'ಲೈಗರ್' ಸೋಲು.. ಮತ್ತೆ ಬಾಲಿವುಡ್‌ಗೆ ಲಗ್ಗೆ ಇಟ್ಟ ಪುರಿ: ಭಾಯ್ಜಾನ್ ಜೊತೆ ಸಿನಿಮಾ?

ಸಲ್ಲುಗೆ ಪುರಿ ಆಕ್ಷನ್ ಕಟ್

ನಿರ್ದೇಶಕ ಪುರಿ ಜಗನ್ನಾಥ್‌ಗೆ ಬಾಲಿವುಡ್ ಹೊಸತಲ್ಲ. 18 ವರ್ಷಗಳ ಹಿಂದೆಯೇ ತೆಲುಗಿನ ಸೂಪರ್ ಹಿಟ್ 'ಬದ್ರಿ' ಚಿತ್ರವನ್ನು ಬಾಲಿವುಡ್‌ಗೆ ತೆಗೆದುಕೊಂಡು ಹೋಗಿದ್ದರು. 'ಬುದ್ದಾ ಹೋಗಾ ತೇರಾ ಬಾಪ್' ಚಿತ್ರದಲ್ಲಿ ಅಮಿತಾಬ್ ಬಚ್ಚನ್‌ಗೆ ಆಕ್ಷನ್ ಕಟ್ ಹೇಳಿದ್ದರು. ಇದೀಗ ಸಲ್ಮಾನ್ ನಟನೆಯ ಚಿತ್ರವನ್ನು ಪುರಿ ನಿರ್ದೇಶನ ಮಾಡುತ್ತಾರೆ ಎನ್ನಲಾಗ್ತಿದೆ.

'ಆಟೋ ಜಾನಿ' ಆಗ್ತಾರಾ ಸಲ್ಲು?

ಪುರಿ ಜಗನ್ನಾಥ್ 'ಆಟೋ ಜಾನಿ' ಅನ್ನುವ ಕಥೆಯನ್ನು ಬಹಳ ಹಿಂದೆಯೇ ಮಾಡಿಕೊಂಡಿದ್ದರು. ಚಿರಂಜೀವಿ ರೀಎಂಟ್ರಿಗೆ ಮಾಡಿದ್ದ ಕಥೆ ಅದು. ಆದರೆ ಆಗ ಅದನ್ನು ಚಿರು ಒಪ್ಪಿರಲಿಲ್ಲ. ಈಗ ಮೆಗಾಸ್ಟಾರ್ ಸಹಾಯದಿಂದಲೇ ಈ ಕಥೆಯನ್ನು ಸಲ್ಮಾನ್‌ ಖಾನ್‌ಗೆ ಪುರಿ ಹೇಳಿದ್ದಾರೆ ಎನ್ನಲಾಗ್ತಿದೆ. ಇತ್ತೀಚೆಗೆ ಚಿರು ಹಾಗೂ ಸಲ್ಲು 'ಗಾಡ್‌ಫಾದರ್' ಚಿತ್ರದಲ್ಲಿ ಒಟ್ಟಿಗೆ ನಟಿಸಿದ್ದರು. ಪುರಿ ಹೇಳಿದ ಕಥೆ ಸಲ್ಲುಗೂ ಇಷ್ಟ ಆಗಿದೆ ಎನ್ನುವ ಗುಸುಗುಸು ಶುರುವಾಗಿದೆ.

ಫೀನಿಕ್ಸ್‌ನಂತೆ ಎದ್ದು ಬರ್ತಾರಾ ಪುರಿ?

ಹಲವು ಸೂಪರ್ ಹಿಟ್ ಸಿನಿಮಾಗಳನ್ನು ಕೊಟ್ಟ ನಿರ್ದೇಶಕ ಪುರಿ ಜಗನ್ನಾಥ್. ಒಂದು ಸಿನಿಮಾ ಸೋತ ಮಾತ್ರಕ್ಕೆ ಅವರ ಕರಿಯರ್ ಮುಗಿಯುವುದಿಲ್ಲ. ಮತ್ತೆ ಪುರಿ ಫೀನಿಕ್ಸ್ ರೀತಿ ಎದ್ದು ಬರ್ತಾರೆ ಎಂದು ಅಭಿಮಾನಿಗಳು ಹೇಳುತ್ತಿದ್ದಾರೆ. ಇದೀಗ ಸಲ್ಲು ಕೂಡ ಪುರಿ ಜೊತೆ ಸಿನಿಮಾ ಮಾಡಲು ಉತ್ಸುಕರಾಗಿದ್ದಾರೆ ಎನ್ನುವ ಸುದ್ದಿ ಟಾಲಿವುಡ್‌ನಲ್ಲಿ ಸದ್ದು ಮಾಡ್ತಿದೆ.

ಕನ್ನಡದಲ್ಲೂ ಪುರಿ ಹವಾ

ಪುರಿ ಜಗನ್ನಾಥ್ ಕನ್ನಡ ಸಿನಿಮಾಗಳಿಗೂ ಆಕ್ಷನ್ ಕಟ್ ಹೇಳಿದ್ದಾರೆ. ದಶಕಗಳ ಹಿಂದೆಯೇ ಶಿವಣ್ಣ ನಟನೆಯ 'ಯುವರಾಜ', ಪುನೀತ್‌ ರಾಜ್‌ಕುಮಾರ್ ಹೀರೊ ಆಗಿ ಎಂಟ್ರಿ ಕೊಟ್ಟ 'ಅಪ್ಪು' ಚಿತ್ರಕ್ಕೆ ಪುರಿ ಸಾರಥ್ಯ ವಹಿಸಿಕೊಂಡಿದ್ದರು. ಇನ್ನು ಇಶಾನ್ ಹೀರೊ ಆಗಿ ನಟಿಸಿದ್ದ 'ರೋಗ್' ಚಿತ್ರಕ್ಕೂ ಆಕ್ಷನ್ ಕಟ್ ಹೇಳಿದ್ದರು. ಆದರೆ 'ಲೈಗರ್' ಸಿನಿಮಾ ದೊಡ್ಡ ಪೆಟ್ಟು ಕೊಟ್ಟುಬಿಟ್ಟಿದೆ. ಇದರಿಂದ ಹೇಗೆ ಎದ್ದು ಬರುತ್ತಾರೆ ಎನ್ನುವ ಕುತೂಹಲ ಅಭಿಮಾನಿಗಳಲ್ಲಿದೆ.