ಡಾ.ರಾಜ್‌ಕುಮಾರ್ ಟು ಸುದೀಪ್: ಬೆಳ್ಳಿತೆರೆ ಮೇಲೆ ದ್ವಿಪಾತ್ರದಲ್ಲಿ ನಟಿಸಿ ಸಿನಿರಸಿಕರ ಮನಗೆದ್ದ ಸ್ಯಾಂಡಲ್‌ವುಡ್ ನಟರಿವರು!

ಕನ್ನಡ ಚಿತ್ರರಂಗದ ಹೀರೋಗಳು ದ್ವಿಪಾತ್ರದಲ್ಲಿ ನಟಿಸುವ ಜಮಾನ ಆರಂಭವಾಗಿದ್ದು ಡಾ.ರಾಜ್‌ಕುಮಾರ್ ಸಿನಿಮಾಗಳಿಂದ. ಅಣ್ಣಾವ್ರು 1967ರಲ್ಲಿ ತೆರೆಗೆ ಬಂದ 'ರಾಜದುರ್ಗ ರಹಸ್ಯ' ಎಂಬ ಸಿನಿಮಾಲಲ್ಲಿ ಡಬಲ್ ರೋಲ್ ಮಾಡಿದ್ದರು. ನರಸಿಂಹ ಮೂರ್ತಿ ಮತ್ತು ದೊರೈ ಭವಾನ್ ಆಕ್ಷನ್ ಕಟ್ ಹೇಳಿದ್ದ ಈ ಚಿತ್ರದಲ್ಲಿ ಮುಗ್ಧ ಹಾಗೂ ಬುದ್ಧಿವಂತನ ಪಾತ್ರ ಮಾಡಿದ್ರು. ಇದಾದ ಬಳಿಕ ನಾನೊಬ್ಬ ಕಳ್ಳ, ಕುಲ ಗೌರವ, ದಾರಿದ ತಪ್ಪಿದ ಮಗ, ಬಬ್ರುವಾಹನ ಚಿತ್ರಗಳಲ್ಲಿ ದ್ವಿಪಾತ್ರ ಮಾಡಿದ್ದು, ಈ ಸಿನಿಮಾಗಳು ಸೂಪರ್ ಹಿಟ್ ಆಗಿದ್ದವು. ಜೊತೆಗೆ 'ಶಂಕರ್ ಗುರು' ಸಿನಿಮಾದಲ್ಲಿ ತ್ರಿಪಾತ್ರದಲ್ಲಿ ನಟಿಸಿದ್ದರು. 

ಡಾ.ರಾಜ್‌ಕುಮಾರ್ ನಂತರ ದ್ವಿಪಾತ್ರ ಹಾಗೂ ತ್ರಿಪಾತ್ರದಲ್ಲಿ ಕಾಣಿಸಿಕೊಂಡ ನಟ ಶಂಕರ್ ನಾಗ್. ೧೯೮೨ರಲ್ಲಿ ಬಿಡುಗಡೆಯಾದ 'ಗೆದ್ದಮಗ' ಸಿನಿಮಾಲ್ಲಿ ಶಂಕರ್ ನಾಗ್, ತ್ರಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆನಂತರ ಮಾನವ ದಾನವ ಹಾಗೂ ಮಹೇಶ್ವರ ಚಿತ್ರಗಳಲ್ಲಿ ದ್ವಿಪಾತ್ರದಲ್ಲಿ ನಟಿಸುವ ಮೂಲಕ ಸಿನಿರಸಿಕರ ಮನಗೆದ್ದಿದ್ದರು. 

ಭಾರತೀಯ ಸಿನಿರಂಗದಲ್ಲೇ ಅತಿಹೆಚ್ಚು ಬಾರಿ ದ್ವಿಪಾತ್ರದಲ್ಲಿ ನಟಿಸಿರುವ ಏಕೈಕ ನಟ ಅಂದರೆ ಸಾಹಸಸಿಂಹ ಡಾ.ವಿಷ್ಣುವರ್ಧನ್. ಇವರು ಮೊದಲ ಬಾರಿಗೆ ಡಬಲ್ ರೋಲ್‌ನಲ್ಲಿ ಕಾಣಿಸಿಕೊಂಡ ಸಿನಿಮಾ 'ಒಂದೇ ರೂಪ, ಎರಡು ಗುಣ'. 1975ರಲ್ಲಿ ಈ ಚಿತ್ರ ರಿಲೀಸ್ ಆಗಿತ್ತು. ಇದಾದ ಬಳಿಕ ವಿಜಯ್ ವಿಕ್ರಮ್, ಕಾಳಿಂಗ, ಶಿವ ಶಂಕರ್, ಲಯನ್ ಜಗಪತಿ ರಾವ್, ಅಪ್ಪಾಜಿ, ಸೂರ್ಯವಂಶ, ಸಿಂಹಾದ್ರಿಯ ಸಿಂಹ, ದಿಗ್ಗಜರು ಹೀಗೆ ಬರೋಬ್ಬರಿ 23 ಸಿನಿಮಾಗಳಲ್ಲಿ ದ್ವಿಪಾತ್ರ ಹಾಗೂ ತ್ರಿಪಾತ್ರ ಮಾಡುವ ಮೂಲಕ ಕನ್ನಡಿಗರ ಹೃದಯ ಗೆದ್ದಿದ್ದಾರೆ.

ಕನ್ನಡ ಸಿನಿಮಾರಂಗದಲ್ಲಿ ರೆಬಲ್ ಸ್ಟಾರ್ ಅಂತ ಕರೆಸಿಕೊಳ್ಳುವ ಅಂಬರೀಶ್ ಕೂಡ ದ್ವಿಪಾತ್ರದಲ್ಲಿ ನಟಿಸಿದ್ದಾರೆ. ಅಂಬರೀಶ್‌ ಮೊದಲ ಬಾರಿ ಡಬಲ್‌ ರೋಲ್‌ನಲ್ಲಿ ನಟಿಸಿದ ಸಿನಿಮಾ ಅಂತ. ಈ ಸಿನಿಮಾ ಅವರಿಗೆ ಸಿಕ್ಕಾಪಟ್ಟೆ ಖ್ಯಾತಿ ತಂದುಕೊಟ್ಟಿತು. ಆ ಬಳಿಕ ಮಂಠ್ಯದ ಗಂಡು, ಶಂಕರ್ ಸುಂದರ್, ಪ್ರೀತಿ ಹೀಗೆ ಕೆಲ ಸಿನಿಮಗಳಲ್ಲಿ ದ್ವಿಪಾತ್ರದಲ್ಲಿ ಮಿಂಚಿದ್ದಾರೆ. 

ಕ್ರೇಜಿ ಸ್ಟಾರ್ ರವಿಚಂದ್ರನ್ ಕೂಡ ದ್ವಿಪಾತ್ರದಲ್ಲಿ ಪ್ರೇಕ್ಷಕರಿಗೆ ಕಿಕ್ ಕೊಟ್ಟಿದ್ದಾರೆ. 1992ರಲ್ಲಿ ತೆರೆಗೆ ಬಂದ 'ಗುರು ಬ್ರಹ್ಮ' ಸಿನಿಮಾದಲ್ಲಿ ರವಿಚಂದ್ರನ್ ಅಣ್ಣ-ತಮ್ಮನ ಪಾತ್ರ ಮಾಡಿದ್ದರು. ಆನಂತರ ಶ್ರೀರಾಮಚಂದ್ರ ಚಿತ್ರದಲ್ಲಿ ದ್ವಿಪಾತ್ರ ಮಾಡಿದ್ದರು. ಅಂದಿನ ಕಾಲಕ್ಕೆ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಇದೇ ಜಾನರ್‌ನಲ್ಲಿ ಬಂದ 'ಚೆಲುವ' ಸಿನಿಮಾದಲ್ಲೂ ಡಬಲ್‌ ರೋಲ್‌ನಲ್ಲಿ ರವಿಮಾಮ ಮೋಡಿ ಮಾಡಿದ್ದರು. 

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ನೂರಕ್ಕೂ ಹೆಚ್ಚು ಕನ್ನಡ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಸದ್ಯ ಪರಭಾಷೆಯಲ್ಲೂ ಮಿಂಚುತ್ತಿದ್ದಾರೆ. ಶಿವಣ್ಣ ದ್ವಿಪಾತ್ರದಲ್ಲಿ ನಟಿಸಿದ ಮೊದಲ ಸಿನಿಮಾ ಮುತ್ತಣ್ಣ. 1994ರಲ್ಲಿ ಬಿಡುಗಡೆಯಾಗಿದ್ದ ಈ ಚಿತ್ರದಲ್ಲಿ ಶಿವಣ್ಣ ಹೀರೋ ಹಾಗೂ ವಿಲನ್ ಆಗಿ ಕಾಣಿಸಿಕೊಂಡಿದ್ದರು. ಇದಾದ ಬಳಿಕ ಗಡಿಬಿಡಿ ಅಳಿಯ ಹಾಗೂ ಗಡಿಬಿಡಿ ಕೃಷ್ಣ ಸಿನಿಮಾಗಳಲ್ಲಿ ಡಬಲ್ ರೋಲ್ ಮಾಡಿದ್ರು. 

ಕನ್ನಡ ಚಿತ್ರರಂಗದಲ್ಲಿ ನಟ ಮಾತ್ರವಲ್ಲದೇ, ನಿರ್ದೇಶಕರಾಗಿಯೂ ಸ್ಟಾರ್‌ಗಿರಿ ಸಂಪಾದನೆ ಮಾಡಿದವರು ರಿಯಲ್ ಸ್ಟಾರ್ ಉಪೇಂದ್ರ. ಇವರು ಮೊದಲ ಬಾರಿ 2002ರಲ್ಲಿ ತೆರೆಗೆ ಬಂದ 'ಸೂಪರ್ ಸ್ಟಾರ್' ಚಿತ್ರದಲ್ಲಿ ದ್ವಿಪಾತ್ರ ಮಾಡಿದ್ದರು. ಇದಾದ ಬಳಿಕ ಹಾಲಿವುಡ್, ಕಠಾರಿವೀರ ಸುರಸುಂದರಾಂಗಿ ಸಿನಿಮಾಗಳಲ್ಲಿ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. 

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕೂಡ ದ್ವಿಪಾತ್ರದಲ್ಲಿ ನಟಿಸಿದ್ದಾರೆ. ೨೦೧೧ರಲ್ಲಿ ಬಿಡುಗಡೆಯಾದ ವಾಲಿ ಸಿನಿಮಾದಲ್ಲಿ ಸುದೀಪ್ ಶಿವ ಹಾಗೂ ದೇವ ಎಂಬ ಅಣ್ಣ-ತಮ್ಮನ ಪಾತ್ರ ಮಾಡಿದ್ದರು. ಇದು ೧೯೯೯ರಲ್ಲಿ ತೆರೆಕಂಡ ತಮಿಳು ಚಿತ್ರದ ರಿಮೇಕ್ ಆಗಿತ್ತು. 

ನಟ ಶರಣ್ ಕೂಡ ಬೆಳ್ಳಿತೆರೆ ಮೇಲೆ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವಿಕ್ಟರಿ ಸಿನಿಮಾದಲ್ಲಿ ಶರಣ್ ಡಬಲ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದು, ಈ ಚಿತ್ರ ಸೂಪರ್ ಹಿಟ್ ಆಗಿತ್ತು. ಇದಾದ ಬಳಿಕ ರಾಜರಾಜೇಂದ್ರ ಹಾಗೂ ಬುಲೆಟ್ ಬಸ್ಯಾ ಚಿತ್ರಗಳಲ್ಲಿ ದ್ವಿಪಾತ್ರದಲ್ಲಿ ಅಭಿನಯಿಸಿ ಜನರ ಮನಗೆದ್ದಿದ್ದಾರೆ.