ಸೊನಾಲಿ ಪೋಗಟ್ ಕೊಲೆ ಪ್ರಕರಣ: ಲ್ಯಾಪ್‌ಟಾಪ್ ಮತ್ತು ಸಿಸಿಟಿವಿ ಫುಟೇಜ್ ಮಾಯ!

ಮಾದಕ ವಸ್ತು ನೀಡಿದ್ದ ಸಹಾಯಕರು

ಸೊನಾಲಿಗೆ ಅವರ ಸಹಾಯಕರು ಮಾದಕ ವಸ್ತು ಸೇರಿಸಿ ಕೊಟ್ಟಿದ್ದು ತನಿಖೆಯಿಂದ ಈಗಾಗಲೇ ಬಹಿರಂಗವಾಗಿದೆ. ಆದರೆ ಸೊನಾಲಿ ಸತತವಾಗಿ ಡ್ರಗ್ಸ್ ತೆಗೆದುಕೊಳ್ಳುತ್ತಿದ್ದರು ಎಂಬ ಅನುಮಾನವೂ ವ್ಯಕ್ತವಾಗಿದೆ. ಇದರ ಬೆನ್ನಲ್ಲೆ ಇದೀಗ ಸೊನಾಲಿ ಅವರ ಬಾಡಿಗಾರ್ಡ್‌ ಮಾಧ್ಯಮಗಳೊಟ್ಟಿಗೆ ಮಾತನಾಡಿದ್ದು, ಸೊನಾಲಿ ಎಂದೂ ಯಾವುದೇ ಮಾದರಿಯ ಡ್ರಗ್ಸ್ ಸೇವಿಸಿಲ್ಲ. ಆ ಅಭ್ಯಾಸ ಅವರಿಗೆ ಇರಲಿಲ್ಲ ಎಂದಿದ್ದಾರೆ.

ಐದು ವರ್ಷದಿಂದ ಕೆಲಸ ಮಾಡಿರುವ ಬಾಡಿಗಾರ್ಡ್

ಸೊನಾಲಿ ಪೋಗಟ್‌ರ ಬಾಡಿಗಾರ್ಡ್ ಮನ್ದೀಪ್ ಅನ್ನು ಹರ್ಯಾಣಾ ಪೊಲೀಸರೇ ನೇಮಿಸಿದ್ದು, ಸತತ ಐದು ವರ್ಷಗಳ ಕಾಲ ಸೊನಾಲಿ ಪೋಗಟ್‌ರ ಬಾಡಿಗಾರ್ಡ್‌ ಆಗಿ ಕೆಲಸ ಮಾಡಿದ್ದಾರೆ. ಮಾಧ್ಯಮಗಳ ಬಳಿ ಅವರೇ ಹೇಳಿರುವಂತೆ, ಸೊನಾಲಿ ನಿಧನ ಹೊಂದುವ ಎರಡು ದಿನದ ಹಿಂದೆ ಗುರುಗ್ರಾಮದ ಫ್ಲ್ಯಾಟ್‌ಗೆ ಬಂದಿದ್ದರು. ಜೊತೆಗೆ ಸುಧೀರ್ ಸಾಂಗ್ವಾನ್ ಸಹ ಇದ್ದರು. ಆದರೆ ಇನ್ನೊಬ್ಬ ಸಹಾಯಕ ಸುಧೀರ್ ಅಂದು ಇರಲಿಲ್ಲ. ನಾನು ಗೋವಾಕ್ಕೆ ಬರುವುದು ಬೇಡವೆಂದು ಸುಧೀರ್ ಸಾಂಗ್ವಾನ್ ನನಗೆ ಅಂದು ಹೇಳಿದ್ದ'' ಎಂದಿದ್ದಾರೆ.

ಲ್ಯಾಪ್‌ಟಾಪ್ ಜೊತೆ ನಾಪತ್ತೆಯಾದ ಕಂಪ್ಯೂಟರ್ ಆಪರೇಟರ್

ಸೊನಾಲಿಯ ಪಿಎ ಸುಧೀರ್ ಸಾಂಗ್ವಾನ್ ಕೆಲವು ದಿನಗಳ ಹಿಂದೆ ಕಂಪ್ಯೂಟರ್ ಆಪರೇಟರ್ ಶಿವ ಎಂಬಾತನನ್ನು ನೇಮಿಸಿಕೊಂಡಿದ್ದನಂತೆ. ಆತ, ಸೊನಾಲಿ ಪೋಗಟ್‌ರ ಹರ್ಯಾಣಾದ ಫಾರ್ಮ್ ಹೌಸ್‌ನಲ್ಲಿ ಕೆಲಸ ಮಾಡುತ್ತಿದ್ದ. ಆದರೆ ಸೊನಾಲಿ ಪೋಗಟ್ ನಿಧನವಾದ ದಿನದಿಂದ ಆತ ಸೊನಾಲಿ ಪೋಗಟ್‌ಗೆ ಸೇರಿದ ಲ್ಯಾಪ್‌ಟಾಪ್ ಹಾಗೂ ಕೆಲವು ಸಿಸಿಟಿವಿ ಫುಟೇಜ್‌ಗಳೊಂದಿಗೆ ಪರಾರಿಯಾಗಿದ್ದಾನೆ. ಆತನ ಹುಡುಕಾಟದಲ್ಲಿ ಪೊಲೀಸರು ನಿರತರಾಗಿದ್ದಾರೆ. ಲ್ಯಾಪ್‌ಟಾಪ್‌ನಲ್ಲಿ ಆಸ್ತಿಯ ಹಾಗೂ ಹಣಕಾಸಿನ ವ್ಯವಹಾರದ ಮಾಹಿತಿ ಇವೆಯೆಂದು ಹೇಳಲಾಗುತ್ತಿದೆ.

ಈವರೆಗೆ ತನಿಖೆಯಲ್ಲಿ ತಿಳಿದು ಬಂದಿದ್ದೇನು?

ಈವರೆಗೆ ತನಿಖೆಯಲ್ಲಿ ತಿಳಿದು ಬಂದಿರುವುದೆಂದರೆ, ಗೋವಾದ ಪಬ್‌ನಲ್ಲಿ ಪಾರ್ಟಿ ಮಾಡುವಾಗ ಸೊನಾಲಿಗೆ ಆಕೆಯ ಸಹಾಯಕರು ಡ್ರಗ್ಸ್ ನೀಡಿದ್ದಾರೆ. ಅದನ್ನು ಸೇವಿಸಿ ಆಕೆ ನಡೆಯಲಾರದ ಸ್ಥಿತಿ ತಲುಪಿದ್ದಾಳೆ. ಆಕೆಯನ್ನು ಹೋಟೆಲ್ ರೂಮ್‌ಗೆ ಕರೆದೊಯ್ದಿದ್ದಾರೆ. ಅಲ್ಲಿ ಆಕೆ ಕುಸಿದು ಬಿದ್ದಿದ್ದಾರೆ. ಮೊದಲಿಗೆ ಇವರೇ ಆಕೆಯ ಎದೆಗೆ ಹೊಡೆದು ಎಬ್ಬಿಸುವ ಯತ್ನ ಮಾಡಿ ವಿಫಲವಾಗಿ ಬಳಿಕ ಆಸ್ಪತ್ರೆಗೆ ಸೇರಿಸಿದ್ದಾರೆ ಅಲ್ಲಿ ಸೊನಾಲಿಯನ್ನು ಮೃತ ಎಂದು ವೈದ್ಯರು ಘೋಷಿಸಿದ್ದಾರೆ. ಸೊನಾಲಿ ಪೋಗಟ್‌ ಸಹೋದರರು, ಕುಟುಂಬದವರು ಸೊನಾಲಿ ಪೋಗಟ್‌ ಕೊಲೆ ಪ್ರಕರಣದ ತನಿಖೆಯನ್ನು ಸಿಬಿಐಗೆ ಒಪ್ಪಿಸಬೇಕೆಂದು ಒತ್ತಾಯಿಸಿದ್ದಾರೆ.