ಅಮೇಜಾನ್ ಪ್ರೈಂನಲ್ಲಿ ಬಿಡುಗಡೆಯಾದ ಈ ಐದು ಹೊಸ ಕನ್ನಡ ಸಿನಿಮಾಗಳನ್ನ ಮಿಸ್ ಮಾಡ್ದೆ ನೋಡಿ!

ಕೆ.ಎಂ.ಚೈತನ್ಯ ನಿರ್ದೇಶನದ 'ಅಬ್ಬಬ್ಬಾ' ಸಿನಿಮಾ ಅಮೇಜಾನ್ ಪ್ರೈಂನಲ್ಲಿ ಲಭ್ಯವಿದೆ. ಆದರೆ, ಈ ಸಿನಿಮಾವನ್ನು ಬಾಡಿಗೆಗೆ ಪಡದು ವೀಕ್ಷಿಸಬಹುದಾಗಿದೆ. ಚಿತ್ರದಲ್ಲಿ ಲಿಖಿತ್ ಶೆಟ್ಟಿ, ಅಮೃತಾ ಅಯ್ಯಂಗಾರ್, ಅನುಷಾ ರೈ, ತಾಂಡವ್ ರಾಮ್, ಅಜಯ್ ರಾಜ್, ಧನರಾಜ್ ಆಚಾರ್, ಶರತ್ ಲೋಹಿತಾಶ್ವ, ಸಿಹಿಕಹಿ ಚಂದ್ರು, ಸುಧಾ ಬೆಳವಾಡಿ, ವಿಜಯ್ ಚೆಂಡೂರು ಮುಂತಾದವರು ನಟಿಸಿದ್ದಾರೆ. ಬಾಯ್ಸ್ ಹಾಸ್ಟೆಲ್‌ನಲ್ಲಿ ಈ ಸಿನಿಮಾದ ಪೂರ್ಣ ಚಿತ್ರಕಥೆ ಸಾಗುತ್ತದೆ. ಒಬ್ಬ ಸ್ಟ್ರಿಕ್ಟ್ ವಾರ್ಡನ್ ಇರುವ ಹಾಸ್ಟೆಲ್ ಒಳಗೆ ಕಾರಣಾಂತರಗಳಿಂದ ಒಂದು ಹುಡುಗಿ ಒಳ ಸೇರುತ್ತಾಳೆ. ಮುಂಜಾವಿನಲ್ಲಿ ಹುಡುಗಿಯನ್ನು ಹೊರಗೆ ಕಳಿಸುವ ಯೋಜನೆ ವಿಫಲವಾಗಿ, ಆ ಹುಡುಗಿ ಅಲ್ಲಿಯೇ ಉಳಿಯಬೇಕಾದ ಪರಿಸ್ಥಿತಿ ಬರುತ್ತದೆ. ಹಾಸ್ಟೆಲ್ ಒಳಗೆ ಬಂದ ಹುಡುಗಿಯನ್ನು ಒಂದು ಗೆಳೆಯರ ಬಳಗ ಯಾರಿಗೂ ಅನುಮಾನ ಬರದ ರೀತಿಯಲ್ಲಿ ಹೇಗೆ ಹೊರಗೆ ಕಳಿಸುತ್ತಾರೆ ಎಂಬುದು ಚಿತ್ರದ ಕಥೆಯಾಗಿದ್ದು, ಪ್ರೇಕ್ಷಕರಿಂದ ಮೆಚ್ಚುಗೆ ಪಡೆದುಕೊಳ್ಳುತ್ತಿದೆ.  

ಶಿವರಾತ್ರಿ ಹಬ್ಬಂದು ಬಿಡುಗಡೆಯಾಗಿದ್ದ ಶ್ರೀನಿಧಿ ಬೆಂಗಳೂರು ನಿರ್ದೇಶನದ ಬ್ಲಿಂಕ್ ಸಿನಿಮಾ ಪ್ರೇಕ್ಷಕರಿಂದ ಮೆಚ್ಚಗೆ ಗಳಿಸಿತ್ತು. ಈ ಚಿತ್ರಕ್ಕೆ ಸಕಾರಾತ್ಮಕ ವಿಮರ್ಶೆಗಳು ಬಂದಿದ್ದವು. ದೀಕ್ಷಿತ್ ಶೆಟ್ಟಿ, ಚೈತ್ರಾ ಆಚಾರ್, ವಜ್ರದೀರ್ ಜೈನ್, ಸುರೇಶ್ ಅನಗಳ್ಳಿ, ಮಂದಾರ ಬಟ್ಟಲಹಳ್ಳಿ, ಗೋಪಾಲಕೃಷ್ಣ ದೇಶಪಾಂಡೆ, ಕಿರಣ್ ನಾಯ್ಕ್, ಯಶಸ್ವಿನಿ ರಾವ್, ಮುರಳಿ ಶೃಂಗೇರಿ ಮುಂತಾದವರು ಅಭಿನಯಿಸಿದ್ದ ಈ ಸಿನಿಮಾಗೆ ಹಲವು ಸೆಲೆಬ್ರಿಟಿಗಳು ಸಾಥ್ ನೀಡಿದ್ದರು. ಸದ್ಯ ಈ ಸಿನಿಮಾ ಪ್ರೈಂ ವೀಡಿಯೊದಲ್ಲಿ ಲಭ್ಯವಿದೆ.  ಆದರೆ, ಭಾರತದಲ್ಲಿ ವೀಕ್ಷಣೆಗೆ ಸಿಗಲ್ಲ. ಯುಎಸ್ ಹಾಗೂ ಯುಕೆ ಪ್ರೈಂ ಚಂದಾದಾರರು ಬಾಡಿಗೆಗೆ ಬ್ಲಿಂಕ್ ಚಿತ್ರ ನೋಡಬಹುದು. ಆದರೆ, ಅಲ್ಲಿ ಸಿನಿಮಾ ಸ್ಟ್ರೀಮಿಂಗ್ ಆಗುತ್ತಿದ್ದಂತೆ ಪೈರಸಿಯಾಗಿದ್ದು, ಟೆಲಿಗ್ರಾಂ ಸೇರಿದಂತೆ ಹಲವೆಡೆ ಲಿಂಕ್ ಸಿಗುತ್ತಿದೆ. ಸಿನಿಮಾ ನೋಡಿ ನಿಮಗೆ ಇಷ್ಟವಾದರೆ ನನಗೆ ಹಣ ಕಳುಹಿಸಿ ಎಂದು ನಿರ್ಮಾಪಕರು ಮನವಿ ಮಾಡಿದ್ದಾರೆ.

ಸಿಂಪಲ್ ಸುನಿ ನಿರ್ದೇಶನದ 'ಅವತಾರ ಪುರುಷ 2' ಕೂಡ ಅಮೇಜಾನ್ ಪ್ರೈಂನಲ್ಲಿ ಬಿಡುಗಡೆಯಾಗಿದೆ. ಚಿತ್ರದಲ್ಲಿ ಶರಣ್ ನಾಯಕ ನಟನಾಗಿ ಅಭಿನಯಿಸಿದ್ದರೆ, ಶ್ರೀನಗರ ಕಿಟ್ಟಿ ಖಳನಾಯಕನಾಗಿ ಹಾಗೂ ಆಶಿಕಾ ರಂಗನಾಥ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಇನ್ನುಳಿದಂತೆ ಡೈಲಾಗ್ ಕಿಂಗ್ ಸಾಯಿಕುಮಾರ್, ಭವ್ಯ, ಬಾಲಾಜಿ ಮನೋಹರ್, ಸುಧಾರಾಣಿ, ಸಾಧು ಕೋಕಿಲ ಸೇರಿದಂತೆ ಇನ್ನೂ ಮುಂತಾದ ಪ್ರತಿಭಾವಂತ ಕಲಾವಿದರಿದ್ದಾರೆ. ಈ ಸಿನಿಮಾದ ಪ್ರಿಕ್ವೇಲ್‌ಗೆ ಮಿಶ್ರ ಪ್ರತಿಕ್ರಿಯೆ ಸಿಕ್ಕಿತ್ತು. ಆದರೆ, ಸೀಕ್ವೆಲ್‌ ಅಷ್ಟಾಗಿ ರೆಸ್ಪಾನ್ಸ್ ಸಿಕ್ಕಿರಲಿಲ್ಲ. ಇದೀಗ ಪ್ರೈಂ ವಿಡಿಯೋದಲ್ಲಿ ವೀಕ್ಷಿಸಬಹುದಾಗಿದೆ. 

ಒಂದೂವರೆ ವರ್ಷದ ಹಿಂದೆ ಬಿಡುಗಡೆಯಾಗಿದ್ದ 'ಧರಣಿ ಮಂಡಲ ಮಧ್ಯದೊಳಗೆ' ಇದೀಗ ಅಮೇಜಾನ್ ಪ್ರೈಂನಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ. ಆದರೆ, ಭಾರತದಲ್ಲಿ ವೀಕ್ಷಣೆಗೆ ಸಿಗಲ್ಲ. ಯುಎಸ್ ಹಾಗೂ ಯುಕೆ ಪ್ರೈಂ ಚಂದಾದಾರರು ಬಾಡಿಗೆಗೆ ಪಡೆದು ಸಿನಿಮಾ ನೋಡುವ ಅವಕಾಶವಿದೆ. ಶ್ರೀಧರ್ ಷಣ್ಮುಖ ನಿರ್ದೇಶನದ ಈ ಚಿತ್ರದಲ್ಲಿ ಐಶಾನಿ ಶೆಟ್ಟಿ, ನವೀನ್ ಶಂಕರ್ ಸೇರಿದಂತೆ ಹಲವರು ನಟಿಸಿದ್ದರು. 

ಲವ ಕಗ್ಗೇರೆ ನಿರ್ದೇಶನದ 'ಮಿ ನಟ್ವರ್ ಲಾಲ್' ಸಿನಿಮಾ ಕೂಡ ಪ್ರೈಂ ವಿಡಿಯೋದಲ್ಲಿ ಬಾಡಿಗೆಗೆ ಸಿಗುತ್ತಿದೆ. ಚಿತ್ರದಲ್ಲಿ ತನುಷ್ ಶಿವಣ್ಣ ನಾಯಕನಾಗಿ ಸೋನಲ್ ಮೊಂಥೆರೋ ನಾಯಕಿಯಾಗಿ ಅಭಿನಯಿಸಿದ್ದಾರೆ. ಉಳಿದಂತೆ ನಾಗಭೂಷಣ್ ಎನ್‌.ಎಸ್, ರಾಜೇಶ್ ನಟರಂಗ, ಯಶ್ ಶೆಟ್ಟಿ, ಕಾಕ್ರೋಶ್ ಸುಧೀರ್, ಹರಿಣಿ, ವಿಜಯ್ ಚೆಂಡೂರ್, ಕಾಂತರಾಜ್ ಕಡ್ಡಿಪುಡಿ ಮುಂತಾದವರು ತಾರಾಗಣದಲ್ಲಿದ್ದಾರೆ.