ಬರ್ತ್​​ಡೇಗೂ 2 ದಿನ ಮೊದಲೇ ಕೊನೆಯುಸಿರೆಳೆದ ಖ್ಯಾತ ಕಂಟೆಂಟ್‌ ಕ್ರಿಯೇಟರ್‌

ಹೌದು, ಮಿಶಾ ಅಗರ್ವಾಲ್ ತಮ್ಮ 25ನೇ ಜನ್ಮದಿನವನ್ನು ಆಚರಿಸಿಕೊಳ್ಳುವ ಎರಡು ದಿನದ ಮೊದಲು ಇಹಲೋಕ ತ್ಯಜಿಸಿದ್ದಾರೆ. ಮಿಶಾ ಅಗರ್ವಾಲ್ ಅವರ ಅಕಾಲಿಕ ನಿಧನಕ್ಕೆ ಕಾರಣ ಇನ್ನೂ ಗೊತ್ತಾಗದಿದ್ದರೂ ಮೊನ್ನೆ ಶುಕ್ರವಾರ ರಾತ್ರಿ ಮಿಶಾ ಅವರ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಮಿಶಾ ಅಗಲಿಕೆಯ ಸುದ್ದಿಯನ್ನು ಹಂಚಿಕೊಳ್ಳಲಾಗಿದೆ.

ಮಿಶಾ ಅಗರ್ವಾಲ್ ಅವರ ನಿಧನದ ಸುದ್ದಿಯನ್ನು ನಾವು ಭಾರವಾದ ಹೃದಯದಿಂದ ಹಂಚಿಕೊಳ್ಳುತ್ತಿದ್ದೇವೆ, ನೀವು ಅವರಿಗೆ ಮತ್ತು ಅವರ ಕೆಲಸಕ್ಕೆ ತೋರಿಸಿದ ಪ್ರೀತಿ ಮತ್ತು ಬೆಂಬಲಕ್ಕೆ ಧನ್ಯವಾದಗಳು ಎಂದು ಹೇಳಿರುವ ಅವರ ಕುಟುಂಬಸ್ಥರು ಈ ಅಪಾರವಾದ ನಷ್ಟವನ್ನು ನಿಭಾಯಿಸಲು ನಾವು ಪ್ರಯತ್ನಿಸುತ್ತಿದ್ದೇವೆ ಎಂದು ಹೇಳಿದ್ದಾರೆ. ಅವಳನ್ನು ನಿಮ್ಮ ಮನದಲ್ಲಿ ನಿಮ್ಮ ಯೋಚನೆಯಲ್ಲಿ ಜೀವಂತವಾಗಿಡಿ ಎಂದು ಹೇಳಿದ್ದಾರೆ.

ಮಿ‍ಶಾ ಅವರ ಈ ಹಠಾತ್ ನಿಧನದ ಸುದ್ದಿ ಕೇಳಿ ಇವರ ಫಾಲೋವರ್ಸ್‌ಗಳು, ಅಭಿಮಾನಿಗಳು ಸದ್ಯ ಶಾಕ್ ಆಗಿದ್ದಾರೆ. ತಮ್ಮ ಮನದ ನೋವನ್ನು ಹಂಚಿಕೊಳ್ಳುತ್ತಿದ್ದಾರೆ. ಆಕೆಯ ತಮಾಷೆಯ ವಿಡಿಯೋಗಳು ನಮ್ಮಲ್ಲಿ ನಗು ಮೂಡಿಸುತ್ತಿದ್ದವು ಎಂದು ಅನೇಕರು ಕಾಮೆಂಟ್‌ಗಳನ್ನು ಮಾಡಿದ್ದಾರೆ. ಇದು ಸುಳ್ಳು ಸುದ್ದಿ ಎನ್ನುತ್ತಿದ್ದಾರೆ.

ಫಾಲೋವರ್ಸ್‌ಗಳ ಈ ಕಾಮೆಂಟ್ ಅವರ ನೋವು ನೋಡಿ ಉತ್ತರವನ್ನು ಕೂಡ ನೀಡಿರುವ ಮಿಶಾ ಅವರ ಸಹೋದರಿ ಮುಕ್ತಾ ಅಗರ್ವಾಲ್, ಈ ಸುದ್ದಿಯನ್ನು ನಿಮ್ಮ ಜೊತೆ ಹಂಚಿಕೊಳ್ಳಲೇಬೇಕಿತ್ತು ಅದಕ್ಕೆ ನೀವು ಅರ್ಹರು ಕೂಡ ಹೀಗಾಗಿ ಸುದ್ದಿಯನ್ನು ನಿಮಗೆ ತಲುಪಿಸಿದ್ದೇವೆ ಎಂದು ಹೇಳಿದ್ದಾರೆ.

ಅಂದ್ಹಾಗೇ ಮಿಶಾ ಅಗರ್ವಾಲ್ ಹಾಸ್ಯ ವಿಡಿಯೋಗಳನ್ನು ಹಂಚಿಕೊಳ್ಳುತ್ತಿದ್ದರು. ಎಲ್ಲರನ್ನು ನಗಿಸುತ್ತಿದ್ದರು. ಇನ್‌ಸ್ಟಾಗ್ರಾಮ್‌ನಲ್ಲಿ ಮೂರುವರೆ ಲಕ್ಷ ಫಾಲೋವರ್ಸ್‌ಗಳನ್ನು ಮಿಶಾ ಅಗರ್ವಾಲ್ ಹೊಂದಿದ್ದರು. ಇನ್ನುGRWM { ಗೆಟ್ ರೆಡಿ ವಿತ್ ಮಿ } ಎಂದು ವಿಡಿಯೋಗಳನ್ನು ಕೂಡ ಮಿಶಾ ಶೇರ್ ಮಾಡುತ್ತಿದ್ದರು.