ಪುರುಷ ಪ್ರಧಾನ ಸಿನಿಮಾರಂಗದಲ್ಲಿ ಸ್ಟಾರ್ ನಟರಷ್ಟೇ ಗಮನ ಸೆಳೆದ ನಟಿಯರಿವರು!

ನಟಿ ಜಯಂತಿ ಸಿನಿಮಾರಂಗದಲ್ಲಿ ನಾಯಕಿ ಪಾತ್ರಗಳಿದ್ದ ಕೆಲವು ಗಡಿಗಳನ್ನು ಮೀರಿದವರು. ಸ್ವಿಮ್ಮಿಂಗ್ ಸೂಟ್ ಧರಿಸುವುದಾಗಿರಬಹುದು, ವಿವಾಹೇತರ ಸಂಬಂಧಗಳನ್ನು ಹೊಂದಿಎ ಪಾತ್ರಗಳಲ್ಲಿ ನಟಿಸುವುದಾಗಿರಬಹುದು ಆ ಕಾಲಕ್ಕೆ ಬೋಲ್ಡ್ ಪಾತ್ರಗಳನ್ನು ಆರಿಸಿಕೊಳ್ಳುವ ಮೂಲಕ ದಿಟ್ಟತನ ತೋರಿದವರು ಜಯಂತಿ.

ನಟಿ ಆರತಿ ಸಹ ರಂಗನಾಯಕಿ ಹಾಗೂ ನಾಗರಹಾವು ಸಿನಿಮಾಗಳಲ್ಲಿ ಬೋಲ್ಡ್ ಆದ ಪಾತ್ರಗಳನ್ನು ಆರಿಸಿಕೊಂಡು ನಟಿಸಿದವರು.

ಜಯಂತಿ, ಆರತಿ, ಕಲ್ಪನಾ ಮಹಿಳೆಯರನ್ನು ಗೃಹಿಣಿಯಾಗಿ, ಸಹಿಷ್ಣುವಾಗಿ, ಅಬಲೆಯಾಗಿ ತೋರಿಸಿದ ಸಿನಿಮಾಗಳಲ್ಲಿ ನಟಿಸಿದ್ದಾರಾದರೂ ಶರಪಂಜರ, ಗೆಜ್ಜೆಪೂಜೆಯಂತಹ ಸಿನಿಮಾಗಳಲ್ಲಿಯೂ ನಟಿಸಿಕೊಂಡವರು ನಟಿ ಕಲ್ಪನಾ.

ಬರೀ ಪುರುಷರಿಗಷ್ಟೇ ಸೀಮಿತವಾಗಿದ್ದ ಫೈಟ್, ಮಾಸ್ ಡೈಲಾಗ್‌, ರಗಡ್ ಕುಣಿತಗಳನ್ನು ಮಹಿಳೆಯರೂ ಕೂಡ ಮಾಡಬಲ್ಲರು ಅಂತ ತೋರಿಸಿಕೊಟ್ಟವರು ಕನಸಿನ ರಾಣಿ ಮಾಲಾಶ್ರೀ. ಆಕ್ಷನ್ ಸಿನಿಮಾಗಳ ಮೂಲಕ ಎಲ್ಲಾ ವರ್ಗದ ಅಭಿಮಾನಿಗಳನ್ನು ಸಂಪಾದಿಸಿದ್ದರು.

ಕನ್ನಡ ಚಿತ್ರರಂಗ ಕಂಡ ದಿಟ್ಟ ಹಾಗೂ ಪ್ರತಿಭಾವಂತ ನಟಿ ಉಮಾಶ್ರೀ. ಮಾಲಾಶ್ರೀ, ಶ್ರುತಿ ಅವರುಗಳಂತೆ ನಾಯಕಿಯಾಗಿ ನಟಿಸುವ ಅವಕಾಶ ಸಿಗಲಿಲ್ಲವಾದರೂ ನಟಿಸಿದ ಹಲವು ಸಿನಿಮಾಗಳಲ್ಲಿ ನಾಯಕನಿಗೂ ಮೀರಿ ಗುರುತು ಪಡೆದುಕೊಂಡಿದ್ದಾರೆ. ಪುಟ್ನಂಜ, ತಾಯವ್ವ, ಕೋತಿಗಳು ಸಾರ್ ಕೋತಿಗಳು, ಗುಲಾಬಿ ಟಾಕೀಸ್, ಕನಸೆಂಬ ಕುದುರೆಯೇರಿ ಹಾಗೂ ಇತ್ತೀಚಿಗಿನ ರತ್ನನ್ ಪ್ರಪಂಚ ಚಿತ್ರಗಳಲ್ಲಿ ಅವರ ನಟನೆ ಅದ್ಭುತ.

ನಟಿ ಶ್ರುತಿ ಮಹಿಳಾ ಪ್ರಧಾನ ಸಿನಿಮಾಗಳಲ್ಲಿ ನಟಿಸಿದರಾದರೂ ಅವರ ಬಹುತೇಕ ಸಿನಿಮಾಗಳಲ್ಲಿ ನಾಯಕಿಯು ಅಬಲೆಯಾಗಿ, ಸಹಿಷ್ಣುವಾಗಿ, ಅಳುಮುಂಜಿಯಾಗಿ ಕಾಣಿಸಿಕೊಂಡಿದ್ದೇ ಹೆಚ್ಚು. ಪ್ರತಿರೋಧದ ಮನಸ್ಥಿತಿಯ ನಾಯಕಿಯ ಪಾತ್ರಗಳಲ್ಲಿ ನಟಿಸಿದ್ದು ಕಡಿಮೆ. ಆದರೆ, ನಾಯಕ ಪ್ರಧಾನ ಸಿನಿಮಾಗಳ ನಡುವೆ ಶ್ರುತಿ ತಮ್ಮದೇ ಮಾದರಿಯ ಮಹಿಳಾ ಪ್ರಧಾನ ಸಿನಿಮಾಗಳ ಮೂಲಕ ಗಮನ ಸೆಳೆದಿದ್ದರು.

ಶ್ರುತಿ ಅವರ ಸಮಕಾಲೀನರಾದ ನಟಿ ತಾರಾ ಸಹ ತಮ್ಮ ಬಹುತೆಕ ಸಿನಿಮಾಗಳಲ್ಲಿ ಸಿದ್ಧ ಮಾದರಿಯ ನಾಯಕಿಯ ಪಾತ್ರಗಳಲ್ಲಿ ಕಾಣಿಸಿಕೊಂಡರಾದರೂ ಕಾನೂರು ಹೆಗ್ಗಡತಿ, ಮುನ್ನುಡಿ, ಮತದಾನ, ಹಸೀನಾ ರೀತಿಯ  ಸಿನಿಮಾಗಳಲ್ಲಿ ನಟಿಸಿ ಪ್ರಶಸ್ತಿಗಳನ್ನು ಬಾಚಿಕೊಂಡಿದ್ದಾರೆ.