ಸೌಂದರ್ಯಳಂಥ ಪಾತ್ರದತ್ತ ರಾಧಿಕಾ ಶ್ರವಂತ್ ಚಿತ್ತ

ಹಲವು ಧಾರಾವಾಹಿಗಳಲ್ಲಿ ನಟನೆ

ಕಸ್ತೂರಿ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಎರಡು ಕನಸು' ಧಾರಾವಾಹಿಯ ಮೂಲಕ ಕಿರುತೆರೆಗೆ ಕಾಲಿಟ್ಟ ರಾಧಿಕಾ ಮಿಂಚು ಮತ್ತೆ ಹಿಂತಿರುಗಿ ನೋಡಿದ್ದೇ ಇಲ್ಲ!
ಮುಂದೆ 'ಅಳಗುಳಿಮನೆ', 'ರಾಧಾ ಕಲ್ಯಾಣ', 'ಖುಷಿ ಕಣಜ', 'ಕಾದಂಬರಿ', 'ಮುಂಗಾರುಮಳೆ', 'ಪುಟ್ಮಲ್ಲಿ', 'ಆತ್ಮಬಂಧನ', 'ಅರಮನೆ ಗಿಳಿ' ಧಾರಾವಾಹಿಗಳಲ್ಲಿ ನಟಿಸಿರುವ ರಾಧಿಕಾ ಅವರಿಗೆ ಜನಪ್ರಿಯತೆ ತಂದು ಕೊಟ್ಟಿದ್ದು ಸೌಂದರ್ಯ ಪಾತ್ರ.

ಜನಪ್ರಿಯತೆ ನೀಡಿದ್ದು ಸೌಂದರ್ಯ ಪಾತ್ರ

'ಮಂಗಳ ಗೌರಿ' ಮದುವೆ ಧಾರಾವಾಹಿಯಲ್ಲಿ ಸೌಂದರ್ಯ ಆಗಿ ಅಭಿನಯಿಸಿದ್ದ ರಾಧಿಕಾಗೆ ಆ ಪಾತ್ರ ನೀಡಿದ ಜನಪ್ರಿಯತೆ ಅಷ್ಟಿಷ್ಟಲ್ಲ. ಮುಂದೆ ಕಾರಣಾಂತರಗಳಿಂದ ರಾಧಿಕಾ ಅವರು ಪಾತ್ರಕ್ಕೆ ವಿದಾಯ ಹೇಳಿದ್ದರೂ ಜನ ಇಂದಿಗೂ ಆಕೆಯನ್ನು ಗುರುತಿಸುವುದು ಸೌಂದರ್ಯ ಆಗಿ. ಅಷ್ಟರ ಮಟ್ಟಿಗೆ ಆ ಪಾತ್ರ ವೀಕ್ಷಕರ ಮನ ಸೆಳೆದುಬಿಟ್ಟಿತ್ತು. ಇದೀಗ ಮತ್ತೆ ನಟನೆಗೆ ಮರಳುವ ಬಯಕೆ ಹೊಂದಿದ್ದಾರೆ ರಾಧಿಕಾ ಶ್ರವಂತ್.

ಸೌಂದರ್ಯಳಂಥ ಪಾತ್ರ ಬೇಕು

ರಾಧಿಕಾ ಶ್ರವಂತ್ ಅವರಿಗೆ ಈಗಾಗಲೇ ಸಾಕಷ್ಟು ಅವಕಾಶಗಳು ಅರಸಿ ಬರುತ್ತಿದೆ. ಆದರೆ ಮತ್ತೊಮ್ಮೆ ಸೌಂದರ್ಯಳಂತಹ ಪಾತ್ರಕ್ಕೆ ಜೀವ ತುಂಬಬೇಕು ಎಂಬುದು ರಾಧಿಕಾ ಅವರ ಮಹಾದಾಸೆ. ಹಾಗಾಗಿ ಅಂತಹುದೇ ಪಾತ್ರಕ್ಕಾಗಿ ಕಾಯುತ್ತಿದ್ದಾರೆ ರಾಧಿಕಾ. ಕೆಲ ಪಾತ್ರಗಳೇ ಹಾಗೆ. ಜನರ ಮನಸ್ಸಿನಲ್ಲಿ ಅಚ್ಚೊತ್ತಿಬಿಡುತ್ತದೆ. ನಟಿಸಿದ ಕಲಾವಿದರಿಗೂ ದೊಡ್ಡ ಮಟ್ಟದಲ್ಲಿ ಹೆಸರು ತಂದು ಕೊಡುತ್ತದೆ. ಅಂಥದ್ದೆ ಪಾತ್ರ ಮತ್ತೆ ಸಿಗುವುದು ಸುಲಭ ಅಲ್ಲ.