Happy Birthday: ನಟಿ ಸಂಜನಾ ಆನಂದ್ ನಟನೆಯ ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಸಂಜನಾ ಆನಂದ್ ನಾಯಕಿಯಾಗಿ ನಟಿಸಿದ ಮೊದಲ ಸಿನಿಮಾ ಕೆಮಿಸ್ಟ್ರಿ ಆಫ್ ಕರಿಯಪ್ಪ. ಇದೊಂದು ಹಾಸ್ಯಪ್ರಧಾನ ಚಿತ್ರವಾಗಿದ್ದು, ಕುಮಾರ್ ನಿರ್ದೇಶನ ಮಾಡಿದ್ದರು. ಈ ಚಿತ್ರದಲ್ಲಿ ಅಪ್ಪ-ಅಮ್ಮ, ಮಗ-ಸೊಸೆ ನಡುವೆ ನಡೆಯುವ ಕಾಮಿಡಿ ಪ್ರೇಕ್ಷಕರನ್ನು ನಕ್ಕು ನಗಿಸುತ್ತದೆ. ಸಿನಿಮಾದಲ್ಲಿ ಸಂಜನಾ ಹಳ್ಳಿ ಹುಡುಗಿ. ಈಕೆ ಮದುವೆಯಾದ ನಂತರ ಗಂಡನ ಮೇಲೆ ಅನುಮಾನ ಪಡುತ್ತಿರುತ್ತಾಳೆ. ಕೊನೆಗೆ ಮಾವ ಅದನ್ನು ಸರಿಪಡಿಸಬೇಕಾಗುತ್ತದೆ. ಸಂಸಾರದಲ್ಲಿ ಅನೇಕ ಸಮಸ್ಯೆಗಳು ಬರುತ್ತವೆ. ಅದನ್ನು ಸರಿಪಡಿಸಿಕೊಳ್ಳುತ್ತಾ ಮುಂದೆ ಸಾಗಬೇಕು. ಒಬ್ಬ ವ್ಯಕ್ತಿ ಸಂಸಾರ ಉಳಿಸಿಕೊಳ್ಳಲು ಏನೆಲ್ಲಾ ಸರ್ಕಸ್ ಮಾಡುತ್ತಾನೆಂಬುದೇ ಚಿತ್ರದ ಪ್ರಮುಖ ಅಂಶ. ಕೆಮಿಸ್ಟ್ರಿ ಆಫ್ ಕರಿಯಪ್ಪ ಚಿತ್ರದಲ್ಲಿ ಚಂದನ್ ಆಚಾರ್, ತಬಲಾ ನಾಣಿ, ಸುಚೇಂದ್ರ ಪ್ರಸಾದ್ ಮುಂತಾದವರು ನಟಿಸಿದ್ದಾರೆ.  

ನಾಗರಾಜ್ ಹಿರಿಯೂರು ನಿರ್ದೇಶನದಲ್ಲಿ ಮೂಡಿಬಂದ `ಮಳೆ ಬಿಲ್ಲು' ಸಂಜನಾ ಆನಂದ್ ಅವರ ಎರಡನೇ ಸಿನಿಮಾ. ಇದರಲ್ಲಿ ಶರತ್ ಎಂಬುವವರು ನಾಯಕನಾಗಿ ನಟಿಸಿದ್ದು, ಸಂಜನಾ ಆನಂದ್ ಮತ್ತು ನಯನಾ ಚವ್ಹಾಣ್ ನಾಯಕಿಯರಾಗಿ ನಟಿಸಿದ್ದರು. ಇದ್ದೊಂದು ಲವ್ ಸ್ಟೋರಿ ಸಿನಿಮಾವಾಗಿದ್ದು, ಸಂಜನಾ ಆನಂದ್ ಬಜಾರಿ ಹುಡುಗಿಯ ಪಾತ್ರವನ್ನು ನಿರ್ವಹಿಸಿದ್ದರು.  

ಯೋಗಾನಂದ ಮುದ್ದಾನ್ ನಿರ್ದೇಶನದಲ್ಲಿ ಮೂಡಿಬಂದ `ಕುಷ್ಕ' ಚಿತ್ರದಲ್ಲಿ ಚಂದನ್ ಗೌಡ ಮತ್ತು ಸಂಜನಾ ಆನಂದ್ ಮುಖ್ಯಪಾತ್ರ ನಿರ್ವಹಿಸಿದ್ದರು. ಬೇಗನೇ ಶ್ರೀಮಂತರಾಗಲು ಸಂಚು ರೂಪಿಸುವ ಸಸ್ಪೆಂಡ್ ಆದ ಪೊಲೀಸ್ ಮತ್ತು ಮೆಕಾನಿಕ್. ಒಂದು ಅಮೂಲ್ಯ ರತ್ನದ ಶೋಧನೆಯಲ್ಲಿರುವ ಡ್ರಗ್ಸ್ ಡೀಲರ್ ಮತ್ತು ಗ್ಯಾಂಗಸ್ಟರ್ ಗುಂಪುಗಳು. ಕಷ್ಟಗಳ ಮಧ್ಯದಲ್ಲಿರುವ ತನ್ನ ಪ್ರಿಯತಮನನ್ನು ಬೆಂಬತ್ತುವ ಪ್ರೇಯಸಿ. ಹೀಗೆ ಎಲ್ಲರ ಜೀವನ ಒಂದು ಹಂತದಲ್ಲಿ ಘರ್ಷಣೆ ಒಳಗಾದಾಗ ಸಿಗುವ ಮಿಶ್ರಣವೇ ಕುಷ್ಕ ಚಿತ್ರ. ಈ ಸಿನಿಮಾದಲ್ಲಿ ಡೈಮಂಡ್ ಬಿಸಿನೆಸ್ ಸುತ್ತುವ ಕಥೆಯನ್ನು ಕಾಮಿಡಿಯಾಗಿ ತೋರಿಸಲಾಗಿತ್ತು. 

ದುನಿಯಾ ವಿಜಯ್ ನಿರ್ದೇಶಿಸಿ, ನಟಿಸಿರುವ ಸಿನಿಮಾದಲ್ಲಿ ಸಂಜನಾ ಆನಂದ್ ನಾಯಕಿಯಾಗಿ ನಟಿಸಿದ್ದರು. ಇದೊಂದು ಭೂಗತಲೋಕದ ಸಾಹಸಪ್ರಧಾನ ಕಥೆಯುಳ್ಳ ಸಿನಿಮಾವಾಗಿತ್ತು. 'ಸಲಗ' ಹೆಸರಿನ ರೌಡಿಯೊಬ್ಬ ತನ್ನ ಎದುರಾಳಿಗಳನ್ನು ಒಬ್ಬೊಬ್ಬರನ್ನಾಗಿ ಕೊಲ್ಲಲು ಹೊರಟಿದ್ದಾನೆ. ಅವನಿಗೆ ಅವನಂಥೆಯೇ ಖಡಕ್ ಆಗಿರುವ ಪೊಲೀಸ್ ಅಧಿಕಾರಿಯೊಬ್ಬ ಎದುರಾಗುತ್ತಾನೆ. ಈ ರೌಡಿ-ಪೊಲೀಸ್ ಆಟದಲ್ಲಿ ಜಯ ಯಾರಿಗೆ? ಎದುರಾಳಿಗಳನ್ನು ಕೊಲ್ಲಲು ಸಲಗನಿಗೆ ಇರುವ ಕಾರಣಗಳೇನು? 'ಸಲಗ' ಯಶಸ್ವಿಯಾಗುತ್ತಾನಾ? ಸಲಗನನ್ನು ಪೊಲೀಸ್ ಅಧಿಕಾರಿ ತಡೆಯುತ್ತಾನಾ? ಇದು ಸಲಗ ಚಿತ್ರ ಒನಲೈನ್ ಸ್ಟೋರಿ. ಈ ಸಿನಿಮಾ ನಟಿ ಸಂಜನಾ ಆನಂದ್ ಅವರಿಗೆ ಬಿಗ್ ಬ್ರೇಕ್ ನೀಡಿತು. 

ಜಾಕಿ ನಿರ್ದೇಶನದ 'ಶೋಕಿವಾಲ' ಸಿನಿಮಾದಲ್ಲಿ ಸಂಜನಾ ಆನಂದ್ ನಾಯಕಿ ಮತ್ತು ಅಜಯ್ ರಾವ್ ನಾಯಕನಾಗಿ ನಟಿಸಿದ್ದರು. ಇದೊಂದು ಪ್ರೇಮಕಥೆಯುಳ್ಳ ಚಿತ್ರವಾಗಿದ್ದು, ಮಂಡ್ಯದ ಹಳ್ಳಿಯೊಂದರಲ್ಲಿ ನಡೆಯುತ್ತದೆ. ಊರ ಗೌಡರ ಮಗಳಿಗೆ (ರಾಧಾ) ಶೋಕಿವಾಲಾ (ಕೃಷ್ಣ ) ಕಾಳು ಹಾಕುತ್ತಾನೆ. ನಾಯಕನ ಮಾತಿಗೆ ಮರುಳಾದ ರಾಧಾ ಕೂಡ ಆತನೊಂದಿಗೆ ಪ್ರೀತಿಯಲ್ಲಿ ಬೀಳುತ್ತಾನೆ. ಆದರೆ, ಇವರಿಬ್ಬರ ಪ್ರೀತಿಗೆ ರಾಧಾಳ ತಂದೆ ವಿಲನ್ ಆಗಿರುತ್ತಾನೆ. ಬಳಿಕ ರಾಧಾ-ಕೃಷ್ಣ ಮತ್ತು ಅವರ ಕುಟುಂಬದ ನಡುವೆ ನಡೆಯುವ ಗಲಾಟೆ, ಪೊಲೀಸ್ ಸ್ಟೇಷನ್ ನಲ್ಲಿ ಹೈಡ್ರಾಮಾವನ್ನು ಸಿನಿಮಾದಲ್ಲಿ ತೋರಿಸಲಾಗಿದೆ.  

ಶೀತಲ್ ಶೆಟ್ಟಿ ರಚಿಸಿ, ನಿರ್ದೇಶನ ಮಾಡಿರುವ ವಿಂಡೋ ಸೀಟ್ ಚಿತ್ರದಲ್ಲಿ ನಿರೂಪ್ ಭಂಡಾರಿ ನಾಯಕನಾಗಿ ಮತ್ತು ಅಮೃತಾ ಅಯ್ಯಂಗಾರ್, ಸಂಜನಾ ಆನಂದ್ ನಾಯಕಿಯರಾಗಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ರೋಮ್ಯಾಂಟಿಕ್ ರಘುಗೆ (ನಿರೂಪ್) ಒಂದು ನಿರ್ದಿಷ್ಟ ಕಾರಣಕ್ಕಾಗಿ ತಾನು ಓಡಾಡುವ ರೈಲಿನಲ್ಲಿ ವಿಂಡೋ ಸೀಟಿನಲ್ಲಿ ಕುಳಿತುಕೊಳ್ಳುವುದು ಅಂದರೆ ಇಷ್ಟ. ಈ ವಿಂಡೋ ಸೀಟ್ ನ ಪ್ರಯಾಣ ರಘು ಬಾಳಿನಲ್ಲಿ ಪ್ರೀತಿ ಮತ್ತು ನೋವು ತಂದು ಅವನನ್ನು ಭಯಂಕರ ರಹಸ್ಯಗಳತ್ತ ಕರೆದೊಯ್ಯುತ್ತದೆ.