ಇದ್ದಕ್ಕಿದ್ದಂತೆ ಸಿನಿಮಾರಂಗದಿಂದ ದೂರವಾದ ಈ ನಟಿಯರು ಈಗೇನ್ ಮಾಡ್ತಿದ್ದಾರೆ ಗೊತ್ತಾ?

ಕನ್ನಡ ಚಿತ್ರರಂಗದಲ್ಲಿ ದಾಖಲೆಗಳ ಮೇಲೆ ದಾಖಲೆ ಸೃಷ್ಟಿಸಿದ್ದ 'ಯಜಮಾನ' ಇಂದಿಗೂ ಸಾರ್ವಕಾಲಿಕ ಹಿಟ್. ಈ ಸಿನಿಮಾದಲ್ಲಿ ವಿಷ್ಣುವರ್ಧನ್ ಹಾಗೂ ನಟಿ ಅರ್ಚನಾ ಜೋಡಿಯಾಗಿ ಕಾಣಿಸಿಕೊಂಡಿದ್ದ 'ಓ ಮೈನಾ ಓ ಮೈನಾ' ಹಾಡು ಇಂದಿಗೂ ಹಲವರ ಫೆವರಿಟ್. ಶಿವಣ್ಣನ ಆದಿತ್ಯ ಸಿನಿಮಾ ಮೂಲಕ ಸಿನಿಮಾರಂಗಕ್ಕೆ ಎಂಟ್ರಿಕೊಟ್ಟಿದ್ದ ನಟಿ ಅರ್ಚನಾ, ನಂತರ ಹೃದಯ ನಿನಗಾಗಿ, ಮಾವ ಮಾವ ಮದುವೆ ಮಾಡು, ನೀಲಾಂಬರಿ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ್ದರು. ಆದರೆ, ಮದುವೆ ಬಳಿಕ ಇದ್ದಕ್ಕಿದ್ದಂತೆ ನಟನೆಯಿಂದ ದೂರ ಉಳಿದರು.

ಮಾಡೆಲಿಂಗ್ ಕ್ಷೇತ್ರದಿಂದ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ರೇಖಾ ವೇದವ್ಯಾಸ್, ಹುಚ್ಚ, ಚಿತ್ರ, ತುಂಟಾಟ, ಮೋನಾಲಿಸಾ, ಬಾಸ್, ಹುಡುಗಾಟ, ಚೆಲ್ಲಾಟ, ಪರಿಚಯ ಹೀಗೆ ಹಲವು ಸಿನಿಮಾಗಳ ಮೂಲಕ ಕನ್ನಡಿಗರ ಹೃದಯ ಗೆದ್ದಿದ್ದರು.  ತಮಿಳು ಹಾಗೂ ತೆಲುಗು ಚಿತ್ರರಂಗದಲ್ಲಿಯೂ ಖ್ಯಾತಿ ಗಳಿಸಿದ್ದ ಇವರು, 2014ರಿಂದ ಚಿತ್ರರಂಗದಿಂದ ಅಂತರ ಕಾಯ್ದುಕೊಂಡರು. ಕಳೆದ ವರ್ಷ ತೆಲುಗು ಕಾರ್ಯಕ್ರಮವೊಂದರಲ್ಲಿ ಕಾಣಿಸಿಕೊಂಡಿದ್ದ ಅವರು, ತಮಗೆ ಆರೋಗ್ಯ ಸಮಸ್ಯೆ ಇರುವುದಾಗಿ ಹೇಳಿಕೊಂಡಿದ್ದರು. ರೇಖಾ ಇದುವರೆಗೂ ಮದುವೆಯಾಗಿಲ್ಲ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಸಾರಥಿ ಮೂಲಕ ಬೆಳ್ಳಿತೆರೆಗೆ ಕಾಲಿಟ್ಟ ದೀಪಾ ಸನ್ನಿಧಿ, ಸೂಪರ್ ಸಕ್ಸಸ್ ಕಂಡರು. ನಂತರ ಅದೇ ವರ್ಷ ಪುನೀತ್ ರಾಜ್‌ಕುಮಾರ್ ಜೊತೆಗೆ ಪರಮಾತ್ಮ ಚಿತ್ರದಲ್ಲಿ ನಟಿಸಿದರು. ಇದಾದ ಬಳಿಕ ಯಶ್, ಗಣೇಶ್ ರೀತಿಯ ಸ್ಟಾರ್ ನಟರ ಜೊತೆ ನಟಿಸಿದ ದೀಪಾ ಸನ್ನಿಧಿ ತಮಿಳಿನ ಎರಡು ಚಿತ್ರಗಳಲ್ಲಿಯೂ ಸಹ ನಟಿಸಿದರು. ನಂತರ ಚೌಕ ಹಾಗೂ ಚಕ್ರವರ್ತಿ ಚಿತ್ರಗಳಲ್ಲಿ ಬಣ್ಣ ಹಚ್ಚಿದ ನಟಿ ಈ ನಟಿ, ಸದ್ಯ ಯಾವುದೇ ಚಿತ್ರದಲ್ಲೂ ಬಣ್ಣಹಚ್ಚಿಲ್ಲ. ಅವಕಾಶಗಳ ಕೊರೆತೆಯಿಂದ ಈ ನಟಿ ಸಿನಿಮಾದಿಂದ ದೂರ ಉಳಿದಿದ್ದಾರೆ ಎನ್ನಲಾಗಿದೆ.

ನಟಿ ಡೈಸಿ ಬೋಪಣ್ಣ ಅವರು ಗಾಳಿಪಟ, ರಾಮ ಶ್ಯಾಮ ಭಾಮ, ಭಗವಾನ್, ತವರಿನ ಸಿರಿ, ಐಶ್ವರ್ಯ, ಸತ್ಯವಾನ್ ಸೇರಿದಂತೆ ಅನೇಕ ಸಿನಿಮಾಗಳ ಮೂಲಕ ಕನ್ನಡಿಗರ ಮನಗೆದ್ದಿದ್ದರು. ಕೇವಲ ಕನ್ನಡ ಮಾತ್ರವಲ್ಲದೇ, ಆ ಕಾಲದಲ್ಲಿಯೇ ಹಿಂದಿಯಲ್ಲಿ ಕೂಡ ಅದೃಷ್ಟ ಪರೀಕ್ಷೆ ಮಾಡಿಕೊಂಡು, ಅಕ್ಷಯ್ ಕುಮಾರ್ ಜೊತೆ ಗರಂ ಮಸಾಲಾ ಸಿನಿಮಾದಲ್ಲಿ ನಟಿಸಿದ್ದರು. ಆಗತಾನೇ ಸಿನಿಮಾದಲ್ಲಿ ಯಶಸ್ಸು ಗಳಿಸುತ್ತಿದ್ದ ಡೈಸಿ ಬೋಪಣ್ಣ, 2011ರಲ್ಲಿ  ಅಮಿತ್ ಜಯು ಜೊತೆ ಸಪ್ತಪದಿ ತುಳಿದರು. ಆ ನಂತರ ಚಂದನವನದಿಂದ ದೂರವಾದರು. ಆದರೆ, ಇಂದಿಗೂ ಅವರ ಗ್ಲ್ಯಾಮರ್ ಕಡಿಮೆಯಾಗಿಲ್ಲ. ಆಗಾಗ ವಿಭಿನ್ನ ಫೋಟೋಶೂಟ್ ಮೂಲಕ ಅಭಿಮಾನಿಗಳ ಗಮನ ಸೆಳೆಯುವ ಈ ನಟಿ, ಇನ್‌ಸ್ಟಾಗ್ರಾಮ್‌ನಲ್ಲಿ ಸಿಕ್ಕಾಪಟ್ಟೆ ಆಕ್ಟೀವ್ ಆಗಿದ್ದಾರೆ.

ರಿಯಲ್ ಸ್ಟಾರ್ ನಟನೆಯ 'ಉಪೇಂದ್ರ' ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್ ಪ್ರವೇಶಿಸಿದ ನಟಿ ದಾಮಿನಿ, ಮೊದಲ ಸಿನಿಮಾದಲ್ಲಿಯೇ ಅಭೂತಪೂರ್ವ ಯಶಸ್ಸು ಗಳಿಸಿದರು. ಆನಂತರ ಸುರ, ಸ್ವತಂತ್ರ ಪಾಳ್ಯ ಸೇರಿದಂತೆ ಕೆಲ ಸಿನಿಮಾಗಳಲ್ಲಿ ನಟಿಸಿದರಾದರೂ ಅವು ಅಷ್ಟಾಗಿ ಜನಪ್ರಿಯತೆ ತಂದುಕೊಡಲಿಲ್ಲ. ಕಾಲಕ್ರಮೇಣ ಅವರು ಅವಕಾಶಗಳಿಂದ ವಂಚಿತರಾದರು. ಹೀಗಾಗಿ ಸಿನಿಮಾಗಳಿಂದ ದೂರ ಉಳಿದರು.

ನಿಖಿತಾ ತುಕ್ರಾಲ್ ಬೆರಳೆಣಿಯಷ್ಟು ಕನ್ನಡ ಸಿನಿಮಾಗಳಲ್ಲಿ ನಟಿಸಿದರೂ ಸಿಕ್ಕಾಪಟ್ಟೆ ಕ್ರೇಜ್ ಸೃಷ್ಟಿಸಿಕೊಂಡಿದ್ದರು. ಸುದೀಪ್ ನಟನೆಯ ಮಹಾರಾಜ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್ ಪ್ರವೇಶಿಸಿದ್ದ ನಿಖಿತಾ, ಆನಂತರ ಯೋಧ, ಫ್ರಿನ್ಸ್, ವಂಶಿ, ದುಬೈ ಬಾಬು, ಮುಕುಂದ ಮುರಾರಿ, ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದರು. 2016ರಲ್ಲಿ ಗಗನ್ ದೀಪ್ ಸಿಂಗ್ ಅವರನ್ನು ಮದುವೆಯಾದ ನಿಖಿತಾ, ಸಿನಿಮಾಗೆ ಗುಡ್‌ಬೈ ಹೇಳಿದರು. ಸದ್ಯ ಅವರು ಪತಿ ಹಾಗೂ ಮಗಳೊಂದಿಗೆ ಮುಂಬೈನಲ್ಲಿ ನೆಲೆಸಿದ್ದಾರೆ.