ದುಬಾರಿ ಬೆಲೆಯ ಟಿ-ಶರ್ಟ್ ಧರಿಸಿ ಟ್ರೋಲ್ ಆದ ಕರೀನಾ ಕಪೂರ್: ಬೆಲೆ ಎಷ್ಟೆಂದುಕೊಂಡಿರಿ?

ಭಾರಿ ದುಬಾರಿ ಟಿ-ಶರ್ಟ್ ಧರಿಸಿರುವ ಕರೀನಾ

ಟಿ-ಶರ್ಟ್‌ಗಳ ಬೆಲೆ ಎಷ್ಟು? 300-400 ಬಹಳ ಹೆಚ್ಚೆಂದರೆ 500-600 ಆದರೆ ಕರೀನಾ ಕಪೂರ್ ಧರಿಸಿರುವ ಟಿ-ಶರ್ಟ್‌ನ ಬೆಲೆ ಬರೋಬ್ಬರಿ 40,000 ರುಪಾಯಿ. ಅತ್ಯಂತ ಸರಳವಾಗಿ ಕಾಣುವ ಚಿತ್ರದಲ್ಲಿರುವ ಟಿ-ಶರ್ಟ್‌ಗೆ 40,000 ಕೊಟ್ಟಿರುವ ಕರೀನಾರ ದಡ್ಡತನವನ್ನು ನೆಟ್ಟಿಗರು ಆಡಿಕೊಂಡಿದ್ದಾರೆ. ದುಬಾರಿ ಟಿ-ಶರ್ಟ್ ಧರಿಸಿದ ಕರೀನಾ ಸಾಮಾಜಿಕ ಜಾಲತಾಣದಲ್ಲಿ ಸರಿಯಾಗಿ ಟ್ರೋಲ್ ಆಗಿದ್ದಾರೆ.

ಯಾವ ಬ್ರ್ಯಾಂಡ್‌ನ ಟಿ-ಶರ್ಟ್ ಇದು?

ಹಳದಿ ಬಣ್ಣದ ಗುಚ್ಚಿ ಟಿ-ಶರ್ಟ್ ತೊಟ್ಟು, ನೀಲಿ ಬಣ್ಣದ ಜೀನ್ಸ್ ಪ್ಯಾಂಟ್, ಫ್ಲ್ಯಾಟ್ ಶೂ ಹಾಗೂ ಕಪ್ಪು ಬಣ್ಣದ ಸನ್‌ಗ್ಲಾಸ್ ತೊಟ್ಟು ಕರೀನಾ ಕಪೂರ್ ಕಾಣಿಸಿಕೊಂಡಿದ್ದಾರೆ. ಕರೀನಾ ಕಪೂರ್ ಧರಿಸಿದ್ದ ಟಿ-ಶರ್ಟ್‌ ಅನ್ನು ಗುರಿ ಮಾಡಿಕೊಂಡು ವ್ಯಂಗ್ಯ ಮಾಡಿರುವ ನೆಟ್ಟಿಗರು. ನಮ್ಮಲ್ಲಿ ಇದೇ ಟಿ-ಶರ್ಟ್‌ 200 ರುಪಾಯಿಗೆ ಸಿಗುತ್ತದೆ ಎಂದು ಹಲವರು ಕರೀನಾರನ್ನು ಟ್ರೋಲ್ ಮಾಡಿದ್ದಾರೆ. ಸರಳವಾದ ಬಟ್ಟೆಗಳಿಗೂ ಇಷ್ಟೋಂದು ದುಬಾರಿ ಬೆಲೆ ನೀಡುವ ತೋರಿಕೆಯ ಬಗ್ಗೆಯೂ ಹಲವರು ಕಮೆಂಟ್ ಮಾಡಿದ್ದಾರೆ.

ದುಬಾರಿ ಉಡುಪುಗಳನ್ನು ಧರಿಸುವ ಕರೀನಾ

ಕರೀನಾ ಹೀಗೆ ದುಬಾರಿ ಟಿ-ಶರ್ಟ್‌ಗಳನ್ನು ಧರಿಸುತ್ತಿರುವುದು ಮೊದಲೇನಲ್ಲ. ಕೆಲವು ದಿನಗಳ ಹಿಂದೆ ಗುಚ್ಚಿ ಬ್ರ್ಯಾಂಡ್‌ನ ಬಿಳಿ ಬಣ್ಣದ ಟಿ-ಶರ್ಟ್ ಧರಿಸಿದ್ದರು. ಆ ಟಿ-ಶರ್ಟ್ ಸಹ ಸುಮಾರು 30,000-40,000 ಬೆಲೆಯದ್ದಾಗಿತ್ತು. ಟಿ-ಶರ್ಟ್‌ಗಳನ್ನು ಹೊರತುಪಡಿಸಿದರೆ, ಹಲವು ಫ್ಯಾಷನೆಬಲ್ ಉಡುಪುಗಳು ಸಹ ಕರೀನಾ ಬಳಿ ಇದ್ದು ಅವುಗಳ ಬೆಲೆ ಹಲವಾರು ಲಕ್ಷಗಳು. ಇನ್ನು ಆಭರಣಗಳಂತೂ ಕೋಟಿಗೂ ಹೆಚ್ಚು ಬೆಲೆಯವಿವೆ. ಸಾಮಾನ್ಯವಾಗಿ ವಿದೇಶಿ ಫ್ಯಾಷನ್ ಬ್ರ್ಯಾಂಡ್‌ನ ಉಡುಪುಗಳನ್ನೇ ಕರೀನಾ ಧರಿಸುತ್ತಾರೆ.

'ಲಾಲ್ ಸಿಂಗ್ ಛಡ್ಡಾ' ಮೇಲೆ ನಿರೀಕ್ಷೆ

ಸಿನಿಮಾ ವಿಷಯಕ್ಕೆ ಮರಳುವುದಾದರೆ ಕರೀನಾ ಕಪೂರ್ ನಟಿಸಿರುವ 'ಲಾಲ್ ಸಿಂಗ್ ಛಡ್ಡಾ' ಆಗಸ್ಟ್ ತಿಂಗಳಲ್ಲಿ ಬಿಡುಗಡೆ ಆಗಬೇಕಿದೆ. ಈ ಸಿನಿಮಾ ಬಗ್ಗೆ ಬಹುದೊಡ್ಡ ನಿರೀಕ್ಷೆಯನ್ನು ಬಾಲಿವುಡ್ ಇರಿಸಿಕೊಂಡಿದೆ. 'ವೀರ್ ದಿ ವೆಡ್ಡಿಂಗ್ 2', 'ತಕ್ತ್' ಸಿನಿಮಾಗಳಲ್ಲಿ ಕರೀನಾ ನಟಿಸಲಿದ್ದಾರೆ. 'ಸೀತಾ' ಸಿನಿಮಾಕ್ಕಾಗಿ ಕರೀನಾರನ್ನು ಕೇಳಲಾಗಿತ್ತು ಆದರೆ ಸಂಭಾವನೆ ಹೆಚ್ಚು ಕೇಳಿದ ಕಾರಣ ಕರೀನಾರನ್ನು ಕೈಬಿಡಲಾಯಿತು. ಸಲ್ಮಾನ್ ಖಾನ್‌ಗಾಗಿ 'ಭಜರಂಗಿ ಭಾಯಿಜಾನ್ 2' ಸಿನಿಮಾದ ಚಿತ್ರಕತೆ ರೆಡಿಯಾಗಿದ್ದು, ಆ ಸಿನಿಮಾದಲ್ಲಿಯೂ ಕರೀನಾ ನಾಯಕಿಯಾಗಿರಲಿದ್ದಾರೆ ಎನ್ನಲಾಗುತ್ತಿದೆ.