ ಈ ಜೋಡಿ ನಾಯಕ-ನಾಯಕಿಯಾಗಿ ನಟಿಸಿದ್ದ ಚಿತ್ರಗಳು ಒಳ್ಳೆಯ ಯಶಸ್ಸನ್ನು ಪಡೆದಿವೆ. ನಿರೀಕ್ಷೆ, ಬೆಸುಗೆ, ಮಧುರ ಸಂಗಮ ಮುಂತಾದ ಚಿತ್ರಗಳಲ್ಲಿ ನಟಿಸಿದ್ದಾರೆ. 1975-76 ನೇ ಸಾಲಿನಲ್ಲಿ ಮಂಜುಳಾ- ಶ್ರೀನಾಥ್ ಜೋಡಿ ಸತತವಾಗಿ ಆರು ಚಿತ್ರಗಳಲ್ಲಿ ನಟಿಸಿತ್ತು.

ಅವಳ ನೆರಳು ಚಿತ್ರದ ಮೂಲಕ ಅಂಬಿ-ಅಂಬಿಕಾ ಜೋಡಿ ಒಂದಾಯಿತು. ನಂತರ ಚಕ್ರವ್ಯೂಹ, ಹಸಿದ ಹೆಬ್ಬುಲಿ, ಚದುರಂಗ, ಮೂರು ಜನ್ಮ, ಬಜಾರ ಭೀಮ ಚಿತ್ರಗಳಲ್ಲಿ ಈ ಜೋಡಿ ನಟಿಸಿತು. ಕನ್ನಡದಲ್ಲಿ ಅಂಬಿಕಾ ಮುಖ್ಯ ನಾಯಕಿಯಾಗಿ ನಟಿಸಿದ `ಹಾಂಗ ಕಾಂಗ್ ನಲ್ಲಿ ಏಜೆಂಟ್ ಅಮರ್' ಚಿತ್ರದಲ್ಲಿ ಕೂಡ ಅಂಬಿ ನಾಯಕರಾಗಿದ್ದರು. ಹಾಗೇ ಈ ಜೋಡಿಯ `ಚಳಿ ಚಳಿ' ಹಾಡು ಇಂದಿಗೂ ಕನ್ನಡದ ಅದ್ಭುತ ರೋಮ್ಯಾಂಟಿಕ್ ಗೀತೆಯಾಗಿದೆ.

ಕರಾಟೆ ಕಿಂಗ್ ಶಂಕರನಾಗ್ ಮತ್ತು ಭವ್ಯ 1983 ರಲ್ಲಿ ತೆರೆಕಂಡ ಪ್ರಾಣ ಸ್ನೇಹಿತ ಚಿತ್ರದ ಮೂಲಕ ಒಂದಾಗಿತು. ನಂತರ ಭವ್ಯ ಶಂಕರನಾಗ್ ಜೊತೆ ಅಗ್ನಿ ಪರೀಕ್ಷೇ, ಹುಲಿ ಹೆಬ್ಬುಲಿ, ತಾಯಿ, ಜಯ ಭೇರಿ, ಆವೇಶ ಮುಂತಾದ ಚಿತ್ರಗಳಲ್ಲಿ ನಟಿಸಿದರು. ಆದರೆ ಸಾಂಗ್ಲಿಯಾನ ಮತ್ತು ಸಾಂಗ್ಲಿಯಾನ 2 ಚಿತ್ರಗಳಲ್ಲಿನ ಈ ಜೋಡಿ ನಟನೆ ತುಂಬಾ ಪ್ರಸಿದ್ಧಿ ಪಡೆಯಿತು.

ಬಾಲ ನಟಿಯಾಗಿ ಕೆಲ ಚಿತ್ರಗಳಲ್ಲಿ ನಟಿಸಿದ್ದ ಸುಧಾರಾಣಿ, ಆನಂದ್ ಚಿತ್ರದ ಮೂಲಕ ಶಿವರಾಜಕುಮಾರ್ ಜೊತೆ ನಾಯಕಿಯಾಗಿ ಕನ್ನಡ ಚಿತ್ರರಂಗ ಪ್ರವೇಶಿಸಿದರು. ನಂತರ ಮನಮೆಚ್ಚಿದ ಹುಡುಗಿ, ರಣರಂಗ, ಆಸೆಗೊಬ್ಬ ಮೀಸೆಗೊಬ್ಬ, ಮಿಡಿದ ಶೃತಿ ಸೇರಿದಂತೆ ಹಲವು ಚಿತ್ರಗಳಲ್ಲಿ ಈ ಜೋಡಿ ಪ್ರಸಿದ್ದವಾಗಿದೆ. ತಮ್ಮ ಮೊದಲ ಚಿತ್ರದಿಂದಲೇ ಪ್ರಸಿದ್ಧಿ ಪಡೆದ ಈ ಜೋಡಿ ಮುಂದೆ ಹಲವು ಚಿತ್ರಗಳಲ್ಲಿ ತಮ್ಮ ಮ್ಯಾಜಿಕ್ ಮುಂದುವರೆಸಿದವು.

90 ರ ದಶಕದಲ್ಲಿ ಚಾಕಲೇಟ್ ಹೀರೋ ಎಂದೇ ಪ್ರಸಿದ್ಧಿ ಪಡೆದಿದ್ದ ಸುನೀಲ್ ಮತ್ತು ಮಾಲಾಶ್ರೀ ಜೋಡಿ ತುಂಬಾ ಪ್ರಸಿದ್ಧಿಯಾಗಿತ್ತು. ಈ ಜೋಡಿ ಮಾಲಾಶ್ರೀ ಮಾಮಾಶ್ರೀ, ಬೆಳ್ಳಿ ಕಾಲುಂಗುರ, ನಗರದಲ್ಲಿ ನಾಯಕರು, ಬೆಳ್ಳಿ ಕಾಲುಂಗುರ, ಸಿಂಧೂರ ತಿಲಕ, ಮರಣ ಮೃದಂಗ ಮುಂತಾದ ಚಿತ್ರಗಳಲ್ಲಿ ನಟಿಸಿ ಹೆಸರುವಾಸಿಯಾಗಿತ್ತು.

2005 ರಲ್ಲಿ ತೆರೆಕಂಡ ಕಲಾಸಿಪಾಳ್ಯ ಚಿತ್ರದಿಂದ ದರ್ಶನ್- ರಕ್ಷಿತಾ ಜೋಡಿ ಮೊದಲ ಬಾರಿ ತೆರೆ ಮೇಲೆ ಕಾಣಿಸಿಕೊಂಡಿತು. ಮುಂದೆ ಈ ಜೋಡಿ ಅಯ್ಯ, ಸುಂಟರಗಾಳಿ, ಮಂಡ್ಯ ಚಿತ್ರದಲ್ಲಿ ಕಾಣಿಸಿಕೊಂಡಿತು. ಈ ಜೋಡಿ ನಟಿಸಿದ ಎಲ್ಲಾ ಚಿತ್ರಗಳು ಬಾಕ್ಸಾಫೀಸಿನಲ್ಲಿ ಯಶಸ್ವಿಯಾದವು ಮತ್ತು ದರ್ಶನ್-ರಕ್ಷಿತಾ ಕೆಮಿಸ್ಟ್ರಿ ಮನೆಮಾತಾಯಿತು.

ನಾಯಕ-ನಾಯಕಿಯಾಗಿ ನಟಿಸಿದ ಮೊದಲ ಚಿತ್ರ ಮೊಗ್ಗಿನ ಮನಸ್ಸುದಿಂದ ಒಂದಾದ ಯಶ್-ರಾಧಿಕಾ ಜೋಡಿ ಮುಂದೆ ಡ್ರಾಮಾ, ಮಿಸ್ಟರ್ ಆ್ಯಂಡ್ ಮಿಸಸ್ ರಾಮಾಚಾರಿ ಮತ್ತು ಸಂತು ಸ್ಟ್ರೇಟ್ ಫಾರ್ವರ್ಡ್ ಚಿತ್ರಗಳಲ್ಲಿ ನಟಿಸಿತು. ಒಂದರ ನಂತರ ಒಂದು ಯಶಸ್ವಿ ಚಿತ್ರಗಳನ್ನು ನೀಡಿದ ಈ ಜೋಡಿ ಮುಂದೆ ನಿಜ ಜೀವನದಲ್ಲಿ ಕೂಡ ದಂಪತಿಗಳಾದರು.

ಎಸ್ ನಾರಾಯಣ್ ನಿರ್ದೇಶನದ ಚೆಲುವಿನ ಚಿತ್ತಾರ ಚಿತ್ರದ ಮೂಲಕ ಒಂದಾದ ಗಣೇಶ್-ಅಮೂಲ್ಯ ಜೋಡಿ ಮೋಡಿ ಮಾಡಾಯಿತು. ನಂತರ ಶ್ರಾವಣಿ ಸುಬ್ರಹ್ಮಣ್ಯ, ಖುಷಿ-ಖುಷಿಯಾಗಿ ಚಿತ್ರಗಳಲ್ಲಿ ನಾಯಕ-ನಾಯಕಿಯಾಗಿ ನಟಿಸಿದರು. ಹಾಗೇ ಮುಗುಳು ನಗೆ ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ.