ನಿಶಬ್ಧ ಟು 777 ಚಾರ್ಲಿ: ಮನುಷ್ಯ-ಪ್ರಾಣಿಗಳ ನಡುವಿನ ಬಾಂಧವ್ಯ ತೋರಿಸುವ ಕನ್ನಡ ಸಿನಿಮಾಗಳಿವು!

ಪಿ ವಾಸು ನಿರ್ದೇಶನದಲ್ಲಿ ಮೂಡಿಬಂದ 'ಜಯಸಿಂಹ' ಸಿನಿಮಾದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್ ನಾಯಕನಾಗಿ ನಟಿಸಿದ್ದರು. ಈ ಚಿತ್ರದಲ್ಲಿ ಕಾಡಿನ ರಕ್ಷಣೆಗೆ ಕಟಿಬದ್ಧನಾಗಿರುವ ಪೊಲೀಸ್ ಅಧಿಕಾರಿ ಜಯಸಿಂಹ (ವಿಷ್ಣುವರ್ಧನ್) ಹಾಗೂ ಕಳ್ಳಸಾಗಾಣಿಕೆದಾರರನ್ನು ಪತ್ತೆಹಚ್ಚಲು ಸಹಾಯ ಮಾಡುವ ಆನೆ (ರಾಮು) ನಡುವಿನ ಅದ್ಭುತವಾದ ಬಾಂಧವ್ಯವನ್ನು ಕಾಣಬಹುದು. ಹಿಂದಿಯ ಹಾಥಿ ಮೇರಿ ಸಾಥಿ ಚಿತ್ರದ ಮುಖ್ಯ ಎಳೆಯನ್ನು ಇಟ್ಟುಕೊಂಡು ಈ ಸಿನಿಮಾ ನಿರ್ಮಾಣ ಮಾಡಲಾಗಿತ್ತು. 

2018ರಲ್ಲಿ ತೆರೆಕಂಡ 'ಒಂದಲ್ಲಾ ಎರಡಲ್ಲಾ' ಸಿನಿಮಾದಲ್ಲಿ ಭಾನು ಎಂಬ ಹಸು ಹಾಗೂ ಸಮೀರ್ ಎಂಬ ತುಂಟ ಬಾಲಕನ ನಿಸ್ವಾರ್ಥ ಹಾಗೂ ಮುಗ್ಧ ಬಾಂಧವ್ಯವನ್ನು ನೋಡಬಹುದು. ಚಿತ್ರದಲ್ಲಿ ಏಳು ವರ್ಷದ ಸಮೀರ್‌ಗೆ ಭಾನು (ಹಸು) ಅಂದರೆ ಪಂಚಪ್ರಾಣ. ಹೀಗಿರುವಾಗ ಒಂದಿನ ಭಾನು ಕಳೆದುಹೋಗ್ತಾಳೆ. ಮುಗ್ಧ ಸಮೀರ್ ಭಾನುವನ್ನು ಹುಡುಕಿಕೊಂಡು ಮನೆಯಲ್ಲಿ ಯಾರಿಗೂ ತಿಳಿಸದೇ ಸಿಟಿಗೆ ಬರುತ್ತಾನೆ. ಈ ಸಂದರ್ಭ ಹಲವು ಸ್ವಾರ್ಥ ಸ್ವಭಾವದ ಜನರನ್ನು ಭೇಟಿಯಾಗುತ್ತಾನೆ. ಕೊನೆಗೆ ತನ್ನ ಮುದ್ದಿನ ಹಸುವನ್ನು ಹೇಗೆ ಮನೆಗೆ ಮರಳಿ ತರುತ್ತಾನೆ ಎಂಬುದೇ ಸಿನಿಮಾ ಕಥೆ. 

ರಕ್ಷಿತ್ ಶೆಟ್ಟಿ ಅಭಿನಯದ 777 ಚಾರ್ಲಿ ಸಿನಿಮಾದಲ್ಲಿ ಮುನುಷ್ಯ ಮತ್ತು ಶ್ವಾನದ ಬಾಂಧವ್ಯವನ್ನು ಅತ್ಯುತ್ತಮವಾಗಿ ತೋರಿಸಲಾಗಿದೆ. ಈ ಸಿನಿಮಾವನ್ನು ಕಿರಣ್ ರಾಜ್ ಕೆ ನಿರ್ದೇಶನ ಮಾಡಿದ್ದು, ಮನುಷ್ಯ ಮತ್ತು ನಾಯಿಯ ಬಾಂಧವ್ಯದ ಭಾವುಕ ಕಥನ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಧರ್ಮ (ರಕ್ಷಿತ್ ಶೆಟ್ಟಿ) ತನ್ನದೇ ಆದ ಕಾರಣಗಳಿಂದಾಗಿ ಸಮಾಜಕ್ಕೆ ವಿಮುಖನಾಗಿ, ಎಲ್ಲರಿಗೂ ಬೇಡವಾಗಿ ಬದುಕುತ್ತಿರುವ ಏಕಾಂಗಿ. ಸಿಂಪಲ್ಲಾಗಿ ಹೇಳಬೇಕೆಂದರೆ ಮನೆ ಮತ್ತು ಫ್ಯಾಕ್ಟರಿ ಅವನ ಬದುಕು. ಆಗ ಅತನ ಬಾಳಿನಲ್ಲಿ ಅಚಾನಕ್ಕಾಗಿ ಮುದ್ದಾದ ನಾಯಿಯೊಂದರ ಪ್ರವೇಶವಾಗುತ್ತದೆ. ಆರಂಭದಲ್ಲಿ ನಾಯಿಯ ಸಾಂಗತ್ಯ ಧರ್ಮನಿಗೆ ಕಿರಕಿರಿ ತಂದರೂ ಒಂದು ಸಂದರ್ಭದಲ್ಲಿ ನಾಯಿಯ ಮೇಲೆ ಧರ್ಮನಿಗೆ ಪ್ರೇಮ ಉಕ್ಕುತ್ತದೆ. ಇದು ಚಿತ್ರದ ಓನ್‌ಲೈನ್ ಕಥೆ. ಈ ಸಿನಿಮಾದ ಪ್ರತಿ ದೃಶ್ಯದಲ್ಲೂ ಆ ಸನ್ನಿವೇಶಕ್ಕೆ ತಕ್ಕಂತೆ ನಾಯಿ, ಭಾವ ಹೊಮ್ಮಿಸುವ ರೀತಿ ಆಶ್ಚರ್ಯ ಹುಟ್ಟಿಸುತ್ತದೆ. 

ಶಿವರಾಜ್ ಕೆ.ಆರ್.ಪೇಟೆ ಮತ್ತು ಸಂಯುಕ್ತಾ ಹೊರನಾಡು ಮುಖ್ಯಪಾತ್ರದಲ್ಲಿ ನಟಿಸಿರುವ `ನಾನು ಮತ್ತು ಗುಂಡ' ಚಿತ್ರದಲ್ಲಿ  ಮುಗ್ದ ನಾಯಿ ಗುಂಡ ಮತ್ತು ಆಟೋ ಚಾಲಕ ಶಂಕ್ರ (ಶಿವರಾಜ್ ಕೆ.ಆರ್.ಪೇಟೆ) ನಡುವಿನ ಬಾಂಧ್ಯವ್ಯವನ್ನು ನೋಡಬಹುದು. ಒಂದು ದಿನ ಶಂಕ್ರ, ತನ್ನ ಅಟೋದಲ್ಲಿ ಒಂದು ನಾಯಿ ಇರುವುದನ್ನು ನೋಡುತ್ತಾನೆ. ಮೊದಮೊದಲು ಅದನ್ನು ದೂರ ಮಾಡಲು ಪ್ರಯತ್ನ ಮಾಡಿದರೂ, ನಂತರ ಅದರ ಜೊತೆ ಒಂದು ಉತ್ತಮ ಬಂಧ ಬೆಳೆಸಿಕೊಳ್ಳುತ್ತಾನೆ. ಶಂಕ್ರ ಮತ್ತು ಅವನ ನಾಯಿ ಗುಂಡನ ಬಾಂಧವ್ಯ ಊರ ತುಂಬ ಪ್ರಸಿದ್ಧಿ ಪಡೆಯುತ್ತದೆ. ಆದರೆ ಶಂಕ್ರನ ಹೆಂಡತಿಗೆ ಇದು ಹಿಡಿಸುವುದಿಲ್ಲ.. ಈ ಮೂವರ ನಡುವೆ ನೆಡೆಯುವ ಚಿತ್ರಣವೇ ಚಿತ್ರದ ಪ್ರಮುಖ ಕಥಾವಸ್ತು. 

ಸ್ಯಾಂಡಲ್‌ವುಡ್‌ ಕ್ವೀನ್ ರಮ್ಯಾ ಮತ್ತು ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಲಕ್ಕಿ ಸಿನಿಮಾದಲ್ಲೂ ನಾಯಿಯ ಪಾತ್ರಕ್ಕೆ ಹೆಚ್ಚು ಒತ್ತು ನೀಡಲಾಗಿದೆ. ಈ ಚಿತ್ರದಲ್ಲಿ ನಾಯಕ-ನಾಯಕಿಗಿಂತ ಜೂಜು ಹೆಸರಿನ ನಾಯಿಗೆ ಹೆಚ್ಚು ಪ್ರಾಶಸ್ತ್ಯ ನೀಡಲಾಗಿತ್ತು. ಚಿತ್ರದಲ್ಲಿ ರಮ್ಯಾ ಜೂಜು ಹೆಸರಿನ ನಾಯಿಯನ್ನು ಸಾಕಿರುತ್ತಾರೆ. ಈ ಮಧ್ಯೆ ಶ್ವಾನವೆಂದರೆ ಭಯಪಡುವ ಯಶ್‌ಗೆ ರಮ್ಯಾ ಮೇಲೆ ಪ್ರೀತಿಯಾಗಿರುತ್ತದೆ. ಆದರೆ, ರಮ್ಯಾ ಒಪ್ಪಿಗೆ ನೀಡಿರುವುದಿಲ್ಲ. ಹೀಗಾಗಿ ಜೂಜುಗೂ ಯಶ್ ಕಂಡರೆ ಆಗುತ್ತಿರುವುದಿಲ್ಲ. ಬಳಿಕ ಯಶ್ ವೇಷ ಬದಲಿಸಿಕೊಂಡು ನಾಯಕಿಯ ಪಕ್ಕದ ಫ್ಲ್ಯಾಟ್‌ಗೆ ಬರುತ್ತಾನೆ. ಆರಂಭದಲ್ಲಿ ಯಶ್ ಪ್ರೀತಿಗೆ ವಿಲನ್ ಆಗಿದ್ದ ಜೂಜು, ಕೊನೆಯಲ್ಲಿ ತಾನೇ ರಮ್ಯಾ ಮತ್ತು ಯಶ್‌ರನ್ನು ಒಂದು ಮಾಡುತ್ತದೆ.  

ದಿನೇಶ್ ಬಾಬು ನಿರ್ದೇಶನದ ನಿಶಬ್ದ ಸಿನಿಮಾದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್, ರೇವತಿ ಪ್ರಮುಖ ನಟಿಸಿದ್ದರು. ನಿಶಬ್ದ ಚಿತ್ರದಲ್ಲಿ ನಾಯಿಗಳನ್ನು ಪ್ರೀತಿಸುವ ಮೇಜರ್ ಪಾತ್ರದಲ್ಲಿ ವಿಷ್ಣುವರ್ಧನ್ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ಶ್ವಾನಗಳ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದು, ಈ ಚಿತ್ರ ಸೂಪರ್ ಹಿಟ್ ಆಗಿತ್ತು. ಇಲ್ಲೂನ ಕೂಡ ಮನುಷ್ಯ ಮತ್ತು ಶ್ವಾನದ ನಿಸ್ವಾರ್ಥ ಪ್ರೀತಿಯನ್ನು ಕಾಣಬಹುದು.