ಹ್ಯಾಪಿ ಬರ್ತಡೇ: ಶರಣ್ ನಟನೆಯ ನೀವು ನೋಡಲೇಬೇಕಾದ ಕಾಮಿಡಿ ಸಿನಿಮಾಗಳಿವು!

ನಟ ನಾಯಕನಟನಾಗಿ ಬಣ್ಣ ಹಚ್ಚಿದ ಮೊದಲ ಸಿನಿಮಾ ರ‍್ಯಾಂಬೋ. ಇದು ಶರಣ್ ನಟನೆಯ ನೂರನೇ ಚಿತ್ರ. ಶರಣ್, ತಬಲಾ ನಾಣಿ ಮತ್ತು ಉಮಾಶ್ರೀ ಜುಗಲ್ ಬುಂದಿಯಿಂದ ಕೂಡಿದ ಈ ಚಿತ್ರ 2012ರ ಟಾಪ್ 5 ಚಿತ್ರಗಳಲ್ಲಿ ಒಂದಾಗಿತ್ತು. ಎಂ.ಎಸ್. ನಿರ್ದೇಶನದ ರ‍್ಯಾಂಬೋ ಸಿನಿಮಾ ಬಾಕ್ಸಾಫೀಸ್ ನಲ್ಲಿ ಸೂಪರ್ ಹಿಟ್ ಆಗಿತ್ತು. ನಾಯಕನಟನಾಗಿ ನಟಿಸಿದ ಮೊದಲ ಸಿನಿಮಾದಲ್ಲೇ ಶರಣ್ ಸಕ್ಸಸ್ ಕಂಡಿದ್ದರು.  

ಶರಣ್ ಅವರಿಗೆ ನಾಯಕನಾಗಿ ಇನ್ನಷ್ಟು ಭದ್ರ ಬುನಾದಿ ಹಾಕಿಕೊಟ್ಟ ಸಿನಿಮಾ ಅಂದರೆ ವಿಕ್ಟರಿ. ನಂದಕಿಶೋರ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಈ ಚಿತ್ರದಲ್ಲಿ ಶರಣ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಬಿಡುಗಡೆಗೂ ಮುನ್ನವೇ ಈ ಚಿತ್ರದ ಸ್ಯಾಟಲೈಟ್ ಹಕ್ಕು 2.5 ಕೋಟಿಗೆ ಮಾರಾಟವಾಗಿ ಚಿತ್ರದ ಸಂಪೂರ್ಣ ನಿರ್ಮಾಣ ವೆಚ್ಚವನ್ನು ಗಳಿಸಿಕೊಂಡಿತು. ಹಾಗೇ ತೆರೆಕಂಡ ಮೊದಲ ವಾರದಲ್ಲಿ ಸುಮಾರು 6 ಕೋಟಿಗೂ ಅಧಿಕ ಗಳಿಸಿ ಬ್ಲಾಕ್ ಬಸ್ಟರ್ ಹಿಟ್ ಆಯಿತು. ಈ ಸಿನಿಮಾದ 'ಖಾಲಿ ಕ್ವಾಟರ್ ಬಾಟ್ಲಿ ಹಂಗೆ ಲೈಫು' ಹಾಡು ಸಖತ್ ಹಿಟ್ ಆಗಿತ್ತು.  

ತಮಿಳು ಚಿತ್ರದ ರಿಮೇಕ್ ಆದ ಅಧ್ಯಕ್ಷ ಚಿತ್ರದಲ್ಲಿ ಮತ್ತೊಮ್ಮೆ ಶರಣ್-ನಂದಕಿಶೋರ್ ಜೋಡಿ ಮೋಡಿ ಮಾಡಿತು. ಚಿಕ್ಕಣ್ಣ, ರವಿಶಂಕರ್, ಮಾಳವಿಕಾ ಅವಿನಾಶ್, ರಮೇಶ್ ಭಟ್ ಮೊದಲಾದವರ ತಾರ ಬಳಗವೇ ಚಿತ್ರದಲ್ಲಿತ್ತು. ಈ ಚಿತ್ರ ಅಧ್ಯಕ್ಷ ಮತ್ತು ಉಪಾಧ್ಯಕ್ಷರ ಮೂಲಕ ಹಾಸ್ಯದ ಕಚಗುಳಿ ಇಟ್ಟಿತು. ರವಿಶಂಕರ್ ಮತ್ತು ಶರಣ್ ನಡುವೆ ನಡಯುವ ಮುಸುಕು ಯುದ್ಧ ಚಿತ್ರದ ಜೀವಾಳ. ಅಧ್ಯಕ್ಷ ಸಿನಿಮಾದಲ್ಲಿ ಶರಣ್ ಕಾಮಿಡಿ ಜೊತೆಗೆ ರವಿಶಂಕರ್, ಚಿಕ್ಕಣ್ಣ ಅವರ ಕಾಮಿಡಿಗೆ ಪ್ರೇಕ್ಷಕರು ಬಿದ್ದು ಬಿದ್ದು ನಗುತ್ತಾರೆ. ಒಟ್ಟಾರೆಯಾಗಿ ಇಂದೊಂದು ಅಪ್ಪಟ ಮನೋರಂಜನಾತ್ಮಕ ಸಿನಿಮಾವಾಗಿದ್ದು, ಎಷ್ಟು ಬಾರಿ ನೋಡಿದ್ರು ನಿಮಗೆ ಬೇಸರವಾಗುವುದಿಲ್ಲ.  

ರ‍್ಯಾಂಬೊ 2 ನಂತರ ಮತ್ತೊಮ್ಮೆ ಶರಣ್ ಮತ್ತು ಅಟ್ಲಾಂಟ ನಾಗೇಂದ್ರ ಒಂದಾಗ ರ‍್ಯಾಂಬೊ 2 ಚಿತ್ರವನ್ನು ನಿರ್ಮಿಸಿದರು. ಅನಿಲ್ ಕುಮಾರ್ ಕಥೆ ಬರೆದು ನಿರ್ದೇಶಿಸಿದ್ದ ಈ ಚಿತ್ರದಲ್ಲಿ ಶರಣ್ ಗೆ ಜೋಡಿಯಾಗಿ ಆಶಿಕಾ ರಂಗನಾಥ್ ಅದ್ಭುತ ಅಭಿನಯ ನೀಡಿದರು. ಈ ಚಿತ್ರದ 'ಚುಟು ಚುಟು' ಹಾಡು ಯೂಟ್ಯೂಬ್ ನಲ್ಲಿ ಹಲವು ದಾಖಲೆ ಮಾಡಿತ್ತು. ಚಿಕ್ಕ ವಯಸ್ಸಿನಿಂದ ಕೃಷ್ಣ (ಶರಣ್) ಗಣೇಶನ ಭಕ್ತ. ಗಣೇಶನ ಭಕ್ತನಾದರೂ ಈತ ಈ ಯುಗದ ಕೃಷ್ಣ. ಜೀವನದಲ್ಲಿ 'ವೆರೈಟಿ' ಬೇಕು ಅಂತ ಎಲ್ಲ ವಿಷಯದಲ್ಲಿಯೂ ಹುಡುಕುತಿರುತ್ತಾನೆ. ಅದೇ ರೀತಿ 'ವೆರೈಟಿ' ಗಾಗಿ ಲವ್ ಮಾಡುವ ಹುಡುಗಿಯರನ್ನು ಬದಲಿಸುತ್ತಿರುತ್ತಾನೆ. ಇತ್ತ ಮಯೂರಿ ಕೂಡ ಫ್ರೆಂಡ್ ಶಿಪ್ ಹೆಸರಿನಲ್ಲಿ ಹುಡುಗರ ಎಟಿಎಂ ಅನ್ನು ಅವರಿಗಿಂತ ಹೆಚ್ಚು ಬಳಸುವ ಚಾಲಾಕಿ ಆಗಿರುತ್ತಾಳೆ. ಇಂತಹ ಜೋಡಿ ಒಟ್ಟಿಗೆ ಸೇರಿದರೆ ಎನ್ನೆಲ್ಲಾ ಆಗುತ್ತದೆ ಎನ್ನುವುದು ಚಿತ್ರದ ಕಥೆ.

ಯೋಗಾನಂದ ಮುದ್ದಾನ್ ನಿರ್ದೇಶಿಸಿರುವ `ಅಧ್ಯಕ್ಷ ಇನ್ ಅಮೇರಿಕಾ' ಚಿತ್ರದಲ್ಲಿ ಶರಣ್ ಹಾಗೂ ರಾಗಿಣಿ ದ್ವಿವೇದಿ ನಾಯಕ-ನಾಯಕಿಯಾಗಿ ಅಭಿನಯಿಸಿದ್ದಾರೆ. ಈ ಸಿನಿಮಾವನ್ನು ಅಮೇರಿಕಾದಲ್ಲಿ ಸುಮಾರು 40 ದಿನಗಳಿಗೂ ಹೆಚ್ಚು ದಿನ ಚಿತ್ರೀಕರಿಸಲಾಗಿತ್ತು. ಈ  ಚಿತ್ರದಲ್ಲಿ ನಾಯಕ ಹಣಕ್ಕಾಗಿ  ಜನರಿಗೆ ಚಿಕ್ಕಪುಟ್ಟ ಮೋಸಗಳನ್ನು ಮಾಡುತ್ತಾ ಬದುಕುತ್ತಿರುತ್ತಾನೆ. ಹಣಕ್ಕಾಗಿ ಏನು ಮಾಡಲು ರೆಡಿಯುರುವ ಇವನು ಹಣದ ಆಸೆಗೆ ಒಬ್ಬ ಶ್ರೀಮಂತನ ಅಂಗವಿಕಲ ತಂಗಿಯನ್ನು ಮದುವೆಯಾಗುವುದಾಗಿ ಮಾತು ಕೊಡುತ್ತಾನೆ. ಆದರೆ ಇದೇ ಸಮಯದಲ್ಲಿ ಅಮೇರಿಕಾದ ಶ್ರೀಮಂತ ಹುಡುಗಿಯಿಂದ ಇವನ ಮದುವೆಗೆ ಪ್ರೊಪೋಸಲ್ ಬರುತ್ತದೆ. ಇಲ್ಲಿನ ಮದುವೆ ಕ್ಯಾನ್ಸಲ್ ಮಾಡಿ ಅಮೇರಿಕಾಕ್ಕೆ ಹಾರುತ್ತಾನೆ. ಅಲ್ಲಿ ಹೋಗಿ ಅವಳನ್ನ ಮದುವೆಯಾಗುವ ಅವನಿಗೆ ಶಾಕಿಂಗ್ ಸತ್ಯ ಗೊತ್ತಾಗುತ್ತದೆ. ಅವಳು ಶ್ರೀಮಂತಳಾದರೂ ಅವಳ ಒಂದು ಸಮಸ್ಯೆ ಇವನಿಗೆ ನಯಾಪೈಸೆ ದೊರಕದ ಹಾಗೇ ಮಾಡುತ್ತೆ. ಆ ಸಮಸ್ಯೆ ಏನು ? ಅದರಿಂದ ಅಧ್ಯಕ್ಷ ಹೇಗೆ ಹೊರಬರುತ್ತಾನೆ ಎಂಬುದು ಚಿತ್ರದ ಕಥೆ.

ಜೈಲಲಿತ ಸಿನಿಮಾದಲ್ಲಿ ನಟ ಶರಣ್ ಮಹಿಳೆಯ ಗೆಟಪ್ ನಲ್ಲಿ ಕಾಣಿಸಿಕೊಂಡಿದ್ದರು. ಮಲಯಾಳಂನ 'ಮಾಯಾ ಮೋಹಿನಿ' ಎಂಬ ಹಿಟ್ ಸಿನಿಮಾ ಸ್ಪೂರ್ತಿಯಿಂದ ಈ ಸಿನಿಮಾ ಮಾಡಲಾಗಿತ್ತು. ಕಾಮಿಡಿ ಜೊತೆಗೆ ಮಾನವ ಸಂಬಂಧಗಳ ಮಹತ್ವ ಸಾರುವ ಈ ಸಿನಿಮಾವನ್ನು ಪಿ ಕುಮಾರ್ ನಿರ್ದೇಶನ ಮಾಡಿದ್ದರು.  ಈ ಸಿನಿಮಾದಲ್ಲಿ ಹರೀಶ್ ರಾಜ್, ರವಿಶಂಕರ್, ಟಿ.ಎಸ್. ನಾಗಾಭರಣ, ದಿಶಾ ಪಾಂಡೆ, ಐಶ್ವರ್ಯ ದೇವನ್ ಸೇರಿದಂತೆ ಹಲವರ ತಾರಾಬಳಗವೇ ಸಿನಿಮಾದಲ್ಲಿತ್ತು.