ವಿಜಯ್ ಟು ಧನಂಜಯ್: ದುನಿಯಾ ಸೂರಿ ಸೃಷ್ಟಿಸಿದ ಪಾತ್ರಗಳ ಮೂಲಕ ಸ್ಟಾರ್ ನಟರಾದ 5 ಕಲಾವಿದರಿವರು!

ಲೂಸ್ ಮಾದ ಯೋಗೇಶ್ ಅವರು ಸೂರಿ ನಿರ್ದೇಶನದ ಸೂಪರ್ ಹಿಟ್ ದುನಿಯಾ ಸಿನಿಮಾದಲ್ಲಿ ಒಂದು ರೀತಿಯ ಸೈಕೋ ಕ್ಯಾರೆಕ್ಟರ್ ಆದ ಲೂಸ್ ಮಾದ ಎಂಬ ಪಾತ್ರ ಮಾಡುವ ಮೂಲಕ ಚಂದನವನ ಪ್ರವೇಶಿಸಿದರು. ಈ ಸಿನಿಮಾದಲ್ಲಿನ ಅವರ ಪಾತ್ರ ಸಿಕ್ಕಾಪಟ್ಟೆ ಫೇಮಸ್ ಆಯಿತು. ಅಲ್ಲಿಯವರೆಗೂ ಯೋಗೇಶ್ ಆಗಿದ್ದ ಇವರು, ದುನಿಯಾ ಬಳಿಕ ಲೂಸ್‌ಮಾದ ಯೋಗಿ ಅಂತಲೇ ಖ್ಯಾತಿ ಪಡೆದರು. ದುನಿಯಾ ಸಕ್ಸಸ್ ನಂತರ ನಂದ ಲವ್ಸ್ ನಂದಿತಾ ಚಿತ್ರದ ಮೂಲಕ ಹಿರೋ ಆದ ಇವರು, ಇಂದು ಪ್ರಮುಖ ನಟರಾಗಿ ಗುರುತಿಸಿಕೊಂಡಿದ್ದಾರೆ.

2004ರಲ್ಲಿ ತೆರೆಕಂಡ ಯೋಗರಾಜ್ ಭಟ್ ನಿರ್ದೇಶನದ ರಂಗ ಎಸ್ಎಸ್ಎಲ್‌ಸಿ ಸಿನಿಮಾದಲ್ಲಿ ಒಂದು ಚಿಕ್ಕ ಪಾತ್ರ ಮಾಡುವ ಮೂಲಕ ಚಂದನವನ ಪ್ರವೇಶಿಸಿದ ವಿಜಯ್, ನಂತರ ಶಿವರಾಜ್‌ಕುಮಾರ್ ನಟನೆಯ ರಿಷಿ, ರಾಕ್ಷಸ ಹಾಗೂ ಇತರೆ ಸಿನಿಮಾಗಳಲ್ಲಿ ಖಳನಾಯಕನಾಗಿ ಕಾಣಿಸಿಕೊಂಡಿದ್ದರು. ಹೀರೋ ಆಗಬೇಕೆಂಬ ಕನಸು ಕಂಡಿದ್ದ ಇವರು, ಚಾನ್ಸ್ ಕೇಳಿಕೊಂಡು ಹೋದಾಗ ಹಲವರು ನೀನು ಹೀರೋ ಮೆಟೀರಿಯಲ್ ಅಲ್ಲ ಅಂತ ಅವಮಾನಿಸಿದ್ದರಂತೆ. ಇಂತಹ ಸಂದರ್ಭದಲ್ಲಿ ಸೂರಿಯವರ ದುನಿಯಾ ಚಿತ್ರದಲ್ಲಿ ನಾಯಕನಾಗಿ ನಟಿಸುವ ಅವಕಾಶ ಸಿಕ್ಕಿತು. ಇದು ಇವರಿಬ್ಬರಿಗೂ ಚೊಚ್ಚಲ ಸಿನಿಮಾವಾಗಿತ್ತು. ಚಿತ್ರದಲ್ಲಿನ ಡೈಲಾಗ್ ಡೆಲವರಿ, ಸ್ಟಂಟ್, ಲವ್‌ಸ್ಟೋರಿ ಅದ್ಭುತ ನಟನೆಯಿಂದ ವಿಜಯ್, ಅಭಿಮಾನಿಗಳ ಮನಸ್ಸಿನಲ್ಲಿ ಖಾಯಂ ಸ್ಥಾನ ಗಿಟ್ಟಿಸಿಕೊಂಡರು. ಚಿತ್ರದ ಬಳಿಕ ವಿಜಯ್ ದುನಿಯಾ ವಿಜಯ್ ಅಂತಲೇ ಜನಪ್ರಿಯತೆ ಗಳಿಸಿದರು. ಇಂದು ಕನ್ನಡ ಮಾತ್ರವಲ್ಲದೇ, ಪರಭಾಷೆಯಲ್ಲೂ ಗುರುತಿಸಿಕೊಂಡಿರುವ ವಿಜಯ್, ಸಕ್ಸಸ್‌ಗೆ ಸೌಂದರ್ಯ ಮುಖ್ಯವಲ್ಲ, ಟ್ಯಾಲೆಂಟ್ & ಹಾರ್ಡ್‌ವರ್ಕ್‌ ಮುಖ್ಯ ಎಂಬುದನ್ನು ನಿರೂಪಿಸಿದ್ದಾರೆ.

ಕಾಕ್ರೋಚ್ ಸುಧಿ ಎಂತಲೇ ಪ್ರಸಿದ್ಧವಾಗಿರುವ ಸುಧಿ ಗೌಡ ಇಂದು ಕನ್ನಡದ ಜನಪ್ರಿಯ ಖಳನಟರಾಗಿ ಗುರುತಿಸಿಕೊಂಡಿದ್ದಾರೆ. ಸುಮಾರು ಹತ್ತಕ್ಕು ಹೆಚ್ಚು ಸಿನಿಮಾಗಳಲ್ಲಿ ಸಣ್ಣ-ಪುಟ್ಟ ಪಾತ್ರಗಳಲ್ಲಿ ನಟಿಸಿದ್ದ ಇವರಿಗೆ ಸಕ್ಸಸ್ ತಂದುಕೊಟ್ಟಿದ್ದು ಟಗರು ಸಿನಿಮಾ. ಸೂರಿಯವರು ಈ ಚಿತ್ರದಲ್ಲಿ ಸುಧಿಯವರಿಗೆ 'ಕಾಕ್ರೋಚ್' ಅಂತ ಹೆಸರಿಟ್ಟು, ಈ ಹೆಸರಿನಿಂದ ನೀನು ಸ್ಟಾರ್ ಆಗ್ತೀಯಾ ಎಂದು ಹೇಳಿದ್ದರಂತೆ. ಅದರಂತೆ ಟಗರು ಚಿತ್ರದಲ್ಲಿನ ಅವರ ಪಾತ್ರ ಸಿಕ್ಕಾಪಟ್ಟೆ ಗಮನ ಸೆಳೆಯುವುದರ ಜೊತೆಗೆ ಸಿಕ್ಕಾಪಟ್ಟೆ ಜನಪ್ರಿಯತೆ ತಂದುಕೊಟ್ಟಿತು. ಆನಂತರ ಸಲಗ, ರಾಬರ್ಟ್, ಯುವರತ್ನದಂತಹ ಸೂಪರ್ ಹಿಟ್ ಸಿನಿಮಾಗಳಲ್ಲಿ ಅಭಿನಯಿಸಿದರು.

ರಾಜಾಹುಲಿ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟ ವಸಿಷ್ಠ ಸಿಂಹ, ಬಳಿಕ ಅನೇಕ ಸಿನಿಮಾಗಳಲ್ಲಿ ನಟಿಸಿದರೂ ಹೆಚ್ಚು ಯಶಸ್ಸು ಸಿಗಲಿಲ್ಲ. ಆನಂತರ ಸೂರಿಯವರ ಟಗರು ಸಿನಿಮಾದಲ್ಲಿ 'ಚಿಟ್ಟೆ' ಎಂಬ ಪಾತ್ರ ಮಾಡಿದರು. ಚಿತ್ರದಲ್ಲಿನ ಧನಂಜಯ್ ಹಾಗೂ ವಸಿಷ್ಠ ಅವರ ಕೆಮಿಸ್ಟ್ರಿ ವರ್ಕೌಟ್ ಆಗಿತ್ತು. ಈ ಸಿನಿಮಾದಲ್ಲಿನ ಅವರ ಪಾತ್ರ ಪ್ರೇಕ್ಷಕರ ಗಮನ ಸೆಳೆದಿತ್ತು. ಇದಾದ ಬಳಿಕ ಕೆಜಿಎಫ್ ಸಿನಿಮಾದಲ್ಲಿ ಅಭಿನಯಿಸಿದ ವಸಿಷ್ಠ, ತಮ್ಮ ಖಡಕ್ ವಾಯ್ಸ್, ಅದ್ಭುತ ನಟನೆಯಿಂದ ಗುರುತಿಸಿಕೊಂಡಿದ್ದಾರೆ.

2013ರಲ್ಲಿ ಬಿಡುಗಡೆಯಾದ ಡೈರೆಕ್ಟರ್ ಸ್ಪೆಷನ್ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದ ಧನಂಜಯ್, ಆನಂತರ ರಾಟೆ, ಜೆಸ್ಸಿ,  ಬದ್ಮಾಶ್ ಮುಂತಾದ ಸಿನಿಮಾಗಳಲ್ಲಿ ನಟಿಸಿದ್ದರು. ಆದರೆ, ಈ ಸಿನಿಮಾಗಳು ಹೇಳಿಕೊಳ್ಳುವಂತಹ ಯಶಸ್ಸು ನೀಡಿರಲಲ್ಲ. 2018ರಲ್ಲಿ ದುನಿಯಾ ಸೂರಿ ನಿರ್ದೇಶನದ & ಹ್ಯಾಟ್ರಿಕ್ ಹೀರೋ ಶಿವಣ್ಣ ಅಭಿನಯದ `ಟಗರು' ಚಿತ್ರದಲ್ಲಿ ಡಾಲಿ ಎಂಬ ಖಳನಾಯಕನ ಪಾತ್ರ ಮಾಡಿದರು. ಈ ಚಿತ್ರದಲ್ಲಿನ ಇವರ ಅಭಿನಯಕ್ಕೆ ಪ್ರೇಕ್ಷಕರು ಸಂಪೂರ್ಣವಾಗಿ ಫಿದಾ ಆದರು. ಈ ಸಿನಿಮಾದಿಂದ ಧನಂಜಯ ಆಗಿದ್ದವರು ಡಾಲಿ ಧನಂಜಯ್ ಆದರು. ಡಾಲಿ ಪಾತ್ರದ ಮೂಲಕ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ ಅವರು, ಸಾಕಷ್ಟು ಹಿಟ್ ಸಿನಿಮಾ ಮಾಡಿದ್ರು.