ಹೊಸ ಪ್ರೋಮೋದಲ್ಲಿ ಬಿಗ್‌ಬಾಸ್‌ ಕನ್ನಡ ಸೀಸನ್ 11ರ ಸ್ಪರ್ಧಿಗಳ ಫೋಟೋ ಲೀಕ್: ದೊಡ್ಮನೆಗೆ ಹೋಗೋರು ಇವರೇ?

ಪ್ರೋಮೊದಲ್ಲಿ ಲೀಕ್ ಆಗಿರುವ ಫೋಟೋ ಕಂಡು ಸ್ಯಾಂಡಲ್‌ವುಡ್ ನಟಿ ಪ್ರೇಮಾ ಅಂತ ಕೆಲವರು ಊಹಿಸಿದ್ದಾರೆ. ಇನ್ನೂ ಕೆಲವರು ಲಕ್ಷ್ಮೀ ಸೀರಿಯಲ್‌ನ ಕೀರ್ತಿ ಪಾತ್ರಧಾರಿ ತನ್ವಿ ರಾವ್ ಅಂತ ಅಂದಾಜಿಸಿದ್ದಾರೆ. ಪ್ರೇಮಾ ಹಾಗೂ ತನ್ವಿ ರಾವ್ ಈ ಬಾರಿ ಬಿಗ್‌ಬಾಸ್‌ಗೆ ಎಂಟ್ರಿ ಕೊಡಲಿದ್ದಾರೆ ಅಂತ ಆರಂಭದಿಂದಲೂ ಹೇಳಲಾಗುತ್ತಿತ್ತು. ಅದಕ್ಕೆ ಪೂರಕವೆಂಬಂತೆ ಲಕ್ಷ್ಮೀ ಬಾರಮ್ಮ ಸೀರಿಯಲ್‌ನಲ್ಲಿ ಕೀರ್ತಿ ಪಾತ್ರ ಮುಕ್ತಾಯಗೊಂಡಿತ್ತು. 

ಇನ್ನೊಂದು ಫೋಟೋದಲ್ಲಿ ವಜ್ರಕಾಯ ಸಿನಿಮಾ ನಟಿ ನಭಾ ನಟೇಶ್ ಇರಬಹುದಾ? ಅಂತ ಊಹಿಸುತ್ತಿದ್ದಾರೆ. ಇನ್ನು ಸತ್ಯ ಧಾರಾವಾಹಿಲ್ಲಿ ಟಾಮ್ ಬಾಯ್ ಆಗಿ ಕಾಣಿಸಿಕೊಂಡಿದ್ದ ಗೌತಮಿ ಜಾದವ್ ಹೋಲುವ ಫೋಟೋ ಕೂಡ ಇದೆ ಎನ್ನಲಾಗುತ್ತಿದೆ. ಗೌತಮಿ ಜಾದವ್ ಹೆಸರು ಮೊದಲಿನಿಂದಲೂ ಕೇಳಿಬರುತ್ತಿದೆ.

ಕನ್ನಡತಿ ಸೀರಿಯಲ್ ಖ್ಯಾತಿಯ ಕಿರಣ್ ರಾಜ್ ಕೂಡ ಈ ಬಾರಿ ದೊಡ್ಮನೆಗೆ ಎಂಟ್ರಿ ಕೊಡಲಿದ್ದಾರೆ ಎನ್ನಲಾಗುತ್ತಿದೆ. ಇತ್ತೀಚೆಗಷ್ಟೇ ಅವರ ನಟನೆಯ ರಾನಿ ಸಿನಿಮಾ ಬಿಡುಗಡೆಯಾಗಿತ್ತು. ಇವರ ಜೊತೆಗೆ ಒಲವಿನ ನಿಲ್ದಾಣ ಧಾರಾವಾಹಿ ಮೂಲಕ ಕರ್ನಾಟಕದ ಮನೆಮಾತಾಗಿರುವ ಅಕ್ಷಯ್ ನಾಯಕ್ ಕೂಡ ಇದ್ದಾರೆ ಎನ್ನಲಾಗುತ್ತಿದೆ.

ಕನ್ನಡ ಚಿತ್ರರಂಗದ ಜನಪ್ರಿಯ ನಟಿ ಹರಿಪ್ರಿಯಾ ಇತ್ತೀಚೆಗೆ ಯಾವ ಸಿನಿಮಾಗಳಲ್ಲಿ ಅಭಿನಯಿಸುತ್ತಿಲ್ಲ. ಮದುವೆ ಬಳಿಕ ಅವರ ನಟನೆಯ ಯಾವ ಸಿನಿಮಾಗಳು ಬಿಡುಗಡೆಯಾಗಿರಲಿಲ್ಲ. ಅವರ ಸಿನಿಮಾ ಅಪಡೇಟ್ ಕೂಡ ಇರಲಿಲ್ಲ. ಇದೀಗ ಅಚ್ಚರಿ ಎಂಬಂತೆ ಬಿಗ್‌ಬಾಸ್‌ ಸ್ಪರ್ಧಿಗಳ ಪಟ್ಟಿಯಲ್ಲಿ ಅವರ ಹೆಸರು ಕೇಳಿಬರುತ್ತಿದೆ. ಪ್ರೋಮೋದಲ್ಲಿರುವ ಫೋಟೋಗಳಲ್ಲಿ ಒಬ್ಬರು ಹರಿಪ್ರಿಯಾ ಅಂತ ಊಹಿಸಲಾಗಿದೆ.

ಕನ್ನಡ ಚಿತ್ರರಂಗದ ಖ್ಯಾತ ನಿರ್ದೇಶಕ ಎಸ್‌ ನಾರಾಯಣ್ ಪುತ್ರ ಪಂಕಜ್ ಈ ಬಾರಿ ಬಿಗ್‌ಬಾಸ್‌ಗೆ ಎಂಟ್ರಿ ಕೊಡಲಿದ್ದಾರೆ ಅಂತ ಆರಂಭದಿಂದಲೂ ಹೇಳಲಾಗುತ್ತಿತ್ತು. ಪ್ರೋಮೋದಲ್ಲಿ ಅವರ ಫೋಟೋ ಕೂಡ ಇದೆ ಎನ್ನಲಾಗ್ತಿದೆ. ಜೊತೆಗೆ ರೀಲ್ಸ್ ಮೂಲಕ ಸಿಕ್ಕಾಪಟ್ಟೆ ಜನಪ್ರಿಯತೆ ಗಳಿಸಿರುವ ಭೂಮಿಕಾ ಬಸವರಾಜ್ ಕೂಡ ಆ ಫೋಟೋದಲ್ಲಿದ್ದಾರೆ ಅಂತ ಊಹಿಸಲಾಗಿದೆ. ಇವರ ಹೆಸರು ಕೂಡ ಮೊದಲಿನಿಂದ ಕೇಳಿಬರುತ್ತಿತ್ತು.

ದಕ್ಷಿಣ ಭಾರತದ ಖ್ಯಾತ ನಟಿ ಭಾವನಾ ಮೆನನ್ ಕೂಡ ಬಿಗ್‌ಬಾಸ್‌ ಕನ್ನಡ ಸೀಸನ್ 11ರಲ್ಲಿ ಇರಲಿದ್ದಾರೆ ಎನ್ನಲಾಗ್ತಿದೆ. ಪ್ರೋಮೋದಲ್ಲಿ ಲೀಕ್ ಆಗಿರುವ ಫೋಟೋಗೂ ಹಾಗೂ ಇವರಿಗೂ ತುಂಬಾ ಸಾಮ್ಯತೆಯಿದೆ. ಜಾಕಿ ಸಿನಿಮಾ ಮೂಲಕ ಕನ್ನಡಕ್ಕೆ ಕಾಲಿಟ್ಟ ಭಾವನಾ, ಸಾಖಷ್ಟು ಹಿಟ್ ಸಿನಿಮಾಗಳಲ್ಲಿ ಸ್ಟಾರ್ ನಟರೊಂದಿಗೆ ತೆರೆ ಹಂಚಿಕೊಂಡಿದ್ದಾರೆ.